1 ತೆ ಥಯಲ್ಪರ ಯೆಸು ದೆವಾಲಯಮಾತೊ ಜಾ಼ತಾಮಾ ತಿನಾ ಶಿಷ್ಯಾ ದೆವಾಲಯನಾ ಕಟ್ಟಡೊ ದೆಕಾಡಾನಾಹುತಿ ತಿನಾ ನಜಿಕ ಆಯಾ. 2 ತೆಳಾಮಾ ಯೆಸು ತ್ಯುನೊನೆ ಎ ಮ್ಹೊಟಾ ಗೊಡಿಯೊ ದೆಕಾಡಾಸ ಸು? ಮಿ ತುಮೊನೆ ಕ್ಹರಿಮಾಜ಼ ಕೌಸ ನ್ಹ್ಯಾ ದಗ್ಡಾಪರ ದಗ್ಡೊ ಹುಬ್ರೆತೊ ನೈ, ಕ್ಹಾರುಜ಼ ಪಾಡಾಲಗಾಡಸ. 3 ಪಾಚಾ಼ತೊ ತೆ ತೆಲನಾ ಝಾಡೊನಾ ಡೊಂಗರಪರ ಬೈಟಲ ರ‍್ಹತಾಮಾ ತಿನಾ ಶಿಶ್ಯಾ ತಿಕನ ಐನ, ಎ ಕ್ಹಾರು ಕೆಳಾಮಾ ಥಾವಸ? ತು ಪ್ಹರಿನ ಆವಾನು ದುನಿಯಾ ಖಲಾಸ ಥಾವಾನೆ ವಳಕ ಸು ವ್ಹೈ?

4 ಯೆಸು ತ್ಯುನೊನೆ ಸು ಕದ್ಯೊ ಕದ್ಯಾಮ, ಕುನಬಿ ತುಮೊನೆ ಮೊಸ ಕರ‍್ಯಾವಾಚಿ ದೆಕಿಲಿವೊ. ಹುಶಾರ ರ‍್ಹವೊ. 5 ಕಾಕದ್ಯಾಮ ಮಾರಾ ನಾಮಪರ ಘನ್ನಾ ಜ಼ನಾ ಐನ ಮಿಜ಼ ಕ್ರಿಸ್ತ ವ್ಹೈ ಮಿಜ಼ ಕ್ರಿಸ್ತ ವ್ಹೈ ಕೈನ ಘನ್ನಾ ಜ಼ನಾವೊನೆ ಮೊಸ ಕರಸ. 6 ಅಕ್ಲುಜ಼ ನೈಸೊ ಯುದ್ದೊ ಥಾವಾನಿಯೊ ವಳಕ ಸುದ್ದಿಯೊ ತುಮೆ ಐಕೊಶಿ. ಕಳವಳಥಯಾವಾಚಿ ದೆಕಿಲಿವೊ, ಇಮ್ಮ ಥಾವಾನು ಜ಼ರುರತ್ತ ಛೆ. ವರಿಬಿ ತೆ ಅಂತ್ಯಕಾಲ ನ್ಹವೈ. 7 ಇಮ್ಮ ಥಾತಾಮಾ ಮನಕ್ಹೊನಾ ವಿರುದ್ದ ಮನಕ್ಹೊ, ರಾಜ್ಯನಾ ವಿರುದ್ದ ರಾಜ್ಯ ಉಟಸ; ವರಿ ತ್ಯಾ ತ್ಯಾ ಬರಗಾಲ, ತ್ಯಾ ತ್ಯಾ ಭುಕಂಪೊ ಥಾವಸ.

