Suun 18

Pal Bǝrnǝn mBabilon

1 Aɓwoon ɗese, ɓǝ nghan naa mee ngulepnaan npoo kǝ sham nɗǝǝn ɗengnaan. Ngulepnaan ɗesǝ wur kǝ iiko ɗeɗes zam. Mɓǝ peeɓang mǝ iiko wur nǝ ɓang yil nǝ kǝdǝng. 2 Shi ɗoo ɗeɗes ɓe wur le or:

<<Ɓal fi kǝ kyes! Ɓal fi kǝ kyes!

Yil nBabilon ɗeɗes

War kǝ ɗee a tulu

riin ɗebish mo

War ɗee a peetong mǝ

koo a riin ɗebish ɗeɗangyii,

War ɗee a peetong mǝ

koo a mbǝ ɗerap,

kǝ nyer ɗebish.

Kǝ koo a luwa ɗeɗang ɗe nyakkap.

3 Mɓeeɗe gyet gurum nyil mo shini-shini, gyet mo shwaa a am anab

mǝ ngaa ashak kǝ war.

Mishkoom mǝ yil ɗǝsǝ mo

gyet mo cin ngaa kǝ war

Kǝ nennwer

ɗe mǝ yil ɗesǝ mo,

moo long a shi lǝɓet mbǝ bii

kǝ kat war ɗe mǝ yil ɗese, ɗe nǝ met mǝ sat.>>

Kar Bǝ Dyeel Ɗe Nǝ Mbǝ Taa nBabilon

4 Ɗangɓe wen kǝlǝng mee ɗoo npoo

ɗe nǝ put nɗǝǝn ɗengnaan, nǝ sat nǝnee,

<<Wun nen fǝn mo,

wu put aku ndǝǝn war,

mɓekǝ taji mo cin kwat nwun ashak kǝ war mbǝ shikbish war nǝ mo kas,

Mɓekǝ taji wu lap memee nɗǝǝn jeel war nǝ mo kas.

5 Mbǝɗǝ shikbish war nǝ mo kǝ ak

kàa wul a ɗengnaan,

Naan kǝ yee

ɗakɗebish war mo.

6 Wu kwat war nciit

kǝ mbii ɗǝ war kǝ cin wun,

wu kwat war yitvǝl,

mbǝ mbii ɗe gyet war kǝ cin mo nwun.

Wu ɗoo mo yitvǝl, kaaɗe gyet

war kǝ kam nwun ɗin

ɗekwat war sǝ.

7 Wu yit kǝ kwat ɗe nǝ a mǝ kar kǝ jeel

ɗe war lap nǝ, nǝ ɗee nciit-nciit kǝ ram kǝ long ɗe gyet war shin nkáa war,

mɓeeɗe war nkaa ɗyeep kaa nnee

<wen a mishkoom ɗe mat. baa wen a matkaa,

baa wen cam

wal maap kas.>

8 Mɓemǝnǝ ɓe, jeel war nǝ mo njì taa

nkaa war ndi mman, mɓeeɗi a parpuus mǝndong,

ɓe muut kǝ maap, kǝ neen, mo ntaa nkaa war.

Ɗangɓe wus ncaan war,

mbǝɗe Daa Naan

ɗe wur ntokɗyeel nwar,

wur kǝ iiko ɗes.

9 <<Katɗang mishkoom mǝ ɓǝm-yil ɗesǝ mo, ɗe gyet mo cin ngaa ashak kǝ war, ɗe gyet mo se pak long war nǝ mo ashak kǝ war, ɓe mo nnaa ɗyeel ɗe nǝ caan war, ɓe mo nwal kǝ maap mbǝ war. 10 Mbee jeel ɗeɗes ɗe war shwaa nǝ. Ɓe kǝǝrmuut nyaa mo, mbǝ mo nɗar a jong-jong kǝ moo wal ɗǝ, kǝ mo nsat nǝnee,

<<Jeel! Jeel mɓee wii yil

ɗeɗes Babilon!

Yil ɗe gyet wii kǝ iiko ɗes,

nɗǝǝn awa mǝndong,

ɓe kyes fii nǝ jì wul!>>

11 <<Nennwer ɗe mo ɓǝm-yil nǝ mo, mo nwal kǝ maap nkaa war, mbǝɗe baa mee ngwe kuɗi, nseet lée mo mo kas. 12 Lée nwar ɗe mo a zinariya mo, kǝ mǝ azurfa mo, kǝ mǝ nghǝk ɗeret ɗe moo mǝlep nyilaknyilak, kǝ nlǝr ɗe rǝret mo shini-shini, kǝ nlǝr ɗe pan a naat mo, kǝ shiyeep ɗeret mo, kǝ mbii ɗe mo ɗak mo a shi oos nǝ mo, kǝ shiyeep ɗekǝrǝm mo, kǝ mbǝɗe mo ɗak mo a shi shool ɗeret mo, kǝ nghǝk ɗeret ɗe mǝ ɗyiklu mo, 13 kǝ bii ɗe kǝ toos shangshang, kaa sinamon, kǝ le shǝta, meer, kǝ frankisens, kǝ mwoor ɗe gurum kǝ caan, mbǝkǝ wur kǝlǝng toos ɗeshang nǝ ɗe sǝ, kǝ mǝ am anab, kǝ mǝ mwoor paat, kǝ mǝ áas ɗeret mo, mǝ alkama, kǝ mǝ randong mo, kǝ tǝm mo, kǝ mǝ bǝring mo, kǝ mǝ keke bǝring, kǝ gurum mo ɗi mo sǝrep mo kaa kǝrem mo sǝ>>

