Apocalipse 5

Ɓǝǝt-haal ɗeciciɓet kǝ Laatǝm

1 Wen naa mee ɓǝǝt haal ɗe nǝ a ciciɓet nɗǝǝn sarse kǝ gwar ɗe wur tong nkaa peetong mǝ mulki nǝ. Mo ran-ran nkaa ɓǝǝt haal ɗesǝ nǝ, nkoop mɓwoon kǝ nkoop nɗǝǝn zak. Mo lus mo pwoovǝl shi stam. 2 Ɗangɓe wen naa mee ngulep kǝ Naan ɗǝɗes, ɗe wur nkaa satpwoo ɓalɓal nǝnee, <<A wii mmak fǝlǝp káa kǝ <<stam ɗe pwoovǝl nǝ mo, <<mbe kǝ wur wang ɓǝǝthaal <<ɗeciciɓet nǝ ɗe ye?>>

3 Mbe baa mee gurum nɗǝǝn ɗengnaan, koo nɗǝǝn yil ɗese, koo nder kǝ yil nǝ, ɗe wur mak wang ɓǝǝt haal ɗesǝ nǝ, kǝ wur mak naa ɗǝǝn nǝ ɗe kas. 4 Ɓe wen wal hakyeng, mbǝɗe baa mo kat mee gurum ɗe wur mak wang ɓǝǝthaal nǝ, koo naa ɗǝǝn nǝ kas. 5 Ɗangɓe memee nɗǝǝn nennan nǝ mo, sat an nǝnee, <<Taji a wal kas, a naa mbwoor nɗang kǝ Juda, kǝ nɗang kǝ Devid wur kǝ se koorong. Wur mmak fǝlǝp nbii ɗe mo lwas nǝ, kǝ wur wang ɓǝǝt haal nǝ, kǝ mbii lwas ɗepwoovǝl nǝ mo.>>

6 Ɗangɓe an naa mee Laatǝm kǝ naapee kaa ɗe ge gap sǝ, kǝ ɗar nnaar kǝ peetong mǝ mulki nǝ mo, mo neer wur cǝǝr kat kǝ mbǝ ɗefeer ɗe mo kǝ seen sǝ mo, kǝ nennan ɗe sǝ mo. Laatǝm ɗesǝ nǝ kǝ soom mo pwoovǝl, kǝ yit mo pwoovǝl zak. Ɗese nǝ mo a Riin kǝ Naan ɗe pwoovǝl sǝ mo, ɗe Naan wur lep mo koo a pee ɗeɗangyi nɗǝǝn yil ɗese. 7 Laatǝm ɗesǝ nǝ yool dǝm lap ɓǝǝt haal ɗeciciɓet ɗe nǝ nsarse kǝ gwar ɗe wur tong nkaa peetong mǝ mulki ne. 8 Kaaɗe wur lap ɓǝǝthaal ɗesǝ nǝ, ɓe mbǝɗe mo kǝ seen feer sǝ mo, kǝ nennan ɗe laarvǝl baafeer sǝ mo, mo kurum nyil, ntoom kǝ Laatǝm nǝ. Koo a weye nɗǝǝn nennan ɗe laarvǝl baafeer sǝ mo, ɓe mo kǝ nɗeng-nɗeng, mo kǝ yaa ɗaa shool, zinariya, ɗe nǝ gam kǝ mee mbiizuum ɗeshang. Mbiizuum ɗesǝ nǝ a ɗangnaan kǝ nen kǝ Naan mo. 9 Mo mang mee kook ɗepwoo nǝnee,

<<A wa a mak

mbǝ a mang ɓǝǝt haal nǝ,

kǝ a wang lwas nǝ mo,

mbǝɗe gyet mo kǝ tu waa,

kǝ a shi toom fwa,

ɓe a waa seet gurum mo ɗes,

kǝ a jì kǝ mo nDaa Naan.

Nen ɗe waa seet nǝ mo,

mo put a ndǝǝn koo a soon ɗeɗangyii.

Kǝ koo a ndǝǝn lespwoo ɗeɗangyii,

kǝ koo a nɗǝǝn gurum ɗeɗang mo yii,

kǝ koo a nɗǝǝn yil ɗeɗangyii zak.

10 Waa le mo ɗee a mishkoom,

kǝ mo ɗee a pris mo cin ɗak nNaan fun,

kǝzak, mo se mulki nkaa mo nɗǝǝn yil ne.

11 Kaaɗe naapee, ɓe an kǝlǝng ɗoo kǝ nenlep Naan mo ɗes, ɗe mo ngal kaapaat nkaa ngal kaapaat, ɗe mo neer peetong mǝ mulki nǝ cǝǝrkaat, kǝ mbii ɗefeer ɗe mo kǝ seen sǝ mo, mo neer mbetong mǝ mulki nǝ kǝ Nennan sǝ mo. 12 Mo cin kook shi ɗoo ɗeɗes nǝnee,

<<Laatǝm ɗe gyet mo kǝ tu nǝ,

a wur mak lap,

iiko kǝ long, kǝ seen, kǝ ɓal,

kǝ ɗeɗes kǝ ram, kǝ kwoop.>>

13 Ɗangɓe an kǝlǝng mbǝɗe mo ɗak mo jir, ɗe mo nɗǝǝn ɗengnaan, kǝ ɗe mo nɗǝǝn yil, kǝ ɗe mo nder kǝ yil, kǝ ɗe mo nkaa am, kǝ mbǝɗe mo nɗǝǝn mo jir, mo cin kook nǝnee,

<<Mbee wur ɗe wuu tong nkaa

peetong mǝ mulki,

kǝ Laatǝm, wu yit kǝ mǝ kwoop wur,

kǝ shin ɗeɗes nwur,

kǝ ram, kǝ iiko

kǝ ɓal ngaa-ngaa.>>

14 Ɗangɓe mbǝɗe mo kǝ seen feer sǝ mo sat nǝnee, <<nǝ akǝ sǝ.> ɗang Nennan sǝ mo nkurum furum, kǝ mo seyil ɗe nwur.