8 ಎ ಕ್ಹಾರು ತ್ರಾಸ ಥಾವಾನು ಚಾ಼ಲು ಥಾವಸ. 9 ತೆಳಾಮಾ ತುಮೊನೆ ತ್ರಾಸ ಕರಿನ ಖಲಾಸ ಕರಸ; ಮಾರಾಹುತಿ ತುಮೊನೆ ಕ್ಹಾರಾ ಮನಕ್ಹೊ ದ್ವೆಶಕರಸ. 10 ತೆಳಾಮಾ ಘನ್ನಾ ಜ಼ನಾ ಭುಚ಼ಕಿನ ಪಾಚಾ಼ ಸರಕಿನ ಯಕ್ಲಾನೆ ಯಕ್ಲೊ ಧರಿನ ದಿವಸ; ಯಕ್ಲಾಪರ ಯಕ್ಲೊ ದ್ವೆಶ ಕರಸ. 11 ಘನ್ನಾ ಸುಳ್ಳ ಪ್ರವಾದಿಯೊ ಉಟಿನ ಘನ್ನಾ ಮನಕ್ಹೊನೆ ಮೊಸ ಕರಸ. 12 ಅಕ್ಲುಜ಼ ನೈಸೊ ಅಧರ್ಮ ಜಾಸ್ತಿ ಥೈನ ಘನ್ನಾ ಮನಕ್ಹೊನಿ ಮಯಾಜ಼ ಥಂಡಿ ಥೈ ಜಾ಼ವಸ. 13 ವರಿಬಿ ಲಾಸ್ಟಲಕ್ಕಾ ತಡ್ದಿಲಿವಾಲೊ ರಕ್ಷಣೆ ಹೊಂದಿಲಿವಸ.

14 ಅಕ್ಲುಜ಼ ನೈಸೊ ಪರಲೊಕ ರಾಜ್ಯನಿ ಎ ಸುವಾರ್ತೆ ಕ್ಹಾರಿಜ಼ ದುನಿಯಾಮಾ ಕ್ಹಾರಾ ಮನಕ್ಹೊನೆ ಸಾಕ್ಷಿನಾಹುತಿ ಫೈಲಾವಸ; ತೆಳಾಮಾ ಅಂತ್ಯಕಾಲ ಆವಸ. 15 ಪ್ರವಾದಿ ದಾನಿಯಲ ಕದಲ ತಿಮ್ಮಜ಼ ಹಾಳ ಕರಾನು ಕೆಟ್ಟ ವಸ್ತು ಪವಿತ್ರ ಜ಼ಗಾಪರ ಹುಬ್ರಯಲ ತುಮೆ ದೆಕ್ತಾಮಾ 16 ಯುದಾಯಮಾ ರ‍್ಹಯಲವಾಲಾ ಕ್ಹಾರಾಜ಼ ಡೊಂಗರ್ಪರ ನ್ಹಾಟಿ ಜಾ಼ವಾದೆ;

17 ಮ್ಹಾಡಿಪರ ರ‍್ಹಯಲವಾಲೊ ತಿನಾ ಘರ್ಮಾ ರ‍್ಹಯಲ ಸುಜ಼ ಸಾಮನ ಲಿವಾನೆ ಜ಼ೌ ನೈ. 18 ಖೆತರ್ಮಾ ರ‍್ಹಯಲವಾಲೊ ತಿನಾ ವಚ್ಚಾ಼ನಾ ಲಿವಾನಾಹುತಿ ಜೌ಼ನೈ. 19 ತೆ ದಿನೊಮಾ ಪೆಟೆ ರ‍್ಹಯಲವಾಲಿಯೊನೆ, ಬಾಣತಿಯೊ ರ‍್ಹಯಲ ಹೆಣ್ಣ ಮನಕ್ಹೊ ಐಯ್ಯೊ. 20 ತುಮೊನೆ ಎ ಕ್ಹಾರು ಥಂಡನಾ ದಿನೊಮಾ ಸಬ್ಬತ ದಿನೊಮಾ ರ‍್ಹವಾದೆ ಥೌ ನೈ ಕೈನ ಪ್ರಾಥನಾ ಕರೊ. 21 ಕಾಕದ್ಯಾಮ ದುನಿಯಾ ಶುರುತಿಬಿ ಆಜ಼ಲಕ್ಕಾ ನೈ ಥಯಲ, ಇತ್ತಿ ಉಪ್ಪರ ನೈಸೊ ಥಾವಾನು ಮ್ಹೊಟೊ ತರಾಸ ತೆಳಾಮಾ ಥಾವಸ. 22 ಕರ್ತ ದಿನೊ ಕಮ್ಮ ನೈ ಕರ‍್ಯೊಮ ಯಕ್ಲೊಬಿ ಉಗರ್ತೊ ನೈ; ವರಿಬಿ ತೆ ಇನಿಲಿದಲವಾಲಾವೊನಾಹುತಿ ತೆ ದಿನೊ ಕಮ್ಮ ಕರಸ. 23 ತೆಳಾಮಾ ತೊಮೊನೆ ಕುನಬಿ ಕ್ರಿಸ್ತ ನ್ಹ್ಯಾ ಛೆ ಕ್ರಿಸ್ತ ನ್ಹ್ಯಾ ಛೆ ಕೈನ ಕದ್ಯಾಮ ತುಮೆ ನಂಬೊ ನಕೊ. 24 ಸುಳ್ಳ ಕ್ರಿಸ್ತೊ, ಸುಳ್ಳ ಪ್ರವಾದಿಯೊ ಉಟಿನ ಸಾಧ್ಯ ಥಯುಮ ಕ್ಹುದಾ ಇನಿಲಿದಲ ಮನಕ್ಹೊನೆಬಿ ಮೊಸ ಕರಾನಾಹುತಿ ಮ್ಹೊಟಾ ಸುಚಕ ಕಾಮೊ ಘಾಬ್ರಾ ಥಾವಾನಾ ಕಾಮೊ ಕರಿನ ದೆಕಾಡಸ. 25 ದೆಕೊ, ಮಿ ಪೈಲಾಜ಼ ಕವಾಡೊಸ.

