1 ತಿಮ್ಮ ರ‍್ಹಯುಮ, ಅಪ್ನೊ ಪಿತೃಥಯಲ ಅಬ್ರಹಾಮನಾ ಹುತಿ ಅಪೆ ಸು ಕಯ್ಯೆ? ತೆ ಬರೊಕ್ಹಾನಾಹುತಿ ಸು ಶಿಕ್ಯೊ? 2 ತೆನೈಸೊ ತೆ ಕರಾನಾ ಕಾಮೊಕ್ಹು ನಿತಿವಂತವಾಲೊ ವ್ಹೈ ಕೈನ ಕವೈಲಿವಾನೆ ಕಾರಣ ರ‍್ಹತುತು. ವರಿಬಿ ಅಬ್ರಹಾಮ ಕ್ಹುದಾನಾ ಕ್ಹಾಮೊ ಮಿ ವ್ಹೈ ಕೈನ ಕವಾನೆ ಥಯು ನೈ. 3 "ಅಬ್ರಹಾಮ ಕ್ಹುದಾನೆ ನಂಬ್ಯೊ. ಕ್ಹುದಾ ಅಬ್ರಹಾಮನೊ ಬರೊಕ್ಹಾನಾಹುತಿ ತೆ ನಿತಿವಂತವಾಲೊ ವ್ಹೈ ಕ್ಹುದಾ ಸ್ವಿಕಾರ ಕರ‍್ಯೊ" ಕೈನ ಪವಿತ್ರ ಗ್ರಂಥ ಕವಸ. 4 ರಾಬಾಲಾನೆ ಮಳಾನೊ ಪಗಾರ ಮಳು ಗಿಫ್ಟ ನ್ಹವೈ. ತೆ ತಿನೆ ಮಳಾನೊ ಹಕ್ಕ ವ್ಹೈ, 5 ತೆನೈಸೊ ಯಕ್ಲೊ ತೆ ಕರಾನಾ ಕಾಮಪರ ಬರೊಕ್ಹೊ ಕರಾತಿ ಕ್ಹುದಾಪರ ಬರೊಕ್ಹೊ ಮ್ಹೆಲಸ. ಕ್ಹುದಾ ಕೆಟ್ಟ ರ‍್ಹಯಲವಾಲಾನೆ ಧರಮಿ ಕರಾಲೊ ಕ್ಹುದಾ ವ್ಹೈ. ತೆ ಕ್ಹುದಾಪರ ಬರೊಕ್ಹೊ ಮ್ಹೆಲಲ ಎ ಬರೊಕ್ಹೊ ತಿನೆ ಕ್ಹುದಾನಿ ನಜ಼ರಮಾ ನಿತಿವಂತ ವ್ಹೈ ಕೈನ ದೆಕಾಡಿನ ದಿವಸ. 6 ಕ್ಹುದಾ ಯಕ್ಲಾನು ಚೊ಼ಕು ಕಾಮ ದೆಕ್ಯಾವಾಚಿ ತೆ ನಿತಿವಂತವಾಲೊ ವ್ಹೈ ಕೈನ ವಪ್ಪಿಲಿದ್ಯೊಮ ಕ್ಹರಿಮಾ ತೆ ಮನಕ್ಹ ನಸಿಬವಾಲೊ ವ್ಹೈ ಕೈನ ದಾವಿದಬಿ ಕವಸ.

7 "ಕಿನು ತಪ್ಪ ಮಾಫ ಥೈ ಗಯುಸ ಕಿನಾ ತಪ್ಪೊ ಝಕೈ ಗಯಾಸ.

ತೆ ಕ್ಹರಿಮಾಜ಼ ನಶಿಬವಾಲೊ ವ್ಹೈ!

8 ಕ್ಹುದಾ ಕಿನು ತಪ್ಪ ಶೆಂ ನೈ ಕರತೊ ತೆ ಕ್ಹರಿಮಾಜ಼ ನಸಿಬವಾಲೊ ವ್ಹೈ.

