Lucas 3

Yohanesé nané férimé kyaté rngali si bo rdéréré Jou

1 Tiberiusé re ndadi kolano ta pélóy po pemerentah Roma re taun nuén yófésó re pélimé, ga taga re Pontius Pilatusé ndadi gubernur po bótén Yudea, Herodesé ndadi kolano po bótén Galilea. Herodesé ni fténo njé, ngósno Filipusé. Filipusé ndadi kolano po bótén Iturea, re po bótén Trakhonitis. Tabóngo Lisania ndadi kolano po bótén Abilene. 2 Ta rdadi imam ta pélóy po agama Yahudi né, ngósnori Hanasé, i re Kayafasé. Yohanesé i po géwgów esó ta sésé bóto i, ta nbéklingén re nélówé pnuwé. Yohanesé njé, Zakharia ni ntu i. Pocé bóngo Jou Lahatala nméitén po Yohanes ni. 3 Rewóré ta néi, Yohanesé nfan po férimé bótén ta nérakén wóé Yordané né, bo nfébingo férimé kyaté-kyat ta si po géwgów esó ta nélówé pnuwé, se nécegé si faje, "Fngali mewé bo fdéréré Jou Lahatala, re fpo fié bo kbaptisé mewé. Necé ni ngale né, re fngali mewé se fdéréré Jou Lahatala."

4 Tatubé lima lesu, Jou Lahatala re néjaji Yohanesé njé bo nwómé. Ta Jou Lahatala nécegé né, nabi Yesaya nlefo po ni kitabé wlólo né, ni glio faje,

"Nase reni kyat isó ta bo nfébingo kyaté-kyat ta si po géwgów isó ta sésé bóto i njé, bóngo nélówé pnuwé.

I nase nécegé né nfakwat i, se néceg faje,

‘Re mnuw pana, Jou bo nwómé ro!

Se ffamówé re ffamétegél yéfén ta I bo ndélo i njé.

5 Ta nmawalwalé i né, fputo keé re bétbété.

Métét ta némógé né, fégéné keé.

Yéfén ta nmalolén pa, ffamaloléné keé.

Yéfén ta métegél pa, fputo keé re bétbété bo métegélé.

6 Re férimé kyaté nase rémnawé, fanfawa Jou Lahatala nfasalamaté kyaté-kyat ta re róri sélsólé né.’ "

7 Reni kyat félé ta rwóm po Yohanes ni bo nbaptis si. Se Yohanesé nécegé si faje, "Éé, mewé nte kyat léo mewé, mewé flé dolo guw ta nbisa i né. Mewé facogoma fwóm lima nte, Jou nase nfasólé mew pana. 8 Iga fatuw-fatuw ta re fngali mewé se fdéréré Jou, mewé mare fpe ta I nané mewé fpe né, bo tuné ta fatuw-fatuwé fdéréré Jou. Iga fatuw-fatuwé re fngali mewé, necé kfatailo mew ta dolo téntóném ta fié se ni pyono né ma fié. Mewé nte Abrahamé ni ntu re gbu mewé se masike fsólé ma fécegé cogo Jou Lahatala nase nfasólé mew pa. Fajé pa! Ya kécego mewé, bo Jou Lahatala wlo, lóyé nte ma bisa niwéné keé bo rdadi Abrahamé ni ntu re gbu. 9 Adeade ay isó ta ni pyono né lé, pocé nase reni kmón ta re rfaléléyé bo rcélpo keé ayé njé, ga réslayé keé i. Mewé ma, iga ta Jou nané mewé né ga fpe pa, nase góomi po lutén ta nléblobé njé ni wlólo."

10 Pocé tabóngo kyat félé ta si pocé né rutné Yohanesé, "Se sói ta mare amé kpe, bo Jou Lahatala ma nhukum am na?"

11 Tabóngo Yohanesé nécegé si faje, "Pai ta reni kabaya ay luwé, mare faaysó npo keé kyat ta re riri kabaya pa né. Pai ta re nó mnómé, mare ndo nóté po kyat ta re róri mnóm pa né."

12 Kyaté-kyat ta rarénfalutno pajaké né ma, rwómo Yohanesé bo nbaptis si. Se rutné i, "Guru, sói ta mare amé bo kpe?"

13 Tabóngo Yohanesé nécegé si faje, "Mew ta ffalutno pajaké né, ffalutno be féléo fawa ta pemerentah né rané mewé né, ndél pa bo fané si rbóngé."

14 Pocé ma reni tentara-tentara ta rwómé nóté, se rutné Yohanesé, "Iga amé, sói ta mare amé bo kpe?"

Tabóngo i nécegé tentara nesté faje, "Ma fngamo kyaté bo fyó keé riri pipisé né na, re ndél pa fécegé kyat rcólé bo riri pipisé né rpo keé mew na. Mewé nómi pélpólés ta étné be sni né, mare fbósémé nbungé mewé."

15 Pocé rlongé ta néceg fajé né, tabóngo kyaté-kyaté né rfatutén po wlori wlólo, "Nihalé Yohanesé njé Mesias óro, Kolano ta Jou Lahatala re néjaji nwómé bo nfasalamat ité, se téftón re tngongano I njé."

