1 Man ënë köp na Muca ötwakö both jö Icarael kïbëc ï löka kulo Jordan kï kukïdë ï karë na gïn tye ï thim, ï Araba n’opimere kï Cup, ï kin Paran kï Topel, Laban, Kajerot ëka Dijabu. 2 (Tero nïnö apar wie acël më woth, yaa kï ï Koreb më cïdhö yo Kadec Barnea nakun ewok kï ï yoo më Kidi Ceir.)

3 Ï nïnö dwe acël më dwe më apar wie acël, ï mwaka më pyer angwën, ënë Muca okobo both jö Icarael cïk kïbëc n’onwongo Rwoth ömïö bothe na makö komgï. 4 Man ötïmërë kinge na ën ölöö Cikon rwoth ka jö Amor, n’onwongo löö löc ï Kecbon, ëka Og rwoth më Bacan, n’onwongo löö löc ï Acitarot ëka Edrei.

5 Ï löka kulo më Jordan kï kukïdë më lobo më Moab, Muca öcakö gönyö tyën cïk ni nakun kobo nï:

6 Rwoth Obanga onu ötwak kod onu kï ï Koreb* nï, "Un dong ibedo ï thë kidi ni pï karë na lac. 7 Yaa unu ëk ïcak unu wothwu, ïcïdh unu yo lobo n’otingere ka jö Amor, ëka jö kïbëc na cwök ködgï na tye ï Araba, ï kite, kï kuthö thë kite, ï Negeb ëka ï lobo n’ögürö dhö nam, ï lobo ka jö Kanaan ëka ï Lebanon, naka ï kulo na thwönë, n’obedo kulo më Euparate. 8 Nën! An dong atyeko mïöwu lobo ni. Cïdh unu ëk ïgam unu lobo na Rwoth okwongere nï ebino mïö both kwaröwu Abraam, Icaka, Jakob ëka ëkwaëgï na bino lübögï."

9 Ï karë nön, Muca okobo bothgï nï, "An ba dökï arömö cobo pëköwu këna. 10 Rwoth Obangawu dong ömïö ïnya unu na pol rwök, ënë ömïö tin ipol unu calö cër na tye ï polo. 11 Ëk Rwoth, Obanga ka kwerewu, ömïïwu ïmëdërë tyën elip acël ëka ömïïwu gum kite na ën öcïkö ködë! 12 Ëntö an atwërö cobo pëköwu këna nïngö nakun dong ïdökö unu yëc na pëk rwök, ëka kï köp kïbëc na tye ï kinwu? 13 Yër unu jö mökö na ryëk, na nïang ëka jö n’ëwörögï kï ï kom kakawu acëlacël, ëka an abino kethogï na calö ëtëlawu."

14 Un ibino ïgamö nïna nï, "Gin na in ikobo tye na bër na wan myero ëtïm."

15 Cë an akwanyö ëtëla më kakawu, ëryëkö ëka jö n’ëwörögï. An akethogï më bedo kï löc ï komwu na calö edite ka jö elip, edite ka jö mia acël, edite ka jö pyer abic, edite ka jö apar ëka na calö ëtëla më kaka. 16 Ï karë nön an acïkö ëngöl-köpwu nï: Winy unu pido na tye ï kin utmegowu ëka ïngöl unu köp n’atïr, kadï köp tye ï kin omego n’obedo dhanö më Icarael onyo arok mörö na bedo bothe. 17 Kür ilengere unu ï ngölö-köp; un ibino winyo köp ka ngat na tïdï ëka më ka ngat na dit na röm aröma. Kür ibed unu kï lworo ï kom ngat mörö, pïën ngölö-köp obedo më k’Obanga. Kel unu köp mörö na tëk rwök kï bothwu ëka an abino winyo. 18 Ï karë nön an acïköwu ï kom jami kïbëc na un onwongo myero ïtïm.

19 Cë wan ëya ökö kï ï Koreb kite na Rwoth Obangawa öcïköwa ködë. Wan ewok ï thim na lac na un ïnënö ëka ëcïdhö yo lobo n’otingere ka jö Amor cë ethuno ï Kadec Barnea. 20 Cë an akobo bothwu nï, "Un ithuno ï lobo ka jö Amor n’otingere, na Rwoth Obanga onu tye ka mïö both onu. 21 Nën, Rwoth Obangawu ömïöwu lobo. Cïdh unu ëk ïgam unu lobo kite na Rwoth Obanga, Obanga ka kwerewu, okobo niwu. Kür ibed unu kï lworo; kür cwinywu thon opodhi."

22 Cë un kïbëc ibino unu botha ëka ikobo unu nï, "Eru eor cwö mörö më cïdhö anyim ëk öcïdh öröth gïnï lobo nï onu ëka odwongi gïnï köp both onu ï kom yoo na onu myero ëlübï ëka peci na onu ebino dönyö ïë."

