1 "ಬಿಜಾ಼ ಮನಕ್ಹೊನೆ ಫೈಸಲೊ ಕರಿಯೆಸ" ಕೈನ ತುಮಾರಿ ವಿಷಯಮಾ ವಿಚಾರ ಕರೊ ನಕೊ. ಕಾಕದ್ಯಾಮ ತುಮೆಬಿ ಪಾಪ ಕರಿನ ಅಪರಾದಿಯೊ ಥಯಾಸ. ತುಮೆ ತೆ ಮನಕ್ಹೊನೆ ಫೈಸಲೊ ಕರೊಶಿ. ತೆನೈಸೊ ತೆಜ಼ ಕಾಮೊ ತುಮೆ ಕರೊಶಿ. ತಿನಾಹುತಿ ತುಮೆ ತ್ಯುನೊನೆ ಫೈಸಲೊ ಕರತಾಮಾ, ಕ್ಹರಿಮಾಜ಼ ತುಮೊನೆಜ಼ ಫೈಸಲೊ ಕರಿಲಿವಾಲಾ ಥಾವೊಸಿ. 2 ಅಪರಾದ ಕರಾಲಾ ಮನಕ್ಹೊನೆ ಕ್ಹುದಾ ಫೈಸಲೊ ಕರಸ. ತಿನೊ ಫೈಸಲೊ ಕ್ಹರಿನೊ ವ್ಹೈ ಕೈನ ಅಪೊನೆ ಗ್ವತ್ತ ಛೆ. 3 ತೆ ಅಪರಾದೊ ಕರಾಲಾ ಮನಕ್ಹೊನೆ ತುಮೆಬಿ ಫೈಸಲೊ ಕರೊಶಿ. ತೆನೈಸೊ ತುಮೆಜ಼ ತೆ ಅಪರಾದೊ ಕರೊಶಿ. ಇಮ್ಮ ರ‍್ಹತಾಮಾ ಕ್ಹುದಾನಿ ನ್ಯಾಯಕ್ಹು ಚು಼ಕೈಲಿವಾನೆ ಸಾದ್ಯ ನತ್ತಿ ಕೈನ ತುಮೊನೆ ಕ್ಹರಿಬಿ ಗ್ವತ್ತ ಛೆ. 4 ಕ್ಹುದಾ ತುಮಾರಿ ವಿಷಯಮಾ ಘನ್ನೊ ಮರಗಾಲೊ ಥಯೊಸ; ತಡ್ದಿಲಿವಾಲೊ ವ್ಹೈ. ತುಮೆ ಬದಲಿ ಥೌ ಕೈನ ಕ್ಹುದಾ ತುಮಾರಾಹುತಿ ಕೈದಾಡೊಸ. ವರಿಬಿ ತುಮೆ ತಿನಿ ಮರಗಾನಾಹುತಿ ವಿಚಾರ ಕರತಾ ನೈ. ತುಮೆ ತುಮಾರಾ ಮನಸೊ ಜಿವ್ನಾ ಬದಲಿ ಕರಲಿವಾನೆ ಥಾವಸ ಕೈನ ಕ್ಹುದಾನಿ ಮರಗಾನೆ ತಿಳ್ದಿಲಿದ್ಯಾವಾಚಿ ಛೆ. 