Colossenses 4

1 Xómáꞌ ikháanꞌlaꞌ tsáanꞌ kuaꞌdiinlaꞌ yumbáá tsí waꞌtsi̱in, ga̱nindxa̱ꞌlaꞌ xa̱bo̱ tsí májíin jamí gu̱ne̱laꞌ ga̱jma̱á nindxúu̱n xómá phú jaꞌyoo. Ga̱rmáꞌáan a̱kia̱nꞌlaꞌ rí xtáa mbáa tsí ñajuun ña̱ꞌñalaꞌ mangáanꞌlaꞌ ná mikhuíí.

Mbaꞌa inii rí naꞌthán-máꞌán Páblo̱

2 Mu̱xúni̱ꞌñáálaꞌ rí nu̱tha̱n-jáñíílaꞌ Ana̱ꞌlóꞌ. Ga̱juwalaꞌ xawi máꞌ xúꞌkhue̱n jamí gu̱rígu̱ulaꞌ gamaku inuu Ana̱ꞌlóꞌ ído̱ rí nu̱tha̱n-jáñíi̱laꞌ. 3 Gu̱tha̱n-jáñíílaꞌ Táta̱ ga̱jma̱á numa mangáanꞌxo̱ꞌ, kajngó marmáꞌthoo̱ ná ma̱goo mu̱tha̱n-ráꞌaxo̱ꞌ ajngóo̱. A̱ꞌkhue̱n rí ma̱goo mu̱thu̱únxo̱ꞌ xa̱bo̱ awan drígo̱o̱ Krísto̱ rí i̱ndo̱ó máꞌ ikhaa̱ ni̱gi̱da̱ꞌ idxu̱u̱ nákhí wajyúú. Ikhaa máꞌ numuu rúꞌkhue̱n kru̱ꞌúúnlo̱ꞌ géjwa̱nꞌ xúge̱ꞌ. 4 Gu̱tha̱n-jáñíílaꞌ Ana̱ꞌlóꞌ kajngó ma̱goo ma̱thu̱ún mújúnꞌ xa̱bo̱ ga̱jma̱á numuu awan rúꞌkhue̱n, xómá phú jaꞌyoo rí ma̱ne̱. 5 Ga̱ma̱ña májánlaꞌ rí ma̱juwalaꞌ ná majñu̱ú xa̱bo̱ tsí tsínimbu̱únꞌ juyáá Krísto̱, jamí mu̱xúne̱-mbáti̱ga̱laꞌ nimbá mbiꞌi rí juwalaꞌ. 6 Ído̱ rí nu̱ndxákuunlaꞌ, ga̱ꞌne gamaku jamí mitsaan ajngálaꞌ jámba̱ miꞌtsú. Xkuaꞌnii kajngó ma̱ma̱ñalaꞌ rí mu̱riꞌñáálaꞌ mbámbáa tsí naraxa̱ꞌlaꞌ.

Páblo̱ naraxi̱in mbaꞌiin xa̱bo̱

7 Mbá xúgíí rí na̱ka̱-raríga̱ ga̱jma̱á numuꞌ ikhúúnꞌ, maꞌthánlaꞌ Tíki̱ko̱. Ikhaa̱ ñajuu̱n dxájwalóꞌ tsí phú nandalóꞌ juꞌyáá jamí phú jmbii rí ma̱ne̱ ga̱jmi̱ꞌ ñajuun Táta̱. 8 Na̱xu̱ꞌmáa̱lo̱ꞌ rí ma̱ꞌgee̱ gáꞌyalaꞌ kajngó mu̱dxawíínlaꞌ xáne juwaxo̱ꞌ jamí maxnálaꞌ tsiakhe̱. 9 Na̱ke̱e̱ ga̱jmáa̱ Onési̱mo̱, dxájwalóꞌ tsí phú nandalóꞌ juꞌyáá jamí phú jmbii, jamí xa̱bo̱ xuajñalaꞌ máꞌ ñajuu̱n. Ikhii̱n muthanlaꞌ mbá xúgíí rí naríga̱ ge̱jyoꞌ.

