1 ತಿಮ್ಮ ರ‍್ಹಯುಮ ಕ್ಹುದಾ ತಿನಾ ಮನಕ್ಹೊನೆ ನಕೊ ಕೈನ ಢಕ್ಲಿ ಪಾಡಸ ಸು ಕೈನ ಪುಚ್ಚು಼ಸ. ಕೆಳಾಮಾಬಿ ನೈ. ಮಿಬಿ ಇಸ್ರೆಲೊನೆ, ಅಬ್ರಹಾಮನಾ ಸಂತತಿನೆ, ಬೆನ್ಯಾಮಿಯ ಖಾಂದಾನವಾಲೊ ಥಯೊಸ್ತೊ. 2 ಕ್ಹುದಾ ತೆ ಅಗೊ ಥೈನ ತಿನಾ ಮನಕ್ಹೊ ಥಾವಾನೆ ಗ್ವತ್ತ ಕರಿಲಿದಲ ಮನಕ್ಹೊನೆ ಢಕ್ಲಿ ಪಾಡ್ಯೊ ನೈ. ಎಲೀಯಾನಿ ಜವ್ನಾನಾಹುತಿ ಪವಿತ್ರ ಗ್ರಂಥ ಕವಾನಿ ವಾತ ತುಮೊನೆ ಗ್ವತ್ತ ನೈ ಥಾತು ಸು? ತೆ ಕ್ಹುದಾನಾ ಕ್ಹಾಮೊ- 3 ಕರ್ತ "ತ್ಯುನೆ ತಾರಾ ಪ್ರವಾದಿಯೊನೆ ಖಲಾಸ ಕರ‍್ಯಾಸ, ತಾರಾ ಬಲಿ ದಿವಾನಿ ಜ಼ಗಾ ಪ್ಹೊಡಿ ಪಾಡ್ಯಾಸ, ಮಿ ಯಕ್ಲೊಜ಼ ಉಗರ್ಯೊಸ, ಹಮ್ನಾ ಮನಕ್ಹೊ ಮಾರು ಜ಼ಲಮ ಕಾಡು ಕೈನ ಕರ‍್ಯಾಸ" 4 ಕೈನ ಇಸ್ರೆಲೊನಾ ಉಪ್ಪರ ತಪ್ಪ ಕದಲಕ್ಹು ಕ್ಹುದಾನು ಜವಾಬ ಸು ವ್ಹೈ ಕದ್ಯಾಮ ಬಾಳನಿ ಮುರತಿನೆ ಆರಾಧನಾ ನೈ ಕರಲ ಕ್ಹಾತ ಹಜಾ಼ರ ದಾಣ್ಗಾವೊನೆ ಮಾರಾಹುತಿ ವಚಾ಼ಡಿಲಿದ್ಯೊಸ. 5 ತಿನಾನಿಂಗತ ಹಮ್ನಾನಾ ಕಾಲಮಾಬಿ ಕ್ಹುದಾನಿ ಕೃಪಾಕ್ಹು ಇನಿಲಿದಲವಾಲಾ ದಕ್ಹಾ ಜ಼ನಾ ಛೆ. 6 ಕ್ಹುದಾನಿ ಕೃಪಾಕ್ಹು ಇನಿಲಿದಲವಾಲೊ ಕದಲ್ಪರ ಪುಣ್ಯನಾ ಕಾಮೊನಾಹುತಿ ಇನಿಲಿದಲ ನ್ಹವೈ ತೆಕ್ಲುಜ಼; ತಿಮ್ಮ ನೈಸೊ ಪಕ್ಷನೆ ಕೃಪಾನೆ ಹಜು಼ನಬಿ ಕೃಪಾ ನೈ ಕವಾನೆ ಥಾತು

. 7 ಇನಾಕ್ಹು ತಿಳದಿಲಿವಾನು ಸುವೈ? ಇಸ್ರೆಲೊ ಹುಡ್ಕಲ ತ್ಯುನೊನೆ ಮಳ್ಯು ನೈ, ತ್ಯುನೊಮಾ ಇನಿಲಿದಲವಾಲಾವೊನೆ ಮಳ್ಯು. ಬಿಜಾ಼-ಜ಼ನಾ ಪಿಸಾಳಾ ಥಯಾ. 8 ಕ್ಹುದಾ ತ್ಯುನೊನೆ ವಜ್ಜು಼ ಕದ್ಯಾಮ ನೈ ದಿಕ್ಹಾನಾ ಡೊಳಾ ನೈ ಐಕಾನಾ ಕಾನೊ ದಿದ್ಯೊ; ಎ ವಜ್ಜು಼ ಆಜ಼ ಲಕ್ಕಾಬಿ ತಿಮ್ಮಜ಼ ಛೆ ಕೈನ ಬರ್ದಲ ತಿಮ್ಮ ತ್ಯುನೊನೆ ಥಯು. 9 ಎನೈಸೊ-

ತ್ಯುನು ಅನ್ನಜ಼ ತ್ಯುನೊನೆ

ಪಾಖೊ ಸುಜ಼ ಅಡು ಆಯೆ ನೈಸೊ ಶಿಕ್ಷಾ ಥಾವಾದೆ.

