Acaki 23

Thöö ka Cara

1 Cara obedo ï wi lobo pï mwaka 127. 2 Ën öthöö ï Kiriat Arba (na kobedini ecwodo nï Kebron) na tye ï lobo Kanaan. Abraam ödönyö ï këma më kumo pï Cara ëka okoko ën.

3 Cë Abraam öya kï ï nget lyël ka dhakö mërë ëka öcïdhö okobo both jö Kit nï, 4 "An abedo welo ëka arok ï kinwu. Cadh nïna unu kany mörö më ik ëk aik dhanöna n’öthöö ïë."

5 Jö Kit ögamö dhö Abraam nï, 6 "Adwong, winywa. In ibedo ngat na dit ï kinwa kany. Ik kom athööni ï bur lyël mörö na bër na in ïyërö kï kin bur lyenewa ni. Ngat mörö ope na bino kwërö nini ï bur lyënë më iko athööni ïë."

7 Cë Abraam öya ëka oryebere pïny ï nyim jö Kit. 8 Ën okobo bothgï nï, "Ka un iye më mïöna iko athööna, cë winya unu ëka kwa unu nïna Epron wod ka Joar 9 ëk öcadh nïna rwo më Makpela, n’obedo mëgë na tye ï ajiki më pwodho mërë. Peny unu ën ëk öcadh nïna ï wel mërë kikokome na römö wïlö ëk obed na calö kabedo më ik na tye ï kinwu."

10 Ï karë nön Epron onwongo obedo ï kin jö Kit ëka ën ögamö dhö Abraam na jö Kit kïbëc tye ka winyo, n’onwongo obino gïnï ï kabedo më athuko na tye ï dhö wangkac më pacö mërë. 11 Ën okobo nï, "Pathï nï kömanön rwothna, winy köpna. An amïö pwodho bothi, ëka amïö rwo na tye ïë. An amii ï nyim jö na mëga. Ik jö na megi ïë."

12 Abraam dökï oryebere ï nyim jö Kit 13 ëka okobo both Epron na gïn tye ka winyo nï, "Winy unu köpna, ka un iye. An abino cülö wel më pwodho. Yee unu nïna ëk aik dhaköna n’öthöö kunön."

14 Epron ögamö dhö Abraam nï, 15 "Winy köpna, rwothna, wel lobo nön römö cëkël*23:15 Cëkël man obedo cïlïng më karë nön; n’ëyübö kï ryal. më ryal 400, ëntö ngö ënön na tye ï kin an kï in? Ik jö na megi n’öthöö ïë."

16 Abraam oye köp ka Epron, cë opimo wel ryal ï nyim jö Kit na römö cëkël më ryal 400, nakun pimo kï kidi ratili n’ëcath pimo kï jami ï karë nön.

17 Pwodho ka Epron na tye ï Makpela, n’onwongo tye kukïdë më Mamre—pwodho ëka rwo na tye ïë, ëka yen kïbëc na tye ï wang abakëth më pwodho—onwongo ëmïö ökö 18 both Abraam na calö mëgë ï nyim jö Kit n’onwongo obino gïnï ï dhö wangkac më pacö. 19 Kinge manön Abraam oiko dhakö mërë Cara ï rwo na tye ï pwodho më Makpela na tye kukïdë më Mamre (manön, Kebron) na tye ï lobo më Kanaan. 20 Jö Kit ömïö pwodho ëka rwo n’onwongo tye ïë both Abraam na calö kabedo më ik.