Davud Şaulusse hexvana
1 Davud Nov eyhene şahareeqa kaahin Aximelekne k’anyaqa qarayle. Davud g’acu Aximelek qərq’ı’n, qiyghanan:
– Nya’a ğucar ıxha? Nya’a yiğne k’ane vuşucar deş?
2 Davudee Aximelekık’le eyhen:
– Paççahee zas iş huvu uvhiyn, zı nişisiy g’axuvu, zas nena işiy huvuva neng’uk’lecad mats’axhxhecen. Zı mançil-allad yizde insanaaşik’le, zı uvhiyne cigabışee yizde ögilqa qığeepç’eva uvhu. 3 Vaqa oxhanasın hucoona vod? Vaqa vobxhee, zas xhoble komba gıneyna hevle. Deşxheene, vaqa hucooyiy oxhanasın vod, man hele.
4 Kaahinee Davuduk’le eyhen:
– Zaqa məxdıncad gıney deşin, yiğne k’anebın mek’vunbı yadaaşika devxhaxheene, muq’addasın gıney vod.
5 Davudee kaahinıs inəxdın cuvab qele:
– Mısacab, şi nenemee işiqab qihna vüqqəmee, şaka yedar vuxhaynbı deş. Yizın insanar nenemecab işiqab qihna vüqqəmeeyib, manbışe tanbı məttıda havace. G’iyna manbı manisa yiğbışileb məttıba vob.
6 Rəbbis adıyne gıneyle ğayrı maa’ad medın gıney dexhayke, kaahinee mang’us muq’addasın gıney hele. Man gıney Rəbbine ögile alyaat’uyn ıxha, çine cigee manecad yiğıl g’ümən gik’anasva.
7 Mane yiğıl Şaulne insanaaşina sa maa’ar eyxhe. Mang’vee maa’ad Rəbbis ı’bəədat ha’a ıxha. Mana insan Şaulne çobanaaşina xərna, Edomğançena Doeg ıxha.
8 Davudee Aximelekık’le eyhen:
– Deşinne vaqa inyaa nize, gılınc? Paççahee zak’le zaraba haa’asda iş uvhiynçil-alla, zasse yizın gılıncıd, silahbıd alyaat’as əxı' deş.
9 Kaahinee eyhen:
– Ğu Elayne q’adaalil gik’uyne Filiştinğançene Golyatın gılınc vod. Man tanalinçeeqa hitk’ır kaahinne ileylığne yı’q’əl vod. Vas man ıkkanxhee aleet’e, mançile ğayrı inyaa medın deşin.
Davudee eyhen:
– Mançile yugun deşin, qale man zasqa.
Davud Filiştinaaşisqa Gat eyhene şahareeqa hexva
10 Mane yiğıl Davud Şauluke hixu, Gatne paççahne Akişne k’anyaqa ayk’an. 11 Akişne insanaaşe mang’uk’le eyhen:
– İna şene ölkayna paççah Davud dişeene? Mık’ar ha’amee yadaaşee ing’une hək’ee dişdiy qədəqqə:
«Şaulee aazırbışika,
Davudeeme, yits’ne aazırbışika gyapt’ı»?
12 Davuduk’le man eyhenbı g’ayxhımee, mana Gatne paççahıle, Akişile qəyq’ən giyğal. 13 Davudee vucecar-vuc manbışde ögil bəç’ər xhinne hagva, mang’vee beynyava karbı ha’a, qıç’ekku akkayk cıgabı hı’ı, rixhybı saqqalılqa gekka. 14 Akişee cune insanaaşik’le eyhen:
– Şok’le g’ecen mana insan bəç’ərır. Nişisne şu mana zasqa arı? 15 Zaqa bəç’ərarne k’ılyba, şu inar zasqa bəç’əriyvalla haa’as arı? İnəxrına insan yizde xaaqa ikkeç’es eyxheye?