1 Şaulee Rəbbin telebabı gyapt'asınbıva qəvəəq'ən haa'acab vuxha. Xərne kaahinne k'anyaqa arı, 2 mang'uk'le eyhen: «Damask'ne sinagogbışeeqa maktubbı ok'ne. Damask'ee I'sayna yəq avquyn adamer, xhunaşşer vuşu aveykiy, g'el-xıl ayt'ıl, İyerusalimqa qavaales havaasre».

3 Mana Damask'ıs k'ane qıxhamee, sayid sayangada xəənçen işix mang'une hiqiy-alla gexha. 4 Şaul ç'iyelqa qukkyork'ul, mang'uk'le ses g'iyxhe, mang'uk'le eyhe ıxha:

– Şaul, Şaul, nya'a ğu Zalqa yiğbı allya'a?

5 Şaulee Mang'uk'le eyhen:

– Yizda Xərna, Ğu vuşune?

Mang'vee alidghıniy qele:

– Ğu Zalqa yiğbı allya'ana I'sa vor. 6 Suğots'e, şahareeqa hoora, vak'le hucooyiy ha'as ıkkanva eyhesın.

7 Şaulukasana yəqqı'lqa qığeepç'iyn insanar ulyobzurne cigeecab qopsun aaxva. Ses g'ayxheeyid, manbışik'le vuşucar g'ece deş. 8 Şaul ç'iyele oza qexhe, mang'vee uleppı aaqımee mang'une uleppışik'le vuççud g'ece deş. Qiyğa mana xıleke aqqı, Damask'eeqa qıkkekka. 9 Xhebne yiğna Şauluk'le vuççud g'ece deş, mang'vee otxhanıd, ulyoğad deş.

10 Damask', Xananya donana I'sayne telebabışda sa axva ıxha. Rəbb mang'us gyagu, mang'ulqa ona'a:

– Xananya!

Mang'vee alidghıniy qele:

– Hooy, Rəbb!

11 Rəbbee mang'uk'le eyhen:

– Oza, Qopkuna donane şahreeqa Yahudayne xaasqa hak'ne. Maa'ar vak'le Şaul donana Tarsusğançena aveykes. Həşde mang'vee düə haa'a vob. 12 Mang'us gyagu vod, Xananya donana sa insan cusqa arı, cune uleppışik'le g'acecenva culqa xıleppı giyxhe.

13 Xananyee alidghıniy qele:

– Rəbb, zak'le ine adamiyne hək'ee geebınbışike g'ayxhı, mang'vee İyerusalimee Valqa iman ha'anbışilqa nimeen yiğbıyiy alli'ı. 14 İnyaaneb çikana Vas ı'bəədat ha'ane insanaaşin g'el-xıl ayt'alas mang'usqa ç'ak'ıne kaahinaaşe haysaran.

15 Rəbbeeme mang'uk'le eyhen:

– Hoora! Menne milletbışis, paççahaaşis, İzrailyne milletıs Yizın do ats'axhya'asdemee, Zı mana g'əyxı'. 16 Zı mang'uk'le hagvasın, Yizde doyunemee mang'ulqa nimeena veriy ables.

17 Mançile qiyğa Xananya qarı, mane xaaqa ikkeç'u, xıleppı Şaululqa gixhxhı, eyhen:

– Yizda çoc Şaul, Rəbbee, yəqqə vas gyaguyne I'see, zı inyaqa g'axuvu, yiğne uleppışik'le g'acecenva, ğu Muq'addasne Rı'hı'ka gyatsts'ecenva.

18 Mane gahıl itteyhesğu baluğne oodun karbı Şaulne uleppışeençe k'yatk'ın, mang'uk'le meed g'ece giyğal. Mana oza qıxha, gicərxı'y alyaat'a. 19 Qiyğa mang'vee otxhuniy oyxhan, culqa qarayle. Mana sabara yiğbına telebabışika Damask'ee axva.

20 Mankecar Şaul sinagogbışeeqa arı, I'sa Allahna Dix ıxhay g'ayxha'a. 21 Mang'vee eyhenbı g'ayxhiyn gırgınbı ghalybı aaqı avxu, eyhen:

– İyerusalimee I'salqa ı'bəədat haa'anbı oot'al-ooxal ha'ana insan mana dişeene? İnyaqa məxbınbışin g'elybı-xıleppı ayt'ıl, ç'ak'ıne kaahinaaşisqa vukkeesva dişde mana həşde arı?

22 Şaulee eyhençilqa insanaaşe yiğ-yiğıle sık'ıldad geed iman ha'a ıxha. Mang'vee I'sa Allahna Masih ıxhay hagu, Damask' vooxhene Yahudeeşis qəl hoole.

