1 ಯೆಸು ಫರಿನ ಸಮುಂದರನಿ ದಂಡಿಕನ ಉಪದೆಶ ಕರತೊ ವ್ಹತ್ತೊ ಘನ್ನಾ ಜ಼ನಾ ತಿಕನ ಮಳಿನ ಆಯಲಕ್ಹು ತೆ ಸಮುಂದರಮಾ ರ‍್ಹಯಲ ಹಡಗಾಮಾ ಚ಼ಡಿನ ಬೈಟ್ಯೊ. 2 ತೆ ಕ್ಹಾರಾ ಮನಕ್ಹೊ ಸಮುಂದರನಿ ಬಾಜು಼ನಿ ಜ಼ಗಾಪರ ಹುಬ್ರಯಾತಾ ತೆಳಾಮಾ ತೆ ತ್ಯುನೊನೆ ತ್ಯುನಾ ಕ್ಹಾಮೊಜ಼ ತಿವ್ನಾಹುತಿ ಸಾಮ್ಯಲಿನ ಉಪದೆಶ ಕರ‍್ಯೊ. ತೆ ಉಪದೆಶ ಸು ಕದ್ಯೊ ಕದ್ಯಾಮ. 3 ಧ್ಯಾನ ದಿನ್ನ ಐಕೊ, ಬಿತ್ತಾಲೊ ಬಿತ್ತಾನೆ ತಿನಾ ಖೆತರಮಾ ಗಯೊ. 4 ತಿಮ್ಮ ತೆ ಬಿಯ್ಯಾ ಬಿತತಾಮಾ ದಕ್ಹಾ ಬಿಯ್ಯಾ ವಾಟಪರ ಪಡ್ಯಾ. ಪಕ್ಷಿಯೊ ಐನ ತೆ ಬಿಯ್ಯಾ ಖೈಪಾಡಿಯೊ. 5 ಬಿಜಾ಼ ದಕ್ಹಾ ಬಿಯ್ಯಾ ಮಾತಿ ಕಮ ರ‍್ಹಯಲ ದಗ್ಡಾವೊಪರ ಪಡ್ಯಾ. ವರಿ ಮಾತಿ ಕಮ ರ‍್ಹಯಲಕ್ಹು ತೆ ಭೆಗಿನ ಬೆಳದ್ಯಾ. 6 ವರಿ ತಡಕೊ ತಿವ್ನೊಪರ ಪಡ್ತಾಮಾ ಬೆಳದಾತಿ ಅಗ್ದುರಜ಼ ಕುಕ್ಹೈ ಗಯಾ. ಕಾಕದ್ಯಾಮ ತ್ಯುನಿಯೊ ಬೆರ ಘಟ್ಟ ನ್ಹೊತಿಯೊ. 7 ತೆ ಬಿಯ್ಯಾ ದಕ್ಹಾ ಬೆಳದ್ಯಾ ಕಾಟಾವೊನಿಯೊ ಕಂಠಿಯೊ ತ್ಯುನೊನೆ ಝಾಕಿಪಾಡ್ಯಾ ತೆ ಬಿಯ್ಯಾ ಫಲ ದಿದ್ಯಾನೈ. 8 ಹಜು಼ನ ದಕ್ಹಾ ಬಿಯ್ಯಾ ಚೊ಼ಕಿ ಜಿಮಿನ್ಪರ ಪಡ್ಯಾ ತೆ ಬೆಳದಿನ ಮುವತ್ತ ಯಕ್ಲಾ ಯಕ್ಕ ಕ್ಹಾಟ ಯಕ್ಲಾ ಕ್ಹೊ ಯಕಲಾ ಫಲದಿದ್ಯಾ.

9 ವರಿ ಯೆಸು ಇಮ್ಮ ಕದ್ಯೊ ಕಾನೊ ರ‍್ಹಯವಾಲಾ ಧ್ಯಾನ ದಿನ್ನ ಐಕಾದೆ ಕದ್ಯೊ.

