1 Ikhaa numuu rúꞌkhue̱n, ikhúúnꞌ tsúún kru̱ꞌúúnlo̱ꞌ géjwa̱nꞌ ga̱jma̱á numuu Táta̱, na̱tha̱n-jáñalaꞌ rí ga̱juwalaꞌ xómá gíꞌmaa rí ma̱juwalaꞌ tsáanꞌ nindxaꞌwálaꞌ Ana̱ꞌlóꞌ. 2 Gu̱xrígú-mijnálaꞌ jamí gamakuáanꞌlaꞌ gáꞌne. Ga̱ꞌngo̱o̱ a̱kia̱nꞌlaꞌ ju̱ya̱-mijnálaꞌ numuu rí nandalaꞌ ju̱ya̱-mijnálaꞌ. 3 Gu̱xna̱-míjnálaꞌ tsiakhe̱ rí ma̱juwalaꞌ mbá ꞌnduꞌ, xómá tsímáá rí ni̱ru̱wáanꞌlaꞌ Xu̱u̱ꞌ Ana̱ꞌlóꞌ. 4 Asndo xó rí mbáwíi xa̱bo̱ ñajwanlóꞌ mbá xúgiáanꞌlóꞌ, jamí mbáwíi máꞌ Xu̱u̱ꞌ Ana̱ꞌlóꞌ tsí xtáa ná awúun a̱kia̱nꞌlóꞌ, xómá rí mbóó rí watsaꞌwálóꞌ rí ga̱jma̱á mbá jañii a̱kia̱nꞌlóꞌ mu̱waꞌthi̱ínlóꞌ ma̱mba̱núu mangaa. 5 Mbáwíi máꞌ tsí ñajuun Táta̱, mbóó máꞌ xó rí nanimba̱ꞌlóꞌ juꞌyáá Ana̱ꞌlóꞌ, jamí mbóó máꞌ numuu rí waxúꞌdu-maꞌáanꞌlóꞌ ná awúun iya. 6 Mbáwíi máꞌ tsí ñajuun Ana̱ꞌlóꞌ, tsí ñajuun Tátiálóꞌ mbá xúgiáanꞌlóꞌ, tsí naꞌthán-ñájwanlóꞌ mbá xúgiáanꞌlóꞌ. Ikhaa̱ nañajwii̱n ná majña̱ꞌlóꞌ mbá xúgiáanꞌlóꞌ, jamí xtáa̱ ná awúun a̱kia̱nꞌlóꞌ mbá xúgiáanꞌlóꞌ.

7 I̱ndo̱ó máꞌ numuu rí mbámbáa tsí ikháánꞌlóꞌ nijanáá rí ma̱ma̱ñuu mañajun, xómá neꞌne a̱kui̱in Krísto̱. 8 Ikhaa jngó naꞌthán ná i̱yi̱i̱ꞌ ajngóo Ana̱ꞌlóꞌ:

