1 Ka in ïnënö thwön onyo römö k’omeru n’orwenyo ökö ata, kür ïnën anëna; myero ïdwök yo both omeru. 2 Ka won mërë ba bedo na cwök kodi onyo ba ingeo won mërë, cë in myero iter lee n’orwenyo nön yo pari ëka ïgwök naka ka won mërë obino na tye ka rangö. Cë ïmïï bothe. 3 In ibino tïmö nï kömanön ï kom kana mërë, böng mërë, onyo gin mörö këkën n’omeru orwenyo ëka in inwongo; in kür ïnën anëna.

4 Ka in inwongo kana onyo thwön k’omeru n’opodho pïny ï nget yoo, kür ïnën anëna, ëntö köny ën më tingo malö ëk ocung kï tyënë.

5 Dhakö myero kür oruk böng ka cwö, onyo ëcwö kür oruk böng ka mon, pïën dhanö n’ötïmö kömanön bedo më kwer both Rwoth Obangawu.

6 Ka in tye ka woth ï yoo cë icop ï kom öd wïnyü ï nget yoo, onyo ï wi yath onyo ï ngöm, ëka mïn wïnyü obuto ï kom ëthïnë onyo ï kom töngë, kür ïmak mïn mërë kanya acël k’ëthïnë. 7 In ïtwërö tero ëthïnë, cë ïwëkö mïn mërë cïdhö, ëk nyimwu obed na leng ëka ibed unu na kwö pï karë na lac.

8 Ka in ïgërö öt na nyen, myero iketh gin mörö na jükö podho ka dhanö orum wi öt ëk kür okel bal më önyö remo ï odi ka ngat mörö opodho kï ï wi öt.

9 Kür ïcwö kodhi na papath arïö ï pwodho ölökni, ka ïcwö, mïö gin na kïbëc n’öcëk ïë myero eter ï öt k’Obanga, gin na in ïcwö ïë thon naka kï nyig ölök.

10 Kür itwe thwön ëka kana kanya acël më pur.

11 Kür iruk böngü n’obedo yer ëka böngü na pwöth n’ëkwö kanya acël.

12 Myero ïkwö töl tacël na lyero ï twok böngü angwën na in iruko.

13 Ka ëcwö mörö önyömö dhakö cë obedo ködë, cë ökwërö ën ökö, 14 cë okobo köp na rac ï kome, na balö nyïng dhakö nakun kobo nï, "An anyömö dhakö ni, ëntö ï karë na an abedo ködë, anwongo gin mörö ope na nyutho nï ën bara ongere k’ëcwö." 15 Cë apap ëka aya ka dhakö nön bino kelo gïnï gin na nyutho nï ën bara ongere k’ëcwö both edong ï dhö wangkac më pacö. 16 Apap mërë bino kobo both edong nï, "An amïö nyara both ëcwö ni ëk önyöm ëntö ökwërö nyara ökö. 17 Kobedini ën okelo köp më adoth ï kome nakun kobo nï, ‘An anwongo gin mörö ope na nyutho nï ën bara ongere k’ëcwö.’ Ëntö man ënë gin na nyutho nï nyara bara ongere k’ëcwö." Cë enyodo mërë bino yarö böngü ï nyim edong më pacö. 18 Edong më pacö bino tero ëcwö nön ëka epwodo. 19 Gïn bino ngölö nïnë cül më ryal mia acël. Gïn bino mïö both apap ka dhakö, pïën ëcwö nön öbalö nyïng nya jö Icarael na bara ongere k’ëcwö. Cë ën bino mëdërë më bedo dhakö mërë; ëka myero kür ökwër dhakö nön pï karë më kwö mërë kïbëc.

20 Ëntö ka köp më adoth nön tye atïr, ëka gin mörö ope n’enwongo na nyutho nï dhakö nön bara ongere k’ëcwö, 21 cë jö më pacö nön bino kelo dhakö nön ï dholokek më öt k’apap mërë ëka kï kunön cwö më pacö nön bino celo ën kï kite naka thöö. Ën ötïmö gin më lewic ï Icarael nakun obedo tïmö tïm më ölyang ï karë na ën bedo ï öt k’apap mërë. Un myero ïkwany unu gin na rac ökö kï ï kinwu.

22 Ka ebino nwongo ëcwö mörö n’obedo kï dhakö ka ngat nökënë, ëcwö n’obedo ködë ëka dhakö nön myero enekgï ökö. Un myero ïkwany unu gin na rac ökö kï ï Icarael.

23 Ka ëcwö mörö kï ï pacö oromo kï nyakö na bara ongere k’ëcwö, n’onwongo öcïkërë kï ngat mörö më anyöma cë obedo ködë, 24 un ibino tero jö arïö nön kïbëc yökö ï dhö wangkac më pacö nön, ëka ecelogï kï kite naka ï thöö. Eneko nyakö nön pïën ba ögöö oduru ëk ëkönyë ëka eneko ëcwö pïën ötürö cïk më bedo kï dhakö ka ngat nökënë. Un myero ïkwany unu gin na rac ökö kï kinwu.

25 Ëntö ka ëcwö mörö oromo kï nyakö n’öcïkërë kï ngat mörö më anyöma ï dye thim cë obedo ködë tëtëk, ëcwö këkën n’ötïmö gin ni ënë ebino neko. 26 Kür ïtïm unu gin mörö ï kom nyakö; pïën ën ba öbalö bal mörö na römö ngölö nïnë thöö. Köp ni röm kï köp k’ëcwö n’ölwënyö ï kom awodhe cë oneko ökö, 27 pïën ëcwö oromo kï dhakö n’ëcïkërë ködë më anyöma ï thim cë obedo ködë tëtëk ëka dhakö ögöö oduru, ëntö ngat mörö onwongo ope kunön na twërö könyö ën.

28 Ka ëcwö mörö oromo kï nyakö na bara ongere k’ëcwö n’onwongo ba öcïkërë më anyöma ëka obedo ködë tëtëk cë engeogï, 29 ën bino cülö apap ka nyakö ryal pyer abic. Ën myero önyöm nyakö nön pïën ën ötïmö bal ï kome. Ën ba bino kwërö dhakö nön pï karë më kwö mërë kïbëc.

30 Dhanö mörö kür obed kï dhakö k’apap mërë; ën myero kür ömïï lewic ï kom apap mërë.