1 Davud Ramayeene Nayoteençe hixu, Yonatanne k’anyaqa qarı eyhen:

– Nya’a, zı hucoona hı’ı? Yizın taxsir hucoona? Zı yiğne dekkıs nəxbına pisvallane hav’u, mang’us zı gik’as ıkkan?

2 Yonatanee mang’us alidghıniy qele:

– Məxdın kar mısacad ixhes deş! Ğu qik’as deş. Yizde dekkee nenacab iş, xəbna vuxheeyib k’ınna vuxheyib zak’le ittevhu haa’as deş. Nya’asdiyxan dekkee, mana iş zale dyugul hav’u? Məxdın kar ixhes deş!

3 Davudee mang’us k’ın g’assır, eyhen:

– Zı vasqa yugra qarıynçina, yiğne dekkık’le ats’a vod. Mançil-allad dişe mang’us vak’le dyats’axhxha ıkkan. Ğu aq’va qa’asınçina mang’uk’le ats’an. Vorne Rəbbilqaniy yiğne canılqan k’ın ixhen, yizde qik’uys sa g’el qittasın ciga axu.

4 Yonatanee Davuduk’le eyhen:

– Yiğne yik’es hucooyiy ıkkan, zı vas ha’asın.

5 Davudee Yonatanık’le eyhen:

– G’iyqa ts’ebna vaz giviyğalan bayram vod, zı paççahıka sa sufranıl gyu’ur kar oxhanas ıkkan. Həşde ğu zı hasre, qıtsıq exhalilqamee, hark’ın çolee dyugulyxhes. 6 Yiğne dekke zı qirghın he’ee, mang’uk’le eyhe: «Davudee cune şahareeqa Bet-Lexemqa alycaxxvas ı’qqəseeva zake geed qiyghın». Maa’ab, həşde cone xizanın seniysda q’urban gyook’a. 7 Mang’vee uvheene: «Yugdavud», manke zı, yiğna nukar, yugra ixhes. De’eş, mang’us mançike qəl vuxheene, vak’le ats’axhxhe, mang’uqa kara’əən fıkırbı deşud. 8 Zas yugvalla hee’e, ğu Rəbbine ögil zaka cuvab g’ats’atk’un. Zal bınah vobxhee, ğucar zı gik’e. Nişil-allane vas zı yiğne dekkısqa ıkkees ıkkan?

9 Yonatanee eyhen:

– Man yiğne vuk’lelqa qales deş! Yizde dekkıqa karaı’dəən fıkırbı ıxhay, zak’le g’acuynxhiy, nya’a vak’le ittevhu g’alyadaççeyiy?

10 Davudee Yonatanık’le eyhen:

– Dek vaqa qəlaka yuşan he’eene, man zalqa şavaane hixhar ha’as?

11 Yonatanee Davuduk’le eyhen:

– Qora çoleeqa qığeepç’es.

Manbışda q’öyursana g’aqa qığeepç’ı, çoleeqa avayk’an. 12 Qiyğa Yonatanee Davuduk’le eyhen:

– İzrailyne Allahılqan, Rəbbilqan, k’ın ixhen, g’iyqayee, qıtsıqee ine gahılqasse, zak’le dekkına fıkır vaats’a vuxhesda. Mang’uqa yiğne hək’ee yugun fıkırbı ixheene, zı manbı valqa hixhar ha’asınbı. 13 De’eş, yizde dekkıne fıkreençe karaı’dəən karbı ı’lğəə ixheene, zınad man valqa hixhar hide’eene, ğunar yəqqı’l iderçveene, hasre Rəbbee yizde vuk’lelqa mançiled pisın yiğbı alle’ecen. Hasre Rəbb yizde dekkıka nəxüriy eyxhe, vakar həməxür ixhecen. 14 Zı nimeeletteyiy vor, ğunab zak’le Rəbbina g’idyabat’ana yugvalla haagve. Zı qik’uyng’ar, 15 Rəbbee Davudun gırgın duşmanar ç’iyene aq’vayle havaakal hav’uyleb qiyğa, mana yugvalla yizde xizanıle g’ıts’maak’vance.

16 Yonatanee Davudne nasılıka cuvab g’ats’atk’un, eyhen:

– Hasre Rəbbee vucee, Davudne duşmanaaşikın he’ecen!

17 Yonatanee Davuduk’le eyhen:

– Vas zı ıkkanxhee, sayid k’ın g’aysre.

Davudus Yonatan cus vuc ıkkanan xhinne ıkkan ıxha.

18 Qiyğa Yonatanee Davuduk’le eyhen:

– G’iyqa ts’ebne vuzan bayram alğahas. Yiğna ciga q’ərab g’avcumee, ğu t’abal ha’asda. 19 Qıtsıq ğu şenke dyugul ıxhayne cigaysqana qarı, Ezel eyhene g’ayeysne gyu’re. 20 Zı karalqa ayhen xhinne, mane suralqa vukeençe xhebılle ox ahas. 21 Qiyğa «Hoora, oxbı t’abal he’eva» zı maqa sa gade g’axıles. Zı gadeyk’le uvheene: «Oxbı yiğne k’ane vod, hoora manbı zasqa qaleva», manke ğunar qora. Vorne Rəbbilqan k’ın ixhen, manke ğu g’attirxhın ixhes, vak vuççud ixhes deş. 22 De’eş, zı gadeyk’le «Oxbı vake əq’əna’ad vodva» uvhee, ğu qığeç’u, yiğne yəqqı’n hoora. Man Rəbbee ğu əq’ənaqa g’ıxeleva eyhen vodun. 23 Zınay ğu, həşde yuşan hı’iynçilqamee qabımeeme, yik’el aqqe, Rəbb yizdayiy yiğna gırgıne gahbışiscar Şahad vorna.

