1 Ikhúúnꞌ ñajunꞌ Páblo̱, ga̱jmi̱ꞌ Silbáno̱ jamí Timotéo̱.

Nu̱tháánxo̱ꞌ i̱yi̱i̱ꞌ ríge̱ꞌ ma̱ꞌga ná inúú tsí nanimbu̱únꞌ juyáá Jesús ná xuajen Tesalóni̱ka̱, tsáanꞌ mbá ꞌnduꞌ juwalaꞌ ná inuu Ana̱ꞌlóꞌ xúꞌkhue̱n máꞌ ná inuu Táta̱ Jesukrísto̱.

2 A̱gu̱ma-tsakun-rámáaꞌlaꞌ jamí ga̱juwalaꞌ tsímáá gáꞌne Ana̱ꞌlóꞌ Mikhuíí jamí Táta̱ Jesukrísto̱.

3 A̱ngui̱nꞌ, jámba̱ miꞌtsú jaꞌyoo rí mu̱rígu̱uxo̱ꞌ gamaku ná inuu Ana̱ꞌlóꞌ ga̱jma̱á numalaꞌ. Xkuaꞌnii jaꞌyoo rí mu̱ne̱xo̱ꞌ numuu rí na̱ka̱-ragaja̱a̱ rí wéje̱ a̱kia̱nꞌlaꞌ ná inuu Ana̱ꞌlóꞌ, xúꞌkhue̱n máꞌ mbá xúgiáanꞌlaꞌ jamí mbámbáa tsí ikháanꞌlaꞌ na̱ka̱-ragaja̱a̱ i̱tha̱án rí nandalaꞌ ju̱ñu̱ú tsí i̱ꞌwíin. 4 Ikhaa jngó ikháanꞌxo̱ꞌ maphú nadxu a̱kia̱nꞌxo̱ꞌ e̱ne̱laꞌ ná inúú mbámbá kuthuun tsí nanimbu̱únꞌ juyáá Ana̱ꞌlóꞌ. Nu̱thúu̱nxo̱ꞌ rí maske máꞌ nuña̱ꞌlaꞌ mi̱ndaꞌkho xa̱bo̱, ikháanꞌlaꞌ kuajún-gúkuálaꞌ jamí wéje̱ a̱kia̱nꞌlaꞌ ná inuu Ana̱ꞌlóꞌ, jamí na̱ꞌngo̱o̱ a̱kia̱nꞌlaꞌ inuu mbá xúgíí rí nune̱-ngínáaꞌlaꞌ. 5 Mbá xúgíí rúꞌkhue̱n nasngájma rí Ana̱ꞌlóꞌ máján naxúdaa̱ awan ga̱jma̱á numúú xa̱bo̱, kajngó ikháanꞌlaꞌ ma̱juwa-na̱ma̱ñalaꞌ rí ma̱nindxa̱ꞌlaꞌ xa̱bo̱ tsí nithán-ñájúún eꞌne Ana̱ꞌlóꞌ, numuu rí ikhaa máꞌ numuu rúꞌkhue̱n nu̱míni̱ílaꞌ rí xúge̱ꞌ.

6 Numuu rí Ana̱ꞌlóꞌ phú jmbii̱, ikhaa̱ ma̱ꞌnii̱ rí mu̱míni̱í xa̱bo̱ tsí nune̱-ngínáaꞌlaꞌ. 7 Xómáꞌ ikháanꞌlaꞌ tsáanꞌ juwa nu̱míni̱ílaꞌ xúge̱ꞌ rá, Ana̱ꞌlóꞌ ma̱ꞌne rí mbu̱ya̱a xa̱ꞌlaꞌ xómá ma̱ꞌnii̱ ga̱jma̱á nindxa̱ꞌ ikháanꞌxo̱ꞌ. Rúꞌkhue̱n ma̱ꞌnii̱ ído̱ ma̱kujma rí na̱ꞌkha̱a Táta̱ Jesús ná majñu̱u̱ ri̱ꞌyu̱u̱ agu asndo ná mikhuíí gajmíi̱ ánje̱l tsí juya̱ ski̱yu̱u̱ꞌ. 8 Kajngó ma̱ꞌnii̱ rí xa̱bo̱ tsí ra̱khúún gúne̱-nuwiin Ana̱ꞌlóꞌ mune̱-numa̱a rí nene̱ ga̱jma̱á jamínu̱ꞌ, xúꞌkhue̱n máꞌ ga̱jma̱á numuu rí tsíni̱i̱ rí naꞌsngáá ajngáa máján ga̱jma̱á numuu Tátiálóꞌ Jesukrísto̱.* 9 Xa̱bo̱ tsúꞌkhue̱n mu̱dri̱gú mbá jamínu̱ꞌ rí ni miꞌtsú tsíyámba̱. Ma̱ju̱wée̱ꞌ tsíngua̱ꞌ ná inuu Táta̱, ná mu̱xúyáa̱ rí maphú mba̱a̱ tsiakhe̱ drígo̱o̱. 10 Ído̱ gága̱nú mbiꞌi rí ma̱ꞌkha̱a Táta̱, mi̱tiamakuíi̱ gúne̱ xa̱bii̱ tsí ninimbu̱únꞌ juyáa̱ jamí phú ma̱makúu̱n gáꞌnii̱. Ikháanꞌlaꞌ máꞌ mangáanꞌlaꞌ jimáaꞌlaꞌ ga̱jma̱á nindxu̱ún tsúꞌkhue̱n, numuu rí ninimba̱ꞌlaꞌ ju̱ya̱á ajngáa rí ni̱tha̱nꞌlaꞌxo̱ꞌ ga̱jma̱á numuu Táta̱.

11 Ikhaa numuu rúꞌkhue̱n, jámba̱ miꞌtsú nu̱tha̱n-jáñííxo̱ꞌ Ana̱ꞌlóꞌ ga̱jma̱á numalaꞌ, kajngó ikhaa̱ ma̱ꞌnii̱ rí ma̱juwalaꞌ xómá ga̱náꞌyoo rí ma̱ju̱wá xa̱bo̱ tsí ikhaa̱ nindxaꞌwúu̱n. Xúꞌkhue̱n máꞌ nu̱tha̱n-jáñííxo̱ꞌ Ana̱ꞌlóꞌ rí ga̱jma̱á ski̱yu̱u̱ꞌ ga̱ꞌne-gáxu̱u̱ mbá xúgíí rí máján rí nu̱ꞌgí-mijnálaꞌ rí mu̱ne̱laꞌ, jamí mbá xúgíí ñajun rí nu̱ne̱laꞌ numuu rí wéje̱ a̱kia̱nꞌlaꞌ ná inuu̱. 12 Xkuaꞌnii kajngó Tátiálóꞌ Jesukrísto̱ mi̱tiamakuíí gúne̱ xa̱bo̱ ga̱jma̱á numalaꞌ ikháanꞌlaꞌ, jamí ikhaa̱ mbayamakualaꞌ ikháanꞌlaꞌ. Mbá xúgíí rúꞌkhue̱n ma̱ꞌne xkuaꞌnii, numuu rí maphú májáan a̱kui̱in Ana̱ꞌlóꞌ jamí Táta̱ Jesukrísto̱.