1 Cë Yecu öya öwëkö Kaperanaum ëka öcïdhö yo kupïny ï lobo Yudea ëka yo löka kulo Jordan. Lwak jö na pol obino dökï bothe, ëka na calö kite n’önaa tïmö ködë, ën opwonyogï.

2 Eparicayo mökö obino bothe ëka ötëmö gïnï ën nakun epenyo nï, "Cïk yeo nï ëk ëcwö ökwër dhakö mërë?"

3 Yecu ögamö nakun penyogï nï, "Ngö na cïk ka Muca kobo?"

4 Gïn ögamö nï, "Muca ömïö twër both ëcwö më cöönö waraga më kwër ëka öryëm ën ökö."

5 Yecu okobo nïgï nï, "Muca ömïöwu cïk nön pï nwang cwinywu. 6 Ëntö cakërë ï acaki ketho lobo ‘Obanga ocweo ëcwö ëka dhakö.’ 7 ‘Pï tyën köp ni ëcwö bino wëkö apap mërë ëka aya mërë, cë rïbërë kï dhakö mërë, 8 ëka gïn arïö bino dökö kom acël.’ Cë gïn ba dök bedo jö arïö, ëntö kom acël. 9 Pï manön, gin n’Obanga örïbö kanya acël, dhanö mörö kür opok kin-gï."

10 Ï karë na gïn onwongo tye ï öt dökï, ëlübkör Yecu openyo ën ï kom köp na ën okobo. 11 Yecu okobo nïgï nï, "Ka dhanö mörö ökwërö dhakö mërë, cë önyömö dhakö nökënë dökï, nwongo ën ödönyö ï elomi. 12 Ëka ka dhakö ökwërö cwörë cë önyömërë k’ëcwö nökënë dökï, nwongo ën thon ödönyö ï elomi."

13 Ï nïnö mörö acël jö mökö okelo ëthïnö both Yecu ëk ogudgï, ëntö ëlübkörë ocokogï. 14 Ï karë na Yecu önënö, öngöö rwök. Ën okobo nïgï nï, "Wëk unu ëthïnö obin botha ëka kür ijukugï pïën ker k’Obanga tye pï jö na calö man. 15 An akobo niwu köp adyer nï dhanö na ba bino gamö ker k’Obanga na calö athïn, ba bino dönyö ïë." 16 Cë Yecu otingo ëthïnö ï kore ëka oketho cïngë ï wigï cë ölëgö gum ï komgï.

17 Ï karë na Yecu öcakö woth mërë ï yoo, ëcwö mörö örïngö ï körë, cë orumo cöngë pïny ï nyime, ëka openyo nï, "Apwony na bër, atïm ngö ëk anwong kwö na bedo naka?"

18 Yecu ögamö nïnë nï, "Pïngö in icwoda nï abër? Ngat mörö ope na bër, na path k’Obanga këkën. 19 In ingeo cïk nï: ‘Kür ineki, kür ïdöny ï elomi, kür ïkwal, kür ibed acaden më twodo, kür ïbür dhanö mörö, wör apapni ëka ayani.’ "

20 Ëcwö ni öcakö gamö nï, "Apwony, atyeko gwökö cïk nön kïbëc cakërë ï wang thinona."

21 Yecu önënö ëcwö ni, cë ömarö ën, ëka okobo nïnë nï, "Gin mörö acël ënë pod orem kï bothi. Apë ëk ïcïdh ïcadh jamini na in iute ködë kïbëc ëka ïmïï lïm mërë both ëcan, ëka ibino bedo kï lönyö na thwönë ï wi polo. Cë ibin, ïlüb köra."

22 Ï karë n’ëcwö ni owinyo Yecu ka ötwak nï kömanön, wangë öcakö lökërë ökö, cë ödök cen kï cwer cwiny, pïën ën onwongo tye kï lönyö na thwönë rwök.

23 Yecu öwïrë cë önënö ëlübkörë ëka okobo nïgï nï, "Bino bedo na tëk both ëlönyö më dönyö ï ker k’Obanga!"

24 Ëlübkör Yecu obedo kï ur rwök ï köp mërë. Ëntö Yecu okobo dökï nï, "Ëthïnöna, bino bedo na tëk nïngö më dönyö ï ker k’Obanga! 25 Bedo na yot pï kïnaga më dönyö kï wang libira nï löönö pï alönyö më dönyö ï ker k’Obanga."Yot nï kïnaga më dönyö kï wang libira

26 Ëlübkör Yecu dök ouro rwök ëka ötwak ï kin-gï kën-gï nï, "Cë nga na dong twërö larë?"

