1 ಭಾಯೊ ಭೆನೊ, ಮಾರಾ ಸ್ವಂತ ಮನಕ್ಹೊ ರಕ್ಷಣೆ ಹೊಂದಿಲ್ಯು ಕೈನ ಮಾರಿ ಘನ್ನಿ ಮ್ಹೊಟಿ ಆಸ ಛೆ. ಮಿ ಕ್ಹುದಾಕನ ತಿನಾಹುತಿ ಪ್ರಾಥನಾ ಕರಾಡೊಸ. 2 ತ್ಯುನೊನೆ ಘನ್ನಿ ಕ್ಹುದಾಪರ ಭಕ್ತಿ ಛೆ ಮಿ ತಿನಾಹುತಿ ಸಾಕ್ಷಿ ದ್ಯುಸ. ಕ್ಹರಿಜ಼ ಕೌಸ ತಿನಾಹುತಿ ತ್ಯುನೆ ಭಕ್ತಿ ಕ್ಹರಿನಿ ಗ್ಯಾನಪರ ಆದಾರ ಥಯಾ ನತ್ತಿ. 3 ನಿತಿವಂತ ಕರಾನು ಕ್ಹುದಾನಿ ವಾಟ ತ್ಯುನೆ ನೈ ತಿಳದಿಲಿದಲಹುತಿ ತ್ಯುನಿ ಸ್ವಂತ ವಾಟನಾ ಮುಲಕ ತ್ಯುನೊನೆಜ಼ ನಿತಿವಂತೊ ಥೈನ ಕರಲಿವಾನೆ ಕೊಶಿಶ ಕರ‍್ಯಾ. 4 ತಿನಾಮಾ ಬರೊಕ್ಹೊ ಮ್ಹೆಲಾಲೊ ಹರಯಕ್ಲೊ ನಿತಿನೊ ಫೈಸಲೊ ಹೊಂದಿಲಿವಸ ಕೈನ ಕ್ರಿಸ್ತ ಧರಮಶಾಸ್ತ್ರ ಪುರಾ ಕರ‍್ಯೊ.
ಕ್ಹಾರಾ ಮನಕ್ಹೊನೆ ರಕ್ಷಣೆ
5 ಧರಮಶಾಸ್ತ್ರಕ್ಹು ಥಾವಾನಾ ನಿತಿನಾಹುತಿ "ಧರಮಶಾಸ್ತ್ರನೆ ಚಾ಼ಲಿಲಿನ ಜಾ಼ವಾನಾ ಮುಲಕ ಜ಼ಲಮ ಪಡ್ದಿಲ್ಯು ಕೈನ ಕವಾಲೊ, ಧರಮಶಾಸ್ತ್ರ ಕವಾನಾ ಕಾಮೊ ಕರುಜ಼" ಎ ಮೊಶೆ ಕದ್ಯೊಸ. 6 ತೆನೈಸೊ ಬರೊಕ್ಹಾನಾ ಮುಲಕ ನಿತಿನಾ ಫೈಸಲಾನೆ ಹೊಂದಿಲಿವಾನಾಹುತಿ (ಕ್ರಿಸ್ತನೆ ಹೆಟಾ ಬಲೈಲಿನ ಆತಾಮಾ) ಕುನ್ನ ಪರಲೊಕನೆ ನೈ ಜಾ಼ತೊ? ಕೈನ ರ‍್ಹವಾದೆ (ಕ್ರಿಸ್ತನೆ ಮರಲವಾಲಾವೊಮಾತೊ ಉಟಾಡಿನ ಲಾವಾಕ್ಹು) 7 "ಕುನ ಪಾತಾಳನೆ ನೈ ಜಾ಼ತು ಕೈನ ರ‍್ಹವಾದೆ ಕವೊ ನಕೊ" ಕೈನ ಪವಿತ್ರ ಗ್ರಂಥಮಾ ಕವಸ. 8 ಕ್ಹುದಾನಿ ವಾಕ್ಯಾ ತುಮಾರಿ ಕ್ಹಾಮಿಜ಼ ಛೆ; ತೆ ತಾರಾ ಮ್ಹೊಡಾಮಾ ತಾರಾ ಮನಸಮಾಬಿ ಛೆ ಕವಸ. ತೆ ವಾಕ್ಯಾ ಅಪೆ ಕವಾನು ಬರೊಕ್ಹಾನಿ ವಿಷಯಮಾನಿ ವಾಕ್ಯಾ ವ್ಹೈ. 9 ತೆ ಸುವೈ ಕದ್ಯಾಮ ತು ಯೆಸುನೆಜ಼ ಕರ್ತ ವ್ಹೈ ಕೈನ ಮ್ಹೊಡಾಕ್ಹು ಕೈನ ಕ್ಹುದಾ ತಿನೆ ಮರಲವಾಲಾವೊಮಾತೊ ಉಟಾಡ್ಯೊಸ ಕೈನ ಮನಸಕ್ಹು ಬರೊಕ್ಹೊ ಮುಕ್ಯಾಮ ತುನೆ ರಕ್ಷಣೆ ಥಾವಸ ಕೈನ ವ್ಹೈ. 10 ಮನಸಕ್ಹು ಬರೊಕ್ಹೊ ಕರ‍್ಯಾಮ ನಿತಿ ಮಳಸ. ಮ್ಹೊಡಾಕ್ಹು ಕದ್ಯಾಮ ರಕ್ಷಣೆ ಥಾವಸ. 11 ತಿನಾ ಉಪ್ಪರ ಬರೊಕ್ಹೊ ಮ್ಹೆಲಲವಾಲೊ ಕಯೊಬಿ ನಿರಾಶ ಥಾತೊ ನೈ ಕೈನ ಶಾಸ್ತ್ರ ಕವಸ್ತೊ. 12 ಆಂ ವಿಷಯಮಾ ಯೆಹುದಿವಾಲಾನೆಬಿ ವರಿ ಗ್ರಿಕವಾಲಾನೆಬಿ ಜಾಸ್ತ ಕಮ್ಮ ಸು ನತ್ತಿ. ಕ್ಹಾರಾವೊನೆಬಿ ಯಕ್ಲೊಜ಼ ಪ್ರಭು ವ್ಹೈ; ತೆ ತಿನು ನಾಮ ಕವಾಲಾವೊನೆ ಘನ್ನೊ ಆಶಿರ್ವಾದ ದಿವಸ. 13 ಅಮ್ಮ ಪವಿತ್ರ ಗ್ರಂಥ ಕದಲ ತಿಮ್ಮ ಕರ್ತನು ನಾಮ ಕವಾಲಾವೊನೆ ರಕ್ಷಣೆ ಮಳಸ ಕೈನ ಬರ್ದಲ ಛೆ.
