Acaki 44

Ekopo ryal ka Yocepu

1 Kinge na karama othum, Yocepu öcïkö atic mërë na gwökö ödë nï, "Pïk cem opong puki ka jö nön na gïn twërö tingo, ëka iketh cïlïng ka ngat acëlacël ï dhö puku mërë. 2 Cë iketh ekopo ryalna ï dhö puku k’awobi na tïdï, kanya acël kï cïlïng më wïlö cem mërë." Ën ötïmö kite na Yocepu okobo nïnë ködë.

3 Kodiko mërë na pïny dong oru, ëmïögï öcïdhö kï yorgï yökö kanya acël kï kenegï. 4 Gïn onwongo bara öcïdhö na bor kï ï pacö ï karë na Yocepu okobo both atic na gwökö jami mërë nï, "Lüb kör jö nön pïöpïö, ëka ka ïmakögï, cë ikob bothgï nï, ‘Pïngö un ïcülö gin na bër kï gin na rac? 5 Pathï ekopo ni ënë adwongna modho ködë ëka thon tio ködë më thyeth? Un ïtïmö gin na rac rwök.’"

6 Ï karë n’atic ka Yocepu ömakögï ï yoo, ën önwö köp ni bothgï. 7 Gïn okobo nïnë nï, "Adwongwa, ngö n’ömïö in ïtwakö koth köp nön? Wan ebedo eticni myero kür ëtïm koth tïm na calö manön! 8 Nën, cïlïng na wan enwongo ï dhö pukiwa, wan edwongo ökö bothi anaka kï ï lobo Kanaan. Cë pïngö wan myero ëkwal ryal onyo gol kï ï öt k’adwongni? 9 Ka ebino nwongo tye both ngat mörö kï ï kinwa, ëk ënë öthöö. Wan kïbëc ebino bedo opii k’adwongni."

10 Ën ögamö nï, "Wëk unu obed nï kömanön kite na un ikobo ködë. Ngat n’ebino nwongo ekopo bothe ënë bino bedo opiina; jö nökënë ebino wëkögï cïdhö."

11 Cë ngat acëlacël öcakö cibo puku mërë pïny pïöpïö ëka öyabö dhögë. 12 Cë atic ka Yocepu öcakö rangö ï puki cakërë kï both ngat na dit naka both ngat na tïdï. Ekopo ebino enwongo ï puku ka Benjamin. 13 Utmego ka Yocepu öyëcö böng-gï pï cwer cwiny. Cë gïn kïbëc otweo yëcgï ï nge kenegï ëka ödök gïnï yo pacö.

14 Ï karë na Yuda ëka utmego mërë obino gïnï ï öt ka Yocepu, gïn onwongo ën pod tye kany nön, cë opodho gïnï pïny oryebere ï nyime. 15 Yocepu okobo bothgï nï, "Man ngö na un onwongo ïmïtö tïmö? Un ba ingeo unu nï dhanö na calö an twërö ngeo jami ni kï thyeth?"

16 Ëka Yuda okobo nï, "Onu ebino kobo ngö both adwongna? Ngö na onu ebino twakö? Onu ebino kwanyö bal kï kom onu nïngö? Obanga otyeko nwongo bal ï kom aticni. Wan dong ëdökö opii k’adwongna—onu ëka ngat n’enwongo okopo kï bothe."

17 Ëntö Yocepu okobo nï, "An ba atwërö tïmö nï kömanön! Ëntö ngat n’enwongo ekopo bothe, ënë bino bedo opiina. Un jö nökënë kïbëc ïtwërö unu dök both apapwu kï kuc."

18 Cë Yuda öcïdhö bothe ëka okobo nïnë nï, "Akwai adwongna, ëk an atwak köp mörö kodi. Kür ïwëk akëmöni obed na lyeth ï koma, pïën in ïröm kï Parao kikokome. 19 Adwongna openyo etic mërë nï, ‘Un itye k’apapwu, onyo ömïnwu nökënë?’ 20 Ëka wan ekobo both adwongna nï, ‘Wan etye k’apapwa na dong otii ëka ömïnwa na tïdï n’ënywölö ï karë n’apapwa onwongo dong otii ökö. Ömïn mërë öthöö ökö, ëka ën këkën ënë wod k’aya mërë n’odong, ëka apap mërë marö ën rwök.’

21 "Cë in ikobo both eticni nï, ‘Kel unu botha, ëk anën ën kï wanga.’ 22 Wan ekobo both adwongna nï, ‘Awobi ni ba twërö wëkö apap mërë. Ka ën öwëkö; apap mërë bino thöö ökö.’ 23 Ëntö in ikobo both eticni nï, ‘Ka ömïnwu na tïdï ba owotho kodwu kanya acël, un ba ibino nënö wanga dökï.’ 24 Ï karë na wan ëdök yo both aticni, apapna, wan ebino ekobo nïnë köp n’adwongna okobo.

25 "Cë apapwa okobo nï, ‘Dök unu yo Ejip ëk ïwïl unu cem mörö nïwa.’ 26 Ëntö wan ekobo nï, ‘Wan ba ebino cïdhö yo kunön. Ka ömïnwa na tïdï bino cïdhö ködwa, cë wan ebino cïdhö yo kunön, pïën wan ba ebino nënö wang dhanö ca, thwara ka ömïnwa na tïdï tye ï kinwa.’

27 "Apapna okobo nïwa nï, ‘Un ingeo nï dhaköna önywölö ëthïnö awope arïö. 28 Acël kï kin-gï öwëka ökö, cë an akobo nï, "Adyer lee na ger ökïdhö ën ökö na thïthïnö." An ba dök anënö ën na twal. 29 Ka ïkwanyö unu man ökö kï botha, ëka gin na rac opodho ï kome, cë cwer cwiny na un ibino mïöna bino nekona ökö.’

30 "Pï manön adwongna, an ba arömö dök both apapna abonge awobi ni. Kwö k’apapwa ocung ï kom kwö k’awobi ni. 31 Ka ën önënö nï awobi ni ope ï kinwa, cwer cwiny bino mïö apapwa thöö ökö. 32 Adwongna, an abino acïkara both apapna nï an abino gwökö awobi ni. An akobo nïnë nï, ‘Ka an ba abino dwongo ën bothi, cë bal mërë bino dwogo ï wia ï nyim apapna ï karë më kwöna kïbëc.’

33 "Cë kobedini akwai nï ïtïm bër iye aticni odong kany na calö opii k’adwongna nakaka awobi ni, ëk ïmïï awobi ni ödök pacö kanya acël kï utmego mërë. 34 An atwërö dök both apapna nïngö ka awobi ni ba owotho köda? An ba amïtö nënö gin na rac ka podho ï kom apapna."