1 Un ëthïnö, winy unu enyodowu ï Rwoth, pïën manön ënë bër. 2 Cöc na Leng kobo nï, "Wör apapni ëka ayani," man ënë cïk më acël n’ëcïkö pï gin mörö na bër na bino yaa kï ïë— 3 "ëk ibed unu na bër ëka ibed unu ï lobo pï karë na lac."✝

4 Un jö kabebe, kür iter unu ëthïnöwu ï yoo na rac na mïö akëmö makögï, ëntö mïï unugï ödöng na bër nakun ipwonyo unugï ëka inyutho unu nïgï kite na bëcö na Rwoth pwöyö.

5 Un opii, winy unu editewu më lobo kï cwiny acël, na calö iwinyo unu Kiricito, nakun ilworo unugï kï myël kom. 6 Ticwu myero kür obed tic n’ënënö kï wang këkën më yomo cwiny dhanö, ëntö tii unu gin n’Obanga mïtö kï cwinywu kïbëc, na calö opii ka Kiricito. 7 Tii unu ticwu kï cwiny na bër, na calö itio unu pï Rwoth, ëka pathï pï dhanö, 8 pïën un ingeo nï Rwoth bino cülö ngat mörö këkën, kadï obedo opii onyo ngat mörö na löörë kënë pï gin mörö këkën na bër na ën otio.

9 Wegi opii, ter unu opiiwu ï yoo acël nön. Kür ïbür unugï, kite na un ingeo nï adit na löögï ëka kï un tye ï polo, na ën makö jö kïbëc na röm aröma.

10 Më ajiki, bed unu na tëk ï Rwoth ëka ï twërö më tëkö mërë. 11 Ruk unu jami më lwëny n’Obanga mïö, ëk icung unu na tëk, nakun ïgëngërë unu kï kom ököra ka Catan. 12 Pïën onu ba ëlwënyö kï dhanö adhana, ëntö ëlwënyö k’ëlöc ëka wegi twër më yökö, na löö wi lobo thükül ï karë ni më cöl pïny ëka kï tipo mökö na reco na tye malö ï wi yamö. 13 Pï manön, myero iruk unu jami lwëny n’örömö n’Obanga mïö, ëk ökönywu më cung na tëk ka nïnö na rac othuno, ëka kinge lwëny naka ï ajiki, un pod ibino cung unu na tëk. 14 Pï manön myero icung unu nakun itweo unu wang pyërwu kï del më köp atïr, ruk unu kite atïr obed nywenyo më gwökö korwu, 15 ëka ïyübërë unu më tïtö köp më Emuth na Bër më kuc na calö wör më tyënwu. 16 Mëd ï kom jami ni kïbëc, yeewu myero obed kwotwu na un ïtwërö neko mac kï ï kom athërö na Catan yuo. 17 Ruk unu larë obed tok nywenyo më wiwu, ëka köp k’Obanga na ënë pala abadë ka Tipo Naleng. 18 Lëg unu lëga kïbëc na papath kï tëkö ka Tipo Naleng ï karë kïbëc. Bed nï yübërë unu ï karë kïbëc nakun ïdangö unu pëkö, ëka ïlëgö unu pï jö k’Obanga na leng kïbëc.Ruk unu jami lwëny

19 Lëg unu thon pïra ëk Obanga öyab dhöga, ömïa ngö na myero atwakï, ëk atuc müng më köp më Emuth na Bër. 20 An abedo akwëna mërë na röm kï ngat mörö na cung pï lobo mërë, ëntö etwea ökö kï nyör. Lëg unu ëk atwak abonge lworo ï kom köp më Emuth na Bër kite na an myero atwak ködë.

21 Ömïn onu Tukiko omego më amara ëka atic na genere ï Rwoth, bino kobo niwu köp kïbëc ï koma ëka ï kom ticna, ëk un thon inge. 22 An atye ka oro ën yo bothwu pï tyën köp ni, ëk ën ömïïwu inge kite na wan etye ködë ëka ödïï cwinywu.

23 An alëgö nï Obanga Apap ëka Rwoth Yecu Kiricito bino mïö kuc, mar ëka yee both utmego kïbëc. 24 Kïca k’Obanga obed both jö kïbëc na marö Rwoth onu Yecu Kiricito kï mar na ba thum.