10 ತ್ಯುನಾ ಡೊಳಾ ಮಬ್ಬ ಥೈನ ದಿಖ್ಯಾವಾಚಿ ಥಾವಾದೆ;

ತ್ಯುನಿ ಕಂಬರೊ ಕೆಳಾಮಾಬಿ ಡುಗಾ ಥಾವಾ ವರಕ್ಹು ಕರ ಕೈನ ದಾವಿದ ಕವಸ.

11 ತಿಮ್ಮ ರ‍್ಹಯುಮ ತ್ಯುನೆ ಪಡಿನ ಜಾ಼ಯೆ ನಿಂಗತ ಪಡ್ಯಮ ಸುವೈ ಕೈನ ಪುಚ್ಚು಼ಸ. ತಿಮ್ಮ ಕೆಳಾಮಾಬಿ ಕೌ ನೈ. ತ್ಯುನೆ ಪಡಿಗಯಲಕ್ಹು ಕ್ರಿಸ್ತಕ್ಹು ಥಾವಾನಿ ರಕ್ಷಣೆ ಬಿಜಾ಼ ಮನಕ್ಹೊನೆ ಮಳಿ. ಇನಾಕ್ಹು ಕ್ಹುದಾ ತ್ಯುನಾಮಾ ಅಸೈ ಹುಟ್ಸಾವಸ. 12 ಯಹುದ್ಯೊನಾ ಅಪರಾದ ಜಗತ್ನೆ ಘನ್ನಾ ಆಶಿರ್ವಾದೊ ತ್ಯುನಾ ಸೊಲನೆ ಯಹುದಿಯೊ ನೈ ರ‍್ಹಯಲ ಮನಕ್ಹೊನೆ ಘನ್ನಾ ಆಶಿರ್ವಾದೊ ಆವಾನೆ ಕಾರಣ ಥಯು. ಕ್ಹುದಾನಿ ಚಿತ್ತನಾ ನಿಂಗತ ಯೆಹುದಿಯೊ ನೈಸೊವಾಲಾವೊನೆ ಬದಲಿ ಥಾತಾಮಾ ದುನಿಯಾ ವರಿ ಜಾಸ್ತಿ ಆಶಿರ್ವಾದೊ ವ್ಹಂದಾನು ಕ್ಹರಿ ವ್ಹೈ ನೈ?

13 ಹಮ್ನಾ ಮಿ ಯಹುದ್ಯೊ ನೈ ರ‍್ಹಯಲ ಮನಕ್ಹೊನಾ ಕ್ಹಾತೆ ಬೊಲಾಡೊಸ. ಮಿ ತ್ಯುನೊನೆ ಅಪೊಸ್ತಲ ಥಯೊಸ. ತಿನಾಹುತಿ ಮಿ ಆಂ ಕಾಮ ಮಾರಾ ಹತೆ ಥಯಲ ತೆಕ್ಲು ಚೊ಼ಕಿ ತರಾ ಕರುಸ. 14 ಮಿ ಮಾರಾ ಸ್ವಂತ ಮನಕ್ಹೊಮಾ ಅಸೈ ಕರಿನ ತ್ಯುನೊಮಾ ದಕ್ಹಾ ಜ಼಼ನಾತುಬಿ ರಕ್ಷಣೆ ಹೊಂದಿಲಿವಾ ವರಕ್ಹು ಕರುಸ ಕೈನ ಆಸ ಮನೆ ಛೆ. 15 ಯಹುದಿ ಮನಕ್ಹೊನೆ ಇನ್ಕಾರಲಕ್ಹು ದುನಿಯಾ ಕ್ಹುದಾನಾ ಕ್ಹಾತೆ ಸಂಧಾನ ಥಾವಾನೆ ಸಾದ್ಯ ಛೆ. ಕದ್ಯಾಮ ತ್ಯುನೆ ಮಳೈಲಿದಲಪರ ಹಜು಼ನ ಸು ಥಾಸ? ಮರಲವಾಲಾ ಜಿವ್ತಾ ಥೈನ ಉಟಿನ ಆಯಲ ನಿಂಗತ ಥಾವಸು ನೈ?

