1 Şak'le İtaliyeeqa vüqqəsva uvhumee, Paulıy mebın avquynbı «İmperatorne alayeençe» Yuli donane vəşing'une xərıng'usqa qoole. 2 Şi Edremit eyhene şahareençe qadıyne gameeqa gyuv'ur. Man gamı Asiyeyne cigabışeeqa əlyhəə ıxha. Şakasana Makedoniyeyne Salonik eyhene şaharee eyxhena Aristarxır vornaniy.

3 Qinne yiğıl Sidon eyhene şahareeqa hipxhır. Paulıqa yugra eyxhene Yuli'ee, mang'usqa cune hambazaaşisqa hark'ın, ıkkanan kar alyaat'as haysaran. 4 Mançeb şi gamıykacab apk'ın. Mıts aq'veeqa qiviyxharva, şi Kipr eyhene adayne mıts qüdööne surale ılğeepç'ı, maqa apk'ın. 5 Deryahıncab şi Kilikiyayiy Pamfiliya ılğevç'u, Likiyeyne Mira şahareeqa qabı. 6 Vəşing'une xərıng'vee mançe İtaliyeeqa əlyhəən İskandariyeençe gamı t'abal hı'ı, şi maqa gyav'u. 7 Xılece yiğbına dağamiyvalika, k'ılyba-k'ılyba şi ögeeqa apk'ın, Knid eyhene şaharısqa k'ane qeepxha. Mıtsın şas vukkanne suralqa əlyhəəs hidyaasar vuxhayke, şi Krit eyhene adaysse Salmonne surale apk'ın. 8 Kritne mıgleke dağamiyvalika ılğeepç'ı, şi qabı hipxhıriynbı Kritılyne Laseya eyhene şaharne k'anene Micagın Limanbı eyhene cigeeqa.

9 Şi məxüb geeb gah avaak'an hav'u, tsuvuliyn siv aqqaqqan yiğıd* ılğeç'u ıxha. Seniyne mane gahıl deryahın apk'ıniy yı'q' qıxha. Paulee manbışis xabar huvu, 10 eyhen:

– Hambazar, zak'le g'ece vod, həşde şi yəqqı'lqa qığeepç'ee, yukukiy gamıykcad deş, yişde canbışilqab xəbna ver ables.

11 Vəşing'une xərıng'veeme Paulne cuvabıl k'ırı alixhxhesde cigee, gamı he'ekkang'uneyiy gamıyne iyesiyne cuvabıl k'ırı iliyxhe. 12 Man liman q'ı'dı'm alğahasın xhinne deşiy. Mançil-allab gameebınbışde gellesınbışe eyhen:

– Vəvxeene, inçe sık'ılbab şaqana apk'ın, Finikseeqa hipxhır, q'ı'dı'm maa'ad alğahas.

Finiks Kritilin, canubılqa-garbılqa, şimal-garbılqa ilyakkan liman ıxha.

13 Canubıle sık'ınna mıts aa'a gibğılmee, cos vukkanna gah qabınava, gamıçeeşe yakor xhineençe alqayhen. Kritne mıgleke-alla gamıyka ılğeebaç'e. 14 Ooğançe geeb gah ılğooç'e deş, adayle şimal-şargna q'ıfrım haa'ana mıts g'ooxa. 15 Q'ıfrımeeqa gitxhuyne gamıysse mıts qööne suralqa əlyhəəs əxə deş. Manke şicab-şi mırtbışde xılyaqa quvu, mıtsınıb şi inyaqa-şaqa g'uvooxhar hav'uynbı. 16 Şi Qavda eyhene adayne mıts deşde suralqa gamıyka qabı. Şi gameedın lotk'a maa'ad geed dağamda g'attixhan hı'ı. 17 Man lotk'a alqavhumee, gamıçeeşe gamıyn bortbı kanatbışika iyt'alanbı. Manbı qəvəyq'ən vuxha, gamı xhyan k'ıldanane Liviyeys delesne cigee g'umbışik qaçatxır, haq'varasın. Mançil-alla manbışe parusbı avqa g'ekka, gamıd mıtsın nyaqayiy qa'a, maqa ayk'an. 18 Q'ıfrımın şi inyaqa-şaqa yugba g'uvopxhuriynbı. Mançil-alla qinne yiğıl gameedın yuk dağa'a giviyğal. 19 Xhebıd'esde yiğıys cone xıleka manbışe gamıyn karbı dağa'a. 20 Xılece yiğbına verığıb, xənebıd g'acu deş. Q'ıfrım manimee geeb avxu, mançike g'attivxhanasda şaqa umud vuxha deş.

