Rute 3

ರುತನೆ ಮಾಟಿ ಮಳಲ

1 ಯಕ್ಕ ಸಲಾ ನೊವೊಮಿ ವ್ಹೌನೆ "ಮಾರಿ ದಿಕ್ರಿ ತು ಗ್ರಹಿಣಿ ಥೈನ ಸುಖಾಮಾ ರ‍್ಹವಾನು ಮಿ ಕೊಶಿಶ ಕರು ನೈ. 2 ತು ಕಯಾನಾ ಹೆಣ್ಣ ಆಳನಾ ಕ್ಹಾತೆ ಕಾಮ ಕರಿಸಿ? ತೆ ಭೊವಜನ ಹಮಾರಿ ಸಂಭಂದಿಕ ಥೈನ ರ‍್ಹವಸ್ತೊ! ತೆ ಆಜ಼ನಿ ರಾತಮಾ ಕಣಮಾ ಜವೆನು ಘೌ ತುರಸ್ತೊ. 3 ತು ಅಂಗ ಧ್ವನಿ ತೆಲ ಲಗಾಡಿಲಿನ ಚೊ಼ಕಾ ವಣ್ಣಾ ಫೆರಿಲಿನ ತ್ಯಾ ಜಾ. ತೆ ಅನ್ನಪಾನಿ ಲಿಯೆಲಕ್ಕಾ ತು ದಡಿ ರ‍್ಹೈನ, 4 ತೆ ಕ್ಹುರವಾನಿ ಜ಼ಗಾ ವಳಕ ಕರಿನ ಗೈನ ತಿನಾ ಪಗೊಪರ ವಡಿಲಿದಲ ಜಾಡಿ ಸರಕೈನ ತಿನಾ ಪಗೊಕನ ಕ್ಹುರೆ; ಪಾಚಾ಼ತು ತು ಕರುಕವಾನು ತುನೆ ತೆ ಕವಸ" ಕದಿ.

5 ತೆವಾತೆ ರುತ ತಿನೆ ಫೈ ತು ಕಿಮ್ಮ ಕಸಿ ತಿಮ್ಮಜ಼ ಕರುಸ" ಕದಿ.

6 ತೆಳಾಮಾ ತೆ ಕಣಮಾ ಗೈನ ತಿನಿ ಫೈ ಕದಲ ತಿಮ್ಮ ಕರಿ. 7 ಬೊವಜ ಅನ್ನ ಪಾನಿ ಖೈನ ಕ್ಹುಶಿಕ್ಹು ಅನಾಜ಼ನಿ ಢಿಗನಾ ಬಾಜು಼ಮಾ ಕ್ಹುರಲ್ಪರ ತೆ ದಡಿನ ಐನ ತಿನಾ ಪಗೊಪರ ವಡಿಲಿದಲ ಝಾಡಿ ಸರಕೈನ ತ್ಯಾಜ಼ ಕ್ಹುರೈ. 8 ಅರ್ದಿರಾತಮಾ ತೆ ದಾಣಗೊ ಉಟಿನ ದೆಕ್ತಾಮಾ ತಿನಾ ಪಗೊಮಾ ಕ್ಹುರಯಲ ಬಾಕ್ಡಿನೆ ದೆಕಿನ ಅಜಬ ಥಯೊ. 9 ತೆಳಾಮಾ ತೆ ತಿನೆ ಕುನ್ನ ವ್ಹೈ ಕೈನ ಪುಚ್ತಾ಼ಮಾ

ತೆಳಾಮ ತೆ ಮಿ ತಾರಿ ದಾಸಿ ಥಯಲ ರುತ ವ್ಹೈ ತು ಹಮೊನೆ ನಜಿಕೊನೊ ಸಂಭಂದಿ ರ‍್ಹಯಲಹುತಿ ತು ವಡಿಲಿದಲ ಜಾಡಿ ಮಪರ ವರಾಡ ಕದಿ.

