1 Xhots'al'esde Yiğıne bayramne* gahıl gırgın telebabı sacigeeqa sabı vooxhe. 2 Xəənçe sayid it'umne mıtsın xhinnen ses qadı, manbı gyuv'uriyn xav aqqaqqan. 3 Telebabışik'le ts'ayıne mizyaaşik akaran kar g'ece, man bit'alxha curayda-curayda telebabışilqa gexa. 4 Manbışin gırgınbı Muq'addasne Rı'hı'ka gyaats'e, qiyğab curayne-curayne mizyaaşil yuşan haa'a giviyğal. Man ha'as əxiy Rı'hı'n manbışis hele.

5 Mane gahıl İyerusalimee dyunyeyne curayne-curayne ölkabışeençe abıyn mu'mun Yahuder vuxha. 6 Mane seselqa geed millet sadayle. Abıyne insanaaşik'le cone mizyaaşil yuşan haa'a g'ayxhı ghalybı aaqı avxu. 7 Ghalybı aaqı, mançile mattuvxha eyhen:

– İne yuşan haa'anbışin gırgınbı Galileyeençe dişeene? 8 Man nəxüdne eyxhe, yişde gırgıng'uk'le yişdacab yedina miz g'iviyxhe? 9 Şi Parfiyabı, Midiyabı, Elambı, Mesopotambı vobunbı. Yişin sabaranbı Yahudeençe, Kappadokiyeençe, Ponteençe, Asiyeençe, 10 Frigiyeençe, Pamfiliyeençe, Misireençe, Kirina eyhene şaharıs k'anene Liviyeençe, Roomeençe vobunbı. 11 Şaka sacigee Kritbı, Ərabar, Yahuderiy Yahudeeşin din alyaat'uyn menne milletbışinbıb vobunbı. Yişde gırgıng'uk'le Allahne ç'ak'ıne işbışde hək'ee yişde mizyaaşil manbı yuşan haa'a g'ayxhı.

12 Gırgınbı ghalybı aaqı aaxva, hucoome eyhesınçina avxu, sana-sang'uke qiyghanan:

– İn hucoona?

13 Sassanbışeme demalqa giviyxhen xhinne eyhe ıxha:

– İnbı ittune çaxırıke p'iyanıb qeepxha.

14 Pyotur yits'ıssar telebayka ögilqa qığeç'u, milletık'le axtıda eyhen:

– Yahuderiy İyerusalimee vooxhen gırgınbı, zı şolqa g'ayxha'a, zı eyhençil k'ırı alixhxhe. 15 Man insanar, şu eyhen xhineeyib, p'iyanba deş vob. Həşde sə'ət yüç'ülle vod, miç'eebiyna gah vob. 16 İn şok'le g'ecenbı Yoel peyğambarıleğana ögeecad uvhiyn karbı vod:

17 «Allahee uvhiyn: Q'iyaamatıs k'ane

Zı Yizın Rı'h dyunyelyne gırgıne insanaaşilqacad k'yohar ha'as.

Vuşde dixbışeyiy yişbışe peyğambariyvalla haa'as.

Mek'vunbışik'le gyagva giğalas,

ağsaqqalaaşik'led curayn nyak'bı g'aces.

18 Mane yiğbışil Zas g'ullux haa'ane adameeşilqad, yadaaşilqad

Yizde Rı'hı'ke k'yohar ha'as,

manbışeb peyğambariyvalla haa'as.

19 Zı xəybışee əlaamatbı hagvas,

avud ç'iyel gorsatmabı g'aca'as:

eb, yalav, kuma g'aces.

20 Rəbbin xədın, qəvəəq'ənasın yiğ qalesse

verığ miç'ax quvxhes,

vazıb ebalqa savk'alas.

21 Rəbbilqa doyuka onu'una insan g'attixhanasda».*

22 İzrailybı, zı şok'le Nazaretğançene I'sayne hək'ee eyhençil k'ırı alixhxhe! Allahee I'sayleğana haguyne əlaamatbışee, ç'ak'ıne işbışee, gorsatmabışee şok'le Mana Allahısse şosva qarına vorva haguyn. Şok'lecad mançine hək'ee ats'an. 23 Allahık'le ögiykecad hucooyiy ixhesva ats'a ıxha. Mang'une p'lanıs sik'ı şu Vucee G'axuvuna İnsan, Q'aanun deşinbışde xılyaqa quvu. Məxür şu Mana çarmıxıs ı'xı', gik'una. 24 Allaheeme qik'uyn əq'übabı g'ats'atk'un, Mana üç'ür qı'ı. Qik'uysse Mana aqqas əxəs deşdiy.