23 Yı'q'neençe xılece yiğbı ılğeeç'e. Yahuder Şaul gik'asva yuşaneebaxhe. 24 Şauluk'le man ats'axhxhen. Yahuder mana gik'asva miç'eeb-exhal şaharne akkabışisne ulyoozar vuxha. 25 Şaulne telebabışe xəmde mana alyart'u, sa ç'emç'eyne aqa gixhxhı, şaharne cabırbışile gyaqqına.

26 Şaul İyerusalimqa hirxhılymee, I'sayne telebabışika sarçes ıkkiykan. Telebabımee mang'ule qəvəyq'ən vuxha, mana I'sayna teleba vorva inyam ha'a ıxha deş. 27 Barnabeeme Şaul ç'ak'ıne telebabışisqa qarayle. Mang'vee manbışilqa Şaul yəqqı'n əlyhəəme nəxüriy mang'us Rəbb gyaguva, Rəbb mang'uka nəxüriy yuşan hı'ıva, Damask' mang'vee nəxüdiy yik'eka I'sayne hək'ee yuşan hı'ıva g'ayxha'a. 28 Məxür Şaul sabara gahna manbışika axu, manbı İyerusalim gırgınəəng'ə sanab havayk'an. Mang'vee, maayid Xərne I'sayne hək'ee yik'eka yuşan ha'a ıxha. 29 Mana yunanne mizel yuşan haa'ane cühüt'yaaşikar cuvabılqa arayle ıxha. Manbışisme Şaul gik'as ıkkiykan. 30 İmannane çocaaşik'le man ats'axhxhamee, Şaul Kaysariyeeqa ıkkı, mançer Tarsuseeqa g'ıxele ıxha.

31 Məxüd Yahudeyavolle, G'alileyeeyiy Samariyeene iman ha'anbışde ummatılqa ı'qqən yiğbı ç'əveedaxhenbı. İman ha'anbı Rəbbile qəvəyq'ən it'umeebaxhe, Muq'addasne Rı'hen helene yik'eka geeb qeebaxhe vuxha.

32 Mane gahıl geebne cigabışee iman ha'anbışisne ıxhana Pyotur, Lodda eyhene şaharee vooxhene iman ha'anbışisqar çikana arayle. 33 Mana maa'ar Eney donane sang'usqa hayk'an. Eneyis paralic ı'xı' eyxhe, mana tyulee arxhuyn molyulle sen ıxha. 34 Pyoturee mang'uk'le eyhen:

– Eney, I'sa Masihee ğu yug qa'a. Oza, tyulyu se'e.

Eney mankecar tyuleençe oza qexhena. 35 Loddeeyiy Şaronee vooxhene gırgınbışe Xərne I'salqa iman ha'a.

36 Yafo eyhene şaharee I'salqa iman ha'ana sa Tabita doyukana zəiyfa yixha. Mane doyuna mə'na «ceyran» eyhen vodun. Mane zəiyfee gırgıne gahbışil yugun işbı g'ece ıxha, kar deşinbışis xıl avqaaqqa vuxha. 37 Mane gahıl mana yik'iyk'ır qeek'ana. Məng'ı'n mayit əyxər hı'ı, oone gozeeqa alqayhe. 38 Lodda Yafoyeys k'anene cigee ıxha. Pyotur Loddeeva g'ayxhiyne telebabışe q'öyre adamiy mang'une k'anyaqa g'axuvu, mang'us miz k'yaa'a:

– Vaxt avaak'an hidyav'u, şasqa qora.

39 Pyotur oza qıxha, manbışika maqa ayk'an. Yafoyeeqa hipxhırmee, manbışe Pyotur oone gozeeqa alqayhe. Gırgın sip'ıriy yadar gyaaşe-gyaaşe Pyoturusqa sabı, Tabitee manbışisva üç'ürnang'a iyxhuyn gurtar, tanalinbı hagva. 40 Pyoturee manbışin gırgınbı g'aqa qığav'u, q'aratsabışil gyu'ur düə haa'a. Mançile qiyğa mayitılqa sak'ı, eyhen:

– Tabita, oza!

Zəiyfee uleppı aaqımee, Pyotur g'acu, giy'arna. 41 Pyoturee xıl hotku, mana oza qey'ı, iman ha'anbıyiy sip'ıriy yadar qopt'ul, manbışde ögilqa üç'ürna Tabita qığeehe. 42 Man Yafovolle ats'axhxhen, geebınbışe Xərne I'says iman ha'a.

43 Pyotur xılece yiğbına Yafoyee, Şimon donane sa g'ekvabı ha'ane insanne xaa axva.