16 ರೊಕ್ಲಾನು ಪಸ್ಟಲ್ಯೊ ತುಕ್ಡೊ ಕ್ಹುದಾನೆ ಚ಼ಡಾಯಲ ಟೈಮಮಾ, ಪುರಾ ರೊಕ್ಲೊಜ಼ ಕ್ಹುದಾನೊ ಥಯೊ. ಝಾಡನಾ ಬೆರನೆಜ಼ ಕ್ಹುದಾನೆ ದಿದ್ಯಾಮ ಪುರಾ ಝಾಡಜ಼ ಕ್ಹುದಾನು ಥಯು. 17 ಎ, ಆಲಿವ ತೆಲನಾ ಝಾಡೊನಿಯೊ ಠೊಂಗಿಯೊ ತುಟಲ್ಪರ ರಾನ್ಮಾ ರ‍್ಹಯಲ ಆಲಿವ ಝಾಡನಿ ಯಕ್ಕ ಠೊಂಗಿ ಪೈಲಾ ರ‍್ಹಯಲ ಆಲಿವ ಝಾಡನೆ ಮಳಲ ನಿಂಗತ ಛೆ. ಯಹುದ್ಯೊ ನೈ ರ‍್ಹಯಲ ತುಮೆ ರಾನ್ಮಾ ರ‍್ಹಯಲ ಝಾಡನಿಯೊ ಠೊಂಗಿಯೊ ನಿಂಗತ ಛೆ. ತೆನೈಸೊ ಹಮ್ನಾ ತುಮೆ ಪೈಲಾನಾ ಝಾಡನಾ ತಾಕತನೆ ಜ಼ಲಮಮಾ ವಾಟೊ ಲಿವಾಲಾ ಥಯಾಸ. 18 ತಿನಾಹುತಿ ತುಟಿ ಗಯೆಲ ತೆ ಠೊಂಗಿಯೊನೆ ಇನ್ಕಾರೊ ನಕೊ. ತ್ಯುನೊನೆ ಇನ್ಕಾರಾನೆ ತುನೆ ಕಯುಜ಼ ಕಾರಣ ನತ್ತಿ. ಕಾಕದ್ಯಾಮ ತುಮೆ ಬೆರನೆ ಜ಼ಲಮ ದೆತಾ ನೈ. ಬೆರ ತುಮೊನೆ ಜ಼ಲಮ ದಿವಸ.

19 ಅಪೆ ತೆ ಝಾಡನೆ ಠೊಂಗಿಯೊನೆ ಮಳಿ ಕೈನ ತೆ ಠೊಂಗಿಯೊ ತುಟಿಯೊ ಕೈನ ತುಮೆ ಕೆ ಸಕೊಸಿ. 20 ತೆ ಕ್ಹರಿ ವ್ಹೈ. ತೆ ಠೊಂಗಿಯೊ ತುಟಿಯೊ. ತಿನೆ ಬರೊಕ್ಹೊ ನೈ ಕರಲ ಕಾರಣ ವ್ಹೈ. ತುಮೆ ತೆ ಝಾಡನು ಯಕ್ಕ ಭಾಗ ಥಯಲ ತುಮಾರಾ ಬರೊಕ್ಹಾಕ್ಹುಜ಼ ವ್ಹೈ. ತಿನಾಹುತಿ ಸ್ವಕ್ಕ ಕರು ನಕೊ, ಭುಚಿ಼ಕಿನ ರ‍್ಹೆ. 21 ಕ್ಹುದಾ ಪೈಲಾಜ಼ ಹುಟ್ಟಲ ಠೊಂಗಿಯೊನೆ ನೈ ವಚಾ಼ಡಲ್ಪರ ತುಮೆ ಬರೊಕ್ಹೊ ನೈ ಕರ‍್ಯಾಮ ತೆ ತುನೆ ವಚ಼ಾಡಸ ಸು? 22 ತಿನಾಹುತಿ ಕ್ಹುದಾ ಮರಗಾಲೊ ವ್ಹೈ ಘನ್ನೊ ಕಠೊರಬಿ ವ್ಹೈ ಕವಾನೊ ವಳಕ. ಕ್ಹುದಾ ತಿನಾ ಪಾಚಾ಼ ನೈ ಆವಾಲಾ ಮನಕ್ಹೊನೆ ಶಿಕ್ಷಾ ದಿವಸ. ತೆನೈಸೊ ತು ಕ್ಹುದಾನಿ ಮರಗಾಮಾ ರ‍್ಹಯೊಮ, ಕ್ಹುದಾ ತುನೆ ಮರಗಾಲೊ ರ‍್ಹವಸ. ನೈತೊ, ತುನೆ ಝಾಡತೊ ಕತ್ರಿನ ನಾಕಿ ಪಾಡಸ. 23 ಇಸ್ರಾಯೆಲ ಮನಕ್ಹೊ ತಿವ್ನಾ ಬರೊಕ್ಹೊ ನೈ ಛೊಡ್ಯಾಮ ಮಿ ತ್ಯುನೊನೆ ಭಾಂದುಸ, ಕ್ಹುದಾ ತ್ಯುನೊನೆ ವರಿ ತೆ ಝಾಡನೆ ಜೊಡ್ಸಸ. 24 ರಾನ್ಮಾನಿಯೊ ಠೊಂಗಿಯೊನೆ ಚೊ಼ಕಾ ಝಾಡನಾ ಠೊಂಗಿಯೊ ಥಾವಾನೆ ಆಸಾನ ನ್ಹವೈ. ವರಿಬಿ ಯಹುದ್ಯೊ ನೈ ರ‍್ಹಯಲ ತುಮೆ ರಾನ್ಮಾ ರ‍್ಹಯಲ ಒಲಿವ ಝಾಡನಾ ಕತ್ರಲ ಠೊಂಗಿಯೊ ರ‍್ಹಯಲ ಚೊ಼ಕಿಯೊ ಆಲಿವ ಝಾಡನೆ ರಾಕ್ಹ ಭಾಂದಲ ನಿಂಗತ ಛೆ. ಯಹುದ್ಯೊ ಚೊ಼ಕಾ ರ‍್ಹಯಲ ಆಲಿವ ಝಾಡನೆ ಬೆಳದಲ ಠೊಂಗಿಯೊ. ತಿನಾಹುತಿ ತ್ಯುನೆ ತ್ಯುನಾ ಸ್ವಂತ ಝಾಡನೆ ವರಿ ಮಳಾನು ಕ್ಹರಿಬಿ ಸಾದ್ಯ ಛೆ. ಕ್ಹುದಾನೆ ಕೆಕಲು ಆಸಾನ ವ್ಹೈ.

