32 Mu nkonkolo, ŋa mbihi a ŋa ódzyama tala, bágyi a nde babyele bwohono ya banga a mifulu mi mibi. 33 Baara ba bvulu bwohono báyabvuŋunu ŋa nkulu a muŋma a nzo yi áli nde. 34 Nde ádzuhu baara balagha ba báli a mabyele mama mawa-mawa ya ábyi mifulu mi mibi milagha. Ka ágwi muswa kundaa mifulu mi mibi ti mibili o, mu kuulu mye mígyahaba nde.
Yiisu tsala Nsia yi Mbwe mu Ngalile
(Luk 4.42-43)
35 Mu minkya-nkya, ŋaala nkini áli ya mpyibi, Yiisu átemene ya ápala mu bvulu, ágyene ku ebini ki egwene a baara ya ábwi osamana. 36 Simõ ya baara ba báli ya nde bápala mu oyisagha nde. 37 Mu matala ma bámono bo nde, bo bályele kundaa nde ti: «Baara bwohono bali mu okabulusagha we.» 38 Nde ábvuhulu bo ndiri: «Litswe nkolo nkimi, ku mala ma mali bitaataa bi, mpaala me nduo si oko, mu kuulu me mu obo me aangyi ŋa nsie.» 39 Mu obo nde ágyene mu etsulu e nsie kii Ngalile kyehene ya ákabululuo mu manzo mama lisamana ma ba-Dzwife, ya ákabyi mifulu mi mibi mu baara.
Yiisu dzuhu nga-a-buala
(Mat 8.1-4; Luk 5.12-16)