Apocalipse 4

Seyil nNaan aɗeng

1 Aɓwoon mǝnǝ, ɓe an ɗiyeep yit fǝn. Ɓe an naa mee polu ɗe nǝ a wuwang nɗǝǝn ɗengnaan, ɓe an kǝlǝng ɗoo ɗe nǝ wal nciit kǝ feer, ɗe ɗí nǝ katpwoo kǝ an nshee. Nǝ sat an nǝnee, <<A kàa mpesi. Wen nkám nwaa mbǝɗe ting mo ncìn aɓwoon mbii ɗesǝ mo.>> 2 Aɓet-Aɓet, ɓe Riin Naan wur jì ɗel nɗǝǝn an, ɗangɓe nɗǝǝn ɗengnaan, ɓe an naa mee peetong mǝ mulki, ɗe mee gwar kǝ tong nkaa ne. 3 Yit kǝ gwar ɗe wur tong nkaa nǝ, nii lapwus kaa jwak ɗeret ɗe moo pet mo a jaspa, kǝ kaneliyan, kǝ lilliu ɗe nǝ lapshak kǝ mee jwak ɗe moo pet nǝ a emiral, mo tap neer peetong mǝ mulki nǝ cǝǝrkaat. 4 Mee peetong mǝ mulki mo laarvǝl baafeer, mo neer peetong mǝ mulki nǝ le nnaar. Nennan mo laarvǝl baafeer, moo tong nkaa peetong mǝ mulki ɗiisi nǝ mo. Nennan ɗesǝ nǝ mo, moo lep a lée ɗepiyaa-piyaa mo, kǝ zak, mo lep a mbekáa mǝ mulki, ɗe mo ɗak mo a shi zinariya. 5 Mǝlep kǝ pee kǝ put ɗe nɗǝǝn peetong mǝ mulki nǝ, kǝ or ɗeɗes kǝ nluu pǝrep. Akiyeen kǝ peetong mǝ mulki ɗesǝ nǝ mo, ɓe ngyem mo pwoovǝl mo nkaa lapwus. A ɗesǝ nǝ mo a Riin Naan ɗe pwoovǝl sǝ mo. 6 Kǝzak, akyeen kǝ peetong mǝ mulki nǝ, ɓe an naa mee mbǝ káa baahar sǝ, ɗe nǝ mǝlep kaa gǝlas sǝ, kǝ nǝ ɗong kyet-kyet. Mee mbǝɗe mo kǝ seen, mo feer, moo ɗar peefeer, cǝǝr mɓwoon kǝ peetong mǝ mulki ɗeɗes nǝ, mbǝ ɗefeer ɗe mo kǝ seen nǝ mo, mo gam kǝ yit nkoop mɓwoon kǝ nkoop ndǝǝn. 7 Ɗin nshee nǝ, lapshak kǝ nvar, ɗevǝl nǝ lapshak kǝ kus randong, ɗekun nǝ, ɓe yit kǝ nǝ nciit kǝ mǝ gurum, ɗefeer nǝ lapshak kǝ puul ɗe nǝ nkaa yool ncáap sǝ. 8 Koo a ɗeɗangyi ndǝǝn mbǝɗe mo kǝ seen feer ɗesǝ nǝ mo, ɓe nǝ kǝ cáap mo peemee, kǝ mo kǝ yit cǝǝr kat kǝ nɗer caap mo. Mpar kǝ puus, baa mo nok sat nǝnee,

<<Ɗǝɓang, ɗeɓang, ɗeɓang,

a wur a ɗe yam,

kǝ a wur a ɗe yaksǝ,

kǝ a wur a ɗǝ mǝ ji zak.>>

9 Kaaɗe mbii ɗefeer ɗe mo kǝ seen ɗesǝ mo, mo kwoop, kǝ mo cin ɗeɗes mǝ pǝlang, pee gwar ɗe wur tong nkaa peetong mǝ mulki nǝ, a wur ɗe wur kǝ seen mbe ngaa-ngaa. 10 ɓe Nennan ɗe laarvǝl baafeer sǝ mo, mo zǝm ntoom kǝ gwar ɗe wur tong nkaa peetong mǝ mulki nǝ, mo seyil nwur. Wur ɗe wur mmeen mbe ngaa-ngaa. Nennan ɗesǝ nǝ mo shwat mbiikáa ɗe mǝ mulki mo mo ntoom wur, ɗang mo nkaa sat nǝnee,

11 <<Daa Naan fun

a waa mak lap ram,

kǝ kwoop, kǝ ɓal

A waa ɗak mbǝ mo ɗe jir,

A shi pan fwa ɓe

waa ɗak mo ɗǝ, kǝzak,

A waa cin nseen mo.>>