10 ತೆಳಾಮಾ ಯೆಸು ಯಕ್ಲೊ ರ‍್ಹತಾಮಾ ತಿಕನ ರ‍್ಹಯಲ ಬಾರಾ ಶಿಷ್ಯಾವೊನಾ ಕ್ಹಾತೆ ಬಿಜಾ಼ ದಕ್ಹಾ ಜ಼ನಾ ತೆ ಸಾಮ್ಯನಾಹುತಿ ಹಮೊನೆ ತಿಳಸಿನ ದೆ ಕೈನ ಮಾಂಗಿಲಿದ್ಯಾ. 11 ಯೆಸು ತ್ಯುನೊನೆ ಕ್ಹುದಾನಿ ರಾಜ್ಯನು ಗುಟ್ಟ ತುಮ್ನೊನೆ ದಿದ್ಯೊಸ ; ಭಾರಲ್ಯಾವೊನೆ ಸಾಮ್ಯ ನಿಂಗತ ಕವಸ. 12 ತಿನಾಹುತಿ

ತ್ಯುನಾ ಡೊಳಾ ರ‍್ಹೈತಬಿ ದೆಕತಾ ನೈ.

ಕಾನೊ ರ‍್ಹೈನ ಐಕ್ಯಾತಬಿ ತ್ಯುನೆ ತಿಳದಿಲೆತಾನೈ

ತಿಮ್ಮ ದೆಕಿನ ಐಕಿನ ತಿಳದಿಲಿದ್ಯಾಮ. ತ್ಯುನೆ ಕ್ಹುದಾಕನ ಫರಿನ ಕರಲ ಪಾಪನೆ ಕೈಲಿನ ಮಾಫಿ ವ್ಹಂದಸ.

13 ತೆಳಾಮಾ ಯೆಸು ತ್ಯುನೊನೆ ಪುಚ್ಯೊ ತೆಜ಼ ವಾತ ತುಮೊನೆ ನೈ ಗ್ವತ್ತ ಥೈಯುಮ? ಬಿಜಿ಼ ಕೈ ವಾತ ತುಮೊನೆ ಕಿಮ್ಮ ಗ್ವತ್ತ ಥಾವಸ? 14 ತೆ ಬಿತ್ತಾಲೊ ಕ್ಹುದಾನಿಯೊ ವಾತೊ ಕವಾನಾ ಬಿಯ್ಯಾ ಬಿತ್ತಸ. 15 ದಕ್ಹಾ ಜ಼ನಾ ವಾಟಪರ ಪಡಲ ಬಿಯ್ಯಾ ನಿಂಗತ ರ‍್ಹವಸ ಕ್ಹುದಾನಿ ವಾತೊ ಐಕಲ ಬರೊಬ್ಬರ ಸೈತಾನ ಐನ ತ್ಯುನಾಮಾ ರ‍್ಹಯಲ ಕ್ಹುದಾನಿ ವಾತೊ ಕಾಳ್ಳಿನ ಗೈ ಪಡಸ. 16 ದಕ್ಹಾ ಜ಼ನಾ ದಗ್ಡಾಪರ ಪಡಲ ಬಿಯ್ಯಾ ನಿಂಗತ ರ‍್ಹವಸ. ತಿಮ್ಮ ತೆ ಮನಕ್ಹೊ ಕ್ಹುದಾನಿಯೊ ವಾತೊ ಐಕಲ ಬರೊಬ್ಬರ ಖುಶಿಕ್ಹು ರ‍್ಹವಸ. 17 ತಿವ್ನೊಮಾ ಬೆರ ಘಟ್ಟನೈ ರ‍್ಹಯಲಕ್ಹು ಇವ್ನೆ ದಕ್ಹಾ ಟೈಮಾ ರ‍್ಹೈನ ಪಾಚಾ಼ತಾ ಕ್ಹುದಾನಿಯೊ ವಾತೊನಾಹುತಿ ತ್ರಾಸ ಉರಸಾವಾನು ಐಯುಮ ಛೊಡಿಪಾಡಸ. 18 ಹಜು಼ನ ದಕ್ಹಾ ಜ಼ನಾ ಕಾಟಾನಿಯೊ ಕಂಟಿಯೊಮಾ ಪಡಲ ಬಿಯ್ಯಾ ನಿಂಗತ ರ‍್ಹವಸ. ಎ ಮನಕ್ಹೊ ಹವಾವೈ ಕ್ಹುದಾನಿಯೊ ವಾತೊ ಐಕಸ 19 ವರಿ ತ್ಯುನಿ ಜಿವ್ನಾನಾಹುತಿ ಚಿಂತಾ ಕರಸ, ದೊಕಡಾವೊಪರ ಆಸ, ವರಿ ಆಸ್ತಿನಿ ಆಸಮಾ ತೆ ಕ್ಹುದಾನಿಯೊ ವಾತೊನೆ ದಾಬಿಪಾಡಸ ತೆ ಫಲ ದೆತಾ ನೈ.

