1 Pï manön, köny mënë na tye më bedo Ayuda, onyo magoba ngö n’enwongo kï lïrë? 2 Adyer köny tye na pol. Më acël mërë, Eyuda onwongo ëmïögï köp k’Obanga nakun egeno nï bino gwökö gïnï. 3 Adyer, jö mökö kï kin-gï onwongo obedo jö na ba genere; ëntö kite na gïn ba genere, manön twërö mïö Obanga bedo ngat na ba genere? 4 Pathï nï kömanön! Kadï bed nï jö kïbëc obedo etwodo, Obanga obedo adyer na ba twot. Kite na calö ëcöö ködë ï Cöc na Leng:

"Ëk gin na in ïtwakö onyuth nï in kiteni atïr

ëka ïlöö köp ka ëngölö köp ï komi."✝

5 Ëntö ka kite atïr onu na rac nyutho kite atïr k’Obanga kanya leng, köp mënë na onu ëtwërö kobo? Onu ebino kobo nï Obanga kite mërë ba tye atïr pï mïö akëmö mërë podho ï kom onu? (An atye ka twak ï kite ka dhanö.) 6 Pathï nï kömanön! Ka onwongo tye nï kömanön, Obanga onwongo twërö ngölö köp ï wi lobo nïngö? 7 Ëntö ka twodona ni mïö adyer ï kom Obanga mëdërë amëda nakun kelo dheo bothe, cë pïngö pod dökï ëngölö köp ï koma calö an abedo abal? 8 Pïngö ba ekob nï, "Eru ëtïm gin na rac ëk gin na bër öya kï ïë"? Pïën tye jö mökö na cökö köp më dhöwa kï köp më twodo na kobo gïnï nï wan ëtwak nï kömanön. Ka ëngölö-köp ölöö jö n’obedo nï kömanön, nwongo ëngölö köp nïgï kakarë.

9 Ngö na onu dökï ekobo? Wan Eyuda etye na bër na löö jö nökënë ökö? Ba tye nï kömanön, pïën an dong anyutho köpna ökö më adoth nï bal dong ölöö Eyuda ëka Erok ökö kïbëc. 10 Kite n’ëcöö ködë nï:

"Ngat mörö ope na kite atïr, kadï thon acël;

11 ngat mörö ope na nïang,

ngat mörö ope na rangö Obanga.

12 Jö kïbëc ölökërë gïnï,

gïn kïbëc ödökö jö na reco;

ngat mörö ope na tïmö gin na bër,

kadï thon acël."✝

13 "Dwön-gï obedo bur lyene na wigï thwolo;

bwölö gïnï jö kï lëbgï."✝

"Kwir ororo tye ï thë lëbgï."✝

14 "Dhögï këc ëka opong kï köp më alem."✝

15 "Tyën-gï yot më cïdhö önyö remo;

16 kanya kïbëc na gïn cïdhö yo ïë, balö gïnï pïny ëka mïö jïï lïmö pëkö,

17 ëka ba ngeo gïnï yoo më kuc."✝

18 "Lworo Obanga ope ï kom kwögï."✝

19 Kobedini onu engeo nï gin mörö këkën na cïk kobo, kobo both jö na tye ï thë cïk, ëk jö kïbëc ölïng ökö kür ongam dhögï më twak ëka wi lobo thükül obed ï thë ngölö-köp k’Obanga. 20 Pï manön ba ebino kwanö dhanö mörö nï kite atïr ï nyim Obanga pï lübö cïk; gin na cïk tïmö ënë më mïö onu ngeo nï ëbalö.

21 Ëntö kobedini kite n’Obanga kwanö kï dhanö nï kite atïr na ba obedo pï lübö cïk, enyutho dong ökö kanya leng. Cïk ka Muca ëka cöc k’edwarpïny ömïö caden pïrë. 22 Man ënë kite n’Obanga kwanö kï dhanö nï kite atïr pï yee mërë ï kom Yecu Kiricito ëka pï jö kïbëc na yee ën. Apokapoka mörö ope, 23 pïën jö kïbëc öbalö ëka ba twërö gïnï nwongo dheo k’Obanga. 24 Ëntö Obanga kwanögï nï kitegï atïr nono, mïögï na calö mïc pï kïca mërë, pï kite na Kiricito Yecu ökökögï ködë. 25 Obanga oketho ën më bedo gin më tyër më kwanyö bal kï remo mërë, pï jö na yee ï kome, ëk enyuth kï kite atïr mërë, pïën Obanga yam ödïö cwinye ëka ba opwodo jö n’öbalö cön— 26 ën ötïmö më nyutho kite atïr mërë ï karë ni, nï ën kikome kite atïr, ëka ën mïö ëkwanö dhanö nï kite atïr pï yee ï kom Yecu.

27 Awaka onu dong tye kwene? Ëjükö dong ökö. Pï cïk mënë? Pï lübö Cïk? Pathï nï kömanön, ëntö pï yee. 28 Adyer onu emoko thama nï dhanö ëkwanö nï kite atïr pï yee mërë, ëntö pathï pï tic më lübö Cïk. 29 Onyo Obanga obedo më k’Eyuda këkën? Ën ba obedo Obanga k’Erok thon? Eyo, obedo më k’Erok thon. 30 Obanga tye acël këkën, na ën bino kwanö jö n’ëlïrögï nï kitegï atïr pï yeegï, ëka thon bino kwanö jö na ba ëlïrögï nï kitegï atïr pï yeegï. 31 Pï manön, onu etye ka kwërö Cïk ka Muca pï yee ni? Pathï kömanön, onu ëcwakö Cïk.