1 ಛೆ ದಿನ್ನ ಥಯಲ್ಪರ, ಯೆಸು ಪೆತ್ರಾನೆ ಯಾಕೊಬನೆ ತಿನೊ ನ್ಹಾನೊ ಭೈ ಯೊಹಾನನೆ ಕುನ್ನಜ಼ ನೈ ರ‍್ಹಯಲ ಉಚ಼್ಚಾ ಡೊಂಗರಪರ ಬಲೈಲಿನ ಗಯೊ. 2 ತ್ಯಾ ಯೆಸು ತ್ಯುನಾ ಕ್ಹಾಮೊ ರುಪಾಂತರ ಥಯೊ. ತಿನು ಮ್ಹೊಡು ಸುರ್ಯಾನಾ ನಿಂಗತ ಮಿಂಚಾ಼ಡುತು. ತಿನಾ ವಣ್ಣಾ ಉಜಾಲಾ ನಿಂಗತ ಧೊಳಾ ಥಯಾ. 3 ತೆಳಾಮಾ ಮೊಶೆಬಿ ಎಲಿಯಾಬಿ ತಿನಾ ಕ್ಹಾತೆ ಬೊಲ್ತಾ ರ‍್ಹಯಲ ತ್ಯುನೊನೆ ದಿಕ್ಹ್ಯಾ.

4 ತೆಳಾಮಾ ಪೆತ್ರಾ ಯೆಸುನೆ, ಕರ್ತಾ, ಅಪೆ ನ್ಹ್ಯಾಜ಼ ರ‍್ಹವಾನು ಚೊ಼ಕು ವ್ಹೈ. ತು ಮನಸ ಕರ‍್ಯೊಮ, ನ್ಹ್ಯಾ ತನ್ನ ಝುಪ್ಡಾ ಭಾಂದುಸ. ತುನೆ ಯಕ್ಕ, ಮೊಶೆನೆ ಯಕ್ಕ, ಎಲಿಯಾನೆ ಯಕ್ಕ ಕದ್ಯೊ. 5 ತೆ ಹಜ಼ುನ ಬೊಲ್ತೊ ರ‍್ಹತಾಮಾಜ಼ ಉಜಾಲಾನು ಮ್ಹಾಡ ತ್ಯುನಾ ಉಪ್ಪರ ಐಯು. ತೆನೈಸೊ ತೆ ಮ್ಹಾಡಮಾತು ಎ ಮಾರೊ ಮಯಾನೊ ದಿಕ್ರೊ ವ್ಹೈ. ಇನೆ ಮಿ ಪಸಂದ ಕರ‍್ಯೊಸ. ಎ ಕವಾನು ಐಕೊ ಕೈನ ಅವಾಜ಼ ಅಯು. 6 ಶಿಶ್ಯಾ ಎ ಐಕಿನ ಘನ್ನಾ ಘಾಬ್ರಾ ಥೈನ ಉಂದಾ ಪಡ್ಯಾ. 7 ತೆಳಾಮಾ ಯೆಸು ತ್ಯುನೊಕನ ಐನ ತ್ಯುನೊನೆ ಮುಟ್ಟಿನ, ಉಟೊ ಭುಚ಼್ಕೊ ನಕೊ ಕದ್ಯೊ. 8 ತ್ಯುನೆ ಡೊಳಾ ಉಚೈನ ಉಪ್ಪರ ದೆಕ್ತಾಮಾ ಯೆಸುನೆ ಛೊಡಿನ ವರಿ ಕುನ್ನಜ಼ ದಿಕ್ಹ್ಯು ನೈ.

9 ತ್ಯುನೆ ತೆ ಡೊಂಗರ ಉತ್ರಿನ ಆತಾಮಾ ಯೆಸು ತ್ಯುನೊನೆ, ಆಂ ದರ್ಶನನಾಹುತಿ ಮನಕ್ಹನೊ ದಿಕ್ರೊ ಮರಿನ ಜಿವ್ತೊ ಥಯೆ ಲಕ್ಕಾ ಕಿನೆಜ಼ ಕೌ ನೈ ಕೈನ ಆಗನ್ಯಾ ದಿದ್ಯೊ. 10 ತೆಳಾಮಾ ತಿನಾ ಶಿಷ್ಯಾ, ಕ್ರಿಸ್ತ ಆವಾತಿ ಪೈಲಾ ಎಲಿಯಾ ಆವಸ ಕೈನ ಧರ್ಮೊಪದಶಕನಾಲಾ ಕವಾನು ಕಾ? ಕೈನ ಪುಚ್ಯಾ. 11 ತೆ ವಾತೆ ಯೆಸು, ಎಲಿಯ ಆವಾನೊ ಛೆ ಕೈನ ಕವಾನು ಕ್ಹರಿ ವ್ಹೈ. ಕ್ಹರಿಮಾಜ಼ ಎಲಿಯ ಐನ ಕ್ಹಾರು ಕರೆಟ್ಟ ಕರಸ. 12 ವರಿಬಿ ಮಿ ತುಮೊನೆ ಸು ಕೌಸ ಕದ್ಯಾಮ, ಎಲಿಯ ಹಮ್ನಾ ಆಯೊಸ. ವರಿಬಿ ತೆ ಕುನ್ನ ವ್ಹೈ ಕೈನ ಮನಕ್ಹೊನೆ ಗ್ವತ್ತ ಥಯು ನೈ. ಮನಕ್ಹೊ ತ್ಯುನಾ ಮನಸೆ ಆಯಲತಿಮ್ಮ ತಿನೆ ತರಾಸ ಕರ‍್ಯಾ. ತಿನಾನಿಂಗತಜ಼ ತ್ಯುನೆ ಮನಕ್ಹನಾ ದಿಕ್ರಾನೆ ತ್ರಾಸ ದಿವಸ ಕೈನ ಕದ್ಯೊ. 13 ಯೆಸು ಕವಾನು ಬಾಪ್ತಿಸ್ಮಾ ದಿಲಾವಾಲೊ ಯೊಹಾನನಾಹುತಿ ವ್ಹೈ ಕೈನ ಕವಾನು ಶಿಶ್ಯಾ ತಿಳದಿಲಿದ್ಯಾ.