26 ತಿನಾಹುತಿ ಕುನಬಿ ತುಮೊನೆ, ದೆಕೊ, ಕ್ರಿಸ್ತ ರಾನಮಾ ಛೆ ಕೈನ ಕದ್ಯಾಮ ತುಮೆ ರಾನ್ಮಾ ಗೈ ಪಡೊನಕೊ; ದೆಕೊ ಮ್ಹೈನಾ ಘರಮಾ ಛೆ ಕೈನ ಕದ್ಯಾಮ ಬರೊಕ್ಹೊ ಕರೊ ನಕೊ. 27 ಕಿಮ್ಮ ಬಿಜಲಿ ಪುರ್ವಮಾ ಹುಟ್ಟಿನ ಪಶ್ಚಿಮ ಲಕ್ಕಾ ಉಜಾಲು ದಿಕ್ಹಸ ತಿನಾ ನಿಂಗತಜ಼ ಮನಕ್ಹೊನೊ ದಿಕ್ರೊ ಆವಾನು ಥಾವಸ. 28 ಮುರ್ದೊ ಪಡಲ ಜ಼ಗಾ ಹದ್ದೊ ಮಳಸ. 29 ತೆ ತ್ರಾಸನಾ ದಿನೊ ಮುಗ್ದಲ್ಪರ ಸುರ್ಯೊ ಅಂದಾರು ಥಾವಸ, ಚ಼ಂದಪ್ಪಾ ಉಜಾಲು ದಿದ್ಯಾವಾಚಿ ರ‍್ಹವಸ, ಚಿಕ್ಕಿಯೊ ಹಬಾಳಮಾತಿಯೊ ಪಡಸ, ಹಬಾಳಮಾ ರ‍್ಹಯಲ ತಾಕತೊ ಹಲ್ಲಸ.

30 ತೆಳಾಮಾ ಮನಕ್ಹೊನೊ ದಿಕ್ರೊ ಕದಲ ವಳಕ ಹಬಾಳಮಾ ದಿಕ್ಹಿನ ಆವಸ. ತೆಳಾಮಾ ಭುಲೊಕ್ಪರ ರ‍್ಹಯಲ ಕ್ಹಾರಾ ಮನಕ್ಹೊ ಛಾತಿ ಬಡೈಲಿವಸ, ವರಿ ಮನಕ್ಹನೊ ದಿಕ್ರೊ ತಿನಿ ತಾಕತಕ್ಹು, ಘನ್ನಿ ಮಹಿಮಾಕ್ಹು ಹಬಾಳನಾ ಮ್ಹಾಡಪರ ಆವಾನು ದಿಕ್ಹಸ.

