Nwönö Cïk 2

Karë na jö Icarael obedo ködë ï thim

1 Cë wan ëlökërë ëka ëcïdhö ï thim, ï yoo na dök yo Nam na Kwar, kite na Rwoth öcïka ködë. Wan ebedo ka wïrë ï lobo më Ceir n’obedo lobo n’otingere pï karë na lac.

2 Cë Rwoth okobo nïna nï, 3 "Un dong ibedo ka wïrë ï lobo ni n’otingere pï karë na lac; kobedini dong lökërë unu yo kukuju. 4 Mïï jïï cïk ni gïnï: ‘Un ïcwök unu wok ï lobo ka utmegowu n’obedo ëkwaë k’Ecau, na bedo gïnï ï lobo Ceir. Gïn bino bedo kï lworo ï komwu, ëntö myero ïgwökërë unu rwök. 5 Kür ïcak unu lwëny ï komgï, pïën an ba abino mïö lobogï mörö bothwu, kadï thon kany mörö na dhanö twërö cung ïë. An amïö lobo n’otingere më Ceir both Ecau na calö mëgë. 6 Un ibino wïlö cem më acama ëka pii më amodha kï bothgï.’"

7 Rwoth Obangawu ömïöwu gum ï kom tic kïbëc më cïngwu. Ën ögwököwu ï wothwu ï thim ni na lac. Ï mwaka pyer angwën ni Rwoth Obangawu obedo ka gwököwu, ëka gin mörö ope n’orem kï bothwu.

8 Cë wan ëcïdhö ëkadhö utmegowa n’obedo ëkwaë k’Ecau, na bedo gïnï ï Ceir. Wan ëlökërë kï ï yoo më Araba na yaa kï ï Elat ëka Ejion Geber, cë ëcïdhö ï yoo na dök yo thim më Moab.

9 Cë Rwoth okobo nïna nï, "Kür ïcïdh unu both jö më Moab kï gero onyo ïcak unu lwëny ï komgï, pïën an ba abino mïöwu lobogï mörö. An atyeko mïö Ar both ëkwaë ka Lot na calö mëgï."

10 (Jö Emim onwongo bedo gïnï kunön cön; gïn obedo jö na tëk ëka pol gïnï rwök nakun boco gïnï calö jö Anak. 11 Jö ni ëkwanögï ï kom jö Repa calö jö Anak, ëntö jö Moab cwodogï nï jö Emim. 12 Jö Kori onwongo cön bedo gïnï ï Ceir, ëntö ëkwaë k’Ecau obino öryëmögï ökö. Gïn otyekogï ökö kïbëc kï ï nyimgï ëka obedo gïnï ï kabedogï kite na jö Icarael ötïmö ködë ï lobo na Rwoth ömïögï na calö mëgï.)

13 Ëka Rwoth okobo nï, "Kobedini dong yaa unu malö, ïngöl unu ora më Jered." Cë wan ëngölö ora.

14 Cakërë ï karë na wan ëya ködë kï ï Kadec Barnea naka ëngölö ï ora më Jered, onwongo dong römö mwaka pyer adek wie aboro. Ï karë nön cwö kïbëc më run nön n’onwongo obedo gïnï ëlwëny obino öthöö gïnï ökö, kite na Rwoth onwongo okwongere ködë bothgï. 15 Cïng Rwoth onwongo tye ï komgï naka otyeko jö më run nön kïbëc kï ï kabedogï.

16 Ï karë na jö kïbëc n’onwongo obedo gïnï ëlwëny öthöö othum ökö, 17 Rwoth okobo nïna nï, 18 "Tin myero iwok unu kï ï wang lobo më Moab na cwök kï pacö më Ar. 19 Ëntö ka ibino unu na cwök kï jö Amon, kür ïcïdh unu bothgï kï gero onyo ïcak unu lwëny ï komgï, pïën an ba abino mïöwu lobo mörö n’obedo më ka jö Amon. An dong atyeko mïö both ëkwaë ka Lot na calö mëgï."