10 Naraxáa̱nꞌlaꞌ Aristárko̱, dxájuꞌ tsí kru̱ꞌúún ga̱jmi̱ꞌ ná géjwa̱nꞌ, xúꞌkhue̱n máꞌ Márko̱s, a̱ꞌdá-rixa̱ ga̱jma̱á Bernabé. Ni̱xna̱ngáwalaꞌ máꞌ ga̱jma̱á numuu Márko̱s, rí mu̱dríguíi̱ májánlaꞌ xí na̱ke̱e̱ gáꞌyalaꞌ. 11 Naraxáa̱nꞌlaꞌ Jesús mangaa, tsí nitháán Jústo̱. I̱ndo̱ó máꞌ atsúun xa̱bo̱ judío̱ tsíge̱ꞌ ñajúún tsí na̱ñajun gajmíꞌ kajngó i̱ꞌwíin xa̱bo̱ mi̱ꞌthán-ñájúún gáꞌne Ana̱ꞌlóꞌ, jamí ikhii̱n phú nuxniꞌ tsiakhe̱. 12 Naraxáa̱nꞌlaꞌ Epáfra̱s, xa̱bo̱ xuajñalaꞌ máꞌ. Yumbée Krísto̱ tsíge̱ꞌ jámba̱ miꞌtsú naꞌthán-jáñuu Ana̱ꞌlóꞌ ga̱jma̱á numalaꞌ, kajngó ma̱wajún-gúkuálaꞌ, ma̱ꞌne káxáanꞌlaꞌ jamí ma̱fraꞌa̱ꞌ májánlaꞌ mbá xúgíí rí nandoo Ana̱ꞌlóꞌ rí mu̱ne̱laꞌ. 13 Ikhúúnꞌ nda̱yo̱o̱ mújúnꞌ rí maphú naxná-gamiéjuun Epáfra̱s e̱ne̱laꞌ. Xúꞌkhue̱n máꞌ phú naxná-gamiéjuu̱n ga̱jma̱á numúú a̱ngia̱nꞌlóꞌ tsí júwa̱ꞌ ná Laodiséa̱ jamí ná Yerápo̱li̱s. 14 Naraxáa̱nꞌlaꞌ Lúka̱s, xa̱bo̱ thana tsí phú nandaxo̱ꞌ ju̱ya̱á. Xúꞌkhue̱n máꞌ Déma̱s mangaa. 15 Nu̱ra̱xi̱inxo̱ꞌ a̱ngia̱nꞌlóꞌ tsí júwa̱ꞌ ná Laodiséa̱, jamí nu̱ra̱xi̱ixo̱ꞌ Nínfa̱s gajmíí tsí nanimbu̱únꞌ juyáá Jesús tsí na̱gi̱mbíin ná guꞌwóo̱ mangaa.

16 Ído̱ wámba̱ꞌlaꞌ ni̱raxnuu i̱yi̱i̱ꞌ ríge̱ꞌ, gu̱xu̱ꞌmálaꞌ ne̱ ma̱ꞌga inúú tsí nanimbu̱únꞌ juyáá Jesús ná Laodiséa̱ kajngó mu̱raxnuu̱ ne̱ mangii̱n. Jamí ikháanꞌlaꞌ gu̱raxnuulaꞌ i̱yi̱i̱ꞌ rí ni̱xu̱ꞌmá inúu̱ ikhii̱n.

17 Gu̱tha̱ánlaꞌ Arkípo̱ ríge̱ꞌ: «Athane̱-mbáníí lá ñajun rí nixnángawaaꞌ Táta̱ rí ma̱tha̱ne̱».

18 Jmínu̱úꞌ ikhúúnꞌ, Páblo̱, na̱tháán ga̱jma̱á ñawúnꞌ rí na̱ra̱xáanꞌlaꞌ. Ma̱xámbumalaꞌ rí kru̱ꞌúún géjwa̱nꞌ. Ana̱ꞌlóꞌ gáꞌne-tsakun-rámáaꞌlaꞌ. Xkuaꞌnii gáꞌne.*4.18 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «Xkuaꞌnii gáꞌne».