'O SU-SULOKO 4

'O Petrus de 'o Yohanes 'o Yahudioka manga 'Agamaka ma Hakimi ma bionoka

1 'O Petrus de 'o Yohanes kayobi-bicarasi 'o nyawa-nyawaka go’ona, de 'o 'imam ma sae-saeke de ma Jou wi Woa ma jo-jaga manga balusu, de mita 'o Sadukioka*4:1: 'O Sadukioka 'ona koyongakuwa 'ato 'o nyawa yosonge-songenokau dua yomomikoli ma du’uruoka. 'Ona ge’ena yokudai 'o nyawa yola-laagomo de yokaya-kaya. yaino 'o Petrus de 'o Yohanesino. 2 'Ona posironga yongamoka sababu 'o Petrus de 'o Yohanes yongose 'o nyawa-nyawaka 'ato 'o Yesus wosongenukou ma kawomomioka de ge’ena ma nyo-nyata 'ato 'o nyawa yosonge-songenoka dua yomomikoli. 3 So yakitagoko 'o su-suloko yamididi go’ona de yakisingosama 'o buika. De 'iobirokau so 'ona yakitahanuku ge’enaka sigado ma ngorumika 'asa yaki’urusu.