1 Onwongo odong nïnö arïö më thuno ï Karama më Poth ëka Karama më Ogati na Thöbï ope ïë. Ëlamdhök na dito ëka epwony cïk ka Muca onwongo tye ka rangö gïnï kite na myero ëmak kï Yecu ï müng ëka enek ën ökö. 2 Gïn okobo nï, "Kür ëmak Yecu ï karë më Karama më Poth, ëk kür ömïï jïï okel wöö."

3 Ï karë na Yecu tye ka cem ï öt ka Cimon n’onwongo obedo adhöbü ï Betania, dhakö mörö obino kï cupa möö narad na ngwece kur na wel mërë tëk. Ën ötürö dhö cupa ëka önyö möö ï wi Yecu.

4 Jö mökö n’onwongo tye gïnï kany nön ökëcö gïnï rwök ëka ötwak kën-gï nï, "Pïngö ëbalö möö ni na ngwece kur abala? 5 Onwongo myero ëcadh ï wel na kadhö denario mïa adek ëk ëmïï both ëcan!" Cë gïn ocoko dhakö nön kï gero.

6 Ëntö Yecu ögamö nïgï nï, "Wëk unu dhakö nön kënë. Pïngö kara icoko unu ën? Ën ötïmö gin na bër botha. 7 Ëcan itye unu ködgï nïnö kïbëc ëka caa mörö këkën ïtwërö unu könyögï. Ëntö ba ibino unu bedo köda nïnö kïbëc. 8 Ën ötïmö gin na ën römö ëka owiro koma më aika na caa bara örömö. 9 An akobo niwu köp adyer nï kanya kïbëc n’ebino tïtö köp më Emuth na Bër ïë ï wi lobo thükül, gin na dhakö ni ötïmö thon ebino kobo pïrë, ëk obed më po pï ën."

10 Cë Yuda Ikariot, na ënë dhanö acël ï kin ëlübkör Yecu apar arïö, öcïdhö both ëlamdhök na dito ëk ëyüb kit na myero ëmïï Yecu bothgï. 11 Ï karë na gïn owinyo ngö na ën onwongo mïtö tïmö nïgï, cwinygï obedo na yom, ëka öcïkërë gïnï më mïö Yuda Ikariot cïlïng. Cë Yuda öcakö rangö karë na bër na ën ërömö mïö Yecu bothgï.

12 Ï nïnö më acël më Karama më Ogati na Thöbï ope ïë, nïnö na yam ëngölö k’athïn römö më Poth, ëlübkör Yecu openyo gïnï ën nï, "Ka kwene na in ïmïtö nï wan ëcïdh ëyüb nini cem më Poth ïë?"

13 Cë Yecu ooro jö arïö kï kin ëlübkörë nakun cïkögï nï, "Apë unu naka ï Jerucalem, ibino unu romo k’ëcwö mörö n’öyëö agulu pii. Lüb unu körë, 14 ëka kob unu both won öt na ën bino dönyö ïë nï, ‘Apwony okobo nï öt wele ute kwene ëk ëcam cem më Poth ïë k’ëlübkörë?’ 15 Ën bino nyutho niwu öt na lac na tye malö, n’eketho jami kïbëc ïë. Kany nön ënë ïyüb unu cem na më onu ïë."

16 Ëlübkör Yecu arïö öcïdhö gïnï yo Jerucalem ëka onwongo gïnï jami kïbëc kite na Yecu okobo nïgï ködë. Cë gïn dong öcakö yübö cem më Poth kunön.

17 Na dong othuno kothyeno, Yecu obino k’ëlübkörë apar arïö. 18 Ï karë na gïn tye ka cem, Yecu öcakö kobo nïgï nï, "An akobo niwu köp adyer nï ngat acël kï kinwu bino ketho örörö ï koma, ngat acël na tye ka cem köda."Yecu tye ka cem k’Ëkwëna mërë.

19 Ëlübkör Yecu öcakö kumo, nakun ngat acëlacël penyo ën nï, "Ködë an ba?"

20 Yecu öcakö kobo nïgï nï, "Dhanö acël kï kinwu jö apar arïö, na tye ka lutho cïngë ï wal kanya acël köda. 21 Wod ka Dhanö bino cïdhö nï kömanön kite n’ëcöö ködë ï kome. Ëntö dhanö na bino ketho örörö ï kom Wod ka Dhanö bino nënö can! Onwongo bedo na bër ka dhanö nön ba ënywölö."

22 Ï karë na gïn tye ka cem, Yecu ökwanyö ogati, ölëgö gum ïë, cë opoko ömïö both ëlübkörë ëka okobo nïgï nï, "Gam ïcam unu. Man ënë koma."

