1 عَننَبِ هَبَكُكُ شَ مَسٍنيِ نَن يَ، عَلَتَلَ نَشَن مَسٍن عَ بّ؛

2 «عَلَتَلَ، ﭑ شَ عِ مَشَندِ هَن تّمُي مُندُن؟

مُنقٍ رَ عِ مُ ﭑ مَ دُبّ سُشُشِ؟

ﭑ بَرَ ﭑ مَوَ عِ بّ فٍرٍ شَ قٍ رَ،

كْنْ هَن يَ عِ مُ نُ مُشُ رَتَنفَ.

3 مُنقٍ رَ عِ تِنشِ ﭑ يَ شَ كٌبِحَ تٌ؟

عِ تِنشِ يِ تْورّ مْولِ رَ مُنقٍ رَ؟

فبَلٌي نُن فٍرٍ نَ ﭑ يَ رَ تّمُي بِرِن.

لَنتَرٍيَ نُن كَلَمُي بَرَ فبٌ يّ.

4 مِشِيٍ بَرَ فبِلٍن عِ شَ سّرِيّ قْشْ رَ.

عٍ بَرَ عِ شَ يَامَرِ لُ نَ.

تِنشِنتَرٍ قُمَ تِنشِنتْي مَ.

سّرِيّ مُ نَ سْنْن.»

5 «وٌ وٌ يَ تِ حَمَنّيٍ رَ، وٌ عٍ مَتٌ.

وٌ كَابَمَ نّ، وٌ دّ عِشَرَ،

بَرِ مَ قٍ ندٍ نَ رَبَقٍ وٌ شَ وَشَتِ كُي

وٌ مُ لَمَ نَشَن نَ،

هَلِ نَ سَ قَلَ وٌ بّ.

6 ﭑ نَ كَلِدِكَيٍ شُن نَكٍلِقٍ.

سِ كِنِكِنِتَرٍ نَن عٍ رَ.

عٍ حَمَنّ فبّتّيٍ عِسَمَ

عَلَكٌ عٍ شَ بْشِيٍ رَ سُشُ، عٍ فبٍ مُ نَشَن نَ.

7 عٍ مَفَاشُ، عٍ مُ قَن.

عٍ يَامَرِ تِمَ يّتّ عِفبٌحَ نَن نَ.

8 عٍ شَ سٌييٍ شُلُن بَرَتّيٍ بّ.

عٍ شَاحّ وُلَءِ بَرٍيٍ بّ نَشٍيٍ مِنِمَ كْي رَ.

عٍ شَ سٌييٍ قَمَ سّنبّ رَ كٍلِقٍ يِرٍ مَكُيٍ.

عٍ مَقُرَ عَلْ سّفّ، نَشَن فٌرٌ مَ تْشْي يْرّ قْشْ رَ.

9 يِ حَمَ قَمَ كَنَرِ نَن شِلِ مَ،

عٍ يَيٍ بَنبَنشِ عٍ سِفَدٍ رَ.

عٍ مِشِ سُشُشِيٍ مَلَنمَ عَلْ مّيّنيِ.

10 عٍ يٌمَ مَنفّيٍ مَ، عٍ كُنتِفِيٍ مَيٍلٍمَ.

عٍ مُ فَاشُمَ يِرٍ مَكَنتَشِ يَ رَ.

عٍ بّندّ مَتٍمَ تّتّ رَ، عَلَكٌ عٍ شَ سٌ نَا كُي.

11 عٍ دَنفِمَ عَلْ قٌيٍ بٍلٍبٍلٍ.

عٍ فبَتَشِ قٍ حَاشِ رَبَدٍ.

عٍ بَرَ عٍ سّنبّ قِندِ عٍ شَ عَلَ رَ.»

12 ﭑ مَرِفِ سّنِيّنتْي، ﭑ مَرِفِ عَلَتَلَ،

عِ نَ نَ كَبِ قٍ قْلْ قْلّ.

عٍ مُ قَمَ مُشُ قَشَدٍ.

عَلَتَلَ، عِ قَمَ عٍ تَن نَن مَكِيتِدٍ.

ﭑ كَنتَ فّمّ نَ عِ تَن نَن نَ،

عِ عٍ حَشَنكَتَمَ نّ.

13 عِ يَيٍ سّنِيّن، عِ مُ وَ مَ كٌبِحَ تٌقٍ،

عِ قٍ حَاشِ شْنشِ.

عَوَ، مُنقٍ رَ عِ مُ يَنقَنتٍيٍ هَلَكِمَ؟

مُنقٍ رَ عِ مُ سٍسٍ نِيَمَ تِنشِنتَرٍيٍ رَ

عٍ تِنشِنتْييٍ تْورْ مَ تّمُي نَشّ؟

14 عِ بَرَ عَدَ مَدِيٍ لُ عَلْ يّشّ نَشٍيٍ نَ بَا مَ،

عَلْ سُبٍيٍ مَنفّ مُ نَ نَشٍيٍ بّ.

15 مُشُ يَشُييٍ مُشُ سُشُمَ كْنيِ رَ،

عٍ مُشُ سُشُمَ يّلّ رَ.

عٍ نَ فّ مُشُ مَلَندٍ بّكِ كُي، عٍ حّلّشِن.

16 نَ تّمُي عٍ سّرّشّ مْولِ بِرِن بَمَ عَ شَ يّلّ بّ،

بَرِ مَ نَ نَن بَرَ عَ نِيَ عٍ شَ قّيرّ فبٍفبٍ سْتْ.

عٍ دٌنسٍ قَنيِ دٌنمَ عَ تَن نَن سَابُي رَ.

17 عَ لَنمَ عٍ شَ يّلّ شَ نُ سِفَ يّشّيٍ سُشُ رَ،

عٍ شَ نُ بْنسْييٍ رَهَلَكِ كِنِكِنِتَرٍحَ كُي؟