31 ತೆ ತಿನಾ ದುತೊನೆ ಪೊಂಗಾವೊನಿ ಮ್ಹೊಟಿ ಅವಾಜ಼ನಾ ಕ್ಹಾತೆ ಮೊಕ್ಲಸ. ತ್ಯುನೆ ತೆ ಇನಿಲಿದಲವಾಲಾವೊನೆ ಹಬಾಳನಾ ಯಕ್ಕ ಬಗಲ್ತೊ ಚಾ಼ರೆ ದಿಕ್ಕ ಲಕ್ಕಾ ಮಳಾವಸ. 32 ಅಂಜುರ್ನಾ ಝಾಡನಿ ದೃಷ್ಟಾಂತಕ್ಹು ಗ್ಯಾನ ಶಿಕ್ಕೊ. ತಿನಿಯೊ ಠೊಂಗಿಯೊ ಹಜು಼ನ ಕುಳಿಯೊ ರ‍್ಹತಾಮಾಜ಼ ಪಾಲೊ ಛೊಡ್ತಾಮಾ ತಡಕಾನೊ ದಿನ್ನ ನಜಿಕ ಆಯೊಸ ಕೈನ ತಿಳದಿಲಿವೊಸಿತೊ.

33 ತಿಮ್ಮಜ಼ ತುಮೆ ಎ ಕ್ಹಾರು ದೆಕ್ತಾಮಾ ತೆ ದಿನ್ನ ನಜಿಕ ಆಯೊಸ ಕೈನ ತಿಳ್ದಿಲಿವೊ. 34 ಎ ಕ್ಹಾರು ಥಯೆಲಕ್ಕಾ ಎ ಸಂತತಿ ನಾಶ ಥಾತಿಜ಼ ನೈ ಕೈನ ತುಮೊನೆ ಕ್ಹರಿಮಾಜ಼ ಕೌಸ. 35 ಜಿಮಿನ ಹಬಾಳ ನಾಶ ಥಾವಸ, ತೆನೈಸೊ ಮಾರಿ ವಾಕ್ಯ ಹಮೆಶಾಬಿ ರ‍್ಹವಸ.

36 ತೆನೈಸೊ ತೆ ದಿನೊ ವರಿ ತೆ ಟೈಮನಾಹುತಿ, ಮಾರಾ ಬಾನೆ ಯಕ್ಕಜ಼ ಗ್ವತ್ತ ಛೆ ಬಿಜಾ಼ ಕಿನೆಜ಼ ಗ್ವತ್ತ ನತ್ತಿ. ಪರಲೊಕಮಾ ರ‍್ಹಯಲ ದುತೊನೆಬಿ ಗ್ವತ್ತ ನತ್ತಿ, ದಿಕ್ರಾನೆಬಿ ಗ್ವತ್ತ ನತ್ತಿ. 37 ನೊಹಾನಾ ದಿನೊ ಕಿಮ್ಮ ವ್ಹತಾ ತಿನಾನಿಂಗತಜ಼ ಮನಕ್ಹನೊ ದಿಕ್ರೊ ಆವಾನಾ ಟೈಮಮಾ ರ‍್ಹವಸ. 38 ಕಿಮ್ಮ ಕದ್ಯಾಮ ಜಲಪ್ರಳಯತಿ ಪೈಲಾನಾ ದಿನೊಮಾ ನೊಹಾ ಹಡಗಮಾ ಗಯಲ ದಿನ್ನ ಲಕ್ಕಾ ಮನಕ್ಹೊ ಪಿತಾ ಖಾತಾ, ಹಿವಾ ಕರಿಲೆತಾ, ಹಿವಾ ಕರ್ತಾ ವ್ಹತಾ.