23 Ëka ökwanyö ekopo, öpwöyö Obanga, cë ömïögï, ëka gïn kïbëc ömadhö. 24 Yecu okobo nïgï nï, "Man ënë remona më cïkërë na nyen, na bino öny pï jö na pol. 25 An akobo niwu köp adyer nï, ba dök abino madhö pig nyig ölök, naka ï nïnö nön na an abino madhö na nyen ï ker k’Obanga." 26 Na dong gïn otyeko wero wer, cë öcïdhö gïnï ï wi Kidi më Jeituni.

27 Yecu okobo bothgï nï, "Un kïbëc ibino unu wëköna ökö, pïën yam ëcöö nï,

"‘Abino neko akwath,

ëka rom bino këth ata.’

28 Ëntö kinge cer, abino tëlö nyimwu më cïdhö yo Galilaya."

29 Petero öcakö kobo nï, "Kadï bed nï jö kïbëc bino wëköni ökö, ëntö an ba abino wëköni."

30 Yecu ögamö nï, "Petero, an akobo nini köp adyer, tin ï dyewor na thwön gwënö bara okok wang arïö, in ibino kwëröna wang adek."

31 Ëntö Petero ocere kï tëk na kobo nï, "Kadï bed nï myero athöö kodi, an ba abino kwëröni na twal!" Ëka jö kïbëc okwongere nï kömanön.

32 Gïn öcïdhö ï kabedo n’ecwodo nï pwodho më Gethcemane, ëka Yecu okobo both ëlübkörë nï, "Bed unu kany, ëk an kono acïdh alëgï." 33 Ën ökwanyö Petero, Yakobo ëka Jon cë öcïdhö ködgï. Cwinye öcakö podho na lïth rwök ëka kï kumo. 34 Yecu öcakö kobo nïgï nï, "Cwinya cwer rwök na mïtö nekona ökö. Bed unu kany na wangwu thwolo."

35 Yecu öcïdhö anyim na nönök, cë orumo cöngë pïny oryebere ëka ölëgö nï ka onwongo twërë, kono caa nön opoth ökö kï bothe. 36 "Aba, Apap, jami kïbëc twërë kï bothi, kwany ekopo ni ökö kï botha, kür obed kite na an amïtö, ëntö obed kite na in ënë ïmïtö."

37 Cë ën odwogo cen both ëlübkörë ëka onwongogï önïnö ökö. Yecu okobo both Cimon nï, "Petero, ïnïnö ökö? Ba ïrömö bedo na wangi thwolo pï caa mörö acël? 38 Bed unu na wangwu thwolo, lëg unu both Obanga ëk kür ïdöny unu ï atëmatëma mörö. Cwiny mïtö, ëntö kom görü."

39 Yecu öwëkögï dökï ëka öcïdhö ölëgö lëga acël nön. 40 Ï karë na ën odwogo, ën dökï onwongo ëlübkörë tye ka nïnö, pïën nïnö onwongo ömakö wang-gï rwök. Gïn ba ongeo ngö na myero ekob gïnï both Yecu.

41 Yecu odwogo wang më adek mërë, cë okobo nïgï nï, "Un pod ïnïnö ëka iyweo unu? Dong örömö! Caa dong örömö. Wod ka Dhanö dong ëmïö ökö ï cïng ëbal. 42 Yaa unu malö! Eru ecidhu! Nën, dhanö na bino ketho örörö ï koma dong cwök!"

43 Cücüth na Yecu onwongo pod twak, Yuda, ngat acël ï kin ëlübkör Yecu apar arïö, othuno kï lwak n’ömakö gïnï pele abadë ëka kï ludhi, n’ëlamdhök na dito, epwony cïk ka Muca ëka edite ënë oorogï.

44 Won örörö onwongo otyeko dong yübö anyuth ködgï nï: "Ngat na an abino nödhö leme, ën ënön, mak unu ën ëka iter ïgwök unu na bër." 45 Yuda öcakö cïdhö ökö cücüth both Yecu ëka okobo nï, "Apwony!" Cë önödhö leme.

46 Gïn dong öcakö podho ï kom Yecu, ëka ëmakö ën. 47 Ëntö dhanö mörö acël n’onwongo ocung ï nget Yecu öcakö wödhö pala abadë mërë, cë otongo kï ith atic k’Alamdhök na Dit naka onguno ökö.