9 ಎ ನಸಿಬ ಖತ್ನಾ ಕರೈಲಿದಲವಾಲಾ ಯಹುದಿಯೊನೆ ಯಕ್ಕಜ಼ ವ್ಹೈಸು? ನೈತೊ ಖತ್ನಾ ನೈ ಕರೈಲಿದವಾಲಾವೊನೆ (ಯಹುದ್ಯೊ ನೈ ರ‍್ಹಯಲ ಮನಕ್ಹೊ) ಇವ್ನೊ ನಸಿಬ ವ್ಹೈಸು? ಕ್ಹುದಾ ಅಬ್ರಹಾಮನೊ ಬರೊಕ್ಹೊ ವಪ್ಪಿಲಿದ್ಯೊಸ ಕೈನ ತೆಳಾಮಾಜ಼ ಕದ್ಯಾಸ. ತೆ ಬರೊಕ್ಹೊ ತಿನೆ ನಿತಿವಂತವಾಲೊ ಕರ‍್ಯು. 10 ವರಿಬಿ ಎ ಕೆಳಾಮಾ ಥಯು? ಕ್ಹುದಾ ಅಬ್ರಹಾಮನೆ ವಪ್ಪಿಲಿದಲ ತಿನೆ ಸುನ್ನತಿ ಥಾವಾತಿ ಅಗ್ದುರಜ಼ ವ್ಹೈಸು ಸುನ್ನತಿ ಥಯಲ್ಪರ ವ್ಹೈ? ಕ್ಹುದಾ ತಿನೆ ವಪ್ಪಿಲಿದಲ ಸುನ್ನತಿ ಥಾವಾತಿ ಅಗ್ದುರಜ಼ ವ್ಹೈ. 11 ಕ್ಹುದಾ ತಿನೆ ವಪ್ಪಿಲಿದ್ಯೊಸ ಕೈನ ದೆಕಾಡಾನಾಹುತಿ ಅಬ್ರಹಾಮ ಪಾಚಾ಼ತೊ ಸುನ್ನತಿ ಕರೈಲಿದ್ಯೊ. ಅಬ್ರಹಾಮ ಸುನ್ನತಿ ಕರೈಲಿವಾತಿ ಅಗ್ದುರಜ಼ ಬರೊಕ್ಹಾನಾ ಮುಲಕ ನಿತಿವಂತವಾಲೊ ವ್ಹತ್ತೊ. ತಿನಾಹುತಿ ಅಬ್ರಹಾಮ ಕ್ಹುದಾನೆ ಬರೊಕ್ಹೊ ಕರಾಲಾ ಕ್ಹಾರಾವೊನೆ ಆತ್ಮಿಕ ಬಾ ಥಯೊಸ ವರಿ ತ್ಯುನೆ ಸುನ್ನತಿ ನೈ ಕರೈಲಿನತ ಬಿ ತ್ಯುನೊಕ್ಹು ನ್ಯಾಯಮಾ ಸ್ವಿಕಾರ ಕರೈಲಿದಲವಾಲಾ ವ್ಹೈ. 12 ತೆನೈಸೊ ಸುನ್ನತಿ ಕರೈಲಿದಲ ಮನಕ್ಹೊನೆಬಿ ಅಬ್ರಹಾಮ ಮುಲ ಪಿತೃ ಥಯೊಸ. ತೆನೈಸೊ ತೆ ತ್ಯುನೊನೆ ಮುಲ ಪಿತೃ ಥಯಲ ತ್ಯುನೆ ಕರೈಲಿದಲ ಸುನ್ನತಿಕ್ಹು ನ್ಹವೈ. ಅಪ್ನೊ ಮುಲ ಪಿತೃ ಥಯಲ ಅಬ್ರಹಾಮ ಸುನ್ನತಿ ಕರೈಲಿವಾತಿ ಅಗ್ದುರಜ಼ ತೆ ಕಿಮ್ಮ ಬರೊಕ್ಹಾಮಾ ವ್ಹತ್ತೊ ತಿನಾ ನಿಂಗತಜ಼ ರ‍್ಹಯಲವಾಲಾವೊನೆ ತೆ ಮುಲ ಪಿತೃ ಥಯೊಸ.