5 ತೆನೈಸೊ ತುಮೆ ಘಟ್ಟ ಮನಸನಾ ವರಿ ಮಂಡ ಚಾಳಿನಾ ಥಯಾಸ. ತಿನಾಹುತಿ ತುಮೊನೆ ಆವಾನು ರ‍್ಹಯಲ ಶಿಕ್ಷಾ ತುಮೆ ಹೆಚ್ಕಿ-ಹೆಚ್ಕಿ ಕರಲಿವಾಡಾಸ. ಕ್ಹುದಾ ತಿನಿ ಶಿಟ್ಟ ದೆಕಾಡಾನಾ ಟೈಮಮಾ ತುಮೊನೆ ತೆ ಶಿಕ್ಷಾ ಥಾವಾಸ. ತೆ ದಿನ್ನಮಾ ಕ್ಹುದಾನಿ ನ್ಯಾಯನಿ ಫೈಸಲೊ ಮನಕ್ಹೊ ದೆಕಸ. 6 ಕಾಕದ್ಯಾಮ ಕ್ಹುದಾ ಹರಿ ಯಕ್ಲಾನೆ ತ್ಯುನೆ-ತ್ಯುನೆ ಕರಲ ಕಾಮೊನಾ ತಕ್ಕ ಪ್ರತಿ ಫಲ ದಿವಸ. 7 ದಕ್ಹಾ ಮನಕ್ಹೊ ಮಹಿಮಾನಾಹುತಿ, ಮರಯಾದಿನಾಹುತಿ ವರಿ ತ್ಯುನು ಹಮೆಶಾನು ಜ಼ಲಮ ರ‍್ಹೌ ಕೈನ ಕೆಳಾಮಾಬಿ ಚೊ಼ಕಾ ಕಾಮೊ ಕರತಾ ಜಿವ್ನಾ ಕರಸ. ಕ್ಹುದಾ ತೆ ಮನಕ್ಹೊನೆ ಹಮೆಶಾನೊ ಜ಼ಲಮ ದಿವಸ. 8 ತೆನೈಸೊ ಉಗ್ರಲ ಮನಕ್ಹೊ ಸ್ವಾರಥಿಯೊ ಥೈನ, ಕ್ಹರಿಪರ ಚಾ಼ಲ್ಯಾವಾಚಿ ಕೆಟ್ಟ ಕಾಮೊಪರ ಚಾ಼ಲಾಲಾ ಥಯಾಸ. ತ್ಯುನೊಪರ ಕ್ಹುದಾನಿ ಶಿಟ್ಟ ವರಿ ರುದ್ರ ಅವತಾರ ಆವಸ. 9 ಕೆಟ್ಟಜ಼ ಕರಾಲಾ ಹರಿ ಯಕ್ಲಾನೆ ಕದ್ಯಾಮ ಪೈಲಾ ಯಹುದಿಯೊನೆ, ಪಾಚಾ಼ತು ಯಹುದ್ಯೊ ನೈಸೊವಾಲಾವೊನೆ ಕಷ್ಟ ತ್ರಾಸೊ ದಿವಸ. 10 ತೆನೈಸೊ ಚೊ಼ಕುಜ಼ ಕರಾಲಾ ಹರಿ ಯಕ್ಲಾನೆ ಕದ್ಯಾಮ ಪೈಲಾ ಯಹುದಿಯೊನೆ, ಪಾಚ಼ಲ್ತಾ ಯಹುದ್ಯೊ ನೈಸೊವಾಲಾವೊನೆ ಕ್ಹುದಾ ಮಹಿಮಾ, ಮರ್ಯಾದಿ ವರಿ ಶಾಂತಿ ದಿವಸ. 11 ಕ್ಹುದಾ ಕಿನು ಸೈಡ ಲಿದ್ಯಾವಾಚಿ ಕ್ಹಾರಾವೊನೆ ಯಕ್ಕಜ಼ ತರಾ ಫೈಸಲೊ ಕರಸ.

