Acaki 33

Jakob oromo k’Ecau

1 Ï karë na Jakob tye ka yaa kï kany nön, ën otingo wangë ëka önënö Ecau tye ka bino kï jögë mia angwën. Cë ën öcakö poko ëthïnö ï kin Lea, Racel ëka etic na mon arïö. 2 Ën oketho etic na mon k’ëthïnögï anyim, Lea k’ëthïnö mërë ölübö körgï, ëka Racel kï Yocepu odong angec. 3 Jakob kikome öcïdhö anyim ëka oryebere pïny wang abïrö na ën tye ka cïdhö na cwök k’ömïn mërë.

4 Ëntö Ecau örïngö më romo kï Jakob ëka öthünö ngute cë önödhö leme. Cë utmego arïö öcakö gïnï koko. 5 Ï karë n’Ecau otingo wangë ëka önënö mon k’ëthïnö, ën openyo nï, "Ëthïnö ka nga ene?"

Jakob ögamö nï, "Man ëthïnö n’Obanga ömïö both aticni pï kïca mërë."

6 Cë etic na mon k’ëthïnögï othuno ëka oryebere gïnï pïny. 7 Cë Lea k’ëthïnö mërë obino ëka oryebere gïnï pïny. Më ajiki Yocepu ëka Racel obino gïnï anyim cë gïn thon oryebere pïny.

8 Ecau openyo Jakob nï, "Gurup na an aromo ködgï thërë nïngö?"

Jakob ögamö nï, "Ëk ibed kï cwiny na bër ï koma, adwongna."

9 Ëntö Ecau okobo nï, "An dong atye kï leeni na pol ömëra. Wëk gin na in itye ködë obed megi."

10 Ëntö Jakob ökwërö nakun kobo nï, "Ka in ïnënö nï an ayomo cwinyi, cë ïgam mïc na an amii. Pïën adyer, ka an anënö terinyimi, röm nï anënö terinyim Obanga. Pï koth cwiny na bër na in ïjöla ködë. 11 Öma gam mïc ni na an akelo bothi, pïën Obanga onyutho kïca mërë ï koma ëka an atye kï mëga na röma." Jakob ömëdërë kï dïö Ecau naka oye më gamö mïc.

12 Cë Ecau okobo nï, "Eru ewothu kanya acël, ëka an abino tëlö yoo."

13 Ëntö Jakob okobo nïnë nï, "Adwongna ngeo nï ëthïnö pod thïthïnö, ëka an myero agwök rom kï dhok na dödhö ëthïnögï. Ka ïmïögï owotho na bor rwök kadï pï nïnö acël, leeni kïbëc bino thöö ökö. 14 Ëk adwongna öcïdh anyim n’atic mërë, nakun an awotho momoth n’oporo woth ka leeni n’ötëlö yoo ëka më k’ëthïnö, naka ka an abino thuno both adwongna ï Ceir."

15 Cë Ecau okobo nï, "Ëk awëk jö na mëga mökö bothi."

Ëntö Jakob ögamö nï, "In kür ïtïm nï kömanön. Adwongna bed kï cwiny na bër ï koma, ïwëk dong obed nï kömanön."

16 Cë ï nïnö nön Ecau öcakö woth mërë më dök cen yo Ceir. 17 Ëntö Jakob öcïdhö yo Cukot kanya ën ögërö öt ïë ëka öyübö okul pï leeni mërë. Manön ënë ömïö ecwodo kabedo nön nï Cukot.*33:17 Cukot gönyö nï okul.

18 Kinge na Jakob öya ökö kï Paddan Aram, ën othuno na bër ï pacö më Cekem na tye ï Kanaan ëka obedo na cwök kï pacö. 19 Jakob öwïlö ngöm na ën oguro këma mërë ïë kï both ëthïnö ka Kamor, apap ka Cekem, ï wel më cïlïng mia acël.*33:19 Cïlïng mia acël onwongo obedo wel cïlïng na pëk ëka tëkö mërë ba ngere. 20 Kany nön ënë ën ögërö keno tyër ëka öcakö nyïngë nï El Eloe Icarael.*33:20 El Eloe Icarael gönyö nï Obanga më Icarael