Deuteronômio 33

Muca ölamö gum ï kom jö Icarael

1 Man ënë gum na Muca dhanö k’Obanga ölamö ï kom jö Icarael na ën bara öthöö. 2 Ën okobo nï,

"Rwoth obino öya kï wi kidi Cinai

cë onen bothgï ï Ceir,

ën öryëny ï komgï kï ï wi kidi Paran.

Ën obino kï jögë na leng elip kï elip

kï lëb mac na lyël kï ï cïngë më kucem.

3 Adyer in kikomi ënë ïmarö jïï;

jö na leng kïbëc tye gïnï ï cingi.

Gïn kïbëc ryebere pïny ï ka tyeni,

ëka nwongo gïnï pwony kï bothi,

4 cïk na Muca ömïö bothwa,

më bedo më ka jö ka Jakob.

5 Ën obino obedo rwoth ï Jecurun

ï karë n’edite ka lwak öcökërë gïnï,

kanya acël kï kaka kïbëc më Icarael.

6 "Ëk Reuben obed na kwö ëka kür öthöö,

jögë thon kür obed na nönök."

7 Ëka man ënë gin na ën okobo ï kom Yuda:

"Aa Rwoth, winy koko ka Yuda;

dwongi ën pacö both jögë.

Ën bino lwëny pïrë kënë kï cïngë.

Bed ngat na könyö ën ï kom lang mërë!"

8 Ëka ï kom Lebi ën okobo nï:

"Mïï both Lebi Tumim ëka Urim*33:8 Tumim ëka Urim jami arïö ni ëlamdhök ënë onwongo tio ködë më moko miti k’Obanga; ba ngere kite n’onwongo etio ködë. na megi

both aticni na in igeno.

In ïtëmö ën kï ï Maca;

in ibino ïtëmö nï gïn tye adyer kï ï dhö pii më Meriba.

9 Lebi okobo ï kom apap ëka aya mërë nï,

‘An ba aparö pïrgï.’

Ën wie ba opo ï kom utmego mërë

onyo më ngeo ëthïnö mërë kikokome,

ëntö ën ögwökö köp na megi

ëka ölübö cïkërëni.

10 Gïn bino pwonyo Jakob kï cïkni

ëka cïkni both jö Icarael.

Ën bino wangö odok na kur ï nyimi

ëka tyër awanga kïbëc ï wi keno tyërni.

11 Aa Rwoth, mïï gum ï kom dïrü mërë kïbëc,

ëka ibed kï yom cwiny ï kom gin na ën otio kï cïngë.

Göö lang na yaa më lwëny ï kome pïny,

göö lang mërë pïny ëk kür dökï ölwëny gïnï ï kome."

12 Ëka ï kom Benjamin ën okobo nï:

"Ëk dhanö na Rwoth marö obed kï kuc ï kome,

pïën Rwoth gwökö ën ï karë kïbëc,

ëka ngat na Rwoth marö yweo ï kin wi baë."

13 Ï kom Yocepu ën okobo nï:

"Rwoth myero ömïï gum ï lobo mërë

kï mïc më thoi na bëcö na yaa kï malö ï polo,

ëka kï pii na thuth na tye pïny ï thë lobo,

14 kï nyig yen na bëcö na nyak kï ceng,

ëka kï cem na cëk dwe kï dwe,

15 kï nyig kodhi na bëcö na cëk ï wi kite na cön

ëka kï jami na cëk na büp ï wi cere na bedo naka naka;

16 kï mïc na bëcö më ngöm ëka kï gin na kïbëc na cëk ï ïë,

ëka kïca ka ngat n’onen kï ï bunga na lyël mac.

Ëk gum ni kïbëc obed ï wi Yocepu,

ëka ï wi ngat n’epoko ökö kï ï kin utmego mërë.

17 Ï dit mërë kï dheo mërë ën obedo calö wod thwön n’obedo kaö;

tunge cal gïnï kï tung thwön na ger.

Kï tunge gïnï ën bino twomo kï rok gïnï,

naka jö na tye ï thwok lobo kïbëc.

Man ënë gumna pï jö Epraim na pol,

ëka kï jö ka Manace na römö elip kï elip."

18 Ï kom Jabulon ën okobo nï:

"Cwinyi obed na yom, Jabulon, ka ïdönyö yökö,

ëka in, Icakar, ka ibedo ï këmani.

19 Gïn bino cwodo jö kïbëc më cïdhö yo wi kidi

ëka kï kunön gïn bino mïö tyërgï më kite atïr,

gïn bino nwongo lönyögï kï ï nam,

kï ï kom lönyö n’ëkanö ï kwo."

20 Ï kom Gad ën okobo nï:

"Gum obed ï kom dhanö n’ömïö wang lobo ka Gad obedo na lac!

Gad buto kunön calö kibwor,

më yëcö bad lee onyo wie.

21 Ën öyërö lobo mërë na bër,

pïën nget lobo k’ëtëla onwongo ëkanö pïrë.

Ï karë n’edite wi lwak öcökërë gïnï,

ën otio gin na Rwoth mïtö na tye atïr,

ëka kï ngölö-köp mërë ï kom jö Icarael."

22 Ï kom Dan ën okobo nï:

"Dan cal k’athïn kibwor,

na kïïrë kï ï Bacan."

23 Ï kom Naputali ën okobo nï:

"Naputali, in ipong kï kïca ka Rwoth,

ëka ipong kï gum ka Rwoth;

gam lobo më kuthö ëka kukwap."

24 Ï kom Acer ën okobo nï:

"Ëk gum obed ï kom Acer na löö kaka nökënë,

ëk cwiny utmego mërë obed na bër ï kome,

ëka ölwök tyënë ï möö jeituni.

25 Nywenyo më loro dhö wangkac na megi bino bedo nywenyo kï mola,

ëka tëkö më komi bino bedo na rom kï mwaka më ditni.

26 "Ngat mörö ope na cal k’Obanga ka Jecurun,

na ngwëcö arii ï polo më könyöni,

ëka kï dheo mërë ï kom pöl.

27 Obanga na bedo naka naka ënë obedo ka ponowu,

ëka cïngë tye pïny më tingowu malö.

Ën ryëmö langni ökö kï ï nyimi,

nakun kobo nï, ‘Tyekgï ökö!’

28 Pï manön Icarael bino bedo kï kuc,

ëkwaë ka Jakob bino bedo gïnï abonge ayela mörö

ï lobo na kal ëka köngö ölök na nyen tye ïë,

kanya polo mïö thoi tön pïny.

29 Cwinywu obed na yom un jö Icarael!

Nga na cal kodwu,

rok na Rwoth ölarögï?

Ën obedo kwotwu ëka ngat na gwököwu

ëka kï pala abadëni më aura.

Langwu bino bedo gïnï kï myël kom ï nyimwu,

ëka tyënwu bino nyönö kabedogï kïbëc."