16 Mayta Yohanesé nécegé si faje, "Ya kbaptisé mewé né kpaké wóé, necé ni ngalé né, re fngali mewé se fdéréré Jou Lahatala. Mayta nase reni kyat isó nóté ta bo nwómé. Kyat ta njé I ya re I né, I ni kawasa lebe pélóyé. Se bo kasupété ni sandalé ni wólé né ma, pantas pa. Kyat ta njé I, ta nase nbaptisé mew re, Jou ni Rohé njé re luténé. 17 I bo nfarfara keé kyaté-kyat ta rdéréré I, re ta rdéréré I pa né. I nfara si né, kfatailo dolo kyat ta rtófé gandum re lalógéyé. Se ta fié né nisén po góo lo, ni konga né ga nwóté keé po lutén ta nléblobé se na nanénmót pa njé ni wlólo."

18 Yohanesé npo méitén félé po kyat félé ta si pocé né, bo rngali si re rdéréré Habar ta Fié lima Jou Lahatala ni.

19 Mayta nuéncó, Yohanesé nngamo kolano Herodes ta nkawasa po bótén Galilea né. Sababta, Herodesé néfsóo keé Herodiasé, ni tarino tuo i. Yohanesé ma nngamo Herodes félé nóté, sababta Herodesé npe sélsólé né ta délé félé. 20 Mayta Herodesé n’ngali i pa, se nbóng tadélé nlé i. Bóngo nfasungé keé Yohanes po bui wlólo.

Yohanesé nbaptis Yesusé

21 Ta Herodesé nfasung Yohanes po bui lo pafule né, Yohanesé re nbaptis kyat félé bóngo Yesusé nóté. Rewóré ta néi, Yesusé nméiténé ndé Jou Lahatala, télél be langété njé ntapówé. 22 Tabóngo Jou Lahatala ni Rohé njé nfaebé nópé né, ta dolo mané pombo isó. Pocé tabóngo rlongé Jou Lahatala nméitén yama langété né, néceg faje, "Awé nte Ya ntig Awé, Ya ta délé kmésié Awé. Sababta Awé ro ta mpe Ya wlegé njé séngséngé bóto i né."

Yesus Kristusé ni wes re félbawé

23 Yesusé nfamdié ni yabé né, ni halé ma ni taun nuén yófé tel pa. Kyaté né rféyal I né, Yusufé ni ntu I. Yusufé ni délut tatubé lima né ngósnori ta dolo faje: Yusufé ni moke Eli, 24 Eli ni moke Mataté, Mataté ni moke Lewi, Lewi ni moke Malkhi, Malkhi ni moke Yanai, Yanai ni moke Yusufé, 25 Yusufé ni moke Matica, Matica ni moke Amosé, Amosé ni moke Nahumé, Nahumé ni moke Hesli, Hesli ni moke Nagai, 26 Nagai ni moke Maaté, Maaté ni moke Matica, Matica ni moke Simei, Simei ni moke Yosekhé, Yosekhé ni moke Yoda, 27 Yoda ni moke Yohanané, Yohanané ni moke Resa, Resa ni moke Zerubabelé, Zerubabelé ni moke Sealtielé, Sealtielé ni moke Neri, 28 Neri ni moke Malkhi, Malkhi ni moke Adi, Adi ni moke Kosamé, Kosamé ni moke Elmadamé, Elmadamé ni moke Eré, 29 Eré ni moke Yesua, Yesua ni moke Eliezeré, Eliezeré ni moke Yorimé, Yorimé ni moke Mataté, Mataté ni moke Lewi, 30 Lewi ni moke Simeoné, Simeoné ni moke Yehuda, Yehuda ni moke Yusufé, Yusufé ni moke Yonamé, Yonamé ni moke Elyakimé. 31 Elyakimé ni moke Melea, Melea ni moke Mina, Mina ni moke Matata, Matata ni moke Natané, Natané ni moke Daudé, 32 Daudé ni moke Isai, Isaiyé ni moke Obeté, Obeté ni moke Boasé, Boasé ni moke Salmoné, Salmoné ni moke Nahasoné, 33 Nahasoné ni moke Aminadabé, Aminadabé ni moke Adminé, Adminé ni moke Arni, Arni ni moke Hezroné, Hezroné ni moke Peresé, Peresé ni moke Yehuda, 34 Yehuda ni moke Yakobé, Yakobé ni moke Ishaké, Ishaké ni moke Abrahamé, Abrahamé ni moke Terah, Terah ni moke Nahoré, 35 Nahoré ni moke Serugé, Serugé ni moke Rehu, Rehu ni moke Pelegé, Pelegé ni moke Eberé, Eberé ni moke Salmoné, 36 Salmoné ni moke Kenané, Kenané ni moke Arpaksaté, Arpaksaté ni moke Semé, Semé ni moke Nuh, Nuh ni moke Lamekhé, 37 Lamekhé ni moke Metusalah, Metusalah ni moke Henokhé, Henokhé ni moke Yaredé, Yaredé ni moke Mahalaleelé, Mahalaleelé ni moke Kenané, 38 Kenané ni moke Enosé, Enosé ni moke Seté, Seté ni moke Adamé, Adamé njé, Jou ta ntulada i, se npeé ni ntu i.