1 Cwale twasa tatika uku litunta kame twebeni? Kampa twasa zunda aman’olo go bumpaki gaja kwenu kampa gazwa kwenu sinagwe bamwinya abantu ubu batendela? 2 Ninwe in’olo lyetu ili lin’ololitwe mu myojo jetu lizekelelwe no kubaligwa ku bantu bonse. 3 Mi mwasa bonaala buti ninwe n’olo lizwa kwa Kilesite, ili nalya letigwa ko musebezi gwetu, ili tali n’olitwe ko cin’oliso kono ko Moya gujoja gwa Nyambe, isini alukanko lwebwe, kono ulukanko lo myojo jo bantu.

4 Mi tulikwesi nsepo ka Kilesite kwa Nyambe 5 Ukuti iswe twenke tatugoli ukutenda icintu, kono ukugola kwetu kwa Nyambe kuzwa. 6 Mi neje uju atu golisa ukuba ababeleki bo busele ubuya, isini ko in’olo kono lyo Moya. Ukuti in’olo lyasa yaga, kono Umoya gwasawa ubumi.

7 Mi ati umusebezi ugu nagwa leta ulufwu, ulu nalwa zikigwa alukanko lwebwe, nalwe tuba, buti mane abantu ba Isilaele kaba kangwa ukulola ku nkumo ja Mushe kebaka lyo kukebela kakuli munkumo jakwe, mi kaku gola ukumana. 8 Cwale insebelezo jo Moya taa naji kebele lwini no kuita? 9 Mi ati umusebezi ugu nagwa leta ukunyansigwa kagu kwesi ituba, cwale ni tuba lisika kwibo lyo musebezi ugu gulete ukucena! 10 Ukuti ici kaci kwesi ituba etanzi, kuti naci bonaale ukubula ituba aa naci jelekezwe ne lelyo ituba ili li liita. 11 Ukuti ati ici kaci gola ukumana aa naca keza ne tuba, cwale ni tuba lisika kwibo nali beko kwa lelyo talimani!

12 Mi kebaka lyo kuba no nsepo jo kukala bobo, takuli co kujoga. 13 Mi tatu likozite na Mushe, uju naga livwika isila ku nkumo, buti abana ba Isilaele baleke uku logolosa amamaninino go cintu kacimana. 14 Kono kaba kababubwiite mu nzunu jabo, ukuti ne shunwano aa ba bala mu busele bokale naba linunga bwa kunkulu kantnzi, kako kasindwe ko kasili ne shunwano, taa naka zwisigwa, mi kasindwe ka gola ku zwisigwa bulyo ka Kilesite. 15 Kono ne shunwano aa kubaligwa byo mulao gwa Mushe, akasindwe kasi vwikite imyojo jabo. 16 Kono umuntu aa sigulukila ku Mfumu, akasindwe kasa zwisigwa. 17 Cwale Umfumu ne Moya, mi aa kukele Umoya go Mfumu, ku likele intukuluo. 18 Cwale iswe twense tulola ituba lyo Mfumu natu livwikite ku nkumo, gasa tutenda wawa sinagwe neje, ubu tu kezela mu ciswaniso mwi tuba lingiiswa, ili lizwa ku Umfumu, uju ali Umoya.