20 ವರಿ ದಕ್ಹಾ ಜ಼ನಾ ಕ್ಹುದಾನಿಯೊ ವಾತೊ ಐಕಿನ ಕೈದಿಲಿನ ಮುವತ್ತ ಯಕ್ಲಾ ಕ್ಹಾಟ ಯಕ್ಲಾ ಕ್ಹೊ ಯಕ್ಲಾ ಫಲದಿವಾಲಾ ಥಾವಸ. ಇವ್ನೆಜ಼ ಚೊ಼ಕಿ ಜಿಮಿನ್ಪರ ಪಡಲ ಬಿಯ್ಯಾ ನಿಂಗತ ರ‍್ಹವಸ.

21 ಯೆಸು ತ್ಯುನೊನೆ ಕದ್ಯೊ ದಿವ್ವೊ ಲೈನ ಹಂಡ್ಲಾನಾ ನೈತೊ ಪಲಂಗನಾ ಹೆಟಾ ಮುಕ್ಕೊಶಿ ಸು? ನೈ ಮ್ಹೆಲ್ತಾ, ಉಜಾಲು ಪಡಾನಾಹುತಿ ಉಪ್ಪರಲಿ ಜ಼ಗಾಜ಼ ಮ್ಹೆಲಸ್ತೊ. 22 ಸು ದಡಲ ರ‍್ಹವಸ ತಿನೆ ಕ್ಹಾರಾವೊನಾ ಕ್ಹಾಮೊ ಲಾವಸ ವರಿ ಸು ಝಾಕ್ಯಾಸ ತೆ ಖುಲ್ಲಾ ಥಾವಸ. 23 ಐಕಾನೆ ಕಾನೊ ರ‍್ಹಯಲವಾಲಾ ಐಕಾದೆ. ಎಬಿ ತ್ಯುನೊನೆ ಕದ್ಯೊ ಧ್ಯಾನ ದಿವೊ.

24 ತುಮೆ ಕಯಾ ಪದ್ದತಿಕ್ಹು ಬಿಜಾ಼ವೊನೊ ಫೈಸಲೊ ಕರೊಶಿ ತೆಜ಼ ಪದ್ದತಕ್ಹು ಕ್ಹುದಾ ತುಮಾರೊ ಫೈಸಲೊ ಕರಸ ವರಿಬಿ ತಿತ್ತಿಬಿ ಘನ್ನು ಥಾವಸ. 25 ಕುನ್ನ ಮಾರಾ ಉಪದೆಶನೆ ಕಾನ ದಿನ ಐಕಸ ತ್ಯುನೊನೆ ಬೆ ಅಕ್ಲು ಹೆಚ್ಕಿ ಗ್ವತ್ತ ಥಾವಸ ಕುನ್ನ ಕಾನ ದಿನ ನೈ ಐಕ್ತು ತ್ಯುನೊಕಂತು ರ‍್ಹಯಲಬಿ ಕಾಳ್ಳಿಪಾಡಸ.

