Acaki 19

Etyeko Codom ëka Gomora

1 Ï karë n’emalaika arïö othuno gïnï ï Codom kothyeno, gïn onwongo Lot obedo ï dhö wangkac më pacö. Ï karë na Lot önënögï, ën öya malö më romo ködgï, ëka oryebere pïny ï ngöm. 2 Ën okobo nï, "Editena, akwaöwu an aticwu ëk ibin unu ï pacöna. Ïlwök tyënwu ëka ïnïn unu kany, cë dong ïya unu kodiko cön më mëdërë kï woth na mewu."

Gïn ögamö nï, "Pe, wan ebino nïnö ï dyere pacö."

3 Ëntö Lot ödïögï rwök, cë gïn ölökërë ödönyö gïnï ï ödë. Ën otedo cem nïgï, otedo ogati abonge thöbï, ëka öcamö gïnï. 4 Na gïn bara öcïdhö ï kabuto, cwö kïbëc na tye ï pacö më Codom—jö na thïnö ëka jö n’otii—obino cë ögürö gïnï öt. 5 Gïn öcakö redo kï nyïng Lot nï, "Jö n’obino gïnï bothi woro kothyeno tye gïnï kwene? Kelgï yökö bothwa kany, ëk ebut ködgï."

6 Lot ödönyö yökö bothgï, ëka oloro dholokek ökö, 7 nakun kobo bothgï nï, "Akwaöwu, utmegona, kür ïtïm unu tïm më kïpyëdë. 8 Nën, an atye k’anyirana arïö na bara ongere gïnï kï cwö. Ëk akelgï bothwu, ïtïm unu gïn na un ïmïtö ködgï. Ëntö kür ïtïm unu gin mörö ï kom jö ni, pïën gïn dong tye ï thë gwök na mëga."

9 Gïn oredo nï, "Yaa ökö kï ï nyimwa!" Ëka okobo gïnï dökï nï, "Nyeri obino kany na calö arok ëka kobedini mïtö bedo angöl-köp! Wan ebino tïmö gin na rac ï komi na löö gïn." Gïn ömëdërë më dïö Lot, nakun cïdhö gïnï më türö dholokek.

10 Ëntö emalaika arïö olyao cïng-gï yökö, cë öywaö gïnï Lot ï öt ëka oloro gïnï dholokek ökö. 11 Cë gïn öbörö wang jö na dito ëka jö na thïnö n’onwongo tye gïnï ï dholokek më öt kï thöö wang, ëk kür onwong gïnï dholokek.

12 Emalaika arïö okobo both Lot nï, "In itye kï jö mörö nökënë kany n’onyomo ï pacöni, awope, anyira onyo ngat mörö n’obedo watni? Yaa unu ködgï ökö kï kany, 13 pïën wan ëcwök tyeko kabedo ni ökö. Koko na tye ï kom jö na tye ïë ödökö na thwönë ï nyim Rwoth, ëka ën oorowa nï ëk etyekgï ökö."

14 Cë Lot ödönyö yökö, ëka ötwak kï jö n’onwongo mïtö nyömö anyira mërë. Ën okobo nï, "Yaa unu ökö pïöpïö kï ï kabedo ni, pïën Rwoth cwök tyeko pacö ni ökö." Ëntö jö n’onwongo mïtö nyömö anyira mërë, öthamö gïnï nï ën onwongo woco awoca.

15 Kodiko na pïny dong ruu, emalaika arïö öbünyö gïnï Lot, nakun kobo gïnï nï, "Yaa ökö! Kwany dhaköni ëka anyirani arïö na tye gïnï kany, ëk kür etyekwu ökö ka ebino pwodo pacö ni."

16 Ï karë na ën obedo galërë, emalaika ömakö cïngë ëka cïng dhakö mërë, cïng anyira mërë arïö cë öpëögï yökö kï ï pacö, pïën Rwoth onwongo tye kï kïca ï komgï. 17 Ï karë na dong ekelogï yökö, malaika acël okobo nï, "Rïng ïlar unu kwöwu! Kür ïnën unu ngewu, ëka kür icung unu kany mörö ï ora! Rïng unu ï wi kite, ëk kür ïthöö unu!"

18 Ëntö Lot okobo bothgï nï, "Pe, adwongna. 19 An aticni anwongo cwiny na bër rwök ï nyimi, ëka inyutho kïca na thwönë rwök pï larö kwöna. Ëntö ba atwërö rïngö yo wi kite, pëkö ni bino podho ï koma cë abino thöö ökö. 20 Nën, pacö na cwök na an arömö rïngö yo ïë, ëka tïdï mörö. Ëk arïng yo ïë ëntö pacö nön tïdï rwök. Pathï nï kömanön? Cë kwöna twërö bwöth."

21 Malaika okobo nïnë nï, "Bër, an awinyo kwacni, ba abino tyeko pacö nön. 22 Ëntö rïng yo kunön pïöpïö, pïën an ba abino tïmö gin mörö na bara ithuno kunön." (Manön ënë ömïö pacö nön ecwodo nï Joar.*19:22 Joar gönyö nï tïdï.)

23 Ï karë na Lot othuno ï Joar, ceng onwongo dong odonyo. 24 Cë Rwoth ooro mac ëka calpa na lyël kï ï polo n’ocwe pïny calö köth ï kom Codom ëka Gomora. 25 Ën otyeko taun na döngö nön gïnï kanya acël kï ngömgï, ëka jö kïbëc na bedo gïnï ï taun na döngö, ëka thon gin na mar n’otuu kï ï ngöm. 26 Ëntö dhakö ka Lot ogwilo nge, ëka ölökërë ödökö kadö n’ocung kamë wïr.

27 Kodiko mërë Abraam öya cön, cë öcïdhö ï kabedo na ën onwongo ocung ïë ï nyim Rwoth. 28 Ën önënö Codom ëka Gomora, cë önënö iro na dung kï ï kabedo kïbëc na tye ï lobo nön na cal kï mac na lyël kï ï keno. 29 Ï karë n’Obanga otyeko peci na tye ï kabedo na Lot onwongo bedo ïë, ën opo ï kom cïkërë mërë gïn k’Abraam ëka ölarö Lot kï ï kom can na thwönë rwök.

Lot ëka anyira mërë

30 Lot ëka anyira mërë öya gïnï ökö kï ï Joar, cë öcïdhö obedo gïnï ï wi kite, pïën onwongo lworo gïnï bedo ï Joar. Ën ëka anyira mërë arïö obedo gïnï ï rwo. 31 Ï nïnö mörö acël, nyarë na dit öcakö kobo both amïn mërë na tïdï nï, "Apap ön dong otii ökö, ëka ëcwö mörö ope ï wi lobo na myero obed kï ön kite na cïk më wi lobo kïbëc mïtö. 32 Bin, ëmïï apap ön ömadh köngö ölök, ëk ebed ködë ëka enwong ëthïnö."

33 Ï kiwor nön gïn ömïö apapgï ömadhö köngö ölök, ëka anyaka na dit ödönyö ï öt cë obedo k’apap mërë. Lot ba ongeo caa na nyarë obedo ködë, ëka caa na ën öya ködë malö.

34 Kodiko mërë nyarë na dit okobo both amïn mërë na tïdï nï, "Woro kiwor abedo k’apap ön. Ëk dökï ëmïï köngö ölök tin kiwor, ëka in dökï ïcïdh ibed ködë, ëk enwong ëthïnö n’aya kï both apap ön." 35 Cë gïn ömïö apapgï ömadhö köngö ölök ï kiwor nön thon, ëka nyarë na tïdï öcïdhö obedo ködë. Ën dökï ba ongeo caa na nyarë obedo ködë ëka caa na ën öya ködë malö.

36 Manön kite n’anyira ka Lot arïö öyac gïnï k’apapgï ködë. 37 Nyarë na dit önywölö athïn n’ëcwö, ëka öcakö nyïngë Moab. Ënë obedo kwarö ka jö Moab më tin. 38 Nyarë na tïdï thon önywölö athïn n’ëcwö, ëka öcakö nyïngë Ben Ami. Ënë obedo kwarö ka jö Amon më tin.