2 Ŋa mbihi a bitsughu bisemene, Yiisu ábiri Piere, Dzake ya Dzã bo ngasighi mu libee, ku yulu a munguo wu mula. Efa e nde e sobo ŋa nkulu a bo. 3 Binkuru bi nde bíbwi osehene ya bípeŋeme mu buŋu liili ka oli a mbwuru ŋa nsie wu kughu ogwa buŋu lili obo o. 4 Eli ya Moyidze bámoŋono kundaa bo. Bo bákabili ya Yiisu. 5 Piere ályele kundaa Yiisu ndiri: «Muluo, Oli bubwe ti bihi-a-be likala ŋa. Litswe litwu bibvulu bitere: etsyini kii we, etsyini kii Moyidze ya etsyini kii Eli» 6 Piere ka ákasoolo ndagha yi obili o, mu kuulu bo báli a nzalamweẽ. 7 Edzi égyi ya edzyimi-a-dzyimi e kye éfughu bo, ya ndagha yípala kunsa kye: «Wu me Mwana a me wu mukolo, ligyughu nde!» 8 Ŋaana oŋo bo bátala nkolo ya nkolo, lo bo ka bámono mbwuru mukimi o ŋa yulu a yini a Yiisu ngasighi ya bo.
9 Ŋa bákasughuru bo munguo, Yiisu átswi bo mukele banyaã olyele mbwuru mi bámono bo tee ŋa akala oosighili Mwana a mbwuru ŋa kara li ba bákpi. 10 Bo bási ndagha oyo nsimi, lo bakafumunu bo-a-bo ti: «Osighili ŋa kara li ba bákpi bunu-a-bo odzyi olyele?»
Binduono bigwi Yiisu bifwulu mu Eli
(Mat 17.10-13)
11 Ya binduono bi Yiisu bífwulu nde ti: «Mu emakye baluo-mikyene baakalyele ti Eli faana otswama ogya?» 12 Nde ábvuhulu bo ti: «Eli sa atswama ogya mu obvurulu mandagha mwohono bwunu a bu máli. Mu emakye básono ti Mwana a mbwuru faana omono mpara yi alagha ya sa babele nde? 13 Lo me ndi mu olyele be ti Eli ágyi, ya baara bási nde bu bádzyi bo, bwunu a bu oli mandagha ma básono mu nde.»
Yiisu dzuhu mwana nga-a-mufulu wu mubi
(Mat 17.14-21; Luk 9.37-43)