14 ಯೆಸು ವರಿ ತಿನಾ ಶಿಷ್ಯಾ ವರಿಬಿ ಮನಕ್ಹೊಕನ ಗಯಾ. ಯಕ್ಲೊ ಯೆಸುಕನ ಐನ ತಿನಾ ಕ್ಹಾಮೊ ಉಂದೊ ಪಡಿನ, 15 "ಪ್ರಭು ಮಾರಾ ದಿಕ್ರಾನೆ ಮರಗ, ತೆ ಮಡ್ಡ ರೊಗಕ್ಹು ಘನ್ನೊ ತ್ರಾಸ ಖಾವಾಡೊಸ. ತೆ ಹಗಲೆಲ್ಲಾ ಆಗಮಾ ನೈತೊ ಪಾನಿಮಾ ಪಡಸ. 16 ಮಿ ಮಾರಾ ದಿಕ್ರಾನೆ ತಾರಾ ಶಿಷ್ಯಾವೊಕನ ಲಾಯೊ, ತೆನೈಸೊ ತ್ಯುನೆ ತಿನೆ ಅರಾಮ ಕರಾನೆ ಥಯು ನೈ ಕದ್ಯೊ. 17 ಯೆಸು, "ಅಯ್ಯೊ, ಬರೊಕ್ಹೊ ನೈಸೊ ಗ್ಯಾನ ನೈಸೊವಾಲಾವೊನಾ ಬಚ್ಚಾ಼ವೊ, ಹಜು಼ನ ಕೆಕ್ಲಾ ದಿನ್ನ ತುಮಾರಾ ಕ್ಹಾತೆ ರ‍್ಹೌ? ವರಿ ಕೆಕ್ಲಾ ದಿನ್ನ ತುಮೊನೆ ತಡ್ದಿಲ್ಯು? ತೆ ಪಟ್ಟಾನೆ ಮಕನ ಲಿನ ಆವೊ ಕೈನ ಕದ್ಯೊ. 18 ತೆ ಪಟ್ಟಾಮಾ ರ‍್ಹಯಲ ಭುತ್ಡಾನೆ ಯೆಸು ಭುಚ್ಕಾಡ್ತಾಮಾ ಭುತ್ಡು ತಿಮಾತು ಗೈ ಪಡ್ಯು. ತೆಳಾಮಾಜ಼ ತೆ ಪಟ್ಟಾನೆ ಅರಾಮ ಥಯು. 19 ತೆಳಾಮಾ ಶಿಷ್ಯಾ ಯೆಸು ಯಕ್ಲೊಜ಼಼ ರ‍್ಹತಾಮಾ ತಿಕನ ಐನ, ತೆ ಪಟ್ಟಾಮಾ ರ‍್ಹಯಲ ಭುತ್ಡಾನೆ ಛೊಡಾವಾನೆ ಹಮೆ ಕೊಶಿಶ ಕರ‍್ಯಾತಬಿ ಹಮಾರಾ ಹತೆ ಕಾ ಥಯು ನೈ ಕೈನ ಕದ್ಯಾ. 20 ತೆ ವಾತೆ ಯೆಸು ತುಮೊಮಾ ಬರೊಕ್ಹೊ ನೈ ರ‍್ಹಯಲ ತಿನೊ ಕಾರಣ ವ್ಹೈ. 21 ಮಿ ತುಮೊನೆ ಕ್ಹರಿಜ಼ ಕೌಸ. ತುಮಾರೊ ಬರೊಕ್ಹೊ ಸಾಸವಿ ಕಾಳ ಯಕ್ಲಿ ರ‍್ಹೈತಬಿ, ಆಂ ಡೊಂಗರನೆ ನ್ಯಾಂತೊ ತ್ಯಾ ಜಾ಼ ಕೈನ ತುಮೆ ಕದ್ಯಾತಬಿ ತೆ ಜಾ಼ವಸ. ತುಮಾರಾ ಹತೆ ನೈ ಥಾವಾನು ಕಾಮೊಜ಼ ರ‍್ಹತು ನೈ ಕೈನ ಕದ್ಯೊ.

