12 «كْنْ لْننِ تَن تٌمَ مِندٍن؟

شَشِلِ قَنيِ لُدٍ نَ مِندٍن نَ؟

13 عَدَ مَ مُ لْننِ تِدٍ كٌلٌن.

لْننِ مُ تٌمَ دُنِحَ مِشِ بَلٌشِيٍ تَفِ.

14 عَ مُ تٌمَ دَبٌنيِ شُنفبٍ كُي،

عَ مُ تٌمَ بَا مَ.

15 عَ مُ سَرَ مَ شّيمَ رَ،

عَ مُ سْتْمَ فبٍتِ رَ.

16 عَ مُ سَمَ سِكٍيلِ مَ شّيمَ سّيتِ مَ،

شَ نَ مُ عَ رَ فّمّ تٌقَنيِيٍ سّيتِ مَ.

17 عَ مَنِيّ مُ نَ.

عَ مَنِيّ مُ قِندِ شّيمَ رَ،

عَ مُ قِندِ فّمّ تِنسٍشِ رَ،

عَ مُ قِندِ شّيمَ ثْوتِ تٌقَنيِ رَ.

18 لْننِ تِدٍ فبٌ دِيَمَن بّ،

عَ سْتْقٍ تِدٍ فبٌ فّمّ تٌقَنيِ بّ نَشَن تٌمَ بَا مَ.

19 لْننِ مَنِيّ مُ قِندِ فّمّ تٌقَنيِ رَ،

نَشَن كٍلِشِ يِرٍ مَكُيٍ.

عَ مُ مَنِيَمَ سِكٍيلِ رَ عَلْ شّيمَ.»

20 «نَ كُي، لْننِ كٍلِشِ مِندٍن؟

شَشِلِ قَنيِ لُدٍ نَ مِندٍن نَ؟

21 عَ نْشُنشِ نِمَسٍيٍ مَ نَشٍيٍ نَ بْشِ مَ،

عَ نْشُنشِ شْنِيٍ مَ نَشٍيٍ نَ كٌورٍ مَ.

22 عَلِفِيَمَ بَرَ عَ شَ قٍ ندٍ مّ،

كْنْ عَ مُ عَ كٌلٌن.