Lucas 7

سْورِ شُنمَتِ شَ دَنشَنِيَ

1 عِسَ تٌ فّ عَ شَ مَسٍنيِ بِرِن تِدٍ حَمَ بّ، عَ نَشَ سٌ كَثّرّنَمُ. 2 سْورِ مِشِ كّمّ شُنمَتِ ندٍ نُ نَ نَا، نَشَن مَ كٌنيِ شّمّ ندٍ نُ قُرَشِ، عَ فبٍ مُ نُ لُشِ عَ شَ قَشَ. كٌنيِ نَن نُ عَ رَ نَشَن نُ رَقَن عَ مَرِفِ مَ كِ قَنيِ. 3 سْورِ شُنمَتِ تٌ عِسَ شَ قٍ مّ، عَ نَشَ يُوِقِ كُنتِفِ ندٍيٍ شّي عِسَ شْن، عَ شَ قَ عَ شَ كٌنيِ رَيَلَن. 4 يُوِقِ كُنتِفِيٍ تٌ عِسَ يِرٍ لِ، عٍ نَشَ عَ مَيَندِ كِ قَنيِ، عٍ عَ قَلَ، «مِشِ نَ عَ رَ، عَ لَن نّ عِ شَ يِ قٍ رَبَ عَ بّ، 5 بَرِ مَ وٌن سِ رَقَن عَ مَ. عَ تَن نَن سَلِدٍ تِشِ مُشُ بّ.»

6 عِسَ نَشَ بِرَ عٍ قْشْ رَ. عَ تٌ مَكْرّ بَنشِ رَ، نَ سْورِ مِشِ كّمّ شُنمَتِ نَشَ عَ بٌورٍ ندٍيٍ شّي عٍ شَ عَ قَلَ عَ بّ، «مَرِفِ، عِ نَشَ عِ يّتّ تْورْ، بَرِ مَ نَ بِنيّ مُ نَ ﭑ يِ رَ عِ تَن شَ سٌ ﭑ مَ بَنشِ كُي. 7 نَ نَن عَ نِيَ، ﭑ حَن مُ تِن ﭑ يّتّ شَ قَ عِ شْن. عِ شَ يَامَرِ فبَنسَن نَن قِ، ﭑ مَ كٌنيِ شَ يَلَن. 8 ﭑ عَ كٌلٌن بَرِ مَ ﭑ قَن نَ مَنفّ ندٍيٍ شَ يَامَرِ بُن مَ، سْورِ ندٍيٍ مَن نَ ﭑ يِ، نَشٍيٍ نَ ﭑ قَن مَ يَامَرِ بُن مَ. ﭑ نَ عَ قَلَ سْورِ ندٍ بّ، ‹سِفَ،› عَ سِفَمَ نّ. ﭑ نَ عَ قَلَ، ‹قَ،› عَ قَمَ نّ. ﭑ نَ ﭑ مَ كٌنيِ ندٍ يَمَرِ، ‹يِ قٍ رَبَ،› عَ عَ رَبَمَ نّ.»

9 عِسَ تٌ عَ شَ وْيّنيِ مّ، عَ نَشَ كَابَ عَ شَ قٍ مَ. عَ نَشَ عَ يَ رَقِندِ حَمَ مَ نَشَن نُ بِرَشِ عَ قْشْ رَ، عَ عَ مَسٍن عٍ بّ، «ﭑ شَ عَ قَلَ وٌ بّ، ﭑ مُ يِ دَنشَنِيَ مْولِ تٌشِ هَلِ عِسِرَيِلَ بْشِ مَ.» 10 شّيرَيٍ تٌ فبِلٍن سْورِ شُنمَتِ شْنيِ، عٍ نَشَ كٌنيِ لِ، عَ يَلَنشِ.