1 Yiisu ámara oŋo ya ágyene ku bvulu li ákulu nde, ya binduono bi nde bínama nde. 2 Etsughu kii sabate bu eto, nde ábwi oluo mu nzo a lisamana a ba-Dzwife. Baara balagha ba bákagyughu nde bákiŋimi ya bályele ndiri: «Mbwuru wu mandagha ma kunu-ako aabagha mo? Kunu nde aabagha munzeele wu ya nande aagwi nde lileene lii osa bimaã bi ali mu okasa nde? 3 Nde ka li munkomo-manzo o, mwana a Mari, naana a Dzake, Yose, Yude ya Simõ? Ya bankele ba nde ka bali ŋa kara li bihi o?» Ya mandagha mamo mási ti bo bakwono osa kana mu nde. 4 Lo Yiisu ákalyele bo ndiri: «Yini a mu nsie a ndeme, ŋa kara li baara ba dzumu li ndeme ya baba nzo a ndeme, baakabihi ogwa mubighili budziri.» 5 Oko nde ka ákughu osa emaã si etsyini o, nde yini a ndaama a babyele ádzuhu, babo ba ánaã nde myaã ŋa yulu mitswi mi bo. 6 Yiisu ákiŋimi mu kuulu bo ka báli a kana o.

Ŋa mbihi oŋo, Yiisu ákabulugye mu mala ma máli be-bele ya Nadzarete ya ákabululuo. 7 Bu ati bantumu ba nde kwumu ya buolo (12) mbili, ábwi ogweghe bo bagye buolo-buolo ya ágwi bo lileene lili obyi mifulu mi mibi. 8 Átswi bo mukele ti banyaã obiri elogho si emõ, ngu okala limpa, ngu okala empogholo bwunu we nzi mu muswele kala ka yini a mukaana o. 9 Lo nde ályele bo ti: «Lilaha bikoghoro mu myili ya ka lilaha binkuru bi bila byele o.» 10 Yiisu áfirilyele bo ti: «Ŋa akala liisomo be munsa nzo nga-mõ, likala omo tee mu matala ma akala liimara be oŋo. 11 Ya kala ti mu ebini nga-emõ baara babihi obwana be bwunu we ogyughu be, mu matala ma liimara be oŋo, likubulu lifufunu li myili mi be, obo sa osuo bumpughulu mu bo.»

12 Binduono bígyene ya bítsala nsia ti baara bafaana ogyiŋi mayele. 13 Bye bíkabyi mifulu mi mibi milagha, bíkakili babyele balagha maala ya bíkadzuhu bo.

14 Mukogho Erode ágyughu mi ókasa Yiisu. Mu kuulu nkwumu a Yiisu yíkadzumu nsia ya baara bákalyele ti: «Mbwuru wu Dzã Muboghoro aasighili ŋa kara li ba bákpi. Me mu obo nde ali a lileene mu okasa bimaã.» 15 Babake bákalyele ti: «Munde Eli.» Bakimi bákalyele ti: «Nde li mubighili ti anga mumõ mu mibighili mi bihi.» 16 Lo Erode bu agyughu mandagha mamo, ályele ti: «Me Dzã wu aantumu me ti bakehe nde mutswi, me nde aasighili ŋa kara li ba bákpi!»

17 Mu kuulu, Erode ndeme áli aagweghe baara bayisyimi Dzã ya balo nde mu boloko, mu nkooro a Erodyade mukala a Filipe mwana a taara a nde, wu ákie nde. 18 Mu kuulu Dzã ákalyele Erode ti: «We ka li a muswa mu ogwolo mukala a mwana a taara a we o.» 19 Erodyade áli a mbele a Dzã ya ákasagha odzwa nde. Lo ka ákakughu o, 20 mu kuulu Erode áli a nzalamweẽ a Dzã, bu ábaghala ti Dzã áli mbwuru wu a nsumu ya wu a ngili. Mu obo Erode ákakala nde. Ŋa ákagyughu nde Dzã, bitsimi bi nde bíkagwimi, lo nde ákagyughu Dzã ya esee.

21 Lo Erodyade ábagha mpeene yi odzwa Dzã etsughu ki ósi Erode malagha mama ndibili a mweẽ a etsughu ki báburu nde. Erode áti baara ba emfumu e nde, bamfumu ba bambumbulu ya baara baba budziri baba etsulu e nsie kii Ngalile mbili mu oyadza. 22 Mwana a Erodyade wu mukaha áyasomo munsa mu bákadza malagha ya ákakini. Makini ma nde mágwi Erode ya baara ba ágwi nde mpighi esee. Mu obo mukogho ályele kundaa mutughu mukaha ndiri: «Luomo me nswe elogho ki dzyi we, me sa ngwa we kye.» 23 Nde álaba mukihi: «Ki aaluomo we me, me sa ngwa we kye, ngu okala ti epa ki emfumu e me.» 24 Mutughu mukaha ápala ya áfwulu ngughu a nde: «Emakye me aanduomo?» Ngughu a nde ábvuhulu ti: «Mutswi a Dzã Muboghoro.» 25 Mutughu mukaha ábvughuru maswa-maswa kundaa mukogho ya ályele nde ndiri: «Me ndzyi we gwa me mutswi a Dzã Muboghoro mu ndoŋõ lili.» 26 Mukogho ányoõ ku olagha, lo mu nkooro a mikihi mi álaba ŋa nkulu ba bákadza, nde ka áli a bu ofiribihi o. 27 Ŋaana oŋo mukogho ábiŋini nkyele mutsyini ya litumu lili ogya a nde mutswi a Dzã. Nkyele áyikehe Dzã mutswi munsa boloko, 28 ya áyabiri mutswi a nde mu ndoŋõ. Nde ágwi mutswi kundaa mutughu ya mutughu ágwi nde kundaa ngughu a nde. 29 Binduono bi Dzã bu bigyughu ndagha oyo, bíyagwolo ebyimi e nde ya bálo kye kunsa mpyeme.