20 (Manön thon onwongo ecwodo nï lobo ka jö Repa, n’onwongo bedo gïnï kunön; ëntö jö Amon cwodogï nï jö Jamjumim. 21 Gïn onwongo obedo jö na tëk ëka pol gïnï rwök nakun boco gïnï calö jö Anak. Rwoth obino otyekogï kïbëc kï ï nyim jö Amon, n’öryëmögï ökö ëka obedo gïnï ï lobogï. 22 Man ënë kite na Rwoth ötïmö ködë thon ï kom ëkwaë k’Ecau n’onwongo obedo gïnï ï Ceir, ï karë na ën otyeko jö Kori ökö kï ï nyimgï. Cë ëkwaë k’Ecau ögamö lobogï ëka oleo gïnï na pod bedo gïnï ïë naka tin. 23 Ëka pï jö Abi n’obedo gïnï ï peci na thïthïnö naka othuno ï Gaja, jö Kaptor n’obino gïnï kï ï Kaptor otyekogï ökö ëka obedo gïnï ï kabedogï.)

Ëlöö Cikon rwoth më Kecbon

24 "Kinge na dong onu ewok ï Moab, Rwoth okobo both onu nï, ‘Yaa malö, ïcak unu dong ngölö ora më Arnon. Nën! An atyeko mïö Cikon dhanö më Amor, rwoth më Kecbon, kanya acël kï lobo mërë ï cïngwu. Cïdh unu anyim ëk ïlwëny unu ï kome ëka ïgam unu lobo. 25 Ï nïnö na tin, an abino mïö koyo öny ï kom rok kïbëc na bedo ï wi lobo nakun lworo makögï. Gïn bino winyo köp ï komwu ëka komgï bino myël nakun cwinygï podho pïrwu.’

26 "Cë an aoro jïï ï thim më Kedemot both Cikon rwoth më Kecbon kï köp më kuc, nakun akobo nïnë nï, 27 ‘Yee nïwa më wok ï loboni. Wan ebino wok nakun ëlübö yoo këkën. Wan ba ebino lökërë yo kucem onyo yo kucam. 28 Cadh nïwa cem më acama ëka pii më amodha kï wel më ryal. Yee nïwa ewok kï tyënwa këkën— 29 kite n’ëkwaë k’Ecau na bedo gïnï ï Ceir ëka jö Moab na bedo gïnï ï Ar ötïmö ködë—naka wan ëngölö kulo Jordan yo lobo na Rwoth Obangawa tye ka mïöwa.’ 30 Ëntö Cikon rwoth më Kecbon ökwërö ökö nï wan kür ewok na cwök ködë pïën Rwoth Obanga onwongo ömïö ën obedo kï cwiny na nwang ëka kï cwiny na tëk ëk ëmïï ën ï cïngwu kite na dong ötïmö ködë.

31 "Rwoth okobo nïna nï, ‘Nën, an dong acakö mïö Cikon ëka kï lobo mërë bothwu. Cak unu dong gamö lobo mërë na calö mewu.’"

32 Ï karë na Cikon ëka acikari mërë kïbëc obino gïnï më lwëny ï komwa kï ï Jakaj, 33 Rwoth Obangawa öcakö mïö ën ï cïngwa ëka eneko ën kanya acël k’awope mërë ëka k’acikari mërë kïbëc. 34 Ï karë nön wan ëgamö peci mërë kïbëc. Etyekogï—cwö, mon ëka ëthïnö. Ngat mörö ope n’öbwöth na kwö. 35 Wan etero lïm na kwö na wan ëyakö ëk ödök mëwa, kanya acël kï jami nökënë n’ëyakö kï ï peci kïbëc na wan ëmaögï. 36 Cakërë kï ï Aroer na tye ï nget ora më Arnon ëka kï ï pacö na tye ï ora, më thuno ködë naka ï Gilead, pacö mörö ope na tëk n’ëgërö malö rwök na maö ölööwa. Rwoth Obangawa ömïögï kïbëc ï cïngwa. 37 Ëntö un ba ibino iwok unu na cwök kï lobo ka jö Amon, kadï lobo na tye ï dhö kulo më Jabok onyo peci mörö na tye ï lobo n’otingere, onyo kanya Rwoth Obangawa öjüköwa kï ïë.