ರುತ 2

ರುತ ಬುವಜನನಾ ಖೆತರಮಾ ಕಾಮ ಕರಲ

1 ನವೊಮಿನೊ ಮಾಟಿನಾ ಎಲೆಮೆಕನಾ ಖಾಂದಾನಮಾ ಘನ್ನೊ ಸೌಕಾರ ರ‍್ಹಯಲ ಬೊವಜ ಕವಾಲೊ ಯಕ್ಲೊ ವ್ಹತೊ. 2 ಯಕ್ಕ ದಿನ್ನ ಮೊವ್ಯಾಬ್ಯನಿ ರ‍್ಹಯಲ ರುತ ನವೊಮಿನೆ ಮಿ ಗೈನ

ಕುನ್ನ ಮನೆ ಮರ್ಗಸ ತಿನಾ ಖೆತರಮಾ ಕಾಮ ಕರಿನ ಔಸ ಕೈನ ಕದಿ ತಿನಾಹುತಿ ತೆ ಮಾರಿ ದಿಕ್ರಿ ಗೈನಾ ಕದಿ.

3 ಎಲಿಮೆಕನ ಒಸವಾಲೊ ರ‍್ಹಯಲ ಬೊವಜನಾ ಖೆತರ್ಮಾ ಕಾಮ ಕರಾಲಾವೊನಾ ಕ್ಹಾತೆ ಕಾಟಾನೆ ಗೈ.

4 ತೆಳಾಮಾ ಬೊವಜ ಬೆತ್ಲೆಹೆಮತಾ ಖೆತರಮಾ ಐನ ಕಾಟಾಲಾವೊನೆ ಯಹೊವಾ ತುಮಾರ ಕ್ಹಾತೆ ರ‍್ಹವಾದೆ ಕದ್ಯೊ. ತಿವ್ನೆ ಯಹೊವಾ ತುನೆ ಆಶಿರ್ವಾದ ದಿವಾದೆ ಕದ್ಯಾ.

5 ಬೊವಜ ಕಾಟಾಲಾವೊಪರ ಮ್ಹೊಟೊ ಮುಕಾದಮನೆ ರ‍್ಹಯಲವಾಲಾನೆ ಬಲೈನ ಆ ಛೊಕ್ರಿ ಕುನ್ನ ವ್ಹೈ ಕೈನ ಪುಚ್ಯೊ.

6 ತೆಳಾಮಾ ತೆ ನವೊಮಿನಾ ಕ್ಹಾತೆ ಆಯಲ ಮೊವ್ಯಬ್ಯನಿ ಬಾಕಡಿ ವ್ಹೈ ಕದ್ಯೊ. 7 ತೆ ಕಾಟಾಲಾವೊನಾ ಪಾಚಾ಼ತಿ ಸಿವೊಡೊನೆ ವಚ್ಮಾತಿಕಾಡಾನೆ ಅಪ್ಪಣೆ ಥೌ ಕೈನ ಕೈಲಿದಿ. ತೆ ಪಾಟೆ ಆಯಲವಾಲಿ ಹಜು಼ನಬಿ ನ್ಹ್ಯಾಜ ಛೆ ಹಮ್ನಾ ದಕ್ಹಿಯೆಳ ಅರಾಮ ಕರಾಡಿಸ ಕದ್ಯೊ. 8 ತೆಳಾಮಾ ಬೊಜನ ರುತನೆ ಮಾರಿ ದಿಕ್ರಿ, ಐಕ, ಮಾರು ಖೆತರ ಛೊಡಿನ ಬಿಜಾ಼ವೊನಾ ಖೆತರಮಾ ಜೌ಼ ನಕೊ ಮಾರಿಯೊ ಹೆಣ್ಣ ಆಳೊನಾ ಕ್ಹಾತೆ ರ‍್ಹೈ. 9 ಮಾರಾ ಆಳೊ ಕಾಟಾನಾ ಹುತಿ ಕಯಾ ಖೆತರೆ ಜಾ಼ವಸ ತೆ ಖೆತರೆ ತುಬಿ ಜಾ಼ ತುನೆ ಕುನ್ನಜ಼ ಮುಟ್ಟು ನೈ ಕೈನ ಮಾರಾ ಗಂಡ ಆಳೊನೆ ಅಪ್ಪಣೆ ದಿದ್ಯೊಸ. ತುನೆ ತರಕ್ಹ ಲಾಗಿಮ ಮಾರ ಸೆವಕೊ ತುನೆ ಪಾನಿ ಲೈನ ಪಾನಿ ಭರಲಮಾ ತು ಗೈನ ಪಾನಿ ಪಿ ಕದ್ಯೊ.