12 ಯೆಹುದಿ ನೈಸೊ ಮನಕ್ಹೊಕನ ಮೊಶೆನಾ ನಿಯಮೊ ನತ್ತಿ. ತೆ ಮನಕ್ಹೊ ಧರಮಶಾಸ್ತ್ರ ಗ್ವತ್ತ ನೈಸೊ ಪಾಪ ಕರಸ. ಯಹುದ್ಯೊಕನ ಧರಮಶಾಸ್ತ್ರ ಛೆ ತ್ಯುನೆಬಿ ಪಾಪ ಕರಸ ವರಿ ತ್ಯುನೊ ನ್ಯಾಯನೊ ಫೈಸಲೊ ಧರಮಶಾಸ್ತ್ರನಾ ನಿಯಮ ಪ್ರಕಾರ ಫೈಸಲೊ ಥಾವಸ. 13 ಧರಮಶಾಸ್ತ್ರನೆ ಐಕಲಕ್ಹು ಮನಕ್ಹೊ ಕ್ಹುದಾನಿ ನಜ಼ರಮಾ ನಿತಿವಂತವಾಲಾ ಥಾತಾ ನೈ. ತೆನೈಸೊ ಧರಮಶಾಸ್ತ್ರ ಕವಾನಿ ಹರಿ ಯಕ್ಕ ವಾತನೆ ವಿಧೆಯ ಥಾವಾಲಾ ಮನಕ್ಹೊನೆ ಧರಮಶಾಸ್ತ್ರ ನಿತಿವಂತವಾಲಾ ಕರಸ. 14 ಯಹುದ್ಯೊ ನೈ ರ‍್ಹಯಲವಾಲಾ ಧರಮಶಾಸ್ತ್ರ ಹೊಂದ್ಯಾ ನತ್ತಿ. ತೆನೈಸೊ ತ್ಯುನೆ ಧರಮಶಾಸ್ತ್ರನಾ ನಿಂಗತ ಚಾ಼ಲಿನ ಜಾ಼ವತ್ತೊ, ತ್ಯುನೊನೆ ಧರಮಶಾಸ್ತ್ರನಿ ಜ಼ರುರತ್ತಜ಼ ನ್ಹೊತಿ. 15 ತ್ಯುನಿ ಮನಸ್ಸನಾ ನಿಯಮೊ ನಿಂಗತ ಕಯು ಕರೆಟ್ಟ ವ್ಹೈ, ಕಯು ತಪ್ಪ ವ್ಹೈ, ಕವಾನು ತ್ಯುನೆ ತ್ಯುನಾ ನಡತೆಕ್ಹು ದೆಕಾಡಿನ ದಿವಸ. ಎ ಕ್ಹರಿ ವ್ಹೈ ಕೈನ ತ್ಯುನಾ ಮನಸನಿ ಸಾಕ್ಷಿಕ್ಹು ದೆಕಾಡಿನ ದಿವಸ. ತ್ಯುನಿ ತೈಜ಼ ಗ್ಯಾನಕ್ಹು ತ್ಯುನೊನೆ ದೊಶಿ ವ್ಹೈ ಕೈನ ನೈತೊ ನಿರದೊಶಿ ವ್ಹೈ ಕೈನ ಫೈಸಲೊ ಕರಸ. 16 ಮನಕ್ಹೊನಾ ಮನಸಮಾ ದಡಿ ರ‍್ಹಯಲ ಸಂಗತಿಯೊನೆ ಕ್ಹುದಾ ಫೈಸಲೊ ಕರಾನಾ ದಿನ್ನೆ ಎ ಕ್ಹಾರು ಥಾವಸ. ಕ್ಹುದಾ ಯೆಸು ಕ್ರಿಸ್ತನಾ ಮುಲಕ ಮನಕ್ಹೊನೆ ಫೈಸಲೊ ಕರಸ ಕವಾನು ಸುವಾರ್ತೆ ಕೈನ ದಿವಸ. ಮಿ ಮನಕ್ಹೊನೆ ಕವಾನು ತೆಜ಼ ಸುವಾರ್ತೆ ವ್ಹೈ.

