3 Bágyi a nde mbwuru wu óneŋene binama wu ókayabiri babaghala bana. 4 Buulu ka bákakughu obiri nde tee ŋa óli Yiisu o, mu nkooro a mpwumu a baara, bo bákumu ku yulu a see li nzo lili eyabala, ŋa yulu a ebini ki áli bátemene bo, bátobolo see ya básurulu laba li bálaha baghala wu óneŋene binama. 5 Yiisu bu amono kana li bo, ályele kundaa baghala wu óneŋene binama ndiri: «Mwana a me, masumu ma we baasi mo kolokolo.»

6 Oŋo óli a ndaama a baluo-mikyene ba bábwi-nsini ba bákatsimi bu mu mikolo mi bo: 7 «Mu emakye nde ali mu okabili bu? Nde li mu okatsaala Nzaami. Nande kughu osa masumu kolokolo, kala ka yini a Nzaami o?» 8 Ŋaana oŋo, Yiisu ágyahaba bitsimi bi bo mu mufulu a nde ya ályele bo ndiri: «Mu emakye be lili a bitsimi bibi obo? 9 Emakye egwene a mpara mu olyele! Olyele kundaa baghala wu óneŋene binama ti: "Baasi masumu ma we kolokolo", bwunu we olyele ti: "Temene, gwolo laba li we ya dzyara!" 10 Lo me ndzyi ti be ligyahaba ti Mwana a mbwuru li a litumu ŋa yulu a nsie mu osa masumu kolokolo.» Nde ályele mbwuru wu óneŋene binama ti: 11 «Me ndyele we yo, temene, gwolo laba li we ya bvughuru ku nzo a we.» 12 Baghala átemene, ŋaana oŋo ágwolo laba li nde ya ápala mu nzo ŋa mihi mi baara bwohono. Mu obo baara bwohono bákiŋimi ya bákasyighi Nzaami bu bakalyele ndiri: «Kaala bihi nkini límaamono ndagha yi a bu yi o!»