25 Davudee məxüd Masihee eyhen hixhar ha'a:

«Zak'le gırgıne gahbışilycar

Rəbb yizde ögeeniy g'ecena,

Mana yizde sağne suralyva

zı nişilecar qəyq'ən deşdiy.

26 Mançinemee yizın yik' şadexhe,

mizenıb mə'niy qəbəqqə,

canıd umuduka eyxhe.

27 Ğu zı ahalee g'alerçes deş,

Yiğna Muq'addas Ğu nyuq'vnee qı'çes hassaras deş.

28 Ğu zak'le ı'mı'r hoolena yəq haagu,

Yiğne ögee zı ats'esınmee şada'a».*

29 Yizın çocar, zı, yik' hı'ı, şok'le eyhen, yişde dekkaaşina sa eyxhena Davud qik'ur, k'eyxhına. Mang'una nyaq'v g'iyniyne yiğılqameeyib inyaa vobna. 30 Davud peyğambar ıxha. Cune nasıleençe Sa, cune cigee taxtıl gyu'arasva Allahee k'ın g'aysır Davudus cuvab huvuy ats'a ıxha. 31 Mançil-allad Davuduk'le Masihın üç'ür qıxhay ögiykecad ats'axhxha uvhiynniy: «Allahee Mana ahalee g'alerçes deş, tanıd qı'çes hassaras deş». 32 Haane Allahee I'sa üç'ür qı'ı, şinab gırgınbı şahadar vuxha. 33 Allahee Mana xər qı'ı, Cune sağne sural gyu'ar hı'ı. Mang'vee, cuvab huvuyn Muq'addasın Rı'h Dekkıke alyaat'u, şalqacad k'yohar hı'ı. Man gırgın şok'le g'acu-g'ayxhiyn. 34,35 Davud vuc xəəqə ts'ıts' dexheeyir, mang'vee inəxüd uvhu:

«Rəbbee yizde Xərıng'uk'le inəxüd uvhu:

Zı Yiğın duşmanar Yiğne g'eliqqa hevlesmee,

Yizde sağne sural gyu're».

36 Mançil-allad hasre İzrailyne milletık'le yugda ats'a ixhecen, Allahee şu çarmıxılqa ts'ıts'ı'ına I'sa, Xərnayiy Masih xhinne gixhxhı.

37 Mane cuvabıl k'ırı iliyxhenbışde yik'bışeeqa man eyhenbı oxbı xhinne hiyzar. Manbışe Pyoturukeyiy manisa ç'ak'ıne telebabışike qiyghanan:

– Çocar, şi hucoona ha'as?

38 Pyoturee manbışis alidghıniy qele:

– Bınahbışike xıl ts'ıts'ee'e, gırgınbışe I'sa Masihne doyule gicəpxı'ybı aleet'e. Manke vuşde bınahbışile ılyheepç'es, pay xhinneyid şu Muq'addasın Rı'h alyaat'as. 39 Man huvuyn cuvab, şosiy vuşde uşaxaaşis, əq'əna vooxhene gırgınbışis vod. Yişde Allahee Rəbbee manbı gırgınbı qopt'ul.

40 Pyotur geer yuşan hı'ı, manbışis miz k'yav'u:

– Mane yəqqı'le qıtteepç'iyne insanaaşis Allahee hevlesde cazaake g'attivxhne.

41 Mang'un cuvab yik'eençe ıxhayng'vee gicərxı'y alyaat'u. Mane yiğıl xhebıd aazırılqa ələəna insan imannanbışika saraççe.

42 Manbı I'sa Masihne ç'ak'ıne telebabışe xət qa'ançik it'umba ilyt'iviyq'an. Manbı sana-sang'unemee sa xizanınbı xhinne vuxha, sacigee gıney oyxhan ıxha, düəbı ha'a ıxha. 43 Gırgın insanar qəvəyq'ən giviyğal. Masihne ç'ak'ıne telebabışileğana geed əlaamatbı, gorsatmabı hagva.

44 Gırgın iman ha'anbı sacigee vuxha, coqa vodınçiked sacigee alyaat'a ıxha. 45 Manbışe con kar, con cigabı massa huvu, neng'us, nimeeniy gexha, bit'al ha'a. 46 Manbı yiğıs Allahne Xaasqa sa fıkrel savayle, xaybışee gıney hatq'ur, şadda yik'eençe otxhan ıxha. 47 Allah axtı qa'a, manbı milletne ulesqab yugba qavayle vuxha. Rəbbeeme yiğıs insanar g'attivxhan hav'u, imannanbışilqa alivkaa'a vuxha.