«Ído̱ nitsimuu̱ tsída̱ꞌ, jaguu̱n mbaꞌiin tsí traꞌi̱in géjwa̱nꞌ ni̱ke̱e̱,

jamí nixnúu̱ ñajun xa̱bo̱ kajngó mune̱-mba̱a̱ Ana̱ꞌlóꞌ».*

9 Dí ñajuun iꞌthán rí «nitsimuu̱» róꞌ. Naꞌthán ne̱ rí ginii ni̱ga̱taa̱ asndo ná i̱tha̱án me̱jno̱ꞌ ná awúun ju̱ba̱ꞌ. 10 Tsí ni̱ga̱taa, ikhaa máꞌ tsúꞌkhue̱n ñajuun tsí nitsimuu i̱tha̱án tsída̱ꞌ inuu mbá xúgíí mikhu, kajngó ikhaa̱ maꞌthán-ñájuu̱n mbá xúgíí. 11 Ikhaa̱ nixnée̱ ñajun rí mbá tikhuun ma̱nindxu̱ún tsí waxúngui̱inꞌ, i̱ꞌwíin ma̱nindxu̱ún tsí nu̱rawíjnga̱a ajngóo Ana̱ꞌlóꞌ, i̱ꞌwíin ma̱nindxu̱ún tsí nuthan-raꞌa ajngáa máján, i̱ꞌwíin ma̱nindxu̱ún tsí nu̱ña̱wu̱ún xa̱bi̱i Ana̱ꞌlóꞌ jamí tsí nusngáá. 12 Xkuaꞌnii niꞌnii̱ kajngó musngúu̱n xa̱bi̱i Ana̱ꞌlóꞌ. A̱ꞌkhue̱n rí xa̱bi̱i Ana̱ꞌlóꞌ ma̱ma̱ñúu̱ muni̱i̱ ñajun rí nijanúu̱ muni̱i̱, kajngó ma̱gaji̱in tsí mbá xa̱bi̱i̱ ñajúún ga̱jma̱á nindxu̱u̱ Krísto̱. 13 Xkuaꞌnii asndo ma̱ga̱nú mbiꞌi rí mbá xúgiáanꞌlóꞌ mbóó máꞌ xó rí nanimba̱ꞌlóꞌ juꞌyáá Ana̱ꞌlóꞌ gáꞌne jamí mbéꞌtháán gúꞌne̱-nuwiinlóꞌ A̱dée̱ mangaa. A̱ꞌkhue̱n rí ma̱nindxa̱ꞌlóꞌ mbáa xa̱bo̱ káxi̱i̱, tsí jaꞌnii xómá jaꞌnii jayu Krísto̱.

14 Xkuaꞌnii kajngó náxánindxa̱ꞌlóꞌ xómá jaꞌñúú e̱je̱n, tsí nángí eꞌne i̱riꞌkhuíí rí nanimbu̱únꞌ jamí ge̱e̱ ñúꞌún i̱ka̱-jiꞌdiin eꞌne xúgíí inii gisngáá rí nu̱dxawíín, jamí asndo nitsíyáá xáne i̱gu̱ma-nduwiin ene̱ xa̱bo̱ tsí phú wiphiin rí mune̱-nduwa. 15 A̱ꞌkhue̱n gakon, ga̱jma̱á numuu rí nandalóꞌ juꞌñúú xa̱bo̱, gu̱ꞌthánlóꞌ rí gakon, kajngó ma̱gajáanꞌlóꞌ inuu mbá xúgíí jamí ma̱nindxa̱ꞌlóꞌ xómá jaꞌnii jayu Krísto̱, tsí ñajuun xa̱bo̱ idxa̱ꞌlóꞌ. 16 Krísto̱ naꞌne rí mbá xúgiáanꞌlóꞌ ma̱gajáanꞌlóꞌ ga̱jma̱á majñu̱u̱ rí nu̱ru̱wa-mijnáa májánlóꞌ, jamí mbá ꞌnduꞌ nu̱mbáyú-mijnálóꞌ. Ñajun rí naꞌne mbámbáa naꞌne rí ma̱gajáanꞌlóꞌ mbá xúgiáanꞌlóꞌ numuu rí nandalóꞌ juꞌya-mijnálóꞌ.

17 Ikhaa jngó na̱tha̱nꞌlaꞌ jamí na̱nda̱ꞌa̱ꞌlaꞌ ríge̱ꞌ ga̱jma̱á numuu Táta̱ tsí naꞌthán-ñájwanlóꞌ: rí náxájuwalaꞌ ga̱jma̱á ju̱ma̱ rí tsíjmaa, xómá júwa̱ꞌ xa̱bo̱ tsí tsíne̱-nuwiin Ana̱ꞌlóꞌ. 18 Ikhii̱n júgoo inúu̱ jamí ma̱xájúwe̱e̱ꞌ jámuu gáꞌne Ana̱ꞌlóꞌ, ga̱jma̱á numuu rí nda̱a̱ rí i̱ma̱ñúu̱ jamí nini̱i̱ gúkú a̱kuíi̱n. 19 Ikhaa jngó nánguá xí i̱ti̱ñúu̱ wáa rí nuni̱i̱ rí xkawe̱ꞌ, ni̱xna̱xí-mijnée̱ mbá jayu rí muni̱i̱ rí na̱nda̱ꞌa̱ xuñúu̱, jamí tsíꞌne níꞌngúu̱n rí nuni̱i̱ xúgíí inii rí xkawe̱ꞌ.