39 ಪ್ರಳಯನು ಪಾನಿ ಐನ ಕ್ಹಾರಾವೊನೆ ಕಿತ್ತೈ ಲಿನ ಜಾ಼ಯೆ ಲಕ್ಕಾ ತ್ಯುನೊನೆ ಸುಜ಼ ಗ್ವತ್ತ ನೈಸೊ ವ್ಹತಾತೊ. ತಿನಾನಿಂಗತಜ಼ ಮನಕ್ಹನೊ ದಿಕ್ರೊ ಆವಾನಾ ದಿನೊಮಾ ರ‍್ಹವಸ. 40 ತೆಳಾಮಾ ಬೆ ಜ಼ನಾ ಖೆತರ್ಮಾ ರ‍್ಹವಸ; ತ್ಯುನಾಮಾನಾ ಯಕ್ಲಾನೆ ಲಿವಸ, ಯಕ್ಲಾನೆ ಛೊಡಸ. 41 ಬೆ ಬಾಕ್ಡಿಯೊ ದಳಾನಾ ದಗ್ಡಾಕನ ಬೈಟಿನ ದಳತಿಯೊ ರ‍್ಹವಸ; ಯಕ್ಲಿನೆ ಲಿವಸ, ಯಕ್ಲಿನೆ ಛೊಡಿಪಾಡಸ. 42 ಇಮ್ಮ ರ‍್ಹತಾಮಾ ಕರ್ತಾ ಆವಾನೊ ದಿನ್ನ ನೈ ಗ್ವತ್ತ ರ‍್ಹಯಲಕ್ಹು ಹುಶಾರಮಾ ರ‍್ಹವೊ. 43 ಚ಼್ವಟ್ಟೊ ಕೆಳಾಮಾ ಆವಸ ಕವಾನು ಗ್ವತ್ತ ರ‍್ಹವತ್ತೊ ತೆ ತಿನಾ ಘರಮಾ ಚೊ಼ರಿ ಕರಾನೆ ಆವಾಲಾನೆ ಕೈತ್ತೊ ರ‍್ಹತೊತೊ ಕೈನ ತಿಳ್ದಿಲಿವೊ.

44 ತಿನಾಹುತಿ ತುಮೆಬಿ ತಯ್ಯಾರ ರ‍್ಹವೊ; ತುಮೆ ವಿಚಾರಬಿ ಕರಲ ರ‍್ಹತಾ ನೈ ತೆವಾ ಟೈಮಮಾ ಮನಕ್ಹೊನೊ ದಿಕ್ರೊ ಆವಸ. 45 ಕದ್ಯಾಮ ಮಾಲಕ ತಿನಾ ಘರವಾಲಾವೊನೆ ಟೈಮ ಟೈಮೆ ಅನ್ನ ದಿವಾನೆ ತೆ ಬರೊಕ್ಹಾವಾಲಾ ನಿಂಗತ, ಗ್ಯಾನಿ ಥಯಲ ಆಳ ಕುನ್ನ ವ್ಹೈ? 46 ಮಾಲಕ ಆವಾನಾ ವಕ್ಹತಮಾ ಕಯೊ ಆಳ ಇಮ್ಮ ಕರಾನು ದೆಕ್ಯೊಮ ತೆ ಆಳ ಧನ್ಯ ವ್ಹೈ. 47 ತೆವಾನೆ ತೆ ತಿನಿ ಕ್ಹಾರಿ ಆಸ್ತಿನೆ ಮ್ಯಾನೆಜರ ಕರಿನ ಮ್ಹೆಲಸ ಕೈನ ತುಮೊನೆ ಕ್ಹರಿಮಾಜ಼ ಕೌಸ. 48 ತೆನೈಸೊ ತೆ ಕೆಟ್ಟ ಆಳ, ಮಾರೊ ಮಾಲಕ ಆವಾನೆ ತಡಾ ಕರಸ, ಕೈನ ತಿನಾ ಮನಸ್ಮಾ ಕೈಲಿನ 49 ತಿನಾ ಆಳೊನೆ ಮಾರತೊ, ವರಿ ಪಿದೊಡಾವೊನಾ ಕ್ಹಾತೆ ಮಳಿನ ಪಿವಾನು ಶುರು ಕರ‍್ಯೊಮ, 50 ತೆ ವಿಚಾರ ನೈ ಕರಲ ದಿನೊಮಾ, ವಕ್ಹತ ಗ್ವತ್ತ ನೈ ರ‍್ಹಯಲ ತ ಟೈಮಮಾ ತೆ ಆಳನೊ ಮಾಲಕ ಐನ ತಿನೆ ಘನ್ನಿ ಮ್ಹೊಟಿ ಶಿಕ್ಷಾ ದಿನ 51 ಕಪಟಿಯೊನೆ ನೈಸೊ ಥಾವಾನಿ ಗತಿ ತಿನೆ ತೆ ಕರಸ. ತ್ಯಾ ರವಾನು ಕಟ್ಟ ಕಟ್ಟ ದಾತೊ ಖಾವಾನು ರ‍್ಹವಸ.