قٍ قْلْ قْلّ 20

عِبُرَهِمَ نُن عَبِمٍلٍكِ

1 عِبُرَهِمَ نَشَ سِفَ نٍفٍوِ بْشِ مَ، عَ سَبَتِ كَدٍ سِ نُن سُرُ تَفِ. نَ دَنفِ شَنبِ عَ نَشَ سِفَ فٍرَرَ، عَ سَشَنيِ رَبَ مّننِ. 2 عِبُرَهِمَ نَشَ عَ قَلَ مّننِكَيٍ بّ عَ شَ فِنّ سَرَ شَ قٍ رَ، «ﭑ شُنيَ فِنّمَ نَن عَ رَ.» نَ كُي فٍرَرَ مَنفّ عَبِمٍلٍكِ نَشَ سَرَ تٌنفٌ.

3 كْي تٌ سٌ، عَلَ نَشَ عَ مَسٍن عَبِمٍلٍكِ بّ شِيٍ كُي، «عِ قَمَ نّ قَشَدٍ يِ فِنّ شَ قٍ رَ، عِ نَشَن تٌنفٌشِ، بَرِ مَ شّمّ تَا عِدْشْي نَ عَ رَ.» 4 نَ تّمُي عَبِمٍلٍكِ مُ نُ عَ مَكْرّشِ عَ رَ. عَ نَشَ عَ يَابِ، «ﭑ مَرِفِ، عِ قَمَ نّ سِ تِنشِنشِ شَ قٍ كَنَدٍ؟ 5 عِبُرَهِمَ عَ مَسٍن نّ ﭑ بّ، عَ يِ فِنّ عَ شُنيَ فِنّمَ نَن لَنشِ عَ مَ. فِنّ قَن نَشَ عَ قَلَ ﭑ بّ، عَ تَارَ نَن لَنشِ عِبُرَهِمَ مَ. ﭑ نَشَن نَبَشِ، ﭑ نَ رَبَشِ ﭑ بْحّ قِيشّ نَن نَ.» 6 عَلَ مَن نَشَ عَ مَسٍن عَ بّ نَ شِيٍ كُي، «ﭑ تَن يَتِ، ﭑ نَ كٌلٌن عِ قٍ نَشَن نَبَشِ، قٍ كٌبِ شَ مُ عَ رَ. ﭑ تَن نَن مَن عَ نِيَشِ، عِ مُ نْشِ يُنُبِ قٍ رَبَدٍ ﭑ نَ. نَ نَن عَ تٌشِ ﭑ مُ عَ لُشِ عِ شَ عَ قِندِ عِ شَ فِنّ رَ. 7 يَكْسِ، يِ فِنّ رَفبِلٍن عَ شَ مْرِ مَ. نَمِحْنمّ نَن عَ رَ. عَ قَمَ نّ عَلَ مَشَندِدٍ عِ بّ، عَلَكٌ عِ نِي رَتَنفَمَ كِ نَشّ. كْنْ شَ عِ مُ عَ رَفبِلٍن عَ شَ مْرِ مَ، عَ كٌلٌن عِ قَمَ نّ قَشَدٍ وٌ نُن عِ شَ دٍنبَيَ بِرِن.»

8 عَبِمٍلٍكِ نَشَ كٍلِ سِننَنيِ مَ، عَ نَشَ عَ شَ كٌنيِيٍ بِرِن مَلَن. قٍ نَشَن بِرِن دَنفِشِ، عَ نَ تَفِ رَبَ عٍ بّ. فَاشُي فبٍفبٍ نَشَ عٍ سُشُ. 9 عَبِمٍلٍكِ نَشَ عِبُرَهِمَ شِلِ عَ شْنيِ. عَ نَشَ عَ مَشْرِن، «ﭑ يُنُبِ مُندُن نَبَشِ عِ رَ، عِ شَ نْ ﭑ تَن نُن ﭑ مَ حَمَ قِندِدٍ يُنُبِتْي بٍلٍبٍلٍيٍ رَ؟ عِ بَرَ قٍ رَبَ ﭑ نَ، قٍ نَشَن مُ لَن عَ شَ رَبَ. 10 مُنقٍ عَ نِيَشِ عِ نَ رَبَشِ؟» 11 عِبُرَهِمَ نَشَ عَ يَابِ، «ﭑ عَ قَلَ نّ مِشِ نَشٍيٍ بِرِن نَ بٍ، عٍ مُ فَاشُمَ عَلَ يَ رَ، عٍ قَمَ نّ ﭑ قَشَدٍ ﭑ مَ فِنّ شَ قٍ رَ. 12 نْندِ نَن عَ رَ، ﭑ شُنيَ نَن مَن لَنشِ عَ مَ. مُشُ بِرِن بَبَ كٍرٍن، كْنْ مُشُ نفَ كٍرٍن مُ عَ رَ. نَ نَن عَ تٌشِ عَ قِندِشِ ﭑ مَ فِنّ رَ. 13 عَلَ تٌ بَرَ ﭑ تٌنفٌ ﭑ بَبَ شْنيِ، ﭑ نَشَ عَ مَسٍن ﭑ مَ فِنّ بّ، ‹وٌن نَ سِفَ دّدّ، يَندِ ﭑ بَرَ عِ مَشَندِ عِ شَ عَ قَلَ، ﭑ شُنيَ نَن لَنشِ عِ مَ.›»

14 عَبِمٍلٍكِ نَشَ يّشّييٍ، سِيٍ، نِنفٍيٍ، نُن كٌنيِيٍ تٌنفٌ، عَ نَشَ عٍ بِرِن سٌ عِبُرَهِمَ يِ رَ. عَ مَن نَشَ عَ شَ فِنّ سَرَ رَفبِلٍن عَ مَ. 15 عَ نَشَ عَ قَلَ عِبُرَهِمَ بّ، «ﭑ مَ بْشِ بَرَ رَبِ عِ بّ. عِ نَ وَ لُقٍ دّدّ يِ بْشِ مَ، عِ شَ لُ نَا.» 16 عَ نَشَ عَ قَلَ سَرَ بّ، «عِ بَرَ عَ تٌ، ﭑ بَرَ كْبِرِ كٌلٍ وُلُ قِرِن سٌ عِ تَارَ يِ رَ، عَلَكٌ يَافِ شَ بَ عِ يَ رَ، عِ تَن نُن عِ مَلَن بٌورٍ بِرِن تَفِ. نَ كُي عِ شُن نَكٍلِ سْتْمَ نّ.» 17 عِبُرَهِمَ تٌ عَلَ مَشَندِ، عَلَ نَشَ عَبِمٍلٍكِ، عَ شَ فِنّ، نُن عَ شَ كٌنيِيٍ يَلَن، عَلَكٌ عٍ مَن شَ نْ دِ بَرِدٍ. 18 عَلَتَلَ نُ بَرَ دِبَرِتَرٍحَ رَفِرِ عَبِمٍلٍكِ شَ مِشِيٍ مَ عِبُرَهِمَ شَ فِنّ سَرَ شَ قٍ رَ.