14 Nennwer nǝ mo nsat nwar nǝnee,

<<Jir mbii ɗi rǝret ɗe ɗi yii leyit nkaa mo,

moo ɗel dǝm jee.

Long fii mo jir,

kǝ rak fii nǝ mo jir,

mo nloom.

Baa wii kuɗi

yii kat

mo ɗi zak kas.>>

15 Nennwer ɗe mo seet kǝ mbii ɗesǝ mo, ɗe mo kat long pǝ war di, mo nɗar jong-jong, kǝ kǝǝrmuut fes yaa mo, mbǝ shwaajeel ɗe war nkaa shwaa nǝ mo nwal kǝ maap. 16 Har mo nfwo ruruu nǝnee,

<<Jeel fii, jeel fii, wii yil ɗǝɗes,

gyet yam, ɓe wii yii jwal a lee mulki ɗi rǝret mo

ɗetap piyaa mo, kǝ ɗetap naat juwal mo.

Ɗi mo mǝlep shi zinariya,

kǝ shi nghǝk ɗekǝrǝm

ɗi mo,

kǝ lilliu.

17 nƊǝǝn awa mǝndong ɓejee,

ɓǝ long fii ɗeɗes sǝ mo ɗee a ɗebuu!>

Jir nentung tii am mo, kǝ gurum ɗe moo ghǝr mo ntii nǝ mo, kǝ nen ɗe moo kat mbii teer mo mo a nɗǝǝn baahar mo, das ɗesǝ mo jir, mo nɗar jong-jong, kǝ war. 18 Katɗang mo nnaa ɗyeel mǝ caan war nǝ kàa, ɓe mo nfwo or shiɓal nǝnee, <Baa mo cam kat mee yil ɗeɗes kaa yil sǝ kas.> 19 Mo kok yil le nkaa káa mo mo, ashak kǝ wal, kǝ maap nǝnee,

<<Jeel fii! Jeel fii, wii yil ɗeɗes,

Gyet yam ɓe nen

ɗe mo kǝ tii mo nkaa baahar,

moo kat long a mbǝ long fii,

mɓe ndǝǝn awa mǝndong,

ɓe wii ɗee

a ɗelǝloom jee!>

20 Wii ɗengnaan, yi cin retnyit,

mbǝ mbii ɗe nǝ kat yil ɗesǝ war.

Wu cin retnyit, wun nen Naan mo,

kǝ wun jeplep mo, kǝ nensatpwoo Naan mo,

mɓeeɗe Naan wur canɗyeel nwar,

mɓee mbii ɗe gyet war

kǝcin mo nwun.>>

Kyes mBabilon

21 Ɗangɓe mee ngulep Naan ɗeɓal, wur mang mee nghǝk ɗeɗes kaa fin ɗyees ɗak sǝ, wur vwet nǝ nɗǝǝn am baahar, kǝ wur sat nǝnee,

<<Mo mɓwet Babilon yil ɗeɗes

sǝ a shiɓal aasǝ zak,

baa mo nkuɗi

kǝ naa war ɗe zak kas.

22 Baa mo mbaa kǝlǝng wal kǝ ndeng-ndeng, kǝ ɗoo nenkook mo,

kǝ wal mɓel, kǝ wal nfeer mo nɗǝǝn wii Babilon kas.

Baa mo nwaa kat mee ngucìn ɗak shi sar,

mǝ koo a kaan ɗak ɗeɗangyi nɗǝǝn wa kas.

Baa mo waa baa kǝlǝng

wal nfin ɗyees

ɗakmo nɗǝǝn wii kas.

23 Baa mee wus ngyem nwaa baa ɓangpee ɗi nɗǝǝn wii kas.

Baa mo waa baa kǝlǝng mee ɗoo mǝshpwoo kǝ matpoo nɗǝǝn wii kas.

Gyet yam, ɓe nennwer fii nǝ mo, a nen ɗǝnan-nan mǝ yil nǝ mo.

Gyet a shi mulgut mǝ soot fii,

ɓe yii le gurum ɗe mo ndǝǝn yil nǝ mo jir,

mo taa mer ar ɗi buu.

24 Gyet a nɗǝǝn Babilon,

ɓe mo kat toom

nensatpwoo Naan mo,

kǝ toom mǝ nen Naan mo, kǝ toom mǝ gurum

ɗe gyet mo saa mo jir nɗǝǝn ɓǝm-yil nǝ.>>