1 Xómáꞌ ikháánꞌ rá, Títo̱, arathán-múꞌúún xa̱bi̱i Ana̱ꞌlóꞌ ga̱jma̱á majñu̱u̱ gisngáá rí gakon. 2 Tsí ñajúún táta̱-xi̱ꞌñú jaꞌyoo rí ma̱nindxúu̱n xa̱bo̱ tsí nu̱ndxa̱ꞌwa̱-mijná mújúún rí mune̱, tsí tsianuu júwa̱ꞌ, tsí wéje̱ gúkúu a̱kui̱ín ná inuu Ana̱ꞌlóꞌ, tsí nandúún juñúú xa̱bo̱ jamí phú mba̱a̱ a̱kui̱ín.

3 Xúꞌkhue̱n máꞌ nána̱-xíñu mangaa, ga̱ju̱wée̱ꞌ xómá xa̱bo̱ tsí nduya-makuíí Ana̱ꞌlóꞌ. Ma̱xánindxúu̱n go̱ꞌo̱ tsí ngrigu̱ún judúún tsixtutaa, ni máꞌ ma̱xájngii̱n. Ga̱nindxúu̱n mbá xkri̱da rí máján, 4 jamí gusngúu̱n go̱ꞌo̱ tsí na̱nguá nikhi̱in xóó rí ma̱gúu̱n juñúu̱ a̱jmbíi̱n jamí i̱jíi̱n. 5 Xúꞌkhue̱n máꞌ gusngúu̱n rí mu̱ndxa̱ꞌwa̱-mijnée̱ mújúu̱n rí muni̱i̱, rí jaꞌwu a̱kuíi̱n gáꞌne, rí mune̱-mba̱ꞌwii̱n mújúu̱n xa̱bo̱ guꞌwúu̱n, jamí rí mune̱-mbáníi̱ rí naꞌthán a̱jmbíi̱n, kajngó mu̱xúthan xkawe̱ꞌ xa̱bo̱ ga̱jma̱á numuu ajngáa rawuun Ana̱ꞌlóꞌ.

6 Xúꞌkhue̱n máꞌ mangaa, arathán-múꞌúún jñáma rí mu̱ndxa̱ꞌwa̱-mijná mújúu̱n rí muni̱i̱. 7 Jmína̱áꞌ máꞌ ikháánꞌ jaꞌyoo rí ma̱nindxa̱a̱ꞌ mbá xkri̱da rí máján mbuyáa̱ ga̱jma̱á majñu̱u̱ mbá xúgíí rí nathane̱. Atasngájma rí kuwíín jamí gamakuíín ído̱ rí narasngáá. 8 Arathán rí máján jámba̱ miꞌtsú, kajngó nimbáa xa̱bo̱ ma̱xáꞌthán rí ra̱máján ga̱jma̱á numaaꞌ. A̱ꞌkhue̱n rí xa̱bo̱ tsí tsíñúú gúyalóꞌ ma̱ti̱ñúu̱ꞌ jamí ma̱xáxóo muthee̱n rí xkawe̱ꞌ ga̱jma̱á numalóꞌ.

9 Arathán-múꞌúún yumbáá tsí waꞌtsi̱in rí gune̱-mbáníi̱ mbá xúgíí rí nuthan ña̱ꞌñíi̱, rí ga̱ꞌne gamakuii̱n jamí mu̱xúriꞌñee̱ nikhuáa. 10 Na̱nguá gíꞌmaa rí mune̱-ku̱ꞌwúu̱n ña̱ꞌñíi̱, rí ga̱nindxúu̱n xa̱bo̱ tsí jmbiin ga̱jma̱á majñu̱u̱ mbá xúgíí rí nuni̱i̱, kajngó mbá xúgíin xa̱bo̱ gúyáá rí phú mitsaan gisngáá drígo̱o̱ Ana̱ꞌlóꞌ tsí naꞌne-jríñáaꞌlóꞌ.

11 Numuu rí nisngájma máꞌ Ana̱ꞌlóꞌ rí phú na̱ni̱gu̱u̱ꞌ jaꞌñúu̱ xa̱bo̱, kajngó ma̱goo ma̱jáwíin mbá xúgíin xa̱bo̱. 12 Ikhaa rí phú na̱ni̱gu̱u̱ꞌ Ana̱ꞌlóꞌ jaꞌyalóꞌ naꞌsngálóꞌ rí mu̱ni̱ꞌñáálóꞌ rí xkawe̱ꞌ, jamí rí na̱ni̱gu̱ún xa̱bo̱ ná numbaa ríge̱ꞌ, kajngó mu̱ndxa̱ꞌwa̱-mijná májánlóꞌ rí mu̱ꞌne̱lóꞌ awúun mbiꞌi rí juwalóꞌ ná numbaa. Xúꞌkhue̱n máꞌ rí mu̱ꞌne̱lóꞌ rí máján jamí ma̱juwalóꞌ xómá rí nandoo Ana̱ꞌlóꞌ, 13 awúun rí ga̱jma̱á mbá jañii a̱kia̱nꞌlóꞌ guáꞌthi̱ínlóꞌ ma̱ga̱nú mbiꞌi rí phú wáá ído̱ rí ma̱ꞌkha̱a Ana̱ꞌlóꞌ Jesukrísto̱, tsí phú mba̱a̱ jamí tsí naꞌne-jríñáaꞌlóꞌ. 14 Jesukrísto̱ nixnáxe̱-mine̱e̱ꞌ rí ma̱ja̱ñúu̱ ga̱jma̱á numalóꞌ, kajngó maꞌtse̱-ri̱ñáa̱ꞌlóꞌ inuu mbá xúgíí rí xkawe̱ꞌ jamí ma̱ꞌne-jaꞌwáa̱nꞌlóꞌ rí ma̱nindxa̱ꞌlóꞌ xa̱bo̱ xuajñuu̱, tsí nune̱ i̱ndo̱ó máꞌ rí máján.

15 Mbá xúgíí rúꞌkhue̱n jaꞌyoo rí ma̱ra̱sngúún xa̱bo̱. Arathán-múꞌúu̱n jamí ataxprígúu̱n ga̱jma̱á mbá xúgíí ski̱yu̱u̱ꞌ ajngóo Ana̱ꞌlóꞌ. Ma̱xára̱xna̱á asndo nimbáa xa̱bo̱ rí ma̱ꞌñaaꞌ asndo xó rí nda̱a̱ numaaꞌ.