1 Sabara gah ılğevç’uyle qiyğa, I’sa Yahudeeşine bayramısva İyerusalimqa hayk’an. 2 İyerusalimeene Vəq’əbışin akkava eyhene cigee, cühüt’yaaşine mizel Bet-Zata donana hovuzniy vobna. Mançine hiqiy-alla xholle daxanan ciganiy vod. 3 Mane cigabışee vuk’aranbı, bı’rq’ı’nbı, k’aanbıyiy paralic ı’xı’yn geeb insanar g’alyapk’ı vuxha. Manbışe xhinen ı’ğiykıriy gozet ha’a ıxha. 4 [Rəbbin malaaik gahıle-gahılqa avqa giç’u, xhyan ı’ğiykar ha’a ıxha. Mane gahıl xhineeqa ts’erra ikkeç’uyng’un gırgın ık’arbı yug qeedaxhe ıxha.]* 5 Maa’ar manbışde k’ane xhebts’ale molyulle (38) senna ık’arna insan ıxha. 6 I’sayk’le mana g’alirxhu g’acu ats’axhxhen, mana ık’arna geeb gahıbva. I’see mang’uke qiyghanan:

– Yug qixhes ıkkannane?

7 Ik’arang’vee Mang’us inəxdın alidghıniy qele:

– Xərna, yizde k’ane, xhyan ı’ğı’ykırmee, zı xhineeqa k’erçesda insan deşda. Zı xhinesqa hixharasse, merna zale ögee qıxha k’eç’e.

8 I’see mang’uk’le eyhen:

– Oza qıxhe, ğu g’alirxhuyn karıd alyaat’u, hoora!

9 Mana insan mankecar yug qexhena. Vuc g’alirxhuyn karıd alyaat’u, ayk’anna.

Man Şabbatın yiğ* eyxhe. 10 Mançil-allad Yahudeeşine ç’ak’ınbışe yug qıxhayne insanık’le eyhen:

– G’iyna Şabbatın yiğ vod, ğu g’alirxhuyn kar g’iyna haqqas ıkkan deş.

11 Mane insanee eyhen:

– Zı yug qı’iyne İnsanee, zak’le «Ğu g’alirxhuyn karıd alyaat’u hoorava» uvhu.

12 Manbışe qiyghanan:

– Vak’le «Alyapt’ı hoorava» eyhena İnsan vuşuyiy?

13 Mang’uk’le Mana vuşu ıxhaycad ats’a deşdiy. I’see mana yug qı’iyle qiyğa, maane insanaaşil alikkı ayk’anna. 14 Sahavule I’see mana insan Allahne Xaasne t’abal hı’ı, eyhen:

– Həşde ğu yug qıxhana. Ğu sayıb bınah hımaa’a, vuk’lelqa mançiled pisın kar qımaylecenva.

15 Manke mana insan ark’ın, Yahudeeşine ç’ak’ınbışik’le, vuc yug qı’ına İnsan I’sava eyhe.

16 I’see man Şabbatne yiğıl hı’ıva, Yahudeeşine ç’ak’ınbışe Mang’une vuk’lelqa yiğbı alya’a. 17 I’seeme manbışik’le eyhen:

– Yizde Dekkee həşde iş g’ooceva, Zınab haa’ana.

18 Mançile qiyğa Yahudeeşine ç’ak’ınbışis Mana sık’ırar geer gik’as ıkkiykan. Mang’vee Şabbatne yiğıl iş hav’uy k’ıldanan xhinne, Allahık’le Cuna Dekva uvhu, Mang’uka Vuc sa aqqı.

19 I’seeme manbışik’le eyhen:

– Zı şok’le hək’en eyhe, Dixek’le Dekkee hucooyiy ha’ava g’ıdecveene, Cukedğana vuççud ha’as deş. Dekkee hucooyiy ha’a, Dixeeyid man ha’a. 20 Dekkıs Dix ıkkanva, Vucee ha’an gırgın kar Mang’uk’le hagvan. Şu ghalybı aaqı aaxvecenva Dekkee Mang’uk’le mançiled ç’ak’ın işbı hagvas. 21 Dekkee hapt’ıynbı üç’üb qav’u, manbışis ı’mı’r hoolen xhinne, Dixeeyib Cus vukkananbışis ı’mı’r hoole. 22 Dekkee vuşucar muhaakima ha’a deş. Mang’vee məhkama Dixelqa g’aleççu, 23 Dekkıs hı’rmat giviyxhena xhinne, Dixesıb hı’rmat gyuvxhecenva. Dixes hı’rmat givdiyxheng’vee, Mana g’axuvuyne Dekkısıb hı’rmat giviyxhe deş.