22 ಯಕ್ಕಸಲಾ ಶಿಷ್ಯಾ ಗಲಿಲಾಯಾಮಾ ಮಳ್ಯಾ. ಯೆಸು ತಿನಾ ಶಿಷ್ಯಾವೊನೆ, "ಮನಕ್ಹನಾ ದಿಕ್ರಾನೆ ಮನಕ್ಹೊನಾ ಹತ್ಮಾ ದಿವಸ. 23 ತ್ಯುನೆ ತಿನೆ ಖಲಾಸ ಕರಸ. ವರಿಬಿ ತನ್ವಾ ದಿನ್ಮಾ ತೆ ಮರಲವಾಲಾವೊಮಾತೊ ಜಿವ್ತೊ ಥೈನ ಆವಸ" ಕೈನ ಕದ್ಯೊ.

24 ಯೆಸು ತಿನಾ ಶಿಷ್ಯಾ ಕಪೆನೌರ್ಮಿಯೆ ಗಯಾ. ದೆವಾಲಯನೆ ಯಹುದಿಯೊಕ್ಹು ಭು ಭಾಡೊ ವಸುಲಿ ಕರಾಲಾ ಪೆತ್ರಾಕನ ಐನ, ತುಮಾರಾ ಭೊದಕೊ ದೆವಾಲಯನಾ ಭು ಭಾಡೊ ದೆತಾ ನೈಸು ? ಕೈನ ಪುಚ್ಯಾ. 25 ತೆ ವಾತೆ ಪೆತ್ರಾ ಹೊ ದಿವಸ ಕೈನ ಕದ್ಯೊ. ಪಾಚಾ಼ತೊ ಪೆತ್ರಾ ಯೆಸು ರ‍್ಹಯಲ ಘರಮಾ ಗಯೊ. ತೆ ಎ ವಿಚಾರ ಕಾವತಿ ಪೈಲಾಜ಼ ಯೆಸು ತಿನೆ ಭುಲೊಕನಾ ರಾಜಾ಼ ಮನಕ್ಹೊಕಂತು ಘನ್ನಾ ತರಾನಾ ಭು ಭಾಡಾ ಮಾಂಗಿಲಿವಸ. ತೆನೈಸೊ ಭು ಭಾಡೊ ದಿವಾಲಾ ಮನಕ್ಹೊ ಕುನ್ನ ವ್ಹೈ? ರಾಜಾ಼ನಾ ದಿಕ್ರಾ ನೈತೊ ಬೆಜಾ಼ ಮನಕ್ಹೊ ವ್ಹೈಸು? ತಾರು ವಿಚಾರ ಸು ವ್ಹೈ? ಕೈನ ಪುಚ್ಯೊ. 26 ಪೆತ್ರಾ, "ಬಿಜಾ಼ ಮನಕ್ಹೊ ಭು ಭಾಡೊ ದಿವಸ ಕೈನ ಕದ್ಯೊ. ಯೆಸು ಪೆತ್ರಾನೆ, ತಿಮ್ಮ ರ‍್ಹಯುಮ ರಾಜಾ಼ನಾ ದಿಕ್ರಾ ಭು ಭಾಡೊ ದ್ಯುನೈ. 27 ವರಿಬಿ ಭು ಭಾಡೊ ಲಿವಾಲಾವೊನೆ ಅಪೆ ಕಾ ಶಿಟ್ಟ ಲಾವಾ ವರಕ್ಹು ಕರಿಯೆ? ತೆ ಭು ಭಾಡೊ ದೆ. ಸಮುದ್ರಮಾ ಗೈನ ಮಚ್ಲಿಯೊ ಧರ ತುನೆ ಮಳಲ ಪೈಲಾನಿ ಮಚ್ಲಿನು ಮ್ಹೊಡು ಖುಲ್ಲಾ ಕರ, ತಿನಾ ಮ್ಹೊಡಾಮಾ ಭು ಭಾಡಾನೆ ದಿವಾನೆ ಚಾ಼ಯೆ ಥಯಲ ಯಕ್ಕ ಬಿಲ್ಲೊ ದೆಕಶಿ. ತೆ ಲಿನ ಐನ ಭು ಭಾಡೊ ಲಿವಾಲಾನೆ ದೆ. ತಿನಾಹುತಿ ಮಾರೊ ವರಿ ತಾರೊ ಭು ಭಾಡೊ ದಿದಲ ನಿಂಗತ ಥಾವಸ ಕೈನ ಕದ್ಯೊ.