10 ತೆಳಾಮಾ ತೆ ಮಾರಿ ದಿಕ್ರಿ ಯಹೊವಾಕ್ಹು ತುನೆ ಆಶಿರ್ವಾದ ಥಾವಾದೆ; ತು ಗರಿಬೊನೆ ವರಿ ಸೌಕರೊನಾ ಜಾಂಜಿಮಾನೊನೆ ದೆಕಿನ ಗೈ ನೈ ಹಮ್ನಾ ತು ಭಕ್ತಿಮಾ ಪೈಲಾತಿ ಖಾಸ ದಿಕ್ಹ್ಯು. 11 ದಿಕ್ರಿ ಹಮ್ನಾ ಭುಚ಼ಕು ನಕೊ ತು ಮರ್ಯಾದಿ ವಾಲಿ ವ್ಹೈ ಕೈನ ಗಾಮ್ಮಾ ಗ್ವತ್ತ ಛೆ. ತಿನಾಹುತಿ ಕದಲ ಕ್ಹಾರುಜ಼ ಕರುಸ. 12 ಮಿ ನಜಿಕನೊ ಬಂದು ವ್ಹೈ ಕವಾನು ಕ್ಹರಿ ವ್ಹೈ, ವರಿಬಿ ಮತ್ತಿಬಿ ತುನೆ ನಜಿಕ ಥಾವಾಲೊ ಯಕ್ಲೊ ಛೆ. 13 ಆಜ಼ ರಾತೆ ನ್ಹ್ಯಾಜ಼ ರ‍್ಹೆ; ವ್ಹಂತಾ ತೆ ತಾರಿ ಜವಾಬ್ದಾರಿ ಲಿದ್ಯೊಮ ಚೊ಼ಕು ವ್ಹೈ; ನೈತೊ ಯಹೊವಾನಾ ಕ್ಹಮ ಮಿಜ಼ ತೆ ಕರುಸ. ಪಾಟ ಥಾಯೆಲಕ್ಕಾ ನ್ಹ್ಯಾಜ಼ ಕ್ಹುರೆ ಕೈನ ಕದ್ಯೊ.

14 ತೆ ತೆಳಕ್ಕಾ ತಿನಾ ಪಗೊಮಾಜ಼ ಕ್ಹುರೈತಿ, "ಯಕ್ಕ ಬಾಕಡಿ ಕಣನೆ ಐತಿ ಕವಾನು ಕಿನೆಜ಼ ಗ್ವತ್ತ ಥೌ ನೈ. ತೆ ಕದಲ ಹುತಿ ವಳಕಬಿ ಲಾಗು ನೈಸೊ ಯಕ್ಲು ಅಂದಾರು ರ‍್ಹತಾಮಾಜ಼ ತೆ ಉಟಿ. 15 ತೆಳಾಮಾ ತೆ ತಿನೆ ತಾರಿ ಘುಂಗಡಿ ವಚ್ಚಾ಼ ಕತಾಮಾ ತೆ ವಚ್ಚಾ಼ತಾಮಾ ಕಮ್ಸೆ ಕಮ್ಮ ತಿಮಾ ತನ್ನ ಪೈಲಿ ಜವೆ ಘೌ ಘಾಲಿನ ಉಚಾಯೊ. ತೆ ಗಾಮಮಾ ಗೈ , 16 ತೆ ತಿನಿ ಫೈಕನ ಆತಾಮಾ ತಿನಿ ಫೈ ಮಾರಿ ದಿಕ್ರಿ ತು ಗಯಲ ಕಾಮ ಸು ಥಯು

ಕತಾಮಾ ತೆ ತ್ಯಾ ಥಯಲ ಕ್ಹಾರುಜ಼ ಕದಿ 17 ತು ಖಾಲಿ ಹತೆ ತಾರಿ ಫೈಕನ ಜೌ ನೈ ಕೈನ ಕಮ್ಸೆ ಕಮ್ಮ ಪೈಲಿ ತನ್ನ ಪೈಲಿ ಜವೆ ಘೌ ದಿದ್ಯೊಸ ಕದಿ.

18 ತಿನಿ ಫೈ ಮಾರಿ ದಿಕ್ರಿ ಎ ಕಾಮ ಕಿಮ್ಮ ಥಾಸ ಕೈನ ಗ್ವತ್ತ ಥಾಯೆಲಕ್ಕಾ ಗಪ್ಪ ರ‍್ಹೆ; ಇ ವಕ್ಹತಮಾ ತಿನೆ ತೆ ಕಾಮ ಪುರಾ ಕರೆಲಕ್ಕಾ ಗಪ್ಪ ರ‍್ಹತೊ ನೈ ಕದಿ