24 Zı şok’le hək’en eyhe, Yizde cuvabıl k’ırı alixhxhı, Zı G’axuvuyng’ulqa inyam hı’iyne insanıqa gırgıne gahbışisda ı’mı’r vob. Məxrıng’uqa məhkamad ilyakkas deş. Mana qik’uyke g’attirxhın, üç’ür qıxha. 25 Zı şok’le hək’en eyhe, Allahne Dixen ses hapt’ıynbışik’le g’iyxhena gah qavaalesda, qabıcab vob. Man g’ayxhiynbı üç’üb qeepxhes. 26 Dekkıne ab ı’mı’r vobnan xhinne, Dixesıb Cune ab ı’mı’r Mang’vee hoole. 27 Mana İnsanna Dixva, məhkama hı’iyid Mang’unecad xılyaqa quvu.

28 Mançile ghalybı aaqı ımaaxva, məxbına gah qöö vob, nyuq’vnee g’alyapk’ıynbışde gırgıng’uk’le Mang’un ses g’ayxhes. 29 Nyuq’vneençe qığeepç’esınbı, yugvalla hav’uynbı ı’mrenbı vuxhesva üç’üb qeepxhes. Pisvalla hav’uynbımee Allahee məhkamee eyhenbı g’ayxhes üç’üb qeepxhes. 30 Zasse Zaled-alqa vuççud ha’as əxə deş. Zı Zak’le Dekkee uvhiyn xhinne muhaakima haa’a, Zı alğavhuyn məhkamad qotkuyn vod. Zı Zas ıkkanan deş ha’a, Zı G’axuvuyng’vee uvhiyn ha’a.

31 – Zı Yizdecab hək’ee şahaadat haa’anaxhiy, Yizda şahaadat qopkuna vuxhes deşdiy. 32 Yizde hək’ee şahaadat haa’ana Merna vor. Yizde hək’ee haa’ana mana şahaadat qopkuna vuxhay Zak’le ats’an. 33 Şu Yəhyeyne k’anyaqa insanar g’axuvu, mang’veeyib qopkuna şahaadat hav’u. 34 Zas insanna şahaadat vukkanıb deş, şu g’attivxhnecenva Zı man şok’le eyhe. 35 Yəhye gyopxhannayiy işix helena çirax vuxha. Şos sabara gahna mançine işixee şadepxhes vukkiykın.

36 Yizde hək’ee sayib şahaadat vob. Mana şahaadat Yəhyeyne şahaadatıleb ooqana vob. Zı Dekkee Zak’le uvhiyn işbı ha’a. Mane işbışed Yizde hək’ee şahaadat haa’a Dekkee Zı g’axuvuva. 37 Zı g’axuvuyne Dekkeyib Yizde hək’ee şahaadat haa’a. Şok’le mısacad Mang’un sesıd g’ayxhı deş, Mang’un aq’vad g’acu deş. 38 Mang’un cuvabıd vuşde yik’bışee axva deş, Mang’vee G’axuvuyng’ulqa şu inyam hidya’ava. 39 Şos Muq’addasın Otk’uniybı xət qeedaxhe. Şosqa həməxüd qöö, mançileğana şu gırgıne gahbışisde ı’mrenbıme vuxhes. Yic, Mançinıb Yizde hək’ee şahaadat haa’a. 40 Şosmee gırgıne gahbışisde ı’mrenbı vuxhesdemee Zasqa qavaales vukkan deş.

41 İnsanaaşine axtı qı’ilqa, Zı axucar deş. 42 Zak’le şu vaats’anbı, vuşde yik’ee Allah ıkkiykıniy deşin. 43 Zı Yizde Dekkıne doyule qareeyir, şu Zı k’ane qa’a deş. Sa merna cune doyule qareene, şos mana ıkkiykanasda. 44 Şos sana-sang’vee şu axtı qav’u vukkan. Vorne sa Allahee şu axtı qav’iy şu t’abalcab ha’a deş. Məxüd, şosse nəxüd inyam ha’as əxəyee? 45 Şosqa həməxüd qımaylecen, Zı Dekkıne ögil şolqa taxsirniyxan gixhxhes. Şolqa taxsir gixhxhesda, şu umud haa’ana Mısa vorna. 46 Şu Mısal inyam hı’iynxhiy, Zalid ha’asınniy. Mang’veeyid Yizde hək’ee otk’uninniy. 47 Şu Mısee otk’uninçilqad inyam hidya’axhee, Zı eyhençilqa nəxüd inyam ha’aye?