1 Yahudeyayeençe abıyne sabara insanaaşe Antakyeene iman ha'ane çocaaşis xət qa'a:

– Şu Mısee gixhxhiyne ədatıs sik'ı sunnat hidyav'eene, g'attivxhanas vəəxəs deş.

2 Pauleeyiy Barnabee mane insanaaşika geed xıliyn ha'a. Manke Paulık'leyiy Barnabayk'le sabara imannanbışika sacigee İyerusalimqa hapk'ın, I'sayne ç'ak'ıne telebabışikeyiy ağsaqqalaaşike mane karane hək'ee qiyghnecenva eyhe. 3 Məxüb imannanbışe g'axuvuynbı Finikiyeençeyiy Samariyeençe ılğeebaç'e. Medın milletbı I'sa Masihılqa satk'ılıyna gaf haa'a-haa'a, maabın gırgın imannanbı manbışe şadaa'anbı.

4 İyerusalimqa hipxhırmee, maabın iman ha'anbı, I'sayn ç'ak'ın telebabı, ağsaqqalar manbışika yugba vooxhe. Pauleeyiy Barnabee Allahee coleğana hı'iyn gırgın kar yuşan ha'an. 5 I'salqa iman hı'iyne sabara fariseyaaşe eyhe ıxha:

– Menne milletbışikenbı sunnat haa'as vukkan. Manbı Mısayne Q'aanunun eyhen ha'as alivkas vukkan.

6 I'sayn ç'ak'ın telebabıyiy ağsaqqalar mane karane hək'ee gaf haa'as savayle. 7 Xıliyn gafbı ıxhayle qiyğa Pyotur g'elil qıxha, eyhen:

– Çocar, şok'le ats'an xhinne, Allahee vuşde yı'q'neençe zı ögilycar g'əyxı', menne milletbışik'le Yugna Xabar yizde mizele g'avxhu, iman he'ecenva. 8 İnsanın yik'eedınbı ats'ane Allahee, Muq'addasın Rı'h şas helen xhinne, manbışisıd huvuyn. Mançika Mang'vee hagvan, manbıb q'abıl hav'uynbıva. 9 Manbı şake curav'u deş, manbışe iman hı'ımee, Allahee manbışin yik'bı məttı'iynbı. 10 Yişde dideeşisseyiy şasse iviykaraa'as dəəxəna xamut ine telebabışde gardanançe givapxın, nya'a şu Allah siliys ı'xiyxə? 11 De'eş! Şak'le ats'an, Xərne I'see şinab, manbıb saccu Cune yugvalika g'attivxhanaa'asınbı.

12 Manke maabınbışe nıq'bı aqqı Barnabaliy Paulıl k'ırı iliyxhe giviyğal. Barnabeeyiy Paulee Allahee coleğana menne milletınbışisva haguyn gorsatmabıyiy əlaamatbı yuşan ha'anbı. 13 Manbı yuşan hı'ı ç'əveepxhayle qiyğa, Yaaq'ubee eyhen:

– Çocar, zal k'ırı alixhxhe! 14 Şimonee, Allahee ts'etta menne milletbışike Cune doyunemee sa millet ha'a girğılyva eyhe. 15 Man peyğambaraaşe uvhiyn xhinne eyxhe. Maa'ad inəxüd otk'un vod:

16 «İnçile qiyğa Zı sak'alasda,

hı'ğəpkırna Davudna paççahiyvalla oza qaa'as.

Mang'un hı'ğətkıriyn cigabı q'omançe alya'asınbı,

şenkiyn xhinne qa'as.

17,18 Manke avxuyne insanaaşe,

Yizde doyulyne gırgıne milletbışe Rəbb t'abal ha'as.

Mançine hək'ee Rəbbee avaalacad uvhu».*

19 Mançil-allad zı eyhen, qudoora, menne milletbışikene Allahne suralqa siviyk'alanbışde g'elil-xılel qıçdyaaxaras. 20,21 Şak'leme ats'an, şenkiyle otçu gırgıne şaharbışee Şabbatne yiğıl sinagogbışee Mısayna Q'aanun qəbəqqənbı vob. Mançil-allad şas I'sa Masihılqa iman ha'ane menne milletınbışilqa kağız ok'anas ıkkan: hasre manbışe byutbışisva gyat'uyne q'urbanbışin çuru umoyxhancen, zina hıma'acen, eb g'idivkiyne həyvanaaşin çuru umoyxhancen, eb ulymooğacen.