48 Yecu openyogï nï, "Ibino unu botha kï pele abadë ëka kï ludhi më maköna calö an abedo ayak? 49 Nïnö kï nïnö an abedo kodwu ï dyekal öt k’Obanga nakun apwonyo, ngö n’ocerowu maköna? Ëntö jami ni kïbëc tye ka tïmërë më cobo ngö na Cöc na Leng kobo ï koma."

50 Cë ëlübkör Yecu kïbëc öwëkö ën ëka öngwëcö gïnï ökö. 51 Awobi mörö n’orwao böngü këkën ï kome, onwongo tye ka lübö kör Yecu. Ï karë na lwak ötëmö më makö ën, 52 awobi ni omukere kï ngwëc cë öwëkö böngü mërë ï cïng-gï ëka öngwëcö kotula.

53 Gïn otero Yecu both Alamdhök na Dit, ëka ëlamdhök na dito kïbëc, edite ëka epwony cïk ka Muca obino gïnï kanya acël. 54 Petero obedo ka lübö kör Yecu kï cecen naka othuno ködë ï dyekal k’Alamdhök na Dit. Ën obedo kanya acël k’ëkürpïny, nakun oo mac.

55 Ëlamdhök na dito, ëka athuko më Öd okiko k’edong kïbëc onwongo tye gïnï ka rangö caden mörö na römö mïögï neko Yecu. Ëntö ba onwongo gïnï gin mörö. 56 Ecaden na pol obedo ka twakö köp twodo ï kom Yecu ëntö köpgï ba örwatërë. 57 Më ajiki mërë, jö nökënë öya malö cë ötwakö gïnï caden më twodo nï, 58 "Wan ewinyo ën tye ka kobo nï, ‘An abino muko öt k’Obanga ni n’ëyübö kï cïng dhanö, ëka abino gërö nökënë pï nïnö adek, na ba ëgërö kï cïng dhanö.’ " 59 Kadï bed nï kömanön, köp më caden na gïn ötwakö ba örwatërë.

60 Alamdhök na Dit öya malö cë ocung ï dyeregï ëka openyo Yecu nï, "Eyo, in ba ïtwërö gamö köp ni kïbëc? Ngö na in ïtwërö kobo ï kom gin n’ekobo ï komi?"Alamdhök ocung ï nyimgï 61 Ëntö Yecu ölïng alïnga ba ögamö. Cë Alamdhök na Dit dökï openyo ën nï, "In ënë ibedo Meciya, Wod k’Obanga n’ëwörö?"

62 Yecu okobo nï, "An ënë ën. Ëka ibino nënö unu Wod ka Dhanö n’obedo ï nget cïng Won Twër kucem ëka dökï tye ka bino kï ï pöl më polo."

63 Alamdhök na Dit öyëcö böng mërë ëka okobo nï, "Pïngö onu pod dökï ëmïtö caden nökënë? 64 Un iwinyo unu kite na ën öyanyö k’Obanga ködë. Ïthamö unu nïngö ïë?"

Gïn kïbëc öngölö nï, "Ën opore më thöö!" 65 Jö nökënë öcakö ngülö laö dhögï ï kome, nakun eumo wangë ökö cë ëbapö, n’ekobo nïnë nï, "In ibedo adwarpïny, tuc nïwa!" Ëka ëkürpïny ökwanyö Yecu cë epwodo.

66 Ï karë n’onwongo Petero tye pïny ï dyekal, atic k’Alamdhök na Dit mörö n’obedo nyakö obino. 67 Ï karë na ën önënö Petero tye ka oo mac, ën örïpö Petero na cwök ëka okobo nï, "In thon onwongo itye kï dhanö nön n’öya kï ï Najaret, ën Yecu."

68 Ëntö Petero ökwërö ökö na kobo nï, "An ba angeo ngö na in itye ka twakö," cë öcïdhö ökö yo dhö wangkac, ëka thwön gwënö öcakö kok.

69 Ï karë na nyakö nön n’obedo atic önënö Petero ocung kunön dökï, ën öcakö kobo both jö nökënë nï, "Ëcwö ni obedo awodhgï acël!" 70 Ëntö Petero ökwërö ökö dökï.

Kinge na nönök jö mökö n’onwongo ocung gïnï ï nget Petero öcakö kobo gïnï nï, "Adyer in ibedo awodhgï acël, pïën in ibedo dhanö më Galilaya."

71 Petero öcakö alem ï kome kënë nakun kwongere nï, "An ba angeo ëcwö ni na un itye ka twakö köp ï kome" 72 Ëka cücüth thwön gwënö okok wang më arïö. Cë Petero opo ï köp na Yecu okobo nïnë nï, "Na bara thwön gwënö okok wang arïö, in ibino kwëröna wang adek." Ëka öcakö koko rwök.