25 ಭಾಯೊ, ಭೆನೊ ತುಮೊನೆ ತುಮಾರಾಕ್ಹು ತುಮೆಜ಼ ಶಾಣ್ಯಾ ವ್ಹೈ ಕೈನ ಕವೈಲಿದ್ಯಾವಾಚಿ ಹಜು಼ನ ಲಕ್ಕಾಬಿ ದಡಿ ರ‍್ಹಯಲ ಕ್ಹರಿ ತುಮೊನೆ ಕೌಸ. ತೆ ಸುವೈ ಕದ್ಯಾಮ ಇಸ್ರಾಯೆಲನಾ ದಕ್ಹಾ ಮನಕ್ಹೊ ಮಡ್ಡ ಥಯಾತಬಿ ತೆನೈಸೊ ಯಹುದ್ಯೊ ನೈ ರ‍್ಹಯಲ ಮನಕ್ಹೊ ಕ್ಹುದಾಕನ ಆತಾಮಾ ತ್ಯುನೊನೆ ಮಡ್ಡ ರ‍್ಹಯಲ ಗೈಪಡಸ. 26 ಇಮ್ಮ ಕ್ಹಾರಾ ಇಸ್ರಾಯೆಲೊ ರಕ್ಷಣೆ ಹೊಂದಿಲಿವಸ. ಪವಿತ್ರ ಗ್ರಂಥಮಾ ಅಮ್ಮ ಬರ್ದ್ಯಾಸ;

"ಸಿಯೊನತೊ ರಕ್ಷಕ ಆವಸ;

ತೆ ಯಾಕೊಬನಾ ಕುಟುಂಬಮಾತೊ ಕ್ಹಾರು ಕೆಟ್ಟತನಾ ಕಾಡಿಪಡಸ.

27 ಮಿ ತೆ ಮನಕ್ಹೊನಾ ಪಾಪೊ ಪರಿಹಾರ ಕರತಾಮಾ

ತ್ಯುನಾ ಕ್ಹಾತೆ ಎ ವಡಂಬಡಿಕೆ ಕರುಸ.

