Marcos 16

Yesusé npangéné

1 Po ngénngan Sabtu ni dórémé, ngénngan Sabat ta kyat Yahudi né bisa rpe yabé pa né re télapésé né, pocé Maria kyat Magdala, Maria (Yakobusé ni neke), re Salomé rfané se rtukél yégét ta pépu mnó né, bo rélulo Yesusé ni mayaté njé tadolo kyat Yahudi rénpe né. 2 Se ni tómémóné né, mgo po ngénngan Minggu, ngénngané njé tagare ncó, bóngo si rfan néli po Yesusé ni kuburé lo. 3 Po yéfén fapéluno né, bóngo rfalécego faje, "Pésénte it néli nte, pai ta bo n’gali ité tfalilés lóy ta pélóo i njé, bo bisa tcung némin po kubur leg ta rfépelo Yesusé ni mayaté njé né?"

4 Waktu ta si re rérakén néli po kubur legé njé né, rémnaw lóyé njé re némlilésé. Momongo lóyé njé tadélé npélóyé.

5 Tabóngo rcung némin kubur leg ta rpeo Yesusé ni mayaté njé né, pocé ga rémnaw món isó njé npake juba mfusé, néntolén i po faspal wónéyé né. Ta si rémnaw i né, tadélé rémtaté. 6 Bóngo móné njé nécegé si faje, "Ma fémtat na. Mewé féyówé Yesus kyat Nazaret ta rcalib I njé! Mayta re tiso I pote, I re npangéné nmulé. Coba fémnawé, nete géwgów ta rfapelo ni mayaté njé né. 7 Se nte féléyé ro, néli bo ffébingo Yesusé ni motemote nesté, re Petrusé nóté, fécego si faje, ‘Yesusé re ntubé néli po bótén Galilea. Pocé ga nase fémnaw I, ta dolo I re nécego mewé né.’ "

8 Mépiné nesté rlongé ta nméiténé rewóré né, rémtat sogado rwéwewé se rcéreré nétó. Rémtaté le né sogado po yéféné lo ma rméitén facuci le ma tisé. [Re rwóm néli, bóngo réfétno Petrusé i re ni délé né sói ta si rlongé re rémnawé né le, réfétén ta nésé pana. Rewóré ta néi, Yesusé nané ni motemote nesté rfané bo réfétén Habar ta Fié né po férimé kyat ta po ngénngané ncóo sogado po ngénngané ncepé. Bo, férimé kyaté né bisa rhidup re Jou Lahatala sogado fajé néli le. Habar ta lima Jou ni né tadélé fié, bóngo nase myangés pa sogado fajé néli le.]

Yesusé nfaftulo ni diri po ni motemote nesté ni

9 Ta Yesusé npangéné nmulé né, mgo po ngénngan Minggu tómémóné. Ta po faiwóbno né, I nfaftulo ni diri ntubé po Maria kyat Magdala njé ni. Maria njé ta Yesusé nféungé setan séfit ta rcung i né. 10 Rewóré ta néi, ga Maria nfané se néfétén farimé ta i re némanwé né po kyat ta rdéréré Yesusé né. Pocé kyaté né rtangisé re wlori né kangelangé, sababta wlori né kangelangé lesu. 11 Pocé rlongé ta mépiné njé nécegé Yesusé re npangéné nmulé né, bóngo i ma re némnaw I né, mayta rdélé i pa.

Yesusé nfaftulo ni diri po kyat séluw ta réndéréré I né

12 Rewóré ta néi, Yesusé nfaftulo ni diri po kyat séluw ta bo rfan po pnuw isó ni. Si dorén luw ta néi ma réndéréré I nóté. Mayta rfayal I pa, sababta ni rupa né nésé I. 13 Mayta mnuw pa, bóngo rféyal ta nejé Yesusé. Pocé bóngo si dórén luwé né rpólén si néli po Yerusalemé bo rfébingo Yesusé ni motemote ta iglé né, mayta rdélé si pa nóté.

Yesusé nfaftulo ni diri po ni motemote yófésó re isó nesté ni

14 Rewóré ta néi, Yesusé nfaftulo ni diri po ni motemote yófésó re isó nesté ni. Po waktu nwómo si né, rémnómé róri. Pocé bóngo Yesusé nécegé si faje, "Wlomi né ga i ni métué! Kyaté né re rémnaw Ya se runé ta re kpangéné nmulé né, se réfétno mewé nóté, ga fdélé si pa né!"

15 Bóngo re Yesusé nécego si nóté, "Ffan po géwgów pua le bo féfétno férimé kyaté né Habar ta Fié lima Jou Lahatala ni. 16 Pai le ta ndélé Habar ta Fié nje sogado rbaptis i, i nase nduk salamaté. Mayta pai ta ndélé Habar ta Fié njé pa, i nase nduke salamat pa, mayta nase rhukumé i. 17 Kyat ta rdéréré Ya né, Jou Lahatala nase npo si kawasa bo rpe faféyal ta dolo faje: iga rut ngósnogé né se rféungé setan-setané né, méitén ta runé pa ma, nase runé. 18 Masike ga rétané guw ta nbisa i re riném boliga ma, rpe gélesó pa. Iga rétewlé faori po kyat ta rpisé né, nase rfié si."

19 Yesusé nméiténé ndé si rewóré, tabóngo terélóngé I néya po soroga lo. Se ntolén po géwgów ta fié, po Jou Lahatala ni féspal wónéyé. 20 Rewóré ta néi, bóngo Yesusé ni motemote nesté rfané se réfétén Habar ta Fié lima Jou Lahatala ni, po farimé kyat si po géwgów pua le. Ta rfané réfétén Habar ta Fié né, Jou ma ndéréré si. I npo ni kawasa bo rpe mujizat re faféyal ta lima Jou Lahatala ni né. Jou npe fajé, bo kyaté né runé ta Habar ta Nfié njé fatuwé.