14 ತೆನೈಸೊ ತುಮೆ ಕಿಪರ ಬರೊಕ್ಹೊ ನತ್ತಿ ಕರ‍್ಯಾ ತಿನು ನಾಮ ಕವಾನೆ ಕಿಮ್ಮ ಥಾವಸ? ತಿನಿ ವಾಕ್ಯಾ ನೈ ಐಕ್ಯಾಮ ತಿಪರ ಬರೊಕ್ಹೊ ಮುಕ್ಕಾನು ಕಿಮ್ಮ? ಕವಾಲೊ ನೈ ರ‍್ಹಯಾರೆ ಐಕಾನು ಕಿಮ್ಮ? ಕವಾಲಾನೆ ಕವಾನೆ ಮೊಕಲ್ಯಾ ಬಗರ ತೆ ಕವಸ ಕಿಮ್ಮ? 15 ಚೊ಼ಕಿ ಸುವಾರ್ತೆ ಕವಾಲಾವೊನಾ ಪಗೊ ಕೆಕ್ಲಾಕಿ ಚೊ಼ಕಾ ಶೆ ಕೈನ ಬರ್ದಲ ಛೆ. ತಿಮ್ಮ ರ‍್ಹಯುತಬಿ ಚೊ಼ಕಿಯೊ ವಾತೊ ಕ್ಹಾರಾ ಜ಼ನಾ ಐಕ್ತಾ ನೈ. 16 ಆಂ ವಿಷಯಮಾ ಯೆಶಾಯ- 17 ತಿಮ್ಮ ರ‍್ಹತಾಮಾ ಚೊ಼ಕಿ ಸುವಾರ್ತೆ ಐಕಾಕ್ಹು ಬರೊಕ್ಹೊ ಆವಸ. ವರಿ ವಾಕ್ಯಾ ಯೆಸುನಾಹುತಿ ತೆ ಸುವಾರ್ತೆ ಐಕಾಕ್ಹು ವರಿ ಕ್ರಿಸ್ತನಿ ವಾಕ್ಯಾ ಐಕಾಕ್ಹು ಸಂದೆಶ ಆವಸ.
18 ತಿಮ್ಮ ರ‍್ಹಯುತಬಿ ತ್ಯುನೊನೆ ಐಕು ಐಯು ನೈ ಕೈನ ಪುಚ್ಯೊ. ಐಕು ಆಯಲ ಕ್ಹರಿಜ಼ ವ್ಹೈ.
ಕವಾಲಾವೊನಿ ಆವಾಜ಼ ಜಿಮಿನ ಪುರಾ ಐಕೈಸ,
ತಿವ್ನಾ ವಾತೊ ಜಗತ್ನಾ ಲಾಸ್ಟಲಕಾಬಿ ಫೈಲ್ಯಾಸ.
19 ತೆನೈಸೊ ಇಸ್ರಾಯೆಲನಾ ಮನಕ್ಹೊ ತೆ ಸುವಾರ್ತೆ ತಿಳದಿಲಿದ್ಯಾ ನೈಸು ಕೈನ ವರಿ ಮಿ ಪುಚ್ಚು಼ಸ.
ಹೊ, ಆಂ ವಿಷಯಮಾ- ಮಾರಿ ಜನಾಂಗ ನೈ ರ‍್ಹಯಲವಾಲಾವೊಕ್ಹು
ತುಮೊಮಾ ಹೊಚ್ಚಿಗಿಟ್ಟಿ ಹುಟಸೌಸ;
ಗ್ಯಾನ ನೈಸೊವಾಲಾವೊಕ್ಹು
ತುಮೊನೆ ಶಿಟ್ಟ ಹುಟಸೌಸ ಕೈನ ಪೈಲಾಜ಼ ಮೊಶೆ ಕವಸ.
20 ತೆನೈಸೊ ಯೆಶಾಯ ಧೈರ್ಯಕ್ಹು ಬೊಲ್ಯೊ-
ಮನೆ ನೈ ಹುಡ್ಕಲವಾಲಾವೊನೆ ಮಳ್ಯೊ,
ಮಾರಿ ವಿಷಯಮಾ ವಿಚಾರ ಕರಲವಾಲಾವೊನಾ ಕ್ಹಾಮೊ ಆಯೊ ಕೈನ ಕದ್ಯೊ.
21 ತೆನೈಸೊ ಕ್ಹುದಾ ಅಮ್ಮ ಕವಸ ತೆ ಇಸ್ರಾಯೆಲವಾಲಾವೊನಾ ವಿಷಯಮಾ- ಮಾರಿ ವಾತನೆ ಅವಿಧೆಯ ಥೈನ ಫರಿನ ಬೊಲಲ ಮನಕ್ಹೊನೆ ಮಿ ದಿನ್ನ ಕ್ಹಾರಿ ಹತ್ತ ಕರಿನ ಬಲಾಯೊ ಕೈನ ಕವಸ.