Acaki 42

Utmego ka Yocepu öcïdhö yo Ejip

1 Ï karë na Jakob owinyo nï cem tye ï Ejip, ën okobo both awope mërë nï, "Pïngö ïnënërë unu anëna kenwu?" 2 Cë ën okobo nï, "An awinyo nï cem tye ï Ejip. Cïdh unu yo kunön ëk ïwïl unu cem mörö pï onu ëk ëkwö ëka kür ëthöö."

3 Cë utmego ka Yocepu apar öcïdhö gïnï yo Ejip më wïlö cem. 4 Ëntö Jakob ba ooro Benjamin ömïn Yocepu ködgï, pïën ën onwongo tye kï lworo nï onyo gin mörö na rac römö tïmërë ï kome. 5 Cë awope ka Jakob onwongo tye ï kin jö n’öcïdhö gïnï wïlö cem, pïën kec onwongo thon tye ï lobo më Kanaan.

6 Yocepu onwongo dong obedo alöc më lobo Ejip ëka ënë onwongo cadhö cem both jögë. Cë ï karë na utmego mërë othuno, gïn oryebere gïnï pïny ï nyime na terinyimgï gudo ngöm. 7 Ï karë na Yocepu önënö utmego mërë, ën ongeogï ëntö ötïmö na calö ën ebedo arok ëka ötwak ködgï kï gero nakun penyogï nï, "Un ïya kï kwene?"

Gïn ögamö nï, "Wan ëya kï ï lobo Kanaan më bino wïlö cem."

8 Utmego ka Yocepu ba ongeo gïnï ën, ëntö Yocepu ongeogï. 9 Cë ën opo ï lek mërë ï komgï ëka okobo nïgï nï, "Un ibedo ëröth pïny! Un ibino unu më nënö kanya ba etye ka gwökö kï ï lobowa."

10 Gïn ögamö nï, "Pe, adwongna, eticni obino më wïlö cem. 11 Wan kïbëc ebedo awope ka dhanö acël. Eticni obedo jö na genere, pathï ëröth pïny."

12 Yocepu okobo nïgï nï, "Pe, Un ibino unu më nënö kanya ba etye ka gwökö kï ï lobowa."

13 Ëntö gïn ögamö nï, "Eticni onwongo tye utmego apar arïö, awope ka dhanö acël, na bedo ï lobo më Kanaan. Athïn na tïdï odong both apapwa, ëka acël dong ope."

14 Yocepu okobo nïgï nï, "Obedo kite na an akobo niwu ködë: Un ibedo ëröth pïny! 15 Ëka man ënë kite n’ebino tëmöwu ködë: An akwongara kï nyïng Parao, un ba ibino wëkö kany naka ka wang n’ömïnwu na tïdï obino kany. 16 Or unu ngat acël öcïdh ööm ömïnwu, un jö kïbëc ebino gwököwu ï buc, ëk köpwu ëtëm më nënö ka ikobo unu köp adyer. Cë ka ope, adyer ka Parao pod kwö, un ibedo ëröth pïny!" 17 Ëka ën okethogï kïbëc ï buc pï nïnö adek.

18 Ï nïnö më adek, Yocepu okobo nïgï nï, "An abedo ngat na lworo Obanga, tïm unu köman ëk ibed unu na kwö. 19 Ka un ibedo jö na genere, wëk unu ömïnwu acël odong kany ï buc ëk un kïbëc iter unu cem pacö pï jöwu na kec tye ka nekogï. 20 Ëntö myero ikel unu ömïnwu na tïdï yo botha, ëka ënïang ï köpwu ëk ömïï kür ïthöö unu." Cë gïn ötïmö kite na ën okobo ködë.

21 Gïn öcakö twak ï kin-gï kën-gï nï, "Adyer onu etye ka nwongo pwod pï ömïn onu. Onu ënënö pëkö n’onwongo ën tye ködë ï caa na ën dweko onu pï kwö mërë, ëntö onu ba ewinyo; ënë ömïö pwod ni tye ka bino ï kom onu."