17 "ಮಿ ಯಹುದ್ಯನೊ ವ್ಹೈ" ಕೈನ ಕೈಲಿವಾನು ತಾರಿ ವಿಷಯ ಸುತೊ ವ್ಹೈ? ಧರಮಶಾಸ್ತ್ರಮಾ ಬರೊಕ್ಹೊ ಮ್ಹೆಲಿನ ಕ್ಹುದಾನಾ ನಜಿಕ ರ‍್ಹವಾನಾಹುತಿ ತು ಖುಶಿ ಥಾಶಿ. 18 ಕ್ಹುದಾನಿ ಚಿತ್ತ ನಿಂಗತ ರ‍್ಹಯಲ ಕಾಮೊ ಧರಮಶಾಸ್ತ್ರಕ್ಹು ಶಿಕ್ಕಲಹುತಿ ತು ಕೈಲೆಶಿ. 19 ಚೊ಼ಕಿ ರ‍್ಹಯಲ ವಾಟ ನೈ ಗ್ವತ್ತ ರ‍್ಹಯಲ ಮನಕ್ಹೊನೆ ವಾಟ ದೆಕಾಡಾಲೊ ಅಂದಾರಾಮಾ ರ‍್ಹವಾಲಾ ಮನಕ್ಹೊನೆ ಉಜಾಲು ಥೈನ ರ‍್ಹೌ ಕೈನ ತಾರಾಹುತಿ ವಿಚಾರ ಕರಲಿದ್ಯೊಸ. 20 ಮಡ್ಡ ರ‍್ಹಯಲವಾಲಾವೊನೆ ವಾಟ ದೆಕಾಡಾಲೊ ನಿಂಗತ ವಳಕ ನೈ ರ‍್ಹಯಲ ಮನಕ್ಹೊನೆ ಮಾಸ್ತರ ನಿಂಗತ ವ್ಹೈ ಕೈನ ತಾರಾಮಾ ಧರಮಶಾಸ್ತ್ರನು ಪುರಾ ಗ್ಯಾನ ವರಿ ಕ್ಹರಿ ಗ್ವತ್ತ ಛೆ ಕೈನ ತು ಕೈಲಿದ್ಯೊಸ. 21 ತು ಬಿಜಾ಼ವೊನೆ ಶಿಕ್ಲಾಶಿ. ಇಮ್ಮ ರ‍್ಹಯುಮ ತು ತುನೆಜ಼ ಕಾ ಶಿಕ್ಲೈಲೆತೊ ನೈ? ಚೊ಼ರಿ ಕರು ನೈ ಕೈನ ತು ಮನಕ್ಹೊನೆ ಕಶಿ, ತೆನೈಸೊ ತುಜ಼಼ ಚೊ಼ರಿ ಕರಶಿ. 22 ಮನಕ್ಹೊ ವ್ಯಭಿಚಾರ ಕರು ನೈ ಕೈನ ತುಜ಼಼ ಕಶಿ, ತೆನೈಸೊ ತುಜ಼಼ ತೆ ವ್ಯಭಿಚಾರ ನೈ ಕರ‍್ತೊ ಸು? ತು ಮೊರತಿಯೊನೆ ದ್ವೆಷ ಕರಶಿ, ತೆನೈಸೊ ತುಜ಼಼ ತೆ ಕ್ಹಾರು ಚೊ಼ರಿ ಕರ‍್ತೊ ನೈ ಸು? 23 ತು ಕ್ಹುದಾನಾ ಧರಮಶಾಸ್ತ್ರನಾಹುತಿ ಘಮಂಡ ಕರಶಿ. ತೆನೈಸೊ ತು ಧರಮಶಾಸ್ತ್ರನೆ ದಾಟಿನ ಕ್ಹುದಾನೆ ಮರ್ಯಾದಿ ಕಾಡ್ತೊ ನೈ ಸು? 24 "ಯಹುದ್ಯೊ ಥಯಲ ತಮಾರಾಹುತಿ ಯಹುದ್ಯೊ ನೈ ರ‍್ಹಯಲ ಮನಕ್ಹೊ ಕ್ಹುದಾನಾ ನಾಮನೆ ವಿರುದ್ದ ಥೈನ ಬೊಲಸ" ಕೈನ ಪವಿತ್ರ ಗ್ರಂಥಮಾ ಬರ್ದಲ ಛೆ.

