1 Numuu rí ndi̱ya̱a máꞌ mbiꞌyalaꞌ ga̱jma̱á nindxu̱u̱ Krísto̱, gu̱ꞌyálaꞌ rí ríga̱ ná mikhuíí, ná ꞌgí Krísto̱ ná ñawún mújúun Ana̱ꞌlóꞌ. 2 Gu̱ndxa̱ꞌwa̱-mijnálaꞌ ga̱jma̱á numuu rí ríga̱ ná mikhuíí, ra̱ꞌkhá rí ríga̱ ná numbaa ríge̱ꞌ. 3 Numuu rí ikháanꞌlaꞌ nijáñalaꞌ máꞌ, ikhaa jngó nánguá máꞌ juwalaꞌ rí mu̱ne̱laꞌ rí nandoo xuyalaꞌ, jamí Ana̱ꞌlóꞌ gíꞌdoo mújúún mbiꞌyalaꞌ ga̱jma̱á nindxu̱u̱ Krísto̱ ná mikhuíí. 4 Ído̱ gáꞌkha̱a Krísto̱, tsí jayá mbiꞌyalaꞌ, a̱ꞌkhue̱n ma̱kujmáaꞌ mangáanꞌlaꞌ ga̱jma̱á nindxu̱u̱ jamí ma̱juwalaꞌ ná phú wáá xtáa̱ ikhaa̱.

5 Ikhaa jngó, gu̱ne̱laꞌ rí ma̱ja̱ñúu mbá xúgíí rí xkawe̱ꞌ rí na̱wa̱ꞌa̱ a̱kia̱nꞌlaꞌ mu̱ne̱laꞌ: nimbáa ma̱xábóo ga̱jma̱á xa̱bo̱ tsí táyáa, ma̱xáꞌne nimbá rí xkawe̱ꞌ ga̱jma̱á xuyuu, ma̱xáꞌne nimbá rí ra̱jáꞌyoo ga̱jma̱á xuyuu, ma̱xáwa̱ꞌa̱ a̱kui̱in ma̱ꞌne rí xkawe̱ꞌ. Nimbáa ma̱xáni̱gu̱u̱ꞌ rí ma̱gi̱ꞌdoo mi̱ndaꞌkho, numuu rí asndo xó rí ikhaa máꞌ rúꞌkhue̱n eꞌne-mba̱a̱ jaꞌnii. 6 Ga̱jma̱á numuu mbá xúgíí rúꞌkhue̱n na̱ꞌkha̱ jamínu̱ꞌ eꞌne Ana̱ꞌlóꞌ ná inúú tsí najñaguun juyáa̱.* 7 Ne̱ne̱ mangáanꞌlaꞌ mbá xúgíí rúꞌkhue̱n nákhí wapha, nákhí rí nijuwalaꞌ ná awúun ne̱. 8 Xómáꞌ xúge̱ꞌ rá, gu̱ni̱ꞌñáálaꞌ mbá xúgíí ríge̱ꞌ: ma̱xágigoo idxa̱ꞌlaꞌ, ma̱xájiꞌnáaꞌlaꞌ, mu̱xúne̱laꞌ rí xkawe̱ꞌ, mu̱xútha̱n-xkawiu̱únlaꞌ xa̱bo̱, ni máꞌ ma̱xágájnuu nimbá ajngáa xkawe̱ꞌ ná rawanlaꞌ. 9 Mu̱xúne̱-nduwa-mijnálaꞌ, numuu rí ikháanꞌlaꞌ ni̱ni̱ꞌñáálaꞌ máꞌ janíí xa̱bo̱ aꞌkhán tsí ninindxa̱ꞌlaꞌ nákhí wajyúú ga̱jma̱á mbá xúgíí rí xkawe̱ꞌ ne̱ne̱laꞌ. 10 Jamí ni̱gíꞌdi̱ínlaꞌ máꞌ nijuwalaꞌ xómá jaꞌyoo xa̱bo̱ tsí nuxi̱i̱ꞌ, jamí na̱ka̱-raꞌne nuxáanꞌlaꞌ máꞌ xúꞌkhue̱n kajngó ma̱nindxa̱ꞌlaꞌ xómá jaꞌnii Ana̱ꞌlóꞌ tsí neꞌne-ku̱máaꞌlaꞌ, asndo rí mu̱ne̱-nuwii̱n májánlaꞌ. 11 Ikhaa jngó rí xúge̱ꞌ rá, tsíꞌyoo máꞌ xí xa̱bo̱ griégo̱ o xa̱bo̱ judío̱ ñajwanlóꞌ, xí juꞌyálóꞌ tsina jndi o na̱nguá mbo̱ꞌ, xí phú nduꞌyáálóꞌ o na̱nguá, xí yumbáá tsí waꞌtsi̱i̱ ñajwanlóꞌ o na̱nguá mbo̱ꞌ. Krísto̱ ñajuun tsí phú i̱tha̱án gíꞌdoo numuu inuu mbá xúgíí, jamí xtáa̱ ga̱jma̱á nindxa̱ꞌlóꞌ mbá xúgiáanꞌlóꞌ.