28 ಯಹುದ್ಯೊ ಸುವಾರ್ತೆ ಒಪ್ಪಿಲಿದ್ಯಾ ನೈ. ತಿನಾಹುತಿ ತ್ಯುನೆ ಕ್ಹುದಾನಾ ವಿರೊಧಿ ಥಯಾಸ. ಯಹುದಿ ನೈಸೊ ಮನಕ್ಹೊನೆ ಮದತ ಥೌ ಕೈನ ಎ ಥಯು. ತೆನೈಸೊ ಯಹುದ್ಯೊ ಹಜ಼ುನ ಕ್ಹುದಾತಿ ಇನಿಲಿದಲ ಮನಕ್ಹೊ ಥಯಾಸ. ತಿನಾಹುತಿ ತೆ ಪಿತೃವೊನಾ ಕ್ಹಾತೆ ಕರಲ ವಡಂಬಡಿಕೆನಾ ಮುಲಕ ತ್ಯುನೊನೆ ಮಯಾ ಕರಸ. 29 ಕ್ಹುದಾ ವರಾ ದಿದಲ ಹುತಿಬಿ ಮನಕ್ಹೊನೆ ಬಲಾಯಲಹುತಿ ಪಶ್ಚಾತಾಪ ಪಡಾಲೊ ನ್ಹವ್ಹೈ. 30 ಯಕ್ಕ ಟೈಮಮಾ ಯೆಹುದಿಯೊ ನೈ ರ‍್ಹಯಲ ತಿನೆ ವಿಧೆಯ ಥೈನ ನ್ಹೊತಾ. ಹಮ್ನಾತುಬಿ ತುಮೆ ಮರಗಾ ಹೊಂದಿಲಿದ್ಯಾಸ. ಕಾಕದ್ಯಾಮ ತ್ಯುನೆ (ಯಹುದ್ಯೊ) ತಿನೆ ವಿಧೆಯ ಥಯಾ ನೈ. 31 ಕ್ಹುದಾ ತುಮೊನೆ ಮರಗಾ ದೆಕಾಡಲಹುತಿ ಹಮ್ನಾ ಯಹುದ್ಯೊ ವಿಧೆಯ ಥಾತಾ ನೈ. ತೆನೈಸೊ ತ್ಯುನೆಬಿ ಕ್ಹುದಾ ಕಂತಾ ಮರಗಾ ಹೊಂದಿಲ್ಯು ಕೈನ ಇಮ್ಮ ಥಯು. 32 ಕಾಕದ್ಯಾಮ ಕ್ಹಾರಾ ಜ಼ನಾ ಕ್ಹುದಾನೆ ವಿಧೆಯ ಥಯಾ ನೈ. ಕ್ಹುದಾ ಕ್ಹಾರಾವೊನೆ ಮರಗಾ ದೆಕಾಡು ಕೈನ ಕ್ಹಾರಾವೊನೆ ಮಳೈನ ಅವಿಧೆಯ ಕ್ಹು ಭಾಂದ್ಯೊಸ.

33 ಹೊ, ಕ್ಹುದಾನಿ ಆಸ್ತಿ ವರಿ ಘನ್ನಿ ಛೆ! ಕ್ಹುದಾನಿ ಗ್ಯಾನ ಘನ್ನಿ ಛೆ. ಕ್ಹುದಾ ಫೈಸಲೊ ಕರಾನಾ ಸಂಗತಿಯೊನೆ ಕುನ್ನಜ಼ ತಿಳ್ಸಾತುನೈ ಕ್ಹುದಾನೊ ಫೈಸಲೊ ದೆಕಾಡಾಲು ಕುನ? ತಿನಾ ವಾಟೊ ತಿಳದಿಲಿವಾನು ಕುನ್ನ? 34 ಪವಿತ್ರ ಗ್ರಂಥ ಕದಲ ನಿಂಗತ;

ಪ್ರಭುನು ಮನಸ ಕುನ್ನ ತಿಳ್ದಿಲಿದ್ಯುಸ?

ಕ್ಹುದಾನೆ ಕುನ್ನ ಸಲಹೆ ದಿವಾನೆ ಥಾವಸ? ಯೆಶಾಯ 40:13

35 ಪೈಲಾ ಕ್ಹುದಾನೆ ಕುನ್ನ ಸು ದಿದ್ಯಾಸ?

ಕ್ಹುದಾ ಕಿನೆಜ಼಼ ಸಾಲಾ ದಿವಾಲೊ ನ್ಹವ್ಹೈ" ಯೊಬ 41:11

36 ಹೊ, ಕ್ಹುದಾ ಕ್ಹಾರುಜ಼ ಸೃಷ್ಟಿ ಕರ‍್ಯೊ. ಕ್ಹಾರು ಕ್ಹುದಾನಾ ಮುಲಕ ಕ್ಹುದಾನಾ ಹುತಿಜ಼ ವ್ಹೈ. ಕ್ಹುದಾನೆ ಹಮೆಶಾಬಿ ಮಹಿಮಾ ಥಾವಾದೆ! ಆಮೆನ್.