20 Xómáꞌ ikháanꞌlaꞌ rá, ra̱ꞌkhá xkuaꞌnii ni̱ma̱ñalaꞌ rí nixtáa Krísto̱. 21 Ikhúúnꞌ nda̱yo̱o̱ mújúnꞌ rí ikháanꞌlaꞌ ni̱dxawíínlaꞌ ajngóo Jesús, jamí ni̱ma̱ñalaꞌ rí ma̱juwalaꞌ ga̱jma̱á rí gakon rí waꞌsngálaꞌ ga̱jma̱á numuu̱ ikhaa̱. 22 Waꞌsngálaꞌ rí mu̱ni̱ꞌñáálaꞌ janíí rí ne̱ne̱laꞌ wajyúú, nákhí rí ninindxa̱ꞌlaꞌ xa̱bo̱ aꞌkhán tsí niꞌkhíi mbá jayu ga̱jma̱á numuu rí na̱gu̱ma-nduwaa eꞌne rí na̱wa̱ꞌa̱ a̱kui̱in ma̱ꞌne. 23 Waꞌsngálaꞌ rí mu̱ne̱-nuxi̱iꞌlaꞌ mbá jayu rí nu̱ndxa̱ꞌwa̱-mijnálaꞌ, 24 jamí rí mu̱gíꞌdi̱ín ma̱juwalaꞌ xómá jaꞌyoo xa̱bo̱ tsí nuxi̱i̱ꞌ, tsí ni̱gu̱ma-ku̱maa neꞌne Ana̱ꞌlóꞌ rí ma̱nindxu̱u̱ xómá ikhaa̱, kajngó ma̱ꞌnii̱ rí máján jamí ma̱ꞌne-jaꞌwii̱ ga̱jma̱á majñu̱u̱ rí gakon.

25 Ikhaa numuu rúꞌkhue̱n, náxúne̱-nduwalaꞌ, rí mbámbáa gáꞌthúun dxájuu i̱ndo̱ó máꞌ rí gakon, numuu rí mbá xúgiáanꞌlóꞌ ñajwanlóꞌ mbáwíi ikhaa máꞌ xa̱bo̱. 26 Xí najiꞌnáaꞌlaꞌ, ma̱xáꞌne rí asndo mu̱ne̱laꞌ aꞌkhán. Ma̱xájiꞌnáaꞌlaꞌ asndo rí nijngúun máꞌ a̱kha̱ꞌ, 27 kajngó mu̱xúxna̱álaꞌ gixa̱a̱ rí ma̱ꞌngo̱o̱ inalaꞌ. 28 Tsí ninindxu̱u̱ ku̱ꞌwá, náxáꞌne-kúwe̱e̱ꞌ rá, rí gañajwii̱n ga̱jma̱á ñawúu̱n kajngó ma̱gi̱ꞌdoo̱ rí maxnúu̱ tsí ndaꞌñúú.

29 Nimbá ajngáa xkawe̱ꞌ ma̱xágájnuu ná rawanlaꞌ, rí i̱ndo̱ó máꞌ ajngáa rí máján gútha̱nlaꞌ, rí nambáyúu rí ma̱gaji̱in tsí nu̱dxawanlaꞌ. 30 Mu̱xúne̱laꞌ rí ma̱xtáa-jínúu Xu̱u̱ꞌ Ana̱ꞌlóꞌ, numuu rí ikhaa̱ ñajuu̱n tsina tsí masngájma rí xa̱bi̱i Ana̱ꞌlóꞌ ñajwanlaꞌ ído̱ gága̱nú mbiꞌi rí ma̱jríñáaꞌlaꞌ mbá jayu. 31 Gu̱ni̱ꞌñáálaꞌ mbá xúgíí inii sia̱nꞌ, náxájiꞌnáaꞌlaꞌ, náxámangua̱ꞌlaꞌ, náxúndxa̱ꞌwa̱laꞌ, náxútha̱n-xkawiu̱únlaꞌ xa̱bo̱, jamí náxúne̱laꞌ nimbá rí ra̱máján. 32 A̱ꞌkhue̱n gakon, ga̱nindxa̱ꞌlaꞌ xa̱bo̱ tsí májáan a̱kui̱ín jamí nañáwíin a̱kui̱ín juya-mijná. Gu̱ne̱ mba̱a̱ a̱kia̱nꞌlaꞌ ju̱ya̱-mijnálaꞌ, xómá rí neꞌne mba̱a̱ a̱kui̱in Ana̱ꞌlóꞌ jaꞌyalaꞌ ga̱jma̱á majñu̱u̱ Krísto̱.