10 ರುತ ತಿನೆ ಪಗೆ ಪಡಿ ಬಿಜಾ಼ ದೆಶವಾಲಿ ರ‍್ಹಯಲ ಮನೆ ಅಕ್ಲಿ ದಯಾ ಮಯಾ ಕಾ? ಕತಾಮಾ

11 ಬೊವಜ ತಾರೊ ಮಾಟಿ ಮರಲ್ಪರ ತು ತಾರಿ ಫೈನಾ ಕ್ಹಾತೆ ಮಯಾ ಕರಿನ ಮಾ ಬಾಪನೆ ಸ್ವಂತ ದೆಶ ಛೊಡಿನ ತು ನ್ಹ್ಯಾಲಕ್ಕಾ ಗ್ವತ್ತ ನೈಸೊ ಮನಕ್ಹೊಕನ ಐಸ ಕವಾನು ಮನೆ ಗ್ವತ್ತ ಛೆ. 12 ತು ಕರಲ ಉಪಕಾರನೆ ಬದಲಿ ಯಹೊವಾ ತುನೆ ಉಪಕಾರ ಕರಾದೆ; ತು ಕಿನಾ ರೆಕ್ಯಾವೊಮಾ ಝಾಕಿಲಿವಾನೆ ಆಯಿಸ ಇಸ್ರಾಯೆಲನೊ ಕ್ಹುದಾ ಥಯಲ ಯಹೊವಾ ತುನೆ ಆಸ್ರೊ ವರಿ ಪ್ರತಿಫಲ ದಿವಾದೆ ಕದ್ಯೊ.

13 ತೆಳಾಮಾ ತೆ ಮಾಲಕ ದಾಸಿ ಥಯಲವಾಲಿನೆ ಮನೆ ಮರಗ್ಯೊ. ಮಿ ತಾರಾ ದಾಸಿ ವ್ಹೈ ಕೈನ ಕವೈ ಲಿವಾವರಕ್ಹಿಬಿ ಯೊಗ್ಯ ನೈ ರ‍್ಹೈ ತಬಿ ಮನ ಮರ್ಗಿನ ಮಯಾಕ್ಹು ಬೊಲಾಡ್ಯೊಸ ಕದ್ಯೊ.

14 ಕಾವಾನೊ ವಕ್ಹತ ಥಾತಾಮಾ ತೆನೆ ಬಲೈನ ರೊಕ್ಲೊ ಭಾಗಿನ ಖಾಟೊ ರಕ್ಹಮಾ ದುಬೈನ ಖಾ ಕೈನ ಬಲೌ ಕತಾಮಾ ತೆ ಕಾಟಾಲಾವೊನಾ ಕ್ಹಾತೆ ಬೈಟಿತಿ. ಎ ನೈಸೊ ತೆ ತಿನೆ ಬಳಲ ತೆನೆ ದಿದ್ಯೊ. ತೆ ಪೆಟ ಭರಿನ ಖೈನ ವರಿ ತಿಕನ ಉಗ್ರಲ ರ‍್ಹೈ. 15 ತೆ ಥಯಲ್ಪರ ಫರಿನ ಕಾಮ ಕರಾನೆ ಉಟ್ತಾಮಾ ಬೊವಜ ತಿನಾ ಸೆವಕೊನೆ ಭೆಗಿನ ಕಾಮ ಕರಾಡಿ ನತ್ತಿ ಕೈನ ತಿನೆ ಶಿಟ್ಟ ಕರೊ ನಕೊ. 16 ಭಾರಾವೊಮಾತು ತೆನೆ ಕಿತ್ತಿನ ಹೆಟೊ ಪಾಡೊ; ತೆ ಪಡಲನೆ ಮಳಾವಾದೆ. ತಿನೆ ಭುಚ್ಕಾಡೊ ನಕೊ ಕದ್ಯೊ.