27 Yecu önënögï cë okobo nï, "Kï both dhanö, ba twërë, ëntö kï both Obanga, jami kïbëc twërë."

28 Petero okobo both Yecu nï, "Wan ëwëkö jami kïbëc më lübö kori."

29 Yecu ögamö nï, "An akobo niwu köp adyer nï ngat mörö ope n’öwëkö pacö mërë, onyo utmego mërë onyo aya mërë onyo apap mërë onyo ëthïnö mërë onyo pwothi mërë pïra ëka pï köp më Emuth na Bër, 30 na ën ba bino nwongo jami na kadhö manön wang mia acël ï karë ni, udi, utmego, ayagï, ëthïnögï, ëka jamigï kanya acël k’ayela. Ï karë më ajiki dhanö nön bino nwongo kwö na bedo naka. 31 Ëntö jö na pol na kobedini obedo më acaki bino gïnï dong cen, ëka jö n’odong cen bino tëlö anyim."

32 Ï karë na gïn tye ka cïdhö yo Jerucalem, nakun Yecu ënë ötëlö anyim, ëlübkörë ouro rwök ëka jö n’onwongo lübö körë obedo gïnï kï lworo. Ën dökï otero ëlübkörë apar arïö kï thenge ëka okobo bothgï ngö na bino tïmërë ï kome. 33 Yecu okobo bothgï nï, "Onu ëcïdhö naka yo Jerucalem, ëka Wod ka Dhanö ebino ketho örörö ï kome both ëlamdhök na dito ëka epwony cïk ka Muca. Gïn bino ngölö thöö ï wie ëka ebino mïö ën ï cïng Erok, 34 na bino gïnï nywarö ën ëka ngülö laö dhögï ï kome, pwodo kï del ëka eneko ën ökö. Kinge nïnö adek, ën bino cer."

35 Yakobo ëka Jon, awope ka Jebedayo, obino gïnï both Yecu ëka okobo nïnë nï, "Apwony, wan ëmïtö nï ïtïm nïwa gin mörö këkën na wan ebino penyoni."

36 Yecu openyogï nï, "Ngö na un ïmïtö nï an atïm niwu?"

37 Gïn ögamö nï, "Wëk ngat acël kï kinwa obed ï nget cingi kucem ëka ngat nökënë obed ï nget cingi kucam ka in ibino bedo ï then ker më dheoni."

38 Ëntö Yecu okobo nïgï nï, "Un ba ingeo ngö na un ipenyo. Un ïtwërö modho k’ekopo më can na an amodho ködë, onyo ïtwërö unu batica kï koth batica më can na an abino batica ködë?"

39 Gïn ögamö nï, "Wan ëtwërö."

Yecu okobo nïgï nï, "Okopo na an abino modho ködë, un thon ibino modho ködë ëka kit batica n’ebino batica an ködë, un thon ebino baticawu ködë. 40 Ëntö köp më bedo ï nget cïnga kucem onyo kucam, pathï an ënë amïö. Obanga ënë bino mïö kabedo nön both jö na ën öyërö."

41 Ï karë n’ëlübkör Yecu apar owinyo köp ni, cwinygï öwang ï kom Yakobo ëka Jon. 42 Cë Yecu ocwodogï kïbëc bothe ëka okobo nïgï nï, "Un ingeo unu nï jö n’engeogï kamë ëlöc k’Erok, löögï kï twërö ëka editegï na malö thon bedo kï twër ï komgï. 43 Un kür ibed unu nï kömanön, ëntö ngat na mïtö bedo adit kï kinwu, myero obed aticwu. 44 Ëka ngat na mïtö bedo dhanö më acël, myero obed opii ka jö kïbëc. 45 Naka thon Wod ka Dhanö ba obino nï ëk etii nïnë ëntö më tic pï jïï ëka më mïö kwö mërë më kökö jö na pol."

46 Yecu kanya acël k’ëlübkörë obino gïnï ï Jeriko. Ï caa na gïn dong onwongo yaa më wëkö Jeriko, lwak na pol ölübö körgï. Ëcwö na wangë öthöö, na nyïngë Batulumayo (wod ka Timayo) onwongo obedo ï nget yoo kwaö kwac. 47 Ï karë na ën owinyo nï Yecu më Najaret ënë tye ka wok, ën öcakö redo na kobo nï, "Yecu, Wod ka Daudi, kïca omaki ï koma!"

48 Jö na pol ocoko ën nï ëk ölïng ökö, ëntö ën ömëdërë kï redo rwök, "Wod ka Daudi kïca omaki ï koma!"

49 Yecu ocung ëka okobo nï, "Cwod unu ën obin."

Cë gïn dong ocwodo athöö wang na kobo gïnï nïnë nï, "Dïï cwinyi! Yaa malö! Ën tye ka cwodoni." 50 Athöö wang obolo böng mërë thenge, opye kï tyënë ëka obino both Yecu.

51 Yecu openyo ën nï, "Ngö na in ïmïtö nï atïm nini?"

Athöö wang okobo nï, "Apwony, amïtö wanga önën pïny."

52 Yecu okobo nïnë nï, "Apë cïdhï, yeeni ocangi ökö." Cücüth wangë önënö pïny ëka öcakö lübö kör Yecu.