25 ತು ಧರಮಶಾಸ್ತ್ರ ನಿಂಗತ ಚಾ಼ಲ್ಯೊ ಕದ್ಯಾಮ ತು ಕರಿಲಿದಲ ಸುನ್ನತಿನೆ ಮತ್ಲಬ ಛೆ. ತೆನೈಸೊ ತು ಧರಮಶಾಸ್ತ್ರನೆ ದಾಟಿನ ಗಯೊಮ ತುನೆ ಸುನ್ನತಿ ನತ್ತಿ ಥೈ ಕೈನ ವ್ಹೈ. 26 ಯಹುದ್ಯೊ ನೈ ರ‍್ಹಯಲ ಮನಕ್ಹೊನೆ ಸುನ್ನತಿ ಥೈ ನತ್ತಿ, ತೆನೈಸೊ ಧರಮಶಾಸ್ತ್ರ ಕವಾನು ತ್ಯುನೆ ಕರತಾ ರ‍್ಹಯಾಮ, ತ್ಯುನೆ ಕ್ಹುದಾನಿ ನಜ಼ರಮಾ ಸುನ್ನತಿ ಕರೈಲಿದಲ ನಿಂಗತ ನ್ಹವೈ ಸು? 27 ಯಹುದ್ಯೊ ರ‍್ಹಯಲವಾಲಾ ತುಮೊನೆ ಬರ್ದಲ ಧರಮಶಾಸ್ತ್ರ ಛೆ ವರಿ ಸುನ್ನಿತಿ ಥೈಸ. ತೆನೈಸೊ ತುಮೆ ಧರಮಶಾಸ್ತ್ರನೆ ದಾಟಿನ ಚಾ಼ಲೊಶಿ. ಇಮ್ಮ ರ‍್ಹತಾಮಾ, ಅಂಗಮಾ ಸುನ್ನಿತಿ ನೈ ಥಯಲ ರ‍್ಹೈತಬಿ ಧರಮಶಾಸ್ತ್ರನೆ ವಿಧೆಯ ಥಾವಾಲಾ ಮನಕ್ಹೊ ತುಮೊನೆ ಅಪರಾದಿ ವ್ಹೈ ಕೈನ ದೆಕಾಡಿನ ದಿವಸ. 28 ಎ ಕ್ಹಾಲಿ ಭಾರಲ್ಯಾ ಅಂಗಮಾ ಯಹುದಿ ಥೈನ ರ‍್ಹವಾಲೊ ಯಹುದಿ ನ್ಹವೈ. ಕ್ಹಾಲಿ ಅಂಗನಿ ಭಾರಲಿ ಸುನ್ನತಿ ಕ್ಹರಿನಿ ಸುನ್ನತಿ ನ್ಹವೈ. 29 ಮನಸಮಾ ಯಹುದಿ ರ‍್ಹಯಲವಾಲೊಜ಼ ಕ್ಹರಿನೊ ಯಹುದಿ ವ್ಹೈ. ಮನಸಮಾ ಥಯಲ ಸುನ್ನತಿ ಕ್ಹರಿನಿ ಸುನ್ನತಿ ವ್ಹೈ. ಎ ಸುನ್ನತಿ ಥಯಲ ಕ್ಹುದಾನಿ ಆತ್ಮಾಕ್ಹುಜ಼ ಥಯಲ ವ್ಹೈ ತೆನೈಸೊ ಬರ್ದಲ ಧರಮಶಾಸ್ತ್ರಕ್ಹು ನ್ಹವೈ. ಕ್ಹುದಾನಿ ಆತ್ಮಾಕ್ಹು ಮನಸಮಾ ಸುನ್ನತಿ ಥಯಲ ಮನಕ್ಹ ವ್ಹೈ ಕೈನ ಕವೈಲಿವಾನು ಕ್ಹುದಾಕ್ಹು ವ್ಹೈ ತೆನೈಸೊ ಮನಕ್ಹೊಕ್ಹು ನ್ಹವೈ.