24 Davud çolee dyugul eyxhe. Ts’ebne vuzan bayram giyğalang’a paççah otxhuniy oxhanasva sufranılqa giy’ar. 25 Mana ögilin xhinne cune cigee barugusnee Yonatanne ögee giy’ar. Şaulne k’anyaqa Avner giy’ar. Davudna cigamee q’ərab aaxva. 26 Mane yiğıl Şaulee vuççud eyhe deş. Mang’usqa həməxüd qayle «Davudne vuk’lelqa hucoomecad qadı ixhes. Mançil-allad mang’un gicərxı’y atk’ın ixhes». 27 Qinne, vuzane q’öd’esde yiğılib Davudna ciga meeb q’ərab aaxva. Şaulee Yonatanıke qiyghanan:

– Nya’asdiyxan Yesseyna dix Davud sanıxhar, g’iynar kar oxhanas sufranılqa qidyarı?

28 Yonatanee alidghıniy qele:

– Davudee Bet-Lexemqa ı’qqəsva, zake geed qiyghın. 29 Mang’vee uvhiyn: «Hucoona ixhes, hasre zı ı’qqəs. Yişde xizanın şaharee q’urban ablyaa’a, yizde çocee zak’le maa’ar ixheva uvhu. Hucoona ixhes, zı yiğne ulen aqqıxheene, g’aykke hark’ın çocar g’avces». Mançil-alla mang’usse paççahne sufranıl arı, gyu’aras dəxı'.

30 Şaulee Yonatanılqa qəl hav’u eyhen:

– İykarne zəiyfayna dix, ğu eyhenniyxan, zak’le ğu Yesseyne dixeka hambaziyvalla haa’ava ats’a dişdiyxan. Yiğne yedisıd, vasıd naş qixhecen. 31 Nimeeletteyiy Yesseyna mana dix ine ç’iyene aq’val vor, ğunar yiğna paççahiyvallab aaxvas deş. Mang’uqa qihna insan g’axıle, hasre mana yizde k’anyaqa ayrecen. Mana qidek’u ixhes deş.

32 Yonatanee dekkıs Şaulus alidghıniy qele:

– Mana nişil allane qik’as ıkkan? Mang’vee hucoona hı’ı?

33 Şaulee Yonatan gik’asva nize ayhe. Manke Yonatanılqa hiyxharan, dekkıs Davud gik’asır ıkkan. 34 Yonatan qəlın qoxa, sufranıle oza qexhena. Ts’enne vuzane q’öd’esde yiğıl Yonatanee vuççud oyxhan deş. Dekkee Davud k’ap’ik’ıle avuqa qı’ı g’acu, mang’vee aq’va givaxana’a.

35 Yonatan qinne yiğıl miç’eer Davud g’acesva çoleeqa arayle. Mang’une k’aner sa k’ınna gade eyxhe. 36 Mang’vee gadeyk’le eyhen:

– G’adaxhvne, hark’ın zı ayhen oxbı t’abal he’e.

Gade g’adayxhvanmee, Yonatanee mang’une vuk’lel ooğançe ox ayhe. 37 Gade Yonatanee avhune oxasqa hiyxharmee, Yonatanee yı’q’əle onu’u eyhen:

– Haaşe, ox vake şaqana vod, yiğne ögee vod!

38 Yonatanee meer gade qort’ul, eyhen:

– Zaara ixhe, ulymoyzar, g’adaxhvne!

Gadee ox alyaat’u, cune xərıng’usqa Yonatanne k’anyaqa siyk’al. 39 Gadeys nişikecab xabar vuxha deş. Man saccu Yonatanık’leyiy Davuduk’le ats’a ıxha. 40 Yonatanee cun silahbı gadeysqa quvu, eyhen:

– Hoora, inbı şahareeqa qıkkee.

41 Gade ark’ıniyle qiyğa, Davud g’ayeyne canubne suralqa qarı, q’aratsabışil gyu’ur xhebne yəqqees Yonatanne ögee ç’iyelqamee k’yoyzarna. Manbışe sana-sang’us ubbabı hı’ı, gyaaşenbı. Davud Yonatanıle geer geşşe. 42 Yonatanee Davuduk’le eyhen:

– Vas yugna yəq vuxhena. Zınay ğu Rəbbine doyule sana-sang’us k’ın g’assır, uvhiynniy: Rəbb yizdeyiy yiğne, yişde uşaxaaşine yı’q’neenar gırgıne gahbışisda Şahad vorna.

43 Mançile qiyğa Davud oza qıxha, cune yəqqı’n ayk’an, Yonatanır şahareeqa siyk’al.