13 ಅಬ್ರಹಾಮನೆಬಿ ತಿನಾ ಸಂತತಿನೆಬಿ ದುನಿಯಾಜ಼ ದ್ಯುಸ ಕೈನ ಕ್ಹುದಾ ವಾಗ್ದಾನ ದಿದ್ಯೊ. ತೆನೈಸೊ ಅಬ್ರಹಾಮ ಎ ವಾಗ್ದಾನ ಮಳು ಕದ್ಯಾಮ ಧರಮಶಾಸ್ತ್ರಮಾ ರ‍್ಹಯಲ ತಿಮ್ಮ ಚಾ಼ಲಲಕ್ಹು ನ್ಹವೈ. ಅಬ್ರಹಾಮ ನಿತಿವಂತ ಥೈನ ಬರೊಕ್ಹೊ ಕರಲಕ್ಹು ಎ ವಾಗ್ದಾನ ವ್ಹಂದಿಲಿದ್ಯೊ. 14 ಇಮ್ಮ ರ‍್ಹತಾಮಾ, ಕ್ಹುದಾ ದಿವಾನಿಯೊ ವಾಗ್ದಾನೊ ಧರಮಶಾಸ್ತಮಾ ರ‍್ಹಯಲ ತಿಮ್ಮ ಚಾ಼ಲಾಲಾವೊನೆ ದಿವಾನೆ ರ‍್ಹವತ್ತೊ, ಬರೊಕ್ಹೊ ಸುಜ಼ ಉಪಯೊಗ ನ್ಹೊತೊ. ತೆನೈಸೊ ಅಬ್ರಹಾಮನೆ ಕ್ಹುದಾ ದಿದಲ ವಾತ ಸುಜ಼ ಉಪಯೊಗ ನ್ಹೊತಿ. 15 ಧರಮಶಾಸ್ತ್ರನೆ ವಿಧೆಯ ಥಯಾವಾಚಿ ರ‍್ಹತಾಮಾ, ಧರಮಶಾಸ್ತ್ರ ಕ್ಹುದಾನೆ ಶಿಟ್ಟಲಾವಾ ವರಕ್ಹು ಥಾತುತು. ವರಿಬಿ ಧರಮಶಾಸ್ತ್ರನಾ ರ‍್ಹವತ್ತೊ ಅವಿಧೆಯ ಥಾವಾನೆ ಸುಜ಼ ರ‍್ಹತು ನೈ.

16 ತಿನಾಹುತಿ ಮನಕ್ಹೊ ಬರೊಕ್ಹೊನಾ ಮುಲಕ ವಾಗ್ದಾನ ಹೊಂದಿಲಿವಸ. ವಾತೊ ಫ್ರಿಮಾ ಮಳು ಕೈನ ವರಿ ಗಿಫ್ಟ ರ‍್ಹೌ ಕೈನ ಇಮ್ಮ ಥಯು. ವಾಗ್ದಾನ ಫ್ರಿನಿ ಗಿಫ್ಟ ರ‍್ಹಯ್ಯೊಮ, ಅಬ್ರಹಾಮನಾ ಮನಕ್ಹೊ ತೆ ವಾತೊ ಹೊಂದಿಲಿವಸ. ಎ ವಾಗ್ದಾನ ಮೊಶೆನಾ ಧರಮಶಾಸ್ತ್ರನೆ ಅಧಿನ ಥೈನ ಜಿವ್ನಾ ಕರತಾ ರ‍್ಹಯಲ ಮನಕ್ಹೊನೆ ಯಕ್ಕಜ಼ ನ್ಹವೈ, ಅಬ್ರಹಾಮ ನಿಂಗತ ಬರೊಕ್ಹಾಮಾ ರ‍್ಹಯಲ ಕ್ಹಾರಾ ಮನಕ್ಹೊನಾಹುತಿ ವ್ಹೈ. ಅಬ್ರಹಾಮ ಅಪೊನೆ ಕ್ಹಾರಾವೊನೆ ಮುಲ ಪಿತೃ ಥಯೊಸ. 17 ಮಿ ತುನೆ ಘನ್ನಿ ಜನಾಂಗನಾ ಮನಕ್ಹೊನೆ ಬಾ ಥಾವಾ ವರಕ್ಹು ಕರ‍್ಯೊಸ" ಕೈನ ಪವಿತ್ರ ಗ್ರಂಥಮಾ ಬರ್ದಲ ಛೆ. ಎ ಕ್ಹುದಾನಿ ಸನ್ನಿದಿಮಾ ಕ್ಹರಿ ವ್ಹೈ. ಮರಲವಾಲಾವೊನೆ ಜ಼ಲಮ ದಿವಾನು ಹಜು಼ನಬಿ ನೈ ಥಯಲ ಕಾಮೊ ಕರಾಲಾ ಕ್ಹುದಾನೆ ಅಬ್ರಹಾಮ ನಂಬ್ಯೊ. 