26 ವರಿ ಯೆಸು ಕದ್ಯೊ, ಕ್ಹುದಾನೊ ರಾಜ್ಯ ಇನಾನಿಂಗತ ಛೆ ಯಕ್ಕ ಮನಕ್ಹ ಬಿಯ್ಯಾ ಜಿಮಿನಮಾ ಘಾಲಿನ. 27 ರಾತೆ ತೆ ಕ್ಹುರೈನ ಪಾಟೆ ಉಟ್ತಾಮಾ ತೆ ಬಿಯ್ಯೊ. ಮಡಿಕಿ ಫುಟಿನ ಬೆಳದಸ ವರಿಬಿ ತೆ ಬೆಳದಾನು ತಿನೆ ಗ್ವತ್ತ ನೈ ಥಾತು. 28 ಮಾತಿ ಝಾಡನೆ ಬೆಳದಾನಾಹುತಿ ವರಿ ಫಲ ದಿವಾನೆ ಸಹಾರೊ ಕರಸ. ಪೈಲಾ ಬಿಯ್ಯು ತೆ ಫುಟಸ ಪಾಚ಼ಲ್ತೊ ತೆ ಬುಟ್ಟು ಥಾವಸ ವರಿ ತಿನು ಪುರಾ ಬುಡ ಕಾಳೊ ಥೈ ಜಾ಼ವಸ. 29 ಕೆಳಾಮಾ ಬಿಯ್ಯೊ ಪಾಕಸ ತೆಳಾಮಾ ಮನಕ್ಹೊ ದಾತಡೆ ಕಾಟಸ ಕಾಕದ್ಯಾಮ ಕಾಟಾನೊ ಟೈಮ ಐ ಜಾ಼ವಸ.

30 ಹಜು಼ನ ತೆ ಕದಲ ಕ್ಹುದಾನಿ ಯಕ್ಕ ರಾಜ್ಯ ಕಿನೆ ಹೊಲ್ಸಿಯೆ? ವರಿ ಯೆಸು ಪುಚ್ಯೊ ಎ ತಿಳಸಾನೆ ಕಯು ಸಾಮ್ಯ ಉಪಯೊಗ ಕರಿಯೆ? 31 ತೆ ತಿಮ್ಮಶೆ ಯಕ್ಲೊ ಸಾಸವಿನೊ ಬಿಯ್ಯೊ ಲಿವಸ. ತೆ ದುನಿಯಾಮಾ ಕ್ಹಾರಾವೊತಿ ನ್ಹಾನೊ ರ‍್ಹವಸ ತೆ ಜಿಮಿನ್ಪರ ನ್ಹಾನು ಝಾಡಥಾವಸ. 32 ತೆ ಬಿತ್ತಲಪರ ತೆ ಬೆಳದಿನ ಕ್ಹಾರಾ ಭಾಜಿ ಪಾಲೊನಾ ಝಾಡೊತಿಬಿ ತೆ ಮ್ಹೊಟಾ-ಮ್ಹೊಟಾ ಠೊಂಗಿಯೊ ಛೊಡಿನ ಹಬಾಳಮಾ ಉಡಾನಿಯೊ ಪಕ್ಷಿಯೊ ತಿನಿಯೊ ಠೊಂಗಿಯೊನಿ ಛವ್ಲಿಮಾ ಮಾಚೊ಼ ಕರಲಿವಸ.

33 ಯೆಸು ತ್ಯುನೊನೆ ಇಮ್ಮ ಘನಿಯೊ ತರಾನಿಯೊ ವಾತೊಮಾ ಮನಕ್ಹೊ ತಿಳದಿಲಿವಾದೆ ಕೈನ ಕ್ಹುದಾನಿ ವಾತೊ ಕತೊತೊ. ಕಾನಿ ನೈಸೊ ಸುಜ಼ ತ್ಯುನೊನೆ ಕತೊ ನ್ಹೊತೊ ಕಾಕದ್ಯಾಮ ತ್ಯುನೆ ತಿಳದಿಲಿವಾದೆ ಕೈನ ಕತೊತೊ. 34 ಯೆಸು ಮನಕ್ಹೊನಾ ಕ್ಹಾತೆ ಬೊಲ್ತಾಮಾ ಸಾಮ್ಯಲಿನ ಕತೊತೊ. ತೆನೈತೊ ಯೆಸು ಯಕ್ಲೊ ರ‍್ಹತಾಮಾ ತಿನಾ ಶಿಷ್ಯಾವೊನೆ ಕ್ಹಾರು ಫೊಡಿನ ಕತೊತೊ.