22 Mançil-alla I'sayne ç'ak'ıne telebabışisqa, ağsaqqalaaşisqa, gırgıne imannanbışisqa cone yı'q'neençe insanar g'əvxü, Paulıkayiy Barnabayka sacigee Antakyelqa g'axuviy yugda qayle. İmannanbışe hı'rmat haa'ana Barsabbava eyhena Yahudayiy Silan g'uxoole. 23 Manbışde xılyaqa in kağız huvu, g'ıxoole:

«Çocar vooxhene şi, I'sayne ç'ak'ıne telebabışeyiy ağsaqqalaaşe Antakyel, Suriyel, Kilikiyel vooxhene menne milletbışikene imannanbışis salam g'uxoole!

24 Şak'le g'ayxhiyn, şasse sabara insanar şosqa abı, cone gafbışika vuşun vuk'ulybı alikkı'ı. Man he'eva manbışik'le şi deşdiy uvhu. 25 Mançil-allad şas gırgıng'us, sa insanıs xhinne ıkkiykın, yişde yı'q'neençe sabara insanar g'əvxü, şas geeb vukkanne Barnabaykayiy Paulıka sacigee vuşde k'anyaqa g'axuvu. 26 Manbışde q'öng'ussana con canbı yişde Xərıng'une I'sa Masihnemee qiykkın deş. 27 Şi sayib vuşde k'anyaqa Yahudayiy Silanıb g'uxoolenbı. Şi otk'uniynbı manbışe cone mizekad şolqa hixhar he'ecenva. 28 Muq'addasne Rı'hı'n yişde fıkreeqa aççuyn, vuşde gardanaqa inçile ğayrı vuççud gidiyxhesva: 29 byutbışisva gyat'uyne həyvanaaşin çuru, eb g'idivkiyne həyvanaaşin çuru umoyxhan, eb ulymooğa, zina hıma'a. Mançike şucab-şu havaaceene, şu qotkuda ha'as.

Yugba g'avcenbı!»

30 G'axuvuynbı yəqqı'lqa qığeepç'ı Antakyelqa havayk'an. Maa'ad imannanbı sacigeeqa sav'u, kağız manbışisqa qele. 31 İmannanbı axtıda qədəqqəne yik'bı helene kağızıle şadeebaxhenbı. 32 Yahudar, Silanır peyğambarar vuxha. Mançil-allad manbışe imannanbışis geed gafbı hı'ı, manbışis yik'bı hele. 33 Sabara gahna maa'ab avxuyle qiyğa, co g'axuvuynbışisqa yı'q'əlqa savk'alasva imannanbışe, xayir-düə huvu, manbı yəqqı'l haa'a. 34 [Saccu Yahuda İyerusalimeeqa siyk'al, Silanısmee maa'ar axvas ıkkiykan.]* 35 Paulıy Barnaba Antakyel avxu, geebne menne imannanbışika sacigee Rəbbin cuvab xət qa'a, Yugna Xabar hivxhar haa'a.

36 Ooğançe sabara gah ılğevç'uyle qiyğa, Paulee Barnabayk'le eyhen:

– Qudoora, şi Rəbbin cuvab hixhar hı'iynemeene şaharbışeeqa sapk'ıl, yişde imannane çocaaşil alycaaxvas, manbı nəxbiyva ats'axhxhes.

37 Barnabays ıkkiykanan Mark donana Yəhyer coka ıkkees. 38 Paulısmee Pamfiliyee co dağav'u ark'ınna, coka sacigee iş bə'əttam hidyav'una insan meer coka sacigee ıkkees ıkkiykan deş.

39 Mançil-alla manbışde yı'q'ne manimee yı'q'na gaf gyooxha, manbı sana-sang'uke cureebaxhenbı. Barnabee Markır alyart'u, lotk'eeqa gyu'ur, Kiprıne suralqa ayk'an. 40 Pauleeme Silan g'əyxə. İmannanbışe Rəbbike manbışis xayir-düə hooqqa. 41 Paul Suriyeliy Kilikiyel iykır, imannanbışis yik'bı hele.