18 ಅಬ್ರಹಾಮನೆ ಬಚ್ಚಾ಼ ಥಾವಾನೆ ವಾಟಜ಼ ನ್ಹೊತಿ. ತಿಮ್ಮ ರ‍್ಹಯುತಬಿ ತೆ ಕ್ಹುದಾಪರ ಬರೊಕ್ಹೊ ಮ್ಹೆಲ್ಯೊ ವರಿಬಿ ತೆ ಆಸ ಮ್ಹೆಲಲಕ್ಹು ತೆ ಘನ್ನಿ ಜ಼ನಾಂಗನೆ ಬಾ ಥಯೊ. ಕ್ಹುದಾ ತಿನೆ "ತು ಘನ್ನಿ ಜ಼ನಾಂಗನೆ ಪಡ್ದಿಲೆಶಿ" ಕೈನ ಕದಲ ಪುರಾ ಥಯು. 19 ಅಬ್ರಹಾಮನೆ ಕಮ್ಸಿ ಕಮ ಕ್ಹೊ ವೈಸ ಥಯಲಕ್ಹು ತಿನು ಅಂಗಬಿ ತಾಕತ ನೈಸೊ ಥೈ ಗಯುತು. ತಿನಾಹುತಿ ತಿನೆ ಬಚ್ಚಾ಼ ಥಾವಾನೆ ಸಾದ್ಯ ನ್ಹೊತು. ತೆನೈಸೊ ಸಾರಳನೆಬಿ ಬಚ್ಚಾ಼ ಥಾವಾ ವರಕ್ಹು ನ್ಹೊತು. ಅಬ್ರಹಾಮ ಇನಾಹುತಿ ವಿಚಾರ ಕರ‍್ಯೊ. ತಿಮ್ಮ ರ‍್ಹಯುತಬಿ ಕ್ಹುದಾಪರ ರ‍್ಹಯಲ ತಿನೊ ಬರೊಕ್ಹೊ ಕಮ ಥಯೊ ನೈ. 20 ಕ್ಹುದಾ ದಿದಲ ವಾಗ್ದಾನಪರ ತೆ ಸಂಶೊ ಕರ‍್ಯೊ ನೈ ವರಿ ತಿನಾ ಬರೊಕ್ಹೊನೆ ಕಮ್ಮ ಥಾವಾನೆ ದಿದ್ಯೊ ನೈ. ತಿನೊ ಬರೊಕ್ಹೊಜ಼ ತಿನೆ ಘಟ್ಟ ಕರ‍್ಯು ವರಿ ತೆ ಕ್ಹುದಾನೆ ಸ್ತೊತ್ರಾ ಕದ್ಯೊ. 21 ಕ್ಹುದಾ ದಿದಲ ವಾಗ್ದಾನ ಪುರಾ ಕರಸ ಕೈನ ಅಬ್ರಹಾಮ ನಂಬ್ಯೊತೊ. 22 ತಿನಾಹುತಿ "ಕ್ಹುದಾ ಅಬ್ರಹಾಮನಾ ಬರೊಕ್ಹೊನಾಕ್ಹು ತಿನೆ ನಿತಿವಂತವಾಲಾ ವ್ಹೈ ಕೈನ ಕ್ಹುದಾ ವಪ್ಪಿಲಿದ್ಯೊ" 23 "ನಿತಿವಂತ" ಕವಾನಿ ಎ ವಾತ ಅಬ್ರಹಾಮನೆ ಯಕ್ಕಜ಼ ನ್ಹವೈ. 24 ತೆ ಅಪ್ನಾಹುತಿಬಿ ಬರ್ದಲ ವ್ಹೈ. ಅಪೆ ಬರೊಕ್ಹೊ ಕರಿಯೆಸ. ಅಪ್ನೊ ಪ್ರಭು ಥಯಲ ಯೆಸು ಕ್ರಿಸ್ತನೆ ಮರಲವಾಲಾವೊಮಾತೊ ಜಿವ್ತೊ ಕರಿನ ಉಟಾಡಲವಾಲಾನೆ ಅಪೆ ಬರೊಕ್ಹೊ ಮ್ಹೆಲಿಯೆಸ. 25 ಅಪ್ನಾ ಪಾಪೊನಾಹುತಿ ಯೆಸುನೆ ಮರಾನೆ ದಿದ್ಯಾ. ಅಪೊನೆ ನಿತಿವಂತವಾಲಾ ಕರಾನಾಹುತಿ ತಿನೆ ಮರಲವಾಲಾವೊಮಾತೊ ವರಿ ಜಿವ್ತೊ ಕರಿನ ಉಟಾಡ್ಯೊ.