12 Maphú nandoo Ana̱ꞌlóꞌ jaꞌyalaꞌ, rí asndo niraꞌwáa̱nꞌlaꞌ rí ma̱nindxa̱ꞌlaꞌ xa̱bii̱. Ikhaa jngó jámba̱ miꞌtsú ga̱ñáwíin a̱kia̱nꞌlaꞌ, ga̱ꞌne májáan a̱kia̱nꞌlaꞌ, gu̱xrígú-mijnálaꞌ, ga̱ꞌne gamakuáanꞌlaꞌ, jamí ma̱xájiꞌnáaꞌlaꞌ nacha̱ guéño. 13 Xúꞌkhue̱n máꞌ ga̱ꞌngo̱o̱ a̱kia̱nꞌlaꞌ ju̱ya̱-mijnálaꞌ, jamí gu̱ne̱ mba̱a̱ a̱kia̱nꞌlaꞌ ju̱ya̱-mijnálaꞌ xí mbáa gíꞌdoo xkujndu ga̱jma̱á i̱mba̱a̱ꞌ. Gu̱ne̱ mba̱a̱ a̱kia̱nꞌlaꞌ xómá rí Krísto̱ neꞌne mba̱a̱ a̱kui̱in jaꞌyalaꞌ mangáanꞌlaꞌ. 14 Rí phú i̱tha̱án gíꞌdoo numuu ñajuun rí ma̱galaꞌ ju̱ya̱-mijnálaꞌ, numuu rí ikhaa rúꞌkhue̱n ma̱ꞌne rí mbóó idxa̱ꞌlaꞌ gáꞌne.

15 Ga̱ri̱gá máꞌ xúꞌkhue̱n tsímáá rí naxná Ana̱ꞌlóꞌ* ga̱jma̱á nindxa̱ꞌlaꞌ. Numuu rí ikháanꞌlaꞌ watsaꞌwálaꞌ rí ma̱nindxa̱ꞌlaꞌ asndo xó rí mbáwíi xa̱bo̱. Jamí gu̱rígu̱ulaꞌ gamaku inuu Ana̱ꞌlóꞌ. 16 Gatíí ajngóo Krísto̱ ná awúun a̱kia̱nꞌlaꞌ gáꞌne. Ga̱ma̱ña májánlaꞌ rí mu̱sngáá-mijnálaꞌ jamí rí mu̱xprígú-mijnálaꞌ. Gu̱sianlaꞌ inuu Táta̱ ajmúú rí na̱ꞌkha̱ ná i̱yi̱i̱ꞌ ajngóo Ana̱ꞌlóꞌ, ajmúú rí naꞌne-mba̱a̱ Ana̱ꞌlóꞌ jamí ajmúú rí nambáyúu nímia̱ꞌlaꞌ. 17 Mbá xúgíí rí nu̱ne̱laꞌ, ga̱nindxu̱u̱ ne̱ rí nu̱tha̱nlaꞌ o mbá ñajun rí nu̱ne̱laꞌ mbo̱ꞌ, gu̱ne̱laꞌ ne̱ ga̱jma̱á numuu Táta̱ Jesús, jamí gu̱rígu̱ulaꞌ gamaku inuu Ana̱ꞌlóꞌ ga̱jma̱á majñu̱u̱ máꞌ ikhaa̱.

