Mateus 11

ಬರೊಕ್ಹೊ ನೈಸೊ ಗಾಮೊ

20 ಪಾಚ಼ಲ್ತೊ ಯೆಸು, ತೆ ಕಯಾ ಗಾಮೊಮಾ ಘನ್ನಾ ಅದ್ಭುತ ಕಾಮೊ ಕರ‍್ಯೊತೊತೊ ತೆ ಗಾಮೊನೆ ಇನ್ಕಾರ‍್ಯೊ. ಕಾಕದ್ಯಾಮ ತೆ ಗಾಮೊಮಾ ರ‍್ಹಯಲ ಮನಕ್ಹೊ ತ್ಯುನಿ ಜಿವನಾ ಬದಲಿ ಕರಿಲಿದ್ಯಾ ನೈ ವರಿ ಪಾಪ ಕರಾನು ಛೊಡ್ಯಾ ನೈ. 21 ಯೆಸು ಸು ಕದ್ಯೊ ಕದ್ಯಾಮ; "ಬೆತ್ಸಾಯಿವಾಲಾ, ತುಮಾರಿ ಗತಿ ಮಿ ಸು ಕೌ? ಬೆತ್ಸಾಯಿದ, ತಾರಿ ಗತಿ ಮಿ ಸು ಕೌ! ಮಿ ತುಮೊಮಾ ಘನ್ನಾ ಅದ್ಭುತ ಕಾಮೊ ಕರ‍್ಯೊ. ತೆಜ ಅದ್ಭುತ ಕಾಮೊ ತೊರ, ಸಿದೊನಮಾ ಕರಲ ರ‍್ಹವತ್ತೊ, ತ್ಯುನಾ ಮನಕ್ಹೊ ಘನ್ನಾ ಕಾಲ ಪೈಲಾಜ ತ್ಯುನಿ ಜಿವತ ಬದಲಿ ಕರಿಲೆತಾತಾ; ತ್ಯುನಾ ಪಾಪೊನಾ ಹುತಿ ಪಶ್ಚಾತಾಪ ಪಡಿನ ಕೊತ್ಳಾ ಭಾಂದಿಲೆತಾತಾ; ತ್ಯುನಾ ಅಂಗಪರ ರಾಕ ಘಾಲಿಲೆತಾತಾ. 22 ತೆನೈಸೊ ಫೈಸಲಾನಾ ದಿನ್ನಮಾ ತೊರ, ಸಿದೊನತಿಬಿ ತುಮಾರಿ ಸ್ಥಿತಿ ಘನ್ನಿ ಕಷ್ಟಮಾ ಮ್ಹೈ ಥಾವಸ ಕೈನ ಮಿ ತುಮೊನೆ ಕೌಸ. 23 ಕಪೆನೌರ್ಮಿ, ತು ಪರಲೊಕೆ ಜಾಶಿ ಕೈನ ವಿಚಾರ ಕರಶಿ ಸು? ನೈ! ತು ನರಕೆ ಜಾಶಿ. ಮಿ ತುಮೊಮಾ ಘನ್ನಾ ಅದ್ಭುತ ಕಾಮೊ ಕರ‍್ಯೊ. ಸೊದೊಮಮಾ ತೆ ಅದ್ಭುತ ಕಾಮೊ ಕರ‍ಲ ರ‍್ಹವತ್ತೊ ತೆ ಮನಕ್ಹೊ ಪಾಪ ಕರಾನು ಛೊಡಿಪಡತಾತಾ ವರಿ ಹಜು಼ನ ಲಕ್ಕಾ ತೆ ಗಾಮ ಉಗ್ರಲ ರ‍್ಹತುತು. 24 ತೆನೈಸೊ ಫೈಸಲಾನಾ ದಿನ್ನಮಾ ತಾರಿ ಪರಿಸ್ಥಿತಿ ಸೊದೊಮತಿಬಿ ಕೆಟ್ಟ ಸ್ಥಿತಿನೆ ಮ್ಹೈ ಥಾವಸ ಕೈನ ಮಿ ತುಮೊನೆ ಕೌಸ."