30 Bantumu báyabvuŋunu kundaa Yiisu, bo bályele nde mandagha mwohono ma bágyighili ya ma báluo bo. 31 Yiisu ályele bo ndiri: «Liyatswe mu libee, ku ebini ki egwene a baara, ya limagwumu.» Mu kuulu baara balagha báakagya ya báakabvughuru, ya bo ka bákabagha si matala mama odza o.

32 Mu obo bo básomo mu bwara mu ogye ku libee, ku ebini ki egwene a baara. 33 Baara balagha ba bámono bo mu okagye, básoolo bo. Mu obo, bo bákafa mu mabvulu mwohono mu myili, bátswama oyito ya bábvuŋunu ku okagye Yiisu ya bantumu ba nde.

34 Yiisu bu apala mu bwara, ámono mpwumu a baara yi nene ya nde ámono bo nyiĩ, mu kuulu bo báli ti anga bindoomo bi bigwene a munkaala-bibuolo. Mu obo nde ábwi oluo bo mandagha malagha.

35 Buulu bwihi ali ayi ku ogyili, binduono bi Yiisu bíyalyele nde ti: «Ebini ki ka eli a baara o, ya bwihi buugyili. 36 Bvurulu baara ba mpaala bayiswumu bi-odza mu mamfulu ya mu mala ma mali bitaa-taa bi.» 37 Lo Yiisu ábvuhulu bo ti: «Be beme, ligwa bo bi-odza!» Bo bályele nde ndiri: «We dzyi ti bihi liyiswumu mampa ma maakughu mu nkama-gyolo yi badenali ya bihi ligwa bo mo?» 38 Yiisu áfwulu bo ti: «Mampa kpe be lili a mo? Ligye limatala.» Bu bayitala, bályele nde ndiri: «Mampa mataana ya banswi buolo lili a bye.» 39 Mu obo, Yiisu ágwi bo litumu mu obwihi baara nsini mu yulu a nsele yi a maŋeẽ mu mampwumu. 40 Baara bábwi-nsini mu bikuru bibi baara nkama (100), ya bibi baara makwumu-mataana (50). 41 Nde bu agwolo mampa mataana mamo ya banswi buolo babo, átala ku yulu ya ábvurulu matuono. Ŋa mbihi oŋo, ákehe mampa ya ágwi mo kundaa binduono bi nde mpaala bo bakaba mo. Yiisu ákaba si banswi buolo kundaa baara bwohono. 42 Baara bwohono báli ya bágyughuru 43 ya binduono bítolo bitsulu bi mampa ya bibi banswi bi bísyili. Bo báluhu bitubu kwumu ya byele (12). 44 Baara ba báli mampa báli babaghala mapfwunu mataana (5 000).

45 Ŋaana oŋo, Yiisu ánsiini binduono bi nde mu osomo mu bwara ya mu otswama ku ngulu yinke yi a mubu, ku nkolo yi a bvulu lili Betesayida, edzighi ki aabvurulu ndeme baara ku manzo ma bo. 46 Mu obo Ŋa mbihi a ŋa abvurulu nde mpwumu a baara, nde ágyene ku yulu a munguo mu oyisamana.

47 Mpyibi bu yibwi, bwara búto kara-a-kara li mubu ya nde ábulusyili ngasighi ŋa yulu a nseghe. 48 Yiisu ámono ti binduono bi nde bíkamono mpara mu odzughu bwara, mu kuulu bo áli bataha busu ku ókafa efulu. Ku bele a ku ookya bwihi, nde ágyene kundaa bo mu myili ŋa yulu a madza ya ákaabululuru bo. 49 Bu bamono nde mu okayadzyara ŋa yulu a madza ma mubu, bo bátsimi ti ekye etoomo éeli ya bákehe bingubu. 50 Mu kuulu bo bwohono bákamono nde ya báli a mikolo maã-maã. Ŋaana oŋo Yiisu ábili ya bo ya ályele ti: «Likala a bukyini! Wu me, ka likala a nzalamweẽ o!» 51 Ya nde ásomo mu bwara ya efulu éfi. Bo bákiŋimi ku olagha, 52 mu kuulu bo ka bábaghala emaã ki mampa o: mu kuulu bo báli a mikolo ngyi.

53 Bu bamana opala mubu, bo báto ŋa mbwuu yi a etsulu e nsie kii Ngenedzarete. 54 Bo bu basaapala mu bwara, baara básoolo ti munde Yiisu. 55 Baara bágyene mu etsulu e nsie kyehene ya bákayabiri babyele ŋa yulu a malaba mu nswe ebini ki bákasoolo ti nde li oŋo. 56 Mu nswe ebini ki ókato Yiisu, mu mala, mu mabvulu, mu mapfulu, baara bákatwulu babyele mu malaba ya bákabuono nde mu kuulu bo babyeme si yini a nto a enkuru e nde. Bo bwohono ba bákabyeme nde bákadzughu.