18 Ikháanꞌlaꞌ nána̱ tsáanꞌ ni̱nújúnlaꞌ, gu̱ne̱-mbáníílaꞌ rí nuthanlaꞌ a̱jmbialaꞌ, numuu rí rúꞌkhue̱n jaꞌyoo rí mu̱ne̱laꞌ tsáanꞌ nanimba̱ꞌlaꞌ ju̱ya̱á Táta̱.

19 Ikháanꞌlaꞌ táta̱ tsáanꞌ ni̱ni̱ꞌgúúnlaꞌ, ga̱galaꞌ ju̱ñu̱ú gu̱ꞌwia̱ꞌlaꞌ, jamí mu̱xúñúu̱laꞌ mi̱ndaꞌkho.

20 Ikháanꞌlaꞌ e̱je̱n, gu̱ne̱-mbáníílaꞌ mbá xúgíí rí naꞌthán tátiálaꞌ ga̱jma̱á nániálaꞌ, numuu rí rúꞌkhue̱n ñajuun rí na̱ni̱gu̱u̱ꞌ Táta̱.

21 Ikháanꞌlaꞌ tsáanꞌ anu̱ú e̱je̱n ñajwanlaꞌ, mu̱xúne̱laꞌ rí ma̱jiꞌníi i̱jña̱ꞌlaꞌ, kajngó ma̱xáwabaa a̱kuíi̱n.

22 Ikháanꞌlaꞌ yumbáá tsí waꞌtsi̱in, gu̱ne̱-mbáníílaꞌ mbá xúgíí rí nuthanlaꞌ xa̱bo̱ numbaa tsí ñajúún ña̱ꞌñalaꞌ. Mu̱xúne̱-mbáníílaꞌ i̱ndo̱ó máꞌ ído̱ rí júwe̱e̱ꞌ mu̱ya̱xa̱ꞌlaꞌ kajngó muthee̱n rí máján ga̱jma̱á numalaꞌ, rí gu̱ñajunlaꞌ ga̱jma̱á mbá jañii a̱kia̱nꞌlaꞌ ga̱jma̱á numuu rí ndu̱ya̱-makuíílaꞌ Ana̱ꞌlóꞌ. 23 Mbá jañii a̱kia̱nꞌlaꞌ gúne̱laꞌ mbá xúgíí ñajun rí nu̱ne̱laꞌ. Gu̱ne̱laꞌ asndo xó rí Táta̱ máꞌ e̱ne̱-mba̱a̱laꞌ, ra̱ꞌkhíin xa̱bo̱ numbaa. 24 Numuu rí ndu̱ya̱álaꞌ máꞌ rí Táta̱ ma̱ꞌne rí mu̱drígúlaꞌ gamaku ído̱ gáxnálaꞌ rí nixuda-mine̱e̱ꞌ maxnúu̱ tsí ñajúún xa̱bii̱. Numuu rí ikháanꞌlaꞌ nu̱ne̱-mba̱ꞌwi̱i̱laꞌ Krísto̱, tsí ñajuun Táta̱. 25 Xómáꞌ tsí naꞌne rí ra̱máján rá, ma̱grui̱guíi̱ jamínu̱ꞌ ga̱jma̱á numuu rí niꞌnii̱, numuu rí Ana̱ꞌlóꞌ tsíraꞌwíi̱n xa̱bo̱ tsí ma̱ꞌne-nga̱júu̱n.