23 An athamö nï man obedo thama na bër; cë an ayërö jö apar arïö, ëcwö acël kï ï kaka acëlacël. 24 Gïn obino öya ëka öcïdhö gïnï ï lobo n’otingere, cë obino gïnï naka ï ora më Ecikol ëka öröthö gïnï. 25 Gïn ökwanyö nyig yen mökö më lobo nön ëka okelo gïnï bothwa. Gïn odwongo köp bothwa nakun kobo gïnï nï, "Lobo na Rwoth Obanga onu cwök mïö both onu obedo lobo na bër."

26 Ëntö un onwongo ba ïmïtö unu cïdhö yo malö; un ïjëm ï kom cïk ka Rwoth Obangawu. 27 Un ïngüngüta kï ï këmawu nakun ikobo unu nï, "Rwoth dagwa; ën ökwanyöwa kï ï Ejip më mïöwa ï cïng jö Amor ëk otyekwa ökö. 28 Wan ebino cïdhö yo kwene? Utmegowa ömïöwa erwenyo genwa ökö. Gïn kobo nï, ‘Jö më lobo nön tëk ëka boco gïnï na lööwa ökö; peci tye na döngö, na cël mërë tye naka malö ï wi polo. Wan thon ënënö jö Anak kunön.’"

29 Cë an akobo bothwu nï, "Kür ibed unu kï myël kom; kür ilwor unugï. 30 Rwoth Obangawu, na ënë tëlö nyimwu, ënë bino lwëny pïrwu, kite na un ïnënö ën ötïmö ï Ejip, 31 ëka ï thim. Kunön un ïnënö kite na Rwoth Obangawu ögwököwu ködë, na calö kite n’apap tingo kï wode. Ën ötïmö man ï kabedo kïbëc na un ïcïdhö yo ïë naka ithuno unu ï kabedo ni."

32 Ëntö kï kom gin na kïbëc n’Obanga ötïmö un pod ïkwërö më bedo kï gen ï kom Rwoth Obangawu, 33 n’obino ötëlö nyimwu ï wothwu, kï mac ï kiwor ëka kï pöl ï kiceng, më nwongo kabedo niwu ëk ibed unu ïë ëka më nyutho niwu yoo na myero ïlüb unu.

34 Ï karë na Rwoth owinyo köp na un ikobo, ën obedo k’akëmö ëka okwongo kwong ni: 35 "Ngat mörö më run ni na rac ope kadï k’acël na bino nënö lobo na bër na an akwongara më mïö both kwerewu, 36 na path kï Kaleb wod ka Jepune. Ën bino nënö lobo nön. An abino mïö ën ëka ëkwaë mërë lobo na ën bino nyönö kï tyënë, pïën ën obedo ka lübö Rwoth kï cwinye kïbëc."

37 Akëmö obino ömakö Rwoth thon ï koma pïrwu. Ën okobo nïna nï, "In thon ba ibino dönyö kunön. 38 Ëntö Yocua wod ka Nun n’obedo alüb kori ënë bino dönyö. Dïï cwinye, pïën ën bino tëlö jö Icarael më gamö lobo nön." 39 Cë Rwoth okobo both onu kïbëc nï, "Ëthïnöwu na pod thïthïnö gïnï na un ikobo nï ebino terogï ï opii ëka na bara ngeo gïnï poko gin na bër kï kom gin na rac, gïn ënë bino dönyö kunön. An abino mïögï ëka gïn bino gamö. 40 Ëntö un, lökërë ëka ïdök unu ï thim ï yoo na cïdhö yo Nam na Kwar."

41 Cë un ïgamö nïna nï, "Wan ëbalö ï nyim Rwoth. Wan ebino cïdhö ëka ëlwënyö kite na Rwoth Obangawa öcïköwa ködë." Cë ngat acëlacël oruko jami më lwëny nakun thamö nï cïdhö yo lobo n’otingere obedo gin na yot.

42 Ëntö Rwoth okobo nïna nï, "Kob nïgï, ‘Kür ïcïdh unu malö më lwëny pïën an ba abino woth kodwu ëka langwu bino löönöwu.’"

43 An atwak kodwu, ëntö un ba iwinyo. Un ïjëm ï kom cïk ka Rwoth ëka pï awakawu un ïcïdhö ï lobo n’otingere. 44 Jö Amor n’onwongo bedo gïnï kanya otingere nön obino ï komwu; gïn öryëmö körwu calö kic ëka ölwënyö ï komwu kï ï Ceir naka othuno ï Korma. 45 Cë un idwogo ëka ikok unu ï nyim Rwoth, ëntö ën ba owinyo kokowu ëka ba olengo ithe ï köpwu. 46 Pï manön, un idong ï Kadec nïnö na pol—pï karë kïbëc na un ibedo kunön.