17 ರುತ ಕ್ಹಾಂಜಲಕ್ಕಾ ಕಾಟಿನ ಮಳಾಯಲ ಬಡಾತಾಮಾ ಕಮ್ಸೆ ಕಮ್ಮ ಚಾರ ಪೈಲಿ ಘೌ ಮಳ್ಯಾ. 18 ರುತ ತೆ ಘೌ ಉಚೈನ ತಿನಿ ಫೈಕನ ಲೈನ ದೆಕಾಡಿ ವರಿ ತೆ ಖೈನ ಉಗ್ರಲ ಅನ್ನ ಲೈನ ದಿದಿ, 19 ತಿನಿ ಫೈ, ತು ಕಿನಾ ಖೆತರಮಾ ಕಾಮ ಕರಾಡಿತಿ? ಕಿಜಾ ಕಾಮ ಕರಾಡಿತಿ? ತುನೆ ಮರ್ಗಲವಾಲಾನೆ ಚೊ಼ಕು ಥಾವಾದೆ ಕತಾಮಾ ರುತ ಮಿ ಕಿನಾ ಖೆತರಮಾ ಕಾಮ ಕರಾಡಿತಿ ತಿನು ನಾಮ ಬೊವಜ ವ್ಹೈ ಕೈನ ಕದಿ.

20 ತೆಳಾಮಾ ನವೊಮಿ, ರುತನೆ ಮರಲವಾಲಾವೊನೆ ಜಿವ್ತಾರ‍್ಹಯಲವಾಲಾವೊನೆ ಮರ್ಗಾಲಾನೆ ಯಹೊವಾಕ್ಹು ತಿನಿ ಆಶಿರ್ವಾದ ಥಾವಾದೆ ಕೈನ ತೆ ಮನಕ್ಹ ಅಪ್ನೊ ಸಂಭಂದಿಕಮಾನೊ ಯಕ್ಲೊ ವ್ಹೈ ಕೈನ ರುತ ಕನ ಕದಿ.

21 ತೆಳಾಮಾ ಮೊವಾಬ್ಯನಿ ಥಯಲ ರುತ ಎ ನೈಸೊ ತೆ ಮನಕ್ಹೊ ಸುಗ್ಗಿ ಮುಗ್ದೆಲಕ್ಕಾ ಮಾರಾ ಆಲೊನಾ ಕ್ಹಾತೆಜ಼ ಕಾಮ ಕರ ಕೈನ ಕದ್ಯೊಸ ಕದಿ.

22 ನವೊಮಿ ತಿನೆ ವ್ಹೌನೆ ಮಾರಿ ದಿಕ್ರಿ, ತು ತಿನಿಯೊ ಹೆಣ್ಣ ಆಳೊನಾ ಕ್ಹಾತೆಜ಼ ಜಾ಼ವಾನು ಚೊ಼ಕ ವ್ಹೈ ಕೈನ ಕದಿ. ಬಿಜಾ಼ವೊನಾ ಖೆತರಮಾ ಜಾ಼ವತ್ತೊ ತುನೆ ಸುಬಿ ತ್ರಾಸ ಥಾತುತು. 23 ತಿನಾ ನಿಂಗತಜ಼ ಫೈನಾ ಘರ್ಮಾಜ಼ ರ‍್ಹೈನ ಜವೈ ಘೌ ವರಿ ಘೌನಿ ಸುಗ್ಗಿ ಮುಗ್ದೆಲಕ್ಕಾ ಬೊವಜನನಾ ಹೆಣ್ಣ ಆಳೊನಾ ಕ್ಹಾತೆಜ಼ ತೆನಿಯೊ ಇನಾಡಿತಿ.