21 İnsanaaşe geed gahna otxhuniy oyxhan deş. Manke Paul insanaaşine yı'q'nee ulyorzul eyhen:

– Hambazar, şu zal k'ırı alixhxhı, Kriteençe qığdeepç'inxhiy, şos inimeen ziyanıd, şolqa inimeena verıb ables deşdiy. 22 Həşde yik'eka vuxhe, vuşda nenacar qik'as deş, saccu gamıykın ixhes. 23 İne xəmde zas, zı ı'bəədat ha'ane Allahın malaaik gyagu. 24 Mang'vee zak'le uvhiyn: «Paul, qı'məyq'ən, ğu imperatorne ögilqa qığeç'es ıkkan. Vaka sacigeebın gameebın gırgınbı Allahee yiğnemee g'attivxhan haa'asınbı». 25 Hambazar, mançil-allab yik'eka vuxhe! Zı Allahıl inyam ha'an, gırgın zak'le uvhiyn xhinne ixhes. 26 Gamı adabışde sançeeqa g'uvdyotxhur axvas deş.

27 Yits'ıyoq'ab'esda (14) xəmniy vob. Şi Adriatna eyhene deryahee nyaqa qabiy əlyhəən. Xəm sura vooxhemee, gamıçeeşik'le xhyanıne mıgleqqa hiviyxharva ats'axhxhen. 28 Xhinena k'oraalla ulyoopkumee, yoqts'al (40) metrılqa ələə ıxhay g'ece. Sık'ılba apk'ın, meed ulyoodakken, manked xhebts'al (30) metrılqa ələə ıxhay g'ece. 29 G'anzbışilek'ena qipxhıriyle qəpq'ı'n, gamıçeeşe yoq'ulle yakor xhineeqa gyaqqı, miç'eediy qixhecenva düəbı ha'a. 30 Gamıçeeşis gameençe heepxas vukkiykan, manbışe ögiyle yakor g'ekkava horbı hı'ı, lotk'a xhineeqa gyaqqas ıkkiykan. 31 Pauleeme vəşing'une xərıng'uk'leyiy eskeraaşik'le eyhen:

– Man insanar gamee idyavxee, şosse g'attivxhanas vəəxəs deş.

32 Mançile qiyğa eskeraaşe lotk'a ayt'ılıyn kanatbı gyatxı, man xhineeqa g'a'adaççe.

33 Miç'eed qixhesse, Paulee insanar otxhuniy oxhneva mizel avqaaqqa:

– Yits'ıyoq'vad (14) yiğ eyxhe, şu gozet ha'an, kar udyotxhanan. 34 Mançil-allab zı şu mizel avqaaqqa, sa ghaledın kar oxhneva. Man vuşde g'attipxhıniynemee ıkkan. Vuşde neng'unecab vuk'lele sa ç'ər g'a'avxhas deş.

35 Paulee man uvhuyle qiyğa, xılyaqa gıney alyaat'u, gırgıng'une ögil Allahıs şukur hav'u, hatq'ur oyxhanan. 36 Mançike gırgıng'un yik'bı cigeeqa qadı, karbı oyxhan giviyğal. 37 Gameeab şi gırgıba q'öd vəşşe yights'ale yixhıyre (276) insanniy vob. 38 Gırgınbı avts'uyle qiyğa, suk deryaheeqa haç'aa'a, gamı sibık qixhecenva.

39 Verığna ul üvxümee, gamıçeeşik'le xhyan deşin dyats'an ciga g'ece. Manbışik'le g'acuyn ciga g'umnan deryahın mıgıl eyxhe. Manbışde fıkreençe, əxeene, gamı maqa qığavhiy ılğeç'e. 40 Yakorbı g'ats'atk'un, manbı deryahee g'alya'a. Qiyğa manbışe gamı he'ekkane karbışik avt'ılıyn tü'ı'bı g'ayşu, ögiylin parus ooqa qı'ı, gamı deryahne mıgleqqana qa'as ıkkiykın. 41 Gamı aq'valyne cigee g'umul oğa ulyoyzar. Gamıyn quş g'umeeqa ikkeç'u, ı'ğı'ykar deş. Gamıyne yı'q'əlyne cigaysmee mırtar qitxhır, man haq'var ha'a giyğal. 42 Avquynbı deryahne mıgleqqa hipxhır, himeebaxacenva, eskeraaşis manbı gyapt'as vukkiykan. 43 Paul g'attixhana'as ıkkanne vəşing'une xərıng'vee, eskeraaşisqa man ha'as haysar deş. Mang'vee əmr haa'a, ts'eppa xhyanee üzü ha'as vəəxənbı xhineeqa g'opk'ul, xhineençe qığeepç'ecenva. 44 Avxuynbıb gamı hatq'ur axuyne q'uvabışiliy menne karbışil ooniy xhineençe qığeepç'es vukkan. Məxüb gırgınbı deryaheençe gattipxhıniynbı.