35 ತೆ ದಿನ್ನೆ ಕ್ಹಾಂಜ಼ ಥಾತಾಮಾ ಯೆಸು ತಿನಾ ಶಿಷ್ಯಾವೊನೆ ಸಮುಂದರನಿ ಬಿಜಿ ದಂಡಿಯೆ ಗಯ್ಯೆ ಕದ್ಯೊ. 36 ತ್ಯುನೆ ಮನಕ್ಹೊನು ಗುಂಪ ಛೊಡಿನ ಗಯಾ ಶಿಷ್ಯಾ ಹಡಗಾಮಾ ಗಯಾ ಕಾಕದ್ಯಾಮ ತೆಳಾಮಾಜ಼ ಯೆಸು ತಿಮಾ ಬೈಟ್ಯೊತೊ ವರಿ ತಿನೆ ತ್ಯುನೆ ಬಲೈ ಲಿಂಗಯಾ ಬಿಜಾ಼ ಹಡಗಾಬಿ ತ್ಯಾ ವ್ಹತ್ತಾ. 37 ತ್ಯುನೆ ಜಾ಼ತಾಮಾ ಯಕಾಕಿಜ಼ ತುಫಾನನೊ ಝೊರ ವಾರೊ ಆತಾಮಾ ಧಡಕಿಯೊ ಉಟಿಯೊ ಹಡಾಗಾನೆ ಲಾಗಿನ ತಿಮಾ ಪಾನಿ ಭರಾಡುತು. 38 ಯೆಸು ಹಡಗಾಮಾ ಪಾಚೊ಼ ಮಟ್ಲು ಘಾಲ್ಲಿನ ಧಡ ನಿಂದರ ಕರಾಡೊತೊ. ತ್ಯುನೆ ಯೆಸುನೆ ಗುರು ಉಟ ಅಪೆ ಮರಿಗಿಯೆಸ? ತುನೆ ಚಿಂತಾ ನತ್ತಿ ಸು ಕೈನ ಪುಚ್ಯಾ.

39 ಯೆಸು ಉಟಿನ ತುಫಾನನೆ ಬರಬಡ್ಯೊ ವರಿ ಧಡಕಿಯೊನೆ ಗಪರ‍್ಹೆ ಶಾಂತ ಥಾ ಕೈನ ಕತಾಮಾ ತೆ ತುಫಾನ ಹುಬ್ರೈಪಡ್ಯು ಕ್ಹಾರು ಶಾಂತಥಯು.

40 ತೆಳಾಮಾ ಯೆಸು ತಿನಾ ಶಿಷ್ಯಾವೊನೆ ತುಮೆ ಕಾ ಇಮ್ಮ ಭುಚ್ಕೊ಼ಸಿ? ತುಮೊನೆ ಹಜು಼ನಬಿ ಬರೊಕ್ಹೊ ನತ್ತಿ ಸು ಕದ್ಯೊ?

41 ಶಿಷ್ಯಾ ಘನ್ನಾ ಭುಚ಼ಕಿನ ಆಂ ಮನಕ್ಹ ಕುನ್ನ ವ್ಹೈ? ವಾರೊಬಿ ವರಿ ಸಮುಂದರನಿಯೊ ಧಡಕಿಯೊಬಿ ಇನಿ ವಾತ ಐಕಸ್ತೊ ಕೈನ ತ್ಯುನೆ ಯಕೆಕ್ಲಾಜ಼ ಬೊಲ್ಲಿದ್ಯಾ.