22 Reuben ögamö nï, "An ba akobo niwu ni kür ïtïm unu bal ï kome? Ëntö un ba iwinyo! Kobedini dong onu myero ëcül remo mërë." 23 Gïn ba ongeo ni Yocepu onwongo römö nïang ï köpgï, pïën onwongo ëgönyö köp mërë agönya.

24 Cë Yocepu öya ökö ödönyö yökö kï bothgï ëka öcakö koko, cë odwogo cen bothgï ëka dök ötwak ködgï. Ën ömïö ëmakö Cimeon kï ï kin-gï ëka etweo ï nyimgï na gïn nënö.

25 Yocepu ömïö twërö nï ëpïk cem pong puku ka ngat acëlacël, ëdwök cïlïng ka ngat acëlacël ï puku mërë, ëka myero ëmïïgï gin mörö më acama ï yoo. Manön kïbëc ëtïmö nïgï. 26 Gïn otweo cem ï nge kenegï ëka öcakö gïnï woth.

27 Ï karë na gïn othuno kanya gïn mïtö buto ïë, ngat acël kï ï kin-gï öyabö wi puku ëk ëkwany cem nï kana mërë, ën önënö cïlïng mërë ut ï puku ï wi cem. 28 Cë okobo both utmego mërë nï, "Cïlïngna edwongo! Enene tye ï pukuna."

Ï caa na gïn owinyo, cwinygï opodho rwök nakun ngat acëlacël lökërë both awodhe na kome myël amyëla nakun kobo nï, "Ngö ene n’Obanga tye ka tïmö ï kom onu?"

29 Ï karë na gïn othuno both apapgï Jakob ï lobo më Kanaan, gïn okobo nïnë ngö n’ötïmërë kïbëc ï komgï nï, 30 "Ëcwö n’obedo rwoth më Ejip ötwak ködwa kï gero ëka oterowa na calö jö na tye ka röthö pïny. 31 Ëntö wan ekobo nïnë nï, ‘Wan ebedo jö na genere, wan ba ebedo ëröth pïny. 32 Onwongo wan etye utmego apar arïö, awope ka dhanö acël. Acël dong ope, ëka athïn na tïdï odong both apapwa ï lobo më Kanaan.’

33 "Cë ëcwö n’obedo rwoth më lobo nön okobo nïwa nï, ‘Man ënë kite na an abino ngeo ka onyo un ibedo jö na genere: Wëk ömïnwu acël odong botha kany, ëk iter unu cem më könyö jö më pacöwu na kec tye ka nekogï. 34 Ëntö kel unu ömïnwu na tïdï yo botha, ëk ömïï an ange ka un ba ibedo ëröth pïny ëntö jö na genere. Cë abino mïö ömïnwu cen bothwu, ëka un ibino woth ï lobo ni abonge ayela mörö.’"

35 Ï karë na gïn öönyö cem kï ï pukigï, ngat acëlacël onwongo ocwe mërë më cïlïng n’eketho ï puku mërë. Ï karë na gïn ëka apapgï önënö ocwe kï cïlïng ïë, lworo ömakögï. 36 Cë apapgï Jakob okobo nïgï nï, "Ïmïa unu arwenyo ëthïnöna ökö. Yocepu dong ope, Cimeon dong ope ëka kobedini dökï ïmïtö unu tero Benjamin. Man kïbëc can mërë bino podho ï koma!"

37 Cë Reuben okobo both apap mërë nï, "Ibino neko ëthïnö awopena arïö ökö ka ba adwongo ën cen bothi kany. Wëk an agwök ën, ëka an abino dwongo ën cen bothi."

38 Ëntö Jakob okobo nï, "Woda ba bino cïdhö kunön kodwu, pïën ömïn mërë dong öthöö ökö ëka ën këkën ënë dong odong. Ka gin mörö na rac bino tïmërë ï kome ï